Ta dia l’Ukraine diambela wola wa mbo ya ndɛ l’andja w’otondo

Lo Ngɔndɔ ka tanu 19, 2022, tshunda dielɛwɔ Conseil de sécurité des Nations unies akoke ɛnɛnɛ wa lɛɛta ndekana 75 wata dia “wola wa mbo ya ndɛ wambonga l’andja w’otondo l’ɔtɛ wa hemɔ ka COVID-19 ndo wotshikitanu wa waa deko (changement cilamatique) wambonyomoleka monga wolo l’ɔtɛ wa ta dia lowodja w’Ukraine.” Yema tshitshɛ oma laasɔ, jurnalɛ yelɛwɔ The Economist yakate dia “ta sɔ diovusha nyemba y’anto wa l’andja ɔnɛ ndjala.” Bible kakatatshi dia ndjala yayonga l’etena kaso kɛnɛ, koko tɔ tɛnyaka nto woho wakokaso ndɔshana la dikambo sɔ.

Bible kakatatshi dia ndjala yayonga

•  Yeso akate ate: “Wodja wayɔlɔsha wodja okina ndo diolelo diayɔlɔshah diolelo dikina, ndjala ya kasha [yayonga].”​—Mateo 24:7.

•  Dibuku dia lo Bible di’Ɛnyɛlɔ tɛkɛtaka di’ambahemi wa mfalanga anɛi wa didjidji. Ɔmɔtshi ekɔ didjidji di’ata. Nde ndjelana l’okina lele didjidji dia ndjala ya kasha, etena kele mbo ya ndɛ yayonga wola ndo mbo ya ndɛ yayonga eshinga vɔlɛ. “[Dimi lakɛnyi] mfalasa k’odima ndo ɔnɛ lakakiahema aki la kilɔ lo lonya lande. Lakoke wondjo wele oko dui . . . diata ɔnɛ: “Karɛtɛ k’eponga ɔsaka difuto dia lushi l’otondo! Ndo karɛtɛ shato y’asami aya yɔ lawɔ difuto dia l ushi l’otondo.”​—Ɛnyɛlɔ 6:5, 6, Contemporary English Version.

Prɔfɛsiya ya lo Bible nyɛ yendana la ndjala yekɔ lo kotshama lo etena kɛnɛ kelɛ Bible ɔnɛ “nshi y’ekomelo.” (2 Timɔte 3:1) Dia mbeya awui efula wendana la “nshi yayaye” ndo la ambahemi wa mfalasa anɛi wa lo Ɛnyɛlɔ, enda vidɛo yele l’ɔtɛ a dui ɔnɛ Andja wakatshikitana ntatɛ lo 1914 ndo sawo diele l’ɔtɛ a dui ɔnɛ: “Ambahemi wa mfalasa anɛi​—Waa wewɔ?”

Woho wakoka Bible tokimanyiya

•  Bible kekɔ l’alako w’eshika wakoka tokimanyiya dia ndɔshana l’ekakatanu, mbidja ndo wodelo w’eshinga wa mbo ya ndɛ kana ndjala ya kasha. Enda bɛnyɛlɔ dimɔtshi lo sawo diele l’ɔtɛ a dui ɔnɛ: “Comment vivre avec moins.” (Woho wa nsɛna la diangɔ yema tshitshɛ).

•  Bible toshaka nto elongamelo ɔnɛ awui wayolowana. Tɔ ndakaka etena kele “mbo ya ndɛ yayoyala efula la nkɛtɛ” ndo kele onto tshɛ ayonga la mbo ya ndɛ tshavutshavu. (Osambo 72:16) Dia mbeya awui efula wendana la elongamelo katosha Bible lo kɛnɛ kendana la nshi yayaye ndo lande na kahombaso ndjaɛkɛ lo Bible, adia sawo diele l’ɔtɛ a dui ɔnɛ: “Une espérance réelle pour des jours meilleurs” (Elongamelo ka mɛtɛ ka nshi yayaye y’amɛna efula).