Tekɔ lo mbitola diangɔ diakonɛma wolo
1 Ambeta ɛnɔnyi nkama wele Satana ekɔ lo kamba la wetshelo wa kashi ndo la lokeso dia minganyiya anto efula. Nde ekɔ lo dianganya wetshelo wele oko losato l’osanto, anima havu ndo wetshelo wa ifɛrnɔ. Nde kasala di’anto mbuta ɔnɛ Otungi kema ndo ɔnɛ Bible kosambiyama oma le Nzambi. Shɔnɔdi ya lokoho la demba ndo ngandji k’otamanya ka wodja ekɔ wekamu ekina wadjɛnde anto diaha vɔ mbetawɔ akambo wa mɛtɛ. (2 Kor. 4:4) Ngande wakokaso mbitola dietawɔ diambonɛma wolo sɔ?—2 Kor. 10:4, 5.
2 Todje yimba lo nsaki yawɔ: Wetshelo wendana l’ɔtɛmwɛlɔ wakawalakanya anto ɔnɛ wekɔ mɛtɛ mendanaka mbala efula la nsaki y’onto y’oma k’ɛse otema. Wakalakanya anto amɔtshi wetshelo wa kashi oma ko tɔkɛndakɛnda tawɔ. Dia sho kimanyiya anto wa ngasɔ, sho pombaka sawola la wɔ lo yoho yɛnya ɔnɛ tekɔ lo nɛmiya dietawɔ diawɔ.—1 Pet. 3:15.
3 Sho kokaka nɛmiya anto asɔ lo mbasha diaaso dia vɔ tolembetshiya dietawɔ diawɔ ndo ɛkɔkɔ wâtshutshuya dia vɔ mbetawɔ. (Jak. 1:19) Ondo vɔ mbetawɔka ɔnɛ anima havu nɛ dia wakavusha wakiwɔ wa ngandji ndo wekɔ lo nomɔlomɔ dia mbaɛna nto. Kana ondo vɔ salaka waa fɛtɛ nɛ dia vɔ ngɛnangɛnaka kondja diaaso dia monga kâmɛ la ase nkumbo yawɔ. Mbahokamɛ etena katolembetshiyawɔ dietawɔ diawɔ ayotokimanyiya dia sho shihodia nsaki yawɔ ndo mbasha ekadimwelo w’eshika.—Tuk. 16:23.
4 Tokoya ɛnyɛlɔ ka Yeso: Yeso akatotshikɛ ɛnyɛlɔ k’ɔlɔlɔ etena kakandakadimolaka ambola wakawoke ombewi ɔmɔtshi w’Ɛlɛmbɛ. Yeso kombotɛ kɛnɛ kakandahombe sala nɛ dia ondo pami kakɔ ototona dui diakɔ l’ɔtɛ wakandɔsaka dietawɔ diande la nɛmɔ efula. Koko Yeso akakambe la Afundelo, akɔlɔmbɛ dia nde mbotɛ tokanyi tande ndo akokimanyiya dia kana yimba l’ekimanyielo ka ɛnyɛlɔ.—Luka 10:25-37.
5 Ɔtɛkɛta waki Nzambi kokaka kimanyiya anto dia vɔ tshika tokanyi ta kashi tele lawɔ ta l’ɔtɛmwɛlɔ. (Heb. 4:12) Naka sho nembetshiya ampokami aso akambo wa mɛtɛ la solo dia lotutsha tshɛ, kete sho mbeyaka mbakimanyiya dia vɔ tshika wetshelo wa kashi ko mbetawɔ akambo wa mɛtɛ wakoka mbatshungola.—Joa. 8:32.