Toyasha le anto akina—Lo sambishaka aha la shɔnɔdi
1 Lo ɛnɛlɔ kɛmɔtshi, ɔpɔstɔlɔ Joani akɛnyi ondjelo ɔmɔtshi atafumbɔ l’olongo ndo atasambisha anto wa lo “wedja tshe ndu wauhu tshe ndu eteketa tshe, ndu antu tshe” lokumu l’ɔlɔlɔ la pondjo. (Eny. 14:6) Onde sho mbokoyaka ondjelo lo sambishaka aha la shɔnɔdi? Aha la mbeya, sho koka ndjokanɛ anto akina kɔlɔ. Dionga diaso otsha le anto wahomana la so koka monga la shɛngiya lo yoho yâsambishaso lokumu l’ɔlɔlɔ. Ɔnkɔnɛ, etena kasambishaso anto w’oma lo ahole wotshikitanyi, sho pombaka ndjashaka la ngandji ka mɛtɛ le wɔ.
2 Tɔsɛdingole ɛtshi kaso ka nkɛtɛ: Onde ekɔ angɛndangɛnda kana ase dawo amɔtshi wele lo ɛtshi kaso ka nkɛtɛ? Anto wa ngasɔ hawoleke mbidjama yimba. Tɔshi tɛdikɔ ta ntshɔ dia toyanga weho w’anto asɔ ndo toyange dia mbaeya dimɛna. Naa ehomba awɔ, awui wayashawɔ, awui walangawɔ, awui wahawalange, ndo naa ekiyanu awɔ? Toyange dia mbɔtɔnganyiya losango la Diolelo la kɛnɛ kayotɛna le wɔ. (1 Kor. 9:19-23) L’ɛnyɛlɔ ka ɔpɔstɔlɔ Paulo, sho pombaka ndjaoka dia tekɔ la ɔkɛndɛ wa sambisha onto tshɛ la lo ɛtshi kaso ka nkɛtɛ lokumu l’ɔlɔlɔ, mbidja ndo wanɛ w’oma lo wedja ekina wele la mbekelo nkina, watɛkɛta ɔtɛkɛta okina, kana wele akanga w’ɛngɔnyi efula.—Romo 1:14.
3 Ko ngande wakokaso sambisha onto latɛkɛta ɔtɛkɛta okina? Tokambe dimɛna la biukubuku Une bonne nouvelle pour des gens de toutes nations. Sho koka kamba nto la traktɛ kana tobukubuku tele lo ɛtɛkɛta waleka tɛkɛtama lo ɛtshi kaso ka nkɛtɛ. (Enda lo Olimu aso wa Diolelo wa Ngɔndɔ k’esambele 2003, lɛkɛ 4, od. 2-3.) Lâdiko dia lâsɔ, apandjudi amɔtshi wakadje welo dia mbeka woho wa mbisha onto mɔyɔ ndo sawola kânga yema tshitshɛ l’anto lo ɛtɛkɛta ekina. Tena efula anto ngɛnangɛnaka dia mboka onto atɛkɛta la wɔ kânga yema tshitshɛ lo ɔtɛkɛta awɔ wa lôtɔ ndo kɛsɔ koka kotola anto dia nonga lokumu l’ɔlɔlɔ.
4 Tokoya Jehowa: Lo sambishaka anto w’oma lo ahole wotshikitanyi, sho mbokoyaka Jehowa, Nzambi kaso kaha la shɔnɔdi ‘kalanga dia weho w’anto tshɛ shimbamɛ ndo koma lo ewo ka mɛtɛ.’—1 Tim. 2:3, 4.