Onde ɔtɛmwɛlɔ pombaka ndjatambiya l’awui wa pɔlitikɛ?

L’andja w’otondo, anto efula wasɛma dia wekɔ lo tayele Yeso Kristo ndjatambiyaka tshavu l’awui wa pɔlitikɛ. Amɔtshi salaka la wolo dia nkeketsha waetawɔ awɔ w’ɛtɛmwɛlɔ kana atɔndɔ awɔ wendana la lɔkɛwɔ lo sukɛ atshunda amɔtshi wa pɔlitikɛ kana wanɛ wadja dungi dia nsɔnama dia nkoma ewandji ɛmɔtshi wa pɔlitikɛ. Ase pɔlitikɛ lo wedi awɔ kambaka kambaka l’awui wayasha anto efula lɔkɔ dia nkondja Akristo efula wakoka mbadjɛ akatshi. Mbala ewandji ɛmɔtshi wa pɔlitikɛ mbidjaka dungi dia nsɔnama dia nkoma ewandji ɛmɔtshi wa pɔlitikɛ. Lo wedja ɛmɔtshi, ose ɔtɛmwɛlɔ koka nkoma owandji ɔmɔtshi ndo ɔtɛmwɛlɔ ɔmɔtshi w’Akristo koka nkoma ɔtɛmwɛlɔ wa Lɛɛta.

Naka kanyi yayɛ lo dikambo sɔ? Onde ambeki wa Yeso Kristo pombaka ndjatambiya l’awui wa pɔlitkɛ? Wɛ koka ntana ekadimwelo wa ambola asɔ lo nsɛdingola ɛnyɛlɔ ka Yeso. Nde akate ate: “Dimi lambonyosha ɛnyɛlɔ dia nyu lawɔ nsala woho wonyosalemi.” (Joani 13:15) Lo kɛnɛ kendana l’awui wa pɔlikikɛ, ɛnyɛlɔ kakɔna kakatotshikɛ Yeso?

Onde Yeso akayatambiya l’awui wa pɔlitikɛ?

Ndooko. Yeso kondjatambiya l’awui wa pɔlitikɛ wa l’andja ɔnɛ.

Yeso konyanga dia nkondja lowandji lɔmɔtshi la pɔlitikɛ. Etena kakalange Satana Diabolo mbosha “waolelo tshɛ wa l’andja ɔnɛ” nde akatone. (Mateo 4:8-10)a Lo diaaso dikina, anto wakɛnyi dia Yeso aki la waonga w’amɛna ko wakayange dia mbodja lo lowandji lɔmɔtshi la pɔlitikɛ. Bible mbutaka ɔnɛ: “lam’akeye Yeso dia vɔ waki suke la mbonda ko mbodja nkumekanga la wolo, nde akɔɔngɔ nto otsha lo dikona ndamɛ.” (Joani 6:15) Yeso kosala kɛnɛ kakawotɛka anto dia nsala. Koko nde akatone ndjatambiya l’awui wa pɔlitikɛ.

Lo kɛnɛ kendana l’awui wa pɔlitikɛ, Yeso kombeta lo wedi ɔmɔtshi. Ɛnyɛlɔ, lo nshi ya Yeso, lowandji l’ase Rɔmɔ lakafutshaka ase Juda elambo wamboleka, ko vɔ wakoke nkɛtɛ l’ɔtɛ wakawasalɛka awui waha la losembwe. Etena kakawayange dia nkondja kanyi yaki Yeso lo dikambo dimɔtshi, nde kondjatambiya l’esanyi wa pɔlitikɛ lo mbuta dia kana weho w’elambo ɛsɔ bu dimɛna mbafuta. Nde akawatɛ ate: “Nyosha Kayisa diangɔ dia Kayisa ndo nyosha Nzambi diangɔ dia Nzambi.” (Makɔ 12:13-17) Nde akalame lomangemange l’awui wa pɔlitikɛ ndo nde akɛnya di’elambo wakalɔmbaka ewandji w’ase Rɔmɔ wakahombaka futama, nɛ dia vɔ waki enyimpala waki Kayisa. L’etana kakɔ kaamɛ, nde akɛnya di’okitanyiya w’Akristo otsha le ewandji wa l’andja wekɔ la elelo. Onto hahombe mbisha Lɛɛta kɛnɛ kahomba Nzambi nongola, mbidja ndo omamemelo la ɔtɛmwɛlɔ.​—Mateo 4:10; 22:37, 38.

Yeso akasukɛ lowandji la l’olongo, mbuta Diolelo diaki Nzambi. (Luka 4:43) Nde kondjatambiya l’awui wa pɔlitikɛ nɛ dia nde akeyaka dia Diolelo dia Nzambi, koko aha mandji y’ana w’anto wamboyokotsha kɛnɛ kakombola Nzambi lo dikambo dia nkɛtɛ. (Mateo 6:10) Nde akashihodia dia Diolelo dia Nzambi hadiotolɛ kaamɛ la mandji y’ana w’anto, koko diɔ diayowahɛna.​—Danyɛlɛ 2:44.

Onde Akristo wa lo ntambe ka ntondo wakayatambiya l’awui wa pɔlitikɛ?

Ndooko. Ambeki wa Yeso wakakitanyiya didjango diande diata ‘diaha monga ase andja ɔnɛ.’ (Joani 15:19) Vɔ wakayele ɛnyɛlɔ kande ndo vɔ kondjatambiya l’awui wa pɔlitikɛ. (Joani 17:16; 18:36) Lo dihole dia ndjatambiya l’awui wa pɔlitikɛ, vɔ wakakitanyiya didjango diaki Yeso diata dia nsambisha ndo mbetsha anto awui wendana la Diolelo dia Nzambi.​—Mateo 28:18-20; Etsha 10:42.

Akristo wa lo ntambe ka ntondo waketsha okitanyiya otsha le Nzambi lo dihole dia ntondo lo nsɛnɔ yawɔ, ndo vɔ wakeyaka nto dia vɔ pombaka nɛmiya ewandji wa lɛɛta. (Etsha 5:29; 1 Petero 2:13, 17) Vɔ wakakitanyaka ɛlɛmbɛ ndo wakafutaka elambo. (Rɔmɔ 13:1, 7) Kaanga mbakiwɔ kondjatambiyaka l’awui wa pɔlitikɛ, vɔ wakakondja wahɔ oma l’elimu wa mandji y’ana w’anto.​—Etsha 25:10, 11; Filipɛ 1:7.

Lomangemange l’Okristo ɛlɔ kɛnɛ

Bible mɛnyaka hwe dia Yeso la ambeki ande wa lo ntambe ka ntondo kondjatambiya l’awui wa pɔlitikɛ. L’ɔtɛ ɔsɔ mbele oko Akristo, Ɛmɛnyi wa Jehowa wa l’andja w’ otondo namaka lomangemange lawɔ tshɛ lo tshɛ. L’ɛnyɛlɔ k’Akristo wa lo ntambe ka ntondo, vɔ salaka olimu wakawadjangɛ Yeso, mbuta ate nsambisha “lokumu l’ɔlɔlɔ lɔnɛ la Diolelo.”​—Mateo 24:14.