Ekadimwelo lo ambola anyu
◼ Awui akɔna wahomba atshukanyi kɛtshanya la dikumanyi naka vɔ nangaka kamba la Mbalasa ka Diolelo dia sala sawo dia diwala?
Awala wasalema lo ndjela atɔndɔ wa lo Bible tombolaka Jehowa. Dui sɔ diekɔ mɛtɛ lo kɛnɛ kendana la asawo w’awala wasalema lo Mbalasa ka Diolelo, nɛ dia anto mɛnaka dia awui tshɛ wasalema lo Mbalasa ka Diolelo mendanaka la okongamelo aso. Ɔnkɔnɛ, dia ‘awui tshɛ salema dimɛna ndo aha l’ofutanu,’ kokaka dia dikumanyi dia l’etshumanelo sawola la atshukanyi etena kalɔmbawɔ dia kamba la Mbalasa ka Diolelo dia sala sawo dia diwala.—1 Kor. 14:40.
Atshukanyi wakombola kamba la Mbalasa ka Diolelo dia sala sawo dia diwala pombaka fundɛ komite k’olimu k’etshumanelo dia nɔmba Mbalasa ka Diolelo. Vɔ pombaka funda mukanda akɔ nshi efula la ntondo ndo mɛnya datɛ ndo wonya wayowolanga kamba la Mbalasa ka Diolelo. Vɔ pombaka mbohɔka dia dikumanyi hawototshikitanya ekongelo ka nsanganya l’ɔtɛ wa sawo diawɔ dia diwala. Ndo nto, atshukanyi pombaka monga anto wele la lonyuma la dimɛna, mbuta ate wasɛna lo yoho yɔtɔnɛ la atɔndɔ wa lo Bible ndo la ɛlɛmbɛ wosembwe waki Jehowa.
Dia ndjashikikɛ dia diwala diawɔ diayotombola Nzambi kaso ka nɛmɔ, atshukanyi pombaka kɛtshanya la komite k’olimu ka l’etshumanelo awui wendana la diwala diawɔ la ntondo ka vɔ mbashikikɛ. Kânga mbele dikumanyi hawotoyanga dia tshutshuya atshukanyi dia vɔ sala kɛnɛ kalangawɔ, atshukanyi pombaka mbetawɔ kanyi ya dikumanyi lo akambo amɔtshi. Paka mishiki w’oma lo Totombole Jehowa l’esambo aso kana mishiki w’oma lɔkɔ wakadjama l’eshika mbahomba pomama. Ɔlɛngɛlɔ tshɛ kana otshikitanyelo w’ekala wa lo Mbalasa ka Diolelo pombaka mbetawɔma oma le dikumanyi. Naka nyayokamba la amundji wa foto kana la waa kamɛra, anto asɔ hawohombe nanya nɛmɔ diele la diaaso sɔ. Dikumanyi mbeyaka mbetawɔ dia wohwelo w’awui amɔtshi salema lo Mbalasa ka Diolelo aha la futanya ekongelo ka nsanganya. Hawohombe panɛ akatshi wa leeta lo dibaya diahanɛwɔ waewoyelo. Koko, dikumanyi mbeyaka mbisha diewoyelo dia lo tshena pe lo Losanganya l’olimu dia mbewoya etshumanelo dia sawo dia diwala diayosalema lo Mbalasa ka Diolelo.
Kânga mbele ndoko ɔlɛmbɛ walɔmba dia anto tshɛ wayokamba la atshukanyi monga anto wambobatizama, hatonga dimɛna dia kamba la anto wele la yoho ya lɔsɛnɔ yahɔtɔnɛ la atɔndɔ wa lo Bible kana wanɛ wavɔ anto tshɔdia dia lɔkɛwɔ lawɔ. L’ahole wele dikumanyi, ekumanyi kɛmɔtshi mbahomba mbisha sawo dia diwala. Lam’ele dikumanyi mbele embetsha wa tomanamana wa Ɔtɛkɛta wa Nzambi, vɔ wekɔ l’akoka w’efula wa tɔtɔmiya atɔndɔ wa lo Bible wendana la diaaso di’ohomba sɔ.—1 Tim. 3:2.
Lam’ele diwala mendanaka nto la ekumanyi kayosha sawo, atshukanyi pombaka mbêwoya awui tshɛ wendana la diwala diawɔ la ntondo. Nde ayosawola la atshukanyi dia mbeya lɔkɛwɔ laki lawɔ etena kakawembwanaka ndo vɔ pombaka mbotɛ kɛnɛ kele mɛtɛ. Naka olonganyi ɔmɔtshi ambotshukanaka ntondo, ekumanyi kasha sawo pombaka mɛna djembetelo yɛnya dia lo ndjela Afundelo ndo ɛlɛmbɛ wa lɛɛta, nde kokaka tshuka kana tshukama nto. (Mat. 19:9) Kɛsɔ nembetshiyaka dia nde pombaka mɛnya ekumanyi mukanda w’odiakelo wa diwala.
Naka atshukanyi sawola dimɛna ndo kamba kâmɛ la dikumanyi, kete diwala diawɔ diayonga diaaso di’ɔngɛnɔngɛnɔ le anto tshɛ.—Tuk. 15:22; Heb. 13:17.