SAWO DIA WEKELO 40
OSAMBO 111 Ɛkɔkɔ wa monga l’ɔngɛnɔngɛnɔ
Jehowa kele “ɔngɛnɔngɛnɔ [aso] w’efula”
“ Dimi layoya . . . le Nzambi, lele ɔngɛnɔngɛnɔ ami w’efula.”—OS. 43:4.
KƐNƐ KAYOTEKA
Sawo nɛ diayotokimanyiya dia nshihodia kɛnɛ kakoka toshishɛ ɔngɛnɔngɛnɔ aso ndo woho wakokaso nyomokondja ɔngɛnɔngɛnɔ akɔ naka tambowoshisha.
1-2. a) Dui diakɔna diahomana l’anto efula ɛlɔ kɛnɛ? b) Kakɔna kayotɔsɛdingola lo sawo nɛ?
ƐLƆ kɛnɛ, anto efula salaka kɛnɛ tshɛ kakowɔ nsala dia monga l’ɔngɛnɔngɛnɔ. Koko kaanga mbasalawɔ ngasɔ, vɔ keema l’ɔngɛnɔngɛnɔ wa mɛtɛ. Anto efula wekɔ lo diɛnɛ l’ekiyanu ndo la nsaki ka ndjaoka opoko. Ekambi wa Jehowa vɔ lawɔ ndjaokaka woho akɔ waamɛ. Lam’ele tekɔ lo nsɛna “lo nshi y’ekomelo,” sho nongamɛka dia tayohomana l’akambo ndo la nsaki ya “wolo mbikikɛ.”—2 Tim. 3:1.
2 Lo sawo nɛ, tayɔsɛdingola akambo wakoka toshishɛ ɔngɛnɔngɛnɔ aso ndo woho wakokaso nyomokondja ɔngɛnɔngɛnɔ akɔ naka tambowoshisha. Koko ntondotondo, sho pombaka nshihodia ɔnɛ lele Kiɔkɔ y’ɔngɛnɔngɛnɔ wa mɛtɛ.
ƆNƐ LELE KIƆKƆ Y’ƆNGƐNƆNGƐNƆ WA MƐTƐ
3. Kakɔna katetsha etongelo lo dikambo dia Jehowa? (Enda ndo esato.)
3 Jehowa okongaka nshi tshɛ l’ɔngɛnɔngɛnɔ. Ndo nde nangaka dia sho monga l’ɔngɛnɔngɛnɔ. Diakɔ diele, bu dui dia diambo lo woho wɛnama ɔngɛnɔngɛnɔ ande lo diangɔ diakandatonge; ɛnyɛlɔ, nkɛtɛ kaso k’olangala, alangi w’amɛna wa weho la weho, woho wakɛnya waa nyama ndo mbo ya ndɛ efula ya diɛndjɛ. Nzambi tolangaka mɛtɛ ndo nde nangaka dia sho ngɛnangɛna la lɔsɛnɔ!
Baby elephant: Image © Romi Gamit/Shutterstock; penguin chicks: Vladimir Seliverstov/500px via Getty Images; baby goats: Rita Kochmarjova/stock.adobe.com; two dolphins: georgeclerk/E+ via Getty Images
Woho wakɛnya nyama toholaka dia Jehowa ekɔ Nzambi k’ɔngɛnɔngɛnɔ (Enda odingɔ 3)
4. a) Lande na katetemala Jehowa nama ɔngɛnɔngɛnɔ ande kaanga etena kɛnande anto wasowa? b) Woshasha akɔna watosha Jehowa? (Osambo 16:11)
4 Kaanga mbele Jehowa ekɔ “Nzambi k’ɔngɛnɔngɛnɔ,” nde mɛnaka awui washa paa l’asolo ndo woho wasowa anto l’andja w’otondo. (1 Tim. 1:11) Koko nde kombetawɔ di’awui asɔ nkitshakitsha ɔngɛnɔngɛnɔ ande. Nde mbeyaka di’asui tshɛ wekɔ lo tshanda mɔtshi tsho ndo ndamɛ akashikikɛ etena kayoweta loowe. Ndo nde ekɔ lo mbikikɛ la solo dia lotutsha tshɛ polo l’etena kayondonya lo pondjo awui watokiyanya ndo asui. Koko l’etena kɛnɛ, Jehowa nshihodiaka awui watɛnya paa ndo nde nangaka tokimanyiya. Ngande watokimanyiyande? Dui dimɔtshi ele, nde toshaka ɔngɛnɔngɛnɔ oko woshasha. (Adia Osambo 16:11.) Tende woho wakandasha Ɔnande Yeso woshasha ɔsɔ.
5-6. Lande na kele Yeso l’ɔngɛnɔngɛnɔ?
5 Yeso mbele etongami koleki monga l’ɔngɛnɔngɛnɔ lo ditongami tshɛ dia Jehowa. Lande na? Tɔsɛdingole ɛkɔkɔ ehende. 1) “Nde ekɔ efanelo ka Nzambi kahɛnama” ndo nde kɛnɛmɔlaka lonto laki She lo yoho ya kokele l’oseka dui tshɛ. (Kɔl. 1:15.) 2) Yeso aketsha etena k’otale efula la She lele Kiɔkɔ y’ɔngɛnɔngɛnɔ.
6 Yeso akatanaka ɔngɛnɔngɛnɔ lo nsala kɛnɛ tshɛ kakɔlɔmbaka She dia nsala. (Tok. 8:30, 31; Jni. 8:29) Etombelo waki la kɔlamelo yande ele, nde akalangema ndo aketawɔma le Jehowa.—Mat. 3:17.
7. Ngande wakokaso nkondja ɔngɛnɔngɛnɔ wa mɛtɛ?
7 Sho lawɔ koka nkondja ɔngɛnɔngɛnɔ wa mɛtɛ lo ndjasukanya la Jehowa ɔnɛ lele Kiɔkɔ y’ɔngɛnɔngɛnɔ. Lam’atataleke mbetsha wenya dia mbeka akambo wendana la Jehowa ndo dia mbookoya, mbayototalekaka monga l’ɔngɛnɔngɛnɔ. Tayokondja nto ɔngɛnɔngɛnɔ lo nsala lolango laki Nzambi ndo lo mbeya dia sho mbetawɔmaka le nde.a (Os. 33:12) Ko kakɔna kayotosala naka lo tena dimɔtshi toyaoka dia tamboshisha ɔngɛnɔngɛnɔ lo tshanda mɔtshi kana l’etena k’otale? Onde kɛsɔ mɛnyaka dia hatoyetawɔma le Nzambi? Ndooko! Sho tekɔ anto wele keema kokele ndo lo tena dimɔtshi sho diɛnɛka la asui, l’ekiyanu ndo l’ɔkɔmwɛlɔ. Koko Jehowa shihodiaka dui sɔ. (Os. 103:14) Nyɛsɔ tende awui wakoka toshishɛ ɔngɛnɔngɛnɔ aso ndo woho wakokaso nyomonga nto l’ɔngɛnɔngɛnɔ.
TETAWƆKE DI’ƐNGƆ KƐMƆTSHI KOSHISHƐ ƆNGƐNƆNGƐNƆ AYƐ
8. Ngande wakoka ekakatanu wa lo lɔsɛnɔ monga la shɛngiya le so?
8 Dui dia 1: Ekakatanu wa lo lɔsɛnɔ. Onde wɛ ekɔ lo diɛnɛ l’etombelo w’oma lo ɛhɛnyɔhɛnyɔ, mpokoso y’oma lo diangɔ diakatongama, wola, hemɔ kana lotshundu l’osombe? Sho koka nshisha esadi eto ɔngɛnɔngɛnɔ aso la ntondo k’ekakatanu wa ngasɔ, ndjekoleko wɛnɛ weso bu l’akoka wa nkandola. Diakɔ diashikikɛ Bible ɔnɛ: “Otema wele la lɔkɔnyɔ kɔmɔlaka yimba.” (Tok. 15:13) Babis, ekumanyi kakavusha ɔnango ndo ambutshi ande wakɔ ahende lam’asa ɛnɔnyi ɛnɛi eto, mbutaka ate: “Lakayaokaka opoko ndo ndooko onto lakakoke kimanyiyami. Lo tena dimɔtshi, lakakɔmɔka nɛ dia laki l’awui efula wa nsala ndo dimi kokoka mbetsha wenya efula l’ambutshi ami ndo l’ɔnangɛmi la ntondo ka vɔ mvɔ.” Ekakatanu wa lo lɔsɛnɔ koka mɛtɛ tɔkɔmɔla lo demba ndo lo yimba.
9. Kakɔna kakoka tokimanyiya dia nyomonga l’ɔngɛnɔngɛnɔ? (Jɛrɛmiya 29:4-7, 10)
9 Kakɔna kakoka tokimanyiya dia nyomonga l’ɔngɛnɔngɛnɔ? Sho koka nyomonga l’ɔngɛnɔngɛnɔ lo mɛna akambo la sso di’ɔlɔlɔ ndo lo monga la lowando. Andja ɔnɛ sukɛka kanyi y’ɔnɛ dia sho monga l’ɔngɛnɔngɛnɔ sho pombaka monga la lɔsɛnɔ la kawotake. Koko dui sɔ bu mɛtɛ. Ɛnyɛlɔ, Jehowa akadjangɛ ase Juda waki lo lɔhɔmbɔ la Babilɔna dia mbetawɔ yoho yawɔ ya lɔsɛnɔ y’oyoyo oko ase fumbe lo nkɛtɛ y’angɛndangɛnda ndo nsala kɛnɛ kakokawɔ nsala dia ngɛnangɛna la tena dia wolo sɔ. (Adia Jɛrɛmiya 29:4-7, 10.) Wetshelo akɔna wakondjaso? Hemba ndjaekesanyiya l’akambo wambohomana la yɛ ndo ngɛnangɛna l’awui w’amɛna wele la yɛ lo lɔsɛnɔ. Tohɛke dia Jehowa hakokalɛki pondjo, nde ayokokimanyiya. (Os. 63:7; 146:5) Effie, lakasale aksida wakokonya dia demba di’otondo mbɔla, mbutaka ate: “Lakalongola ekimanyielo ndo osukɔ w’efula oma le Jehowa, ase nkumbo kami ndo oma le ase etshumanelo. Ɔnkɔnɛ, dimi nangaka mbaɛnya dia dimi lekɔ la lowando lo kɛnɛ kasalɛwɔ ndo lo kɛnɛ kakawasalɛ. Laasɔ, lakasale kɛnɛ tshɛ kakamakoke nsala dia nama ɔngɛnɔngɛnɔ ami.”
10. Lande na kakokaso monga l’ɔngɛnɔngɛnɔ kaanga etena kahomanaso l’ekakatanu?
10 Oyadi kaanga lɔsɛnɔ laso laya edika w’edika kana etena kahomanaso kana kahomana ase nkumbo yaso l’awui wa kɔlɔ, sho koka ntetemala monga l’ɔngɛnɔngɛnɔ.b (Os. 126:5) Lande na? Nɛ dia ɔngɛnɔngɛnɔ aso halemanɛ la awui wahomana la so. Maria, lele ombatshi mboka mbutaka ate: “Etena kahomanayɛ l’ekakatanu, nama ɔngɛnɔngɛnɔ halembetshiya minya yimba lo nsaki yayɛ. Koko, dui sɔ nembetshiyaka dia wɛ hohɛ alaka wa Jehowa. Shɛso ayotokimanyiya dia nama ɔngɛnɔngɛnɔ aso.” Tolembete dia oyadi ekakatanu akɔna wahomana la so etena kɛnɛ, vɔ wekɔ wa lo tshanda mɔtshi tsho. Keema edja, vɔ wayanga shila tshɛ.
11. Ngande wakokeketsha ɛnyɛlɔ k’ɔpɔstɔlɔ Pɔɔlɔ?
11 Lo tena dimɔtshi, sho koka ndjɔfɔnya ɔnɛ tekɔ lo mpomana l’ekakatanu l’ɔtɛ wahatayetawɔma le Jehowa. Sho koka nkondja ekimanyielo lo nkanyiya dikambo di’ekambi wa Jehowa wa kɔlamelo wakahomana l’ekakatanu wa wolo. Tɔsɛdingole ɛnyɛlɔ k’ɔpɔstɔlɔ Pɔɔlɔ. Nde akasɔnama oma le Yeso ndaamɛ dia mɛmbɛ “ase wedja, nkumi ya dikanga ndo ana w’ase Isariyɛlɛ” akambo wa mɛtɛ. (Ets. 9:15) Ande ɔkɛndɛ wa laande wakandalongola lee! Koko lɔsɛnɔ la Pɔɔlɔ laki l’ekakatanu efula. (2 Kɔr. 11:23-27) Onde ekakatanu wakɛnamaka oko wahɛnɛ pe wakahomanaka la Pɔɔlɔ wakɛnya dia nde hayetawɔma le Jehowa? Ndooko! Koko, ekikelo kande akɛnyaka dia nde akatshɔkwamaka oma le Jehowa. (Rɔmɔ 5:3-5) Ohokanyiya dikambo diele la yɛ. Oyadi ekakatanu akɔna wahomana la yɛ, wɛ ekɔ lo mbikikɛ la kɔlamelo tshɛ. Laasɔ ndo wɛ lawɔ koka monga l’eshikikelo ɔnɛ wɛ mbetawɔmaka le Jehowa.
12. Ngande wakoka elongamelo kahatakotshama toshishɛ ɔngɛnɔngɛnɔ aso?
12 Dui dia 2: Elongamelo kahatakotshama. (Tok. 13:12) Ngandji kaso ndo lowando lele la so le Jehowa totshutshuyaka dia sho ndjadjɛ eyango l’olimu ande. Koko, naka sho ndjadjɛ eyango wahatakoke nkotsha l’ɔtɛ w’awui wele la so, kete dui sɔ koka tɔkɔmɔla. (Tok. 17:22) Ombatshi mboka welɛwɔ Holly mbutaka ate: “Dimi lakalange mbɔtɔ Kalasa k’Esambisha wa Diolelo, ntshɔ tokamba lo wodja okina kana tokamba lo prɔjɛ ka wokelo ka la Ramapo. Koko awui waki la mi wakatshikatana ndo dimi komonga nto l’akoka wa nkotsha eyango ɛsɔ. Lakakɔmɔ. Mbishaka paa etena kakombolayɛ dia nsala awui amɔtshi, koko wɛ bu l’akoka wa mbasala.” Anto efula ndjaokaka ngasɔ.
13. Naka awui wele la so wekɔ lo todjɛ elelo lo kɛnɛ kakokaso nsala, eyango akɔna wakokaso ndjadjɛ?
13 Kakɔna kakoka tokimanyiya dia nyomonga l’ɔngɛnɔngɛnɔ? Tohɔ dia Jehowa hatɔlɔmbɛ kɛnɛ keso bu l’akoka wa nsala. Nde halongamɛ dia sho nsala awui wamboleka efula ndo nde hashikikɛ nɛmɔ diele la so lo ndjela kɛnɛ keso l’akoka wa nsala l’olimu ande. Jehowa nangaka dia sho monga l’okitshakitsha ndo la kɔlamelo. (Mika 6:8; 1 Kɔr. 4:2) Nde ndjakiyanyaka efula lo kɛnɛ kendana la lonto laso la l’etei oleki lo kɛnɛ kasalaso. Onde ayonga dui dia lomba dia nongamɛ awui efula oma le so oleki kɛnɛ kalongamɛ Jehowa?c Ndooko kaanga yema! Ɔnkɔnɛ naka awui wele la yɛ wekɔ lo kodjɛ elelo lo kɛnɛ kakokayɛ nsala l’olimu wa Jehowa, kete yasha lo kɛnɛ keyɛ l’akoka wa nsala. Onde wɛ hakoke kimanyiyaka akɛnda kana keketshaka esombe? Onde wɛ hakoke ndjadjɛ oyango wa nkeketsha onto ɔmɔtshi okoko l’okoko, lo telefɔnɛ kana mbofundɛ mesajɛ? Jehowa ayokɔtshɔkɔla ndo ayokosha ɔngɛnɔngɛnɔ etena kasalayɛ la wolo dia nkotsha eyango ɛsɔ! Ndo tohɛke dia keema edja l’andja w’oyoyo waki Jehowa, tayonga la waaso efula wa mbokambɛ lo toho tahatakoke mfɔnya! Holly lakatatɛkɛtshi la diko, komiyaka lo mbuta ate: “Etena kakɔmɔmi, dimi kanyiyaka dia ‘layɔsɛna pondjo pondjo.’ Ndo l’ekimanyielo ka Jehowa, layokoka nkotsha eyango ami ɛmɔtshi l’andja w’oyoyo.”
14. Dui diakɔna nto diakoka toshishɛ ɔngɛnɔngɛnɔ aso?
14 Dui dia 3: Ndjaɛkɛ lo falanga kana lo ɛngɔ kɛmɔtshi l’oyango wa monga l’ɔngɛnɔngɛnɔ. Anto amɔtshi kambaka la rɛzo sɔsio dia nsukɛ nkanyi y’ɔnɛ ɔngɛnɔngɛnɔ wa mɛtɛ ndo otondoyelo mongaka lo ndjangɛnyangɛnya. Anto keketshamaka dia ndjasha lo awui wele oko tɔkɛnyɔ, osombelo wa diangɔ ndo lo minda kɛndɔ. Bu kɔlɔ dia ngɛnangɛna l’awui asɔ. Jehowa akatotonge lo yoho yakokaso ngɛnangɛnaka la diangɔ di’amɛna. Koko, anto efula wakɛnyi dia lo dihole di’awui asɔ mbasha ɔngɛnɔngɛnɔ, vɔ mbashishɛkawɔ. Eva, ombatshi mboka ɔmɔtshi mbutaka ate: “Naka lo lɔsɛnɔ la yɛ wɛ ndjashaka paka dia ndjangɛnyangɛnya, kete wɛ ayokombolaka paka awui efula.” Ndjaɛkɛ lo falanga kana lo ɛngɔ kɛmɔtshi l’oyango wa monga l’ɔngɛnɔngɛnɔ koka tɔkɔmɔla kana tokonya dia ndjaoka oko onto laha bu la nɛmɔ.
15. Wetshelo akɔna wakokaso nkondja oma l’ɛnyɛlɔ ka nkumekanga Sɔlɔmɔna?
15 Sho koka nkondja wetshelo oma lo kɛnɛ kakakomɛ nkumekanga Sɔlɔmɔna lo menda etombelo wa kɔlɔ waki la nde lo woho wakandalange ndjangɛnyangɛnya. Nde akahembe dia ntana ɔngɛnɔngɛnɔ wa mɛtɛ lo nkotsha nsaki yande hita, ɛnyɛlɔ lo ndɛ mbo ya ndɛ y’amɛna, lo mpokamɛ mishiki w’amɛna ndo lo nsomba diangɔ tshɛ di’amɛna diakawakoke nsomba la falanga lo nshi yande. Koko akambo asɔ tshɛ kombosha ɔngɛnɔngɛnɔ wa mɛtɛ. Nde akate ate: “Sso hadiohekɔ mɛna; ndo toyi hadiohekɔ mboka.” (Ond. 1:8; 2:1-11) Kanyi yele l’andja ɔnɛ lo dikambo dia kɛnɛ kakoka tela ɔngɛnɔngɛnɔ wa mɛtɛ ekɔ oko falanga ya kashi. Yɔ mɛnamaka oko yekɔ la nɛmɔ, ko tetele yɔ hayokoke tosha ɔngɛnɔngɛnɔ wa mɛtɛ.
16. Lande na kele nkimanyiya anto akina toshaka ɔngɛnɔngɛnɔ? (Enda ndo esato.)
16 Kakɔna kakoka tokimanyiya dia nyomonga l’ɔngɛnɔngɛnɔ? Yeso akatetsha ɔnɛ: “Ɔngɛnɔngɛnɔ waya lo mbisha ndeka wa nongola.” (Ets. 20:35) Ekumanyi kɛmɔtshi kelɛwɔ Alekos mbutaka ate: “Dimi ndjashaka dia nsala akambo wa totshitshɛ lo wahɔ w’anto akina. Etena kawakimanyiyami, dimi haleke ndjasha lo akambo wakombolami ndo dimi mongaka l’ɔngɛnɔngɛnɔ w’efula.” Kakɔna kakokayɛ salɛ anto akina? Naka wɛ ambɛna onto ɔmɔtshi ekɔ lo diɛnɛ la paa, kete hemba dia mbokimanyiya. Ondo wɛ bu l’akoka wa nkandola ekakatanu wele la nde koko wɛ koka mbokeketsha lo mbohokamɛ la yambalo tshɛ, lo mbooka kɛtshi ndo lo mbohola dia nde nkitsha wotsho ande le Jehowa. (Os. 55:22; 68:19) Wɛ koka mbokimanyiya nto dia nde nshihodia ɔnɛ Jehowa hawokale. (Os. 37:28; Isa. 59:1) Wɛ koka kaanga mbosha ekimanyielo kɛmɔtshi shikaa, ɛnyɛlɔ lo mbokatɛ yangɔ ya ndɛ kana nsembola la nde ekolo. Wɛ koka mbɔlɔmba dia nyu nsambisha kaamɛ, ndo dikambo sɔ koka mbosha ɔngɛnɔngɛnɔ. Etawɔ monga ehomɔ kakamba la Jehowa dia nkeketsha anto akina. Ndjasha le anto akina lo dihole dia ndjasha le so shoamɛ toshaka ɔngɛnɔngɛnɔ!—Tok. 11:25.
Lo dihole dia mbika washo paka lo kɛnɛ kakombolayɛ, wɛ koka mbika washo l’ehomba wele l’anto akina (Enda odingɔ 16)d
17. Naka sho nangaka monga l’ɔngɛnɔngɛnɔ wa mɛtɛ, kakɔna kahombaso nsala? (Osambo 43:4)
17 Sho koka ntana ɔngɛnɔngɛnɔ wa mɛtɛ naka sho ntetemala ndjasukanya la Shɛso lele l’olongo. Bible toshikikɛka dia Jehowa ekɔ ‘ɔngɛnɔngɛnɔ aso w’efula.’ (Adia Osambo 43:4.) Ɔnkɔnɛ oyadi ekakatanu akɔna tshɛ wele la so, sho koka ndjaoka l’ekokelo. Nyɛsɔ totetemale mendɛ le Jehowa ɔnɛ lele Kiɔkɔ y’ɔngɛnɔngɛnɔ aso tshɛ!—Os. 144:15.
OSAMBO 155 Ɔngɛnɔngɛnɔ wakiso wa pondjo
a Enda kiombo yele l’ɔtɛ adui ɔnɛ: “Endɛ le Jehowa dia monga l’ɔngɛnɔngɛnɔ.”
b Dia mɛna ɛnyɛlɔ kɛmɔtshi, enda lo jw.org ɔkɔnya waki Dennis nde la Irina Christensen lo Alapɔlɔ wa 5 w’oma le Olui-walɔmbola wa lo 2023.
c Dia mbeya akambo akina efula, enda sawo diele l’ɔtɛ a dui ɔnɛ: “Toyadje eyango wele la ekanelo k’ɔlɔlɔ, ko tayonga l’ɔngɛnɔngɛnɔ” lo Tshoto y’Etangelo ya Ngɔndɔ k’esambele 15, 2008.
d ELEMBETSHIELO W’OSATO WA LO: Kadiyɛso kɛmɔtshi ambotshɔ lo dihole diasondjawɔ diangɔ atoyasombɛ diangɔ diande ndamɛ koko ambɛna ohomba wa sombɛ kadiyɛso k’opalanga kele l’ohomba w’ekeketshielo alɛmbɔlɛmbɔ.