Onde ekomelo k’andja kaya suke? Ko elɛwɔ apɔkalipsɛ?
Kakɔna kakoyɛ lo yimba etena kokayɛ tshɛkɛta “apɔkalipsɛ”? Ondo wɛ kanyiyaka dia elanyelo k’andja w’otondo, kayodiaka ɛngɔ tshɛ kele la lɔsɛnɔ lanɛ la nkɛtɛ. Anto amtshi fɔnyaka dia dui sɔ diayanga salema keem’edja, djekoleko etena kadiawɔ awui wele oko wanɛ:
“Ta diayowokamba la bɔmbɛ nikliyɛrɛ mbeyaka nɔmba ndo kɛnɛ kakoka tokongotola ta sɔ mbeyaka monga kanyi y’onto ɔmɔtshi, dui dimɔtshi di’elengalenga, kana owanu wa lam’asa anto amɔtshi.”—Bulletin of the Atomic Scientists.
“Lo ɛnɔnyi dikumi wetshi, mpokoso yakatombe efula l’andja w’otondo, ɛnyɛlɔ mpɛpɛ ya wolo, loowo lakɔtɔ l’ekonda, ɛwɔ wa kasha, tanyi ta wolo ndo ndola.”—National Geographic.
“Aya ɛnɔnyi efula wele akata wakambwɛ wedja efula wa l’Afrikɛkɛ.”—The Associated Press.
Onde nkɛtɛ kayolanyema oma lo apɔkalipsɛ ɔmɔtshi? Kakɔna kata Bible?
Onde okama wa nkɛtɛ ɔnɛ wayolanyema?
Ndooko. Ɔtɛkɛta wa Nzambi, Bible toshikikɛka dia nkɛtɛ kayotshikalaka pondjo pondjo. (Ondaki 1:4) Lo dihole dia nde ndanya nkɛtɛ yakandatonge, Nzambi ‘ayolanya wanɛ walanya nkɛtɛ.’—Ɛnyɛlɔ 11:18.
Onde ɔsɔ ekɔ ekomelo k’andja?
Lo ndjela Bible, “andja” wayokomɛ nembetshiyaka anto wahadje awui wa Nzambi yimba ndo watawese paka wahɔ awɔ hita. Oko wakandadisale lo nshi ya Nɔa, Nzambi ayokomiya ‘andja wahɔlɛmiya.’—2 Petero 2:5; 3:7.
1 Joani 2:17 mbutaka dia “andja ɔnɛ la nsaki yawɔ wekɔ lo teete.” Divɛsa nɛ mɛnyaka dia Nzambi ayolanya aha okama a so wa nkɛtɛ, kko anto watetemala nsala akambo wa kɔlɔ.
Etena kakɔna kayoya ekomelo?
Bible hatotɛ shikaa etena kakɔka kayoya ekomelo. (Mateo 24:36) Koko tɔ mɛnyaka di’ekomelo kaya suke. Awui amɔtshi watatɔ vɔ anɛ:
Ata, ndjala ya kasha, elando ndo adidimu wa nkɛtɛ wayonga “lo dihole la dihole.”—Mateo 24:3, 7, 14; Luka 21:10, 11; Ɛnyɛlɔ 6:1-8.
Anto lo tshɛ kawɔ wayonga la lokaki. Ɛnyɛlɔ, vɔ “wayolanga falanga,” wayonga “akanga wa lɔhɛndɛ,” ndo anto “waha la ndjakimɛ.”—2 Timɔte 3:1-5.
Anto efula mbetawɔka di’oma ko 1914, awui wa l’andja ɔnɛ mbɔtɔnɛka la kɛnɛ kakatatshi Bible ndo ɔnɛ ekomelo kaya suke. Dia mbeya awui akina, enda sawo diele l’ɔtɛ a dui ɔnɛ: “ Que révèle la chronologie de la Bible sur l’année 1914 ? ” ndo “ Quel est le signe des “derniers jours” ? ”
Naa kitshimudi yele la tshɛkɛta “apɔkalipsɛ” lo Bible?
Lo Bible, tshɛkɛta “apɔkalipsɛ” ndja oma lo tshɛkɛta ya lo Grɛkɛ yalembetshiya “tshelo ya mbishola,” kana “woshwelo.” Lo mbuta mɛtɛ, tshɛkɛta shɔ nembetshiyaka mbishola awui wakashɛma. Bible tɛkɛtaka nto dia “etena kashɔma [apɔkalipsɛ] Nkumadiɔndjɔ Yeso,” mbuta etenya kayɛnya Yeso dia nde mbele la wolo wa minya awui wa kɔlɔ tshɛ oma la nkɛtɛ ndo etena ka mfuta wanɛ watɛmɔla Nzambi.—2 Tɛsalɔnika 1:6, 7; 1 Petero 1:7, 13.
Dibuku di’ekomelo dia lo Bible mbelamɛka ɔnɛ Apɔkalipsɛ, kana Ɛnyɛlɔ nɛ dia diɔ mbisholaka awui wayosalema lo nshi yayaye. (Ɛnyɛlɔ 1:1) Dibuku sɔ diekɔ la nkumu y’ɛlɔlɔ ndo losango lasha elongamelo. (Ɛnyɛlɔ 1:3) Diɔ mɛnyaka dia Nzambi ayonya awui wa kɔlɔ tshɛ ndo ayokadimola nkɛtɛ paradiso. L’etena kɛsɔ, anto kandji, asui ndo kaanga nyɔi hongaki nto pondjo.—Ɛnyɛlɔ 21:3, 4.
Onde wɛ nangaka mbeya awui akina wendana l’alaka wa diambo wa lo Bible asɔ? Ɛmɛnyi wa Jehowa wekɔ lo mbetsha anto Bible ofele ndo vɔ koka kokimanyiya. Bonde kahayayange dia mɛnana la wɔ?