Kakɔna kasalema lo diwala di’Ɛmɛnyi wa Jehowa?

Awala w’Ɛmɛnyi wa Jehowa mongaka mbala efula la sɛlɛmɔnyi kɛmɔtshi kaha kawotake ndo sawo di’oma lo Bible mbishamaka lo tshena pe. Sɛlɛmɔnyi kɛsɔ mbeyaka ndjelana la yema ya fɛtɛ ndo yema ya mbo ya ndɛ mongaka lo fɛtɛ kakɔ.a Yeso aki lo fɛtɛ kɛmɔtshi kakasalema la Kana l’etatelo k’olimu ande.​—Joani 2:1-11.

• Ngande wasalema sɛlɛmonyi ka diwala?

• Lende asala Ɛmɛnyi wa Jehowa awala awɔ?

• Waa wakoka monga lawɔ?

• Ngande wahomba anto wakelame ndɔta?

• Onde wanɛ wakelame ndjaaka la weshasha wa ndjosha atshukanyi?

• Onde anto mbedjaka tɔvɛrɛ ta wanu l’olongo ko mbuta ɔnɛ à la santé?

• Onde wanɛ wakaye lo fɛtɛ mbokɛka atshukanyi eponga lo demba?

• Onde mbo ya ndɛ ndo wanu mongaka l’awala asɔ?

• Onde mishiki wayonga ndo anto wayɔkɛnya lokombe?

• Onde Ɛmɛnyi wa Jehowa salaka fɛtɛ ka lushi lakawatshukana?

Ngande wasalema sɛlɛmɔnyi ka diwala?

Etena koleki ohomba ele etena kashama sawo dia diwala dia minitɛ oko 30 oma le Ɔmɛnyi wa Jehowa ɔmɔtshi. Sawo dia la wangasanu sɔ vɔ ditɔlɔnganyaka le atshukanyi ndo diɔ diekɔ l’alako w’oma lo Bible watshawɔ atshukanyi dia vɔ monga la diwala diatshikala edja, diele la ngandji ndo diele l’ɔngɛnɔngɛnɔ.​—Ɛfɛsɔ 5:33.

Lo wedja efula, ewandji wa lɛɛta mbishaka Ɛmɛnyi wa Jehowa lotshungɔ la vɔ nsala sɛlɛmɔnyi ka diwala. Etena kɛsɔ, otsha l’ekomelo ka sawo diawɔ, atshukanyi salaka alɔkɔlɔkɔ. Ndo mbala mɔtshi vɔ ndɔtshanaka mpitɛ. Ɔmɛnyi wa Jehowa walɔmbɔla sɛlɛmɔnyi kɛsɔ mbutaka dia vɔ waya wadi l’omi.

Lo wedja ekina, ɛlɛmbɔ nɔmbaka di’atshukanyi ntshukana lo biro k’ɔnɛnɛ wa lɛɛta. Atshukanyi salaka dui sɔ yema tshitshɛ la ntondo ka sawo dia diwala. Naka otshuki la otshukami kotshika alɔkɔlɔ la ntondo k’ɔnɛnɛ wa lɛɛta, kete vɔ kokaka nsala dui sɔ l’ekomelo ka sawo dia diwala. Ko naka vɔ wakatshike alɔkɔlɔkɔ la ntondo k’ɔnɛnɛ wa lɛɛta, kete vɔ mbeyaka kalolɛ alɔkɔlɔkɔ akɔ lo nkamba l’ɛtɛkɛta wɛnya dia wakashile disala, koko dikalolɛ mbadikalolɛwɔ. Sawo komɛka la dɔmbɛlɔ dia nɔmba Nzambi dia nde ntshɔkɔla atshukanyi w’eyoyo asɔ.

Lende asala Ɛmɛnyi wa Jehowa awala awɔ?

Ɛmɛnyi wa Jehowa efula salaka sɛlɛmɔnyi k’awala awɔ lo Mbalasa ka Diolelo, naka kɛmɔtshi kekɔ.b Naka atshukanyi wayosala yema ya fɛtɛ oma l’ɔkɔngɔ, vɔ sɔnaka dihole dikina dia nsala fɛtɛ kɛsɔ, koko aha lo mbalasa.

Waa wakoka monga lawɔ?

Lo sɛlɛmɔnyi kasalema lo Mbalasa ka Diolelo, onto tshɛ koka monga lawɔ, oyadi Ɛmɛnyi wa Jehowa kana wanɛ wele bu Ɛmɛnyi wa Jehowa. Ko naka atshukanyi wayosala yema ya fɛtɛ, kete mbasɔna wanɛ wayowolanga mbelɛ.

Ngande wahomba anto wakelame ndɔta?

Kaanga mbele lo sɛlɛmɔnyi ka diwala kasalema lo Mbalasa ka Diolelo hawɔlɔmbɛ anto dia monga la woho ɔmɔtshi w’ɔlɔta shikaa, Ɛmɛnyi wa Jehowa salaka la wolo dia ndjela atɔndɔ wa lo Bible walɔmba dia ndɔta la wɛdimo ndo la dilɛmiɛlɔ. Vɔ ngɛnangɛnaka di’anto akina nsala woho akɔ waamɛ. (1 Timɔte 2:9) Lo mɛtɛ, atɔndɔ asɔ mendanaka ndo la fɛtɛ, naka atshukanyi wambɔsa yɛdikɔ ya nsala yema ya fɛtɛ.

Onde wanɛ wakelame ndjaaka la weshasha wa ndjosha atshukanyi?

Bible kekekeshaka anto dia monga la lokaho. (Osambo 37:21) Ɛmɛnyi wa Jehowa mongaka l’ɔngɛnɔngɛnɔ etena kakahawɔ ndo kalongolawɔ weshasha. (Luka 6:38) Koko Ɛmɛnyi wa Jehowa mbewɔka dia nɔmba weshasha kana mbewoya la ntondo k’anto nkombo y’anto wowasha weshasha. (Mateo 6:3, 4; 2 Kɔrtɛtɔ 9:7; 1 Petero 3:8) Totshelo ta ngasɔ hatɔtɔnɛ l’Afundelo ndo koka nkonya wanɛ wakaye lo fɛtɛ diaha vɔ ndjaoka dimɛna.

Onde anto mbedjaka tɔvɛrɛ ta wanu l’olongo ko mbuta ɔnɛ à la santé?

Ndooko. Ɛmɛnyi wa Jehowa hawotanɛ ɔnɛ à la santé, nɛ dia ndja oma lo mbekelo y’ɛtɛmwɛlɔ wa kashi.c Ɛmɛnyi wa Jehowa kombolɛka atshukanyi ɛtshɔkɔ lo toho tokina.

Onde wanɛ wakaye lo fɛtɛ mbokɛka atshukanyi eponga lo demba?

Ndooko. L’ahole amɔtshi, anto mbokɛka atshukanyi w’eyoyo eponga kana diangɔ dikina dia woho ɔsɔ. Vɔ fɔnyaka dia dui sɔ diayowahomuya lokolo l’ɔlɔ, diayowasha ɔngɛnɔngɛnɔ ndo lɔsɛnɔ l’otale. Koko Ɛmɛnyi wa Jehowa mbewɔka ditshelo dia dikanyiyakanyiya. Dui sɔ mendanaka ndo la kombolɛ onto shansɛ, tshelo yele yɔ hayɔtɔnɛ l’atɔndɔ wa lo Bible.​—Isaya 65:11.

Onde mbo ya ndɛ ndo wanu wayonga?

Lo sɛlɛmɔnyi ka diwala kasalema lo Mbalasa ka Diolelo, hawosha anto mbo ya ndɛ ndo wanu. Atshukanyi amɔtshi sɔnaka dia nsala yema ya fɛtɛ l’ɔkɔngɔ wa sawo dia diwala ndo lɛsɔ, vɔ mbeyaka mbisha anto mbo ya ndɛ la yema ya wanu. (Ondaki 9:7) Naka wambɔsa yɛdikɔ ya mbisha anto wanu, vɔ ndjashikikɛka dia wanu wayonga lo yɛdikɔ yakoka ndo paka wanɛ wele l’ɛnɔnyi wetawɔ lɛɛta di’onto nnɔ wanu mbahomba nnɔ.​—Luka 21:34; Rɔmɔ 13:1, 13.

Onde mishiki wayonga ndo anto wayɔkɛnya lokombe?

Naka atshukanyi wayosala fɛtɛ, kete vɔ mbeyaka mbɔsa yɛdikɔ dia mishiki monga ndo di’anto nnɔ lokombe. (Ondaki 3:4) Vɔ pombaka nsɔna mishiki wa dimɛna, koko mishiki ntshikitana lo ndjela onto l’onto ndo lo ndjela dihole la dihole. Lo sɛlɛmɔnyi ka lo Mbalasa ka Diolelo, mishiki wohikami l’Afundelo mbadjama.

Onde Ɛmɛnyi wa Jehowa salaka fɛtɛ ka lushi lakawatshukana?

Lam’ele atɔndɔ wa lo hawɛnya dia ekɔ kɔlɔ kana bu kɔlɔ anto nsala fɛtɛ ka lushi lakawatshukana, atshukanyi vɔamɛ mbɔsa yɛdikɔ ya kana vɔ kokaka nsala fɛtɛ ka lushi lawɔ la diwala. Naka vɔ wambɔsa yɛdikɔ ya nsala dui sɔ, vɔ koka nsala dui sɔ lo vɔamɛ kana vɔ l’angɛnyi awɔ ndo la nkumbo kawɔ.