Wodja wa Russie ambɔtwɛ wodja w’Ukraine la ta

Ngɔndɔ ka hende 24, 2022, lo wenya wa pindju, asɔlayi wa wodja wa Russie wakatatɛ mbɔtwɛ wodja w’Ukraine, kaanga mbakadje ɛnɔmbɔdi wa wedja wa l’andja w’otondo welo dia mbewɔ ta sɔ. Shɛngiya yakɔna yamonga la ta sɔ le anto? Sekeletɛlɛ jeneralɛ ka tshunda dielɛwɔ Nations unies, yɔnɛ António Guterres, akate lo nshi ngana yetshi nyɛ ate: “Ta nɛ hadiohombe ndɔma nɛ dia diɔ diayela anto asui w’efula, diayolanya diangɔ di’anto ndo diayofukutanya lotui tshitshi l’ase Erɔpɛ ndo l’andja w’otondo lo yɛdikɔ y’efula.”

Lo ndjela Bible awui wele oko wanɛ alembetshiyawɔ na?

• Yeso Kristo akatatshi di’etena kele “wodja wayɔlɔsha wodja okina ndo diolelo diayɔlɔsha diolelo dikina.” (Mateo 24:7) Nyadia sawo diele l’ɔtɛ a dui ɔnɛ: “Quel est le signe des ‘derniers jours’?” (“Naa djembetelo ya ‘nshi y’ekomelo’”?) dia mɛna woho wɛnya Bible di’ata wa nshi nyɛ wekɔ lo nkotsha prɔfɛsiya kaki Yeso kɛsɔ.

• Dibuku dia lo Bible di’Ɛnyɛlɔ tɛkɛtaka dia ta lo nkamba la ombahemi wa mfalasa wodjashi laadiko dia “mfalasa . . . ka beelaa” ndo lanya “wɔladi oma la nkɛtɛ.” (Ɛnyɛlɔ 6:4) Adia sawo diele l’ɔtɛ a dui ɔnɛ: “Ambahemi wa mfalasa anɛi​—Waa na wewɔ?” dia mɛna woho wɔtɔnɛ prɔfɛsiya kɛnɛ la ata wa nshi nyɛ.

• Dibuku dia Danyɛlɛ diakatatshi di’owanu wa lam’asa “nkumekanga ka nɔrdɛ” la “nkumekanga ka sidɛ.” (Danyɛlɛ 11:25-45) Enda vidɛo yele l’ɔtɛ a dui “Une prophétie qui s’accomplit : Daniel chapitre 11 dia mbeya lande na kɔsama Russie la wedja wakadje lawɔ sheke oko nkumekanga ka nɔrdɛ.a

• Ɛnyɛlɔ tɛkɛtaka nto dia “ta dia lushi la woke la Nzambi Kanga-Wolo-Tshɛ.” (Ɛnyɛlɔ 16:14, 16) Koko, ɔsɔ bu ta dia lam’asa wedja oko ta diɛnaso ɛlɔ nɛ. Adia sawo diele l’ɔtɛ a dui ɔnɛ: “Ta dia Aramangɛdɔna kɛdikɛdi na?” dia mbeya awui akina wendana la kɛnɛ kayosalema lo nshi yayaye.

Lande na kakokayɛ monga la elongamelo lo dikambo dia nshi yayaye?

• Bible mbutaka dia Nzambi ayanga “nkomiya ata lo nkɛtɛ k’otondo.” (Osambo 46:9) Adia sawo diele l’ɔtɛ a dui ɔnɛ: “Une espérance réelle pour des jours meilleurs” (“Elongamelo k’oshika kendana la nshi yayaye y’amɛna efula”) dia mbeya awui wendana nshi yayaye yatolaka Nzambi.

• Yeso aketsha ambeki ande dia nɔmba dia Diolelo diaki Nzambi ndja. (Mateo 6:9, 10) Diolelo sɔ diekɔ lowandji la l’olongo diayokotsha sangwelo diaki Nzambi diendana la nkɛtɛ ndo sangwelo diaki Nzambi diendana la wɔladi wa l’andja w’otondo. Dia Mbeya woho wakoka Diolelo kokondjiyɛ wahɔ, enda vidɛo yele l’ɔtɛ a dui ɔnɛ: Diolelo kɛdikɛdi na?

Ndekana Ɛmɛnyi wa Jehowa 129 000 wekɔ lo nsɛna lo wodja w’Ukraine. L’ɛnyɛlɔ k’Ɛmɛnyi wa Jehowa wa lo wodja okina tshɛ, vɔ mbokoyaka Yeso lo nama lomangemange lawɔ l’awui wa pɔlitikɛ ndo lo ntona ndjatambiya l’awui w’ata. (Joani 18:36) L’andja w’otondo, Ɛmɛnyi wa Jehowa wekɔ lo ntetemala mbewoya “lokumu l’ɔlɔlɔ la Diolelo,” oko tshɔi y’ehomɔ kayokomiya ekakatanu w’anto, mbidja ndo ata. (Mateo 24:14) Tambokɔlɔmba dia wɛ tofundɛ dia mbeya awui akina wendana la losango la lo Bibe lasha elongamelo.