Wodelo w’eshinga wa diangɔ l’andja w’otondo​—Kakɔna kata Bible lo dikambo sɔ?

Lo alapɔlɔ wa Ngɔndɔ ka samalo 2022, owandji wa tshunda dielɛwɔ Groupe de la Banque mondiale akate ate: “Dikongɛ dia l’andja w’otondo diendana l’awui wa falanga diaya lo waale nto. Mbala kɛnɛ eshinga wa diangɔ wekɔ lo tadɛ esadi esadi, koko l’etena kakɔ kaamɛ ekondjelo k’anto kekɔ lo takitakita.”

Ndo tshunda dielɛwɔ Fonds monétaire international mbutaka ɔnɛ: “Eshinga w’esasɛ, wa mazoto ndo wa pitilɔ wekɔ lo tadɛ esadi esadi, ndo dui sɔ diamboleka monga l’etombelo woleki kɔlɔ lo wedja wa wola.”

Bible tokimanyiyaka dia nshihodia lande na kadiɛnɛso l’ekakatanu wendana la ekondjelo, woho wakokaso ndɔshana la wɔ ndo elongamelo kele laso lo woho wayokandɔma dikambo sɔ lo pondjo.

Wodelo w’eshinga wa diangɔ lo “nshi y’ekomelo”

• Bible mbelɛka etena kasɛnaso kɛnɛ ɔnɛ “nshi y’ekomelo.”​—2 Timɔte 3:1.

• Yeso akate dia “akambo wa wɔma,” wayonga l’etena kasɛnaso kɛnɛ. (Luka 21:11) Wodelo w’eshinga wa diangɔ mbishaka wɔma. Anto ndjakiyanyaka dikambo dia nshi yawɔ yayaye ndo ndjambolaka dia kana wayonga l’akoka wa nkotsha ehomba w’ase nkumbo yawɔ.

• Dibuku di’Ɛnyɛlɔ diakatatɛkɛtshi dia diangɔ diayodɛ eshinga l’etena kasɛnaso kɛnɛ. “Dimi lakuki dui uku dia untu . . . diata ati: Yediko otoi y’epunga wa menge yeko denariyo otoi; tediko tosato ta eponga wa yelela denariyo otoi.”​—Ɛnyɛlɔ 6:6, Bible k’Ekila.

Dia mbeya awui akina wendana la “nshi y’ekomelo” ndo prɔfɛsiya ka lo dibuku di’Ɛnyɛlɔ, enda vidɛo yele l’ɔtɛ a dui ɔnɛ: Le monde a changé depuis 1914 ndo adia sawo diele l’ɔtɛ a dui ɔnɛ: “Ambahemi wa mfalasa anɛi​—Waa na wewɔ?”

Woho wayokadɔma ekakatanu wendana la ekondjelo

• “Vɔ wayoka mvudu ko wayodjasɛka lɔkɔ, ndo vɔ wayokamba dikambɔ dia vinyɔ ko wayɔlɛka elowa w’oma lɔkɔ. Vɔ hawotoka mvudu dia onto okina ndjodjasɛ lɔkɔ, ndo hawotokamba dikambɔ dia anto akina ndjɔlɛ.”​—Isaya 65:21, 22.

• “Mbo ya ndɛ yayoyala efula la nkɛtɛ; Yɔ yayonga tshavutshavu lo tɔsɔdi t’akona.”​—Osambo 72:16.

• “Jehowa kata ate: ‘L’ɔtɛ wasoyama amɛnyi mfɔnu, l’ɔtɛ w’osekumelo w’ase wola, dimi layanga monɛɛ dia nsala dui dimɔtshi.’”​—Osambo 12:5.a

Nzambi ayanga nkomiya dikongɛ dia kɔlɔ di’awui wendana la falanga, aha tsho lo wodja ɔtɔi, koko l’andja w’otondo. Dia mɛna woho wayondosala dui sɔ, adia sawo diele l’ɔtɛ a dui nɛ: “Onde sho koka nongamɛ dia monga la dikongɛ di’awui wa falanga diele la losembwe?”

Koko kaanga nshi nyɛ, Bible koka kokimanyiya dia ndɔshana la wodelo w’eshinga wa diangɔ. Lo yoho yakɔna? Tɔ kekɔ l’alako w’eshika wendana la woho wa nkamba la falanga la lomba. (Tokedi 23:4, 5; Ondaki 7:12) Dia mbeya awui akina, adia sawo diele l’ɔtɛ a dui ɔnɛ: “Nkokɛ falanga ndo diangɔ diele la yɛ” ndo diele l’ɔtɛ a dui ɔnɛ: “Comment vivre avec moins.”