Lande na kahasale Ɛmɛnyi wa Jehowa fɛtɛ ya eotwelo?

Ɛmɛnyi wa Jehowa hawosale fɛtɛ ya eotwelo nɛ dia sho mbeyaka dia fɛtɛ yakɔ hayɔngɛnyangɛnya Nzambi. Kaanga mbele Bible hate hwe dia tɔ toshimbaka fɛtɛ ya eotwelo, tɔ tokimanyiyaka dia sho mbeya akambo akina wendana la fɛtɛ yakɔ ndo kanyi yaki Nzambi lo kɛnɛ kendana la yɔ. Tɔsɛdingole atɔndɔ anɛi wɔtɛkɛtami lo Bible lo dikambo dia fɛtɛ yakɔ.

1. Fɛtɛ ya eotwelo ndja oma le apanganu. Lo ndjela dibuku dimɔtshi (Funk & Wagnalls Standard Dictionary of Folklore, Mythology, and Legend), fɛtɛ shɔ ndja oma lo dietawɔ di’ɔnɛ lushi la eotwelo k’onto, “ɛdiɛngɛ ndo alɔka koka monga la diaaso dia salɛ kanga fɛtɛ kɔlɔ” ndo ɔnɛ “etena kaya angɛnyi la ɛtɛkɛta w’ɛlɔlɔ wawokombolɛwɔ awui w’ɛlɔlɔ kɛsɔ kimanyiyaka dia nkokɛ kanga fɛtɛ.” Dibuku dimɔtshi (The Lore of Birthdays) mbutaka dia lo nshi y’edjedja, lushi la eotwelo akakimanyiyaka dia mbeya “akambo wayowokomɛ (horoscope)” l’ekimanyelo ka “diendja dia la tɔɔtɔ.” Dibuku sɔ kotshaka ɔnɛ: “Anto wakafɔnyaka dia wa buji yakamba la wɔ lo fɛtɛ ka eotwelo yekɔ la maji wakoka mbisha onto kɛnɛ kakombolande.”

   Koko Bible tonaka okambelo wa la maji, diendja, akambo w’ɛdiɛngɛ ndo “awui wa ngasɔ.” (Eohwelo k’Ɛlɛmbɛ 18:14; Ngalatiya 5:​19-​21) Lo mɛtɛ, ɔkɔkɔ ɔmɔtshi wakasha Nzambi ase Babilɔna w’edjedja dilanya ele nɛ di’ase wodja ɔsɔ wakasalaka diendja dia tɔɔtɔ. (Isaya 47:11-​15) Ɛmɛnyi wa Jehowa hawoyange dia mbeya kiɔkɔ ya mbekelo tshɛ; koko, naka kanyi ya Bible mbokɛmaka hwe lo dikambo dimɔtshi sho mbidjaka mbidja yimba lo dikambo diakɔ.

2. Akristo wa ntondo kosalaka fɛtɛ ka eotwelo. Dibuku dimɔthi (World Book Encyclopedia) mbutaka ɔnɛ: “Vɔ wakɔsaka kɛnɛ tshɛ kendana la fɛtɛ ka eotwelo oko mbekelo y’apanganu.” Bible mɛnyaka di’apɔstɔlɔ ndo Akristo akina waketshama mbala kakɔ ɔtɔi oma le Yeso ndamɛ wekɔ ɛnyɛlɔ kahomba Akristo tshɛ ndjela.​—2 Tɛsalɔnika 3:6.

3. Yeso akatshikɛ Akristo tshɛ ɔkɛndɛ wa salaka eohwelo ka nyɔi kande, koko aha eotwelo kande. (Luka 22:17-​20)Ɔsɔ bu dui dia diambo nɛ dia Bible mbutaka ɔnɛ “lushi la nyɔi ndeka lushi la mbotɔ.” (Ondaki 7:1) Otsha l’ekomelo ka lɔsɛnɔ lande la lanɛ la nkɛtɛ, Yeso akayasalɛ lokombo l’ɔlɔlɔ lo washo waki Nzambi, lushi la nyɔi kande laki ohomba oleki lushi la eotwelo kande.​—Hɛbɛru 1:4.

4. Bible hatɛkɛka dikambo di’Okristo ɔmɔtshi wakasale fɛtɛ ka eotwelo. Dikambo sɔ bu dioha, nɛ dia Bible shilaka fɛtɛ hiende ya eotwelo ka wanɛ waki komonga atɛmɔdi wa Nzambi. Ndo Bible tɛkɛaka di’awui wa kɔlɔ wakasalema lo fɛtɛ yakɔ.​​—Etatelo 40:20-​22; Makɔ 6:​21-​29.

Onde ana w’Ɛmɛnyi wa Jehowa ndjaokaka dia wekɔ lo mpomba ɛngɔ kɛmɔtshi lo woho wewɔ wahosale fɛtɛ ya eotwelo?

Oko ambutshi w’ɛlɔlɔ, Ɛmɛnyi wa Jehowa kɛnɛmɔlɛka anawɔ ngandji l’edja k’ɔnɔnyi w’otondo, vɔ mbashaka weshasha ndo vɔ ngɛnangɛnaka kaamɛ la asekawɔ. Vɔ salaka la wolo dia ndjela ɛnyɛlɔ ka kokele ka Nzambi kele la lolango tshɛ, nde mbishaka anande diangɔ di’amɛna. (Mateo 7:​11) Ana w’Ɛmɛnyi hawoyaoke dia vɔ pombaka ɛngɔ kɛmɔtshi, teende kɛnɛ katawɔ :

• “Etena kakokahɛwɔ ɛngɔ kahayalongame, kɛsɔ mbishaka ɔngɛnɔngɛnɔ efula.”​—Tammy, ɛnɔnyi 12.

• “Kanga mbele ambutshi ami hawombisha weshasha lushi la eotwelo kami, vɔ tetemalaka mbishami weshasha lo waaso akina. Dui sɔ ngɛnyangɛnyakami nɛ dia vɔ kashimolakami la weshasha.”​—Gregory, ɛnɔnyi 11.

• “Nyu fɔnyaka dia mbetsha kaamɛ minitɛ 10 ya memba la ndɛ okate ekɔ mɛtɛ fɛtɛ? Nyoye la ngelo nyoyende elɛwɔ fɛtɛ ka mɛtɛ!”​—Eric, ɛnɔnyi 6.