Jehowa kokɛka ekambi ande

1. Lande na kakalɔmbɛ Yeso Jehowa dia nkokɛ ambeki ande?

L’OTSHO wa la ntondo ka nyɔi kande, Yeso akalɔmbɛ She lele l’olongo dui dimɔtshi dia laande. Nde akalɔmbɛ Jehowa dia nkokɛ ambeki ande. (Jni. 17:15, 20) Lo mɛtɛ, Jehowa namaka ekambi ande nshi tshɛ, mbuta ate nde ndjakiyanyaka dikambo diawɔ, kotshaka ehomba awɔ ndo mbakokɛka. Koko, Yeso akeyaka di’ambeki ande wayohomana l’ɔlɔshamelo wakiwɔ konongamɛka oma le Satana. Yeso akeyaka nto dia vɔ wayonga l’ohomba w’ekimanyielo ka Jehowa dia nshika tanga la ntondo k’ɛlɔshamelo wa Diabolo kanga kɔlɔ.

2. Lo ndjela Osambo 33:18-20, lande na kahatahombe mboka ekakatanu wɔma?

² Andja ɔnɛ walɔmbɔma oma le Satana wekɔ lo mbela Akristo wa mɛtɛ ekakatanu efula ɛlɔ kɛnɛ. Tekɔ lo mpomana l’ekakatanu wakoka tɔkɔmɔla ndo kaanga mbidja kɔlamelo yaso le Jehowa l’ohemba. Koko oko wayotodiɛna lo sawo nɛ, ndooko dui diakokaso mboka wɔma. Jehowa ekɔ lo tokokɛ, nde ekɔ lo mɛna ekakatanu wahomana laso ndo nde mongaka suke dia tokimanyiya dia ndɔshana la wɔ. Nyɛsɔ tɔsɛdingole bɛnyɛlɔ pende dia lo Bible diɛnya woho walama Jehowa “wanɛ wawoka wɔma.”​—Adia Osambo 33:18-20.

ETENA KAYAOKASO OPOKO

3. Lo ntena diakɔna diakokaso ndjaoka opoko?

³ Kaanga mbeso l’atei wa nkumbo ka woke k’atɛmɔdi, sho koka lo ntena dimɔtshi ndjaoka opoko. Ɛnyɛlɔ, ɛlɔngɔlɔngɔ kana esekaseka mbeyaka ndjaoka epoko etena kalembetshiyawɔ asekawɔ wa la kalasa dietawɔ diawɔ kana etena konɔwɔ otsha l’etshumanelo k’oyoyo. Amɔtshi l’atei aso mbeyaka monga la lonyangu kana mbeyaka monga ko sho tekɔ lo ndɔshana la tokanyi ta kɔlɔ lo mfɔnya dia sho pombaka ndɔshana l’ekakatanu aso shoamɛ. Sho mbeyaka mengenga dia mbutɛ anto akina woho wayaokaso lo mfɔnya di’anto akɔ hawotoshihodia woho wayaokaso. Ndo lo ntena dimɔtshi, sho mbeyaka ndjambola dia kana onto ɔmɔtshi ndjakiyanyaka mɛtɛ dikambo diaso. Ndjaoka opoko oyadi l’ɔtɛ w’ɔkɔkɔ akɔna tshɛ, koka tokonya dia ndjakiyanya ndo dia ndjaoka oko sho bu l’onto lakoka tokimanyiya. Jehowa halange kaanga yema dia sho ndjaoka ngasɔ. Lande na kakokaso mbuta ngasɔ?

4. Lande na kakate omvutshi Elidja ate: “Dimi oto kambotshikala”?

⁴ Tɔsɛdingole ɛnyɛlɔ ka pami kɛmɔtshi ka kɔlamelo kakawelɛka Elidja. Jezabɛlɛ akatshike akayashikikɛ dia mbodiaka, diakɔ diakandalawɔ dia nkokɛ lɔsɛnɔ lande l’edja ka nshi 40. (1 Ku. 19:1-9) L’ekomelo, lam’akinde ndaamɛ lo woko wa dive, nde akalelɛ Jehowa lo mbuta ate: “Dimi oto kambotshikala oko [omvutshi].” (1 Ku. 19:10) Koko amvutshi akina wakikɔ lo wodja ɔsɔ; Obadiya akasale la wolo dia nkokɛ amvutshi 100 oma l’anya wa Jezabɛlɛ. (1 Ku. 18:7, 13) Ko laasɔ, lande na kakayaoke Elidja opoko? Onde nde akafɔnya di’amvutshi tshɛ wakakokamɛ oma le Obadiya wakashile la mvɔ? Onde nde akayaoke opoko l’ɔtɛ waki kombeta anto akina lo wedi ande dia kambɛ Jehowa kaanga l’ɔkɔngɔ wa Jehowa mɛnya dia nde mbele Nzambi ka mɛtɛ lo dikona dia Karamɛlɛ? Onde mbala mɔtshi nde akafɔnya dia ndooko onto lakeyaka polo lo yɛdikɔ yakɔna yaki lɔsɛnɔ lande lo waale, kana onde nde akayambolaka dia kana onto ɔmɔtshi akayakiyanyaka dikambo diande? Ɔkɔndɔ hasha elembetshielo efula lo kɛnɛ kendana la woho wakayaokaka Elidja. Koko kɛnɛ keyaso l’eshikikelo tshɛ ele ɔnɛ Jehowa akashihodiaka dimɛna lande na kakayaokaka Elidja opoko ndo nde akeyaka dimɛna dimɛna woho wakandakoke mbokimanyiya.

5. Ngande wakashikikɛ Jehowa Elidja dia nde komonga opoko?

⁵ Jehowa akakimanyiya Elidja lo toho efula. Nde akakeketsha Elidja dia ntɛkɛta. Mbala hiende y’etondo Nde akambola Elidja ate: “Asalayɛ lanɛ na?” (1 Ku. 19:9, 13) Mbala tshɛ, Jehowa akahokamɛ Elidja etena kakandɔkɛnɛmɔlɛka kɛnɛ kaki l’otema ande. Jehowa akakadimola Elidja lo mɛnama le nde ndo lo mbɛnya dia Nde ekɔ Kanga-Wolo-Tshɛ. Jehowa akashikikɛ Elidja nto dia nde aki l’asekande atɛmɔdi efula. (1 Ku. 19:11, 12, 18) Aha la taamu, Elidja akakeketshama l’ɔkɔngɔ wa nde ndjiholɛ Jehowa otema ande ndo mboka okadimwelo Ande. Jehowa akasha Elidja elimu w’ohomba efula. Nde akɔlɔmbɛ dia nkita Hazaɛlɛ esɔ dia monga nkumekanga ka Suriya ndo Jehu dia monga nkumekanga k’Isariyɛlɛ, ndo Elisha oko omvutshi. (1 Ku. 19:15, 16) Lo mbisha Elidja elimu ɛsɔ, Jehowa akokimanyiya dia ndeka mbika washo l’akambo w’amɛna. Nzambi akawosha nto ɔngɛnyi wa ma ma, mbuta ate Elisha. Ngande wakokayɛ nongola ekimanyielo ka Jehowa etena kayaokayɛ opoko?

6. Kakɔna kakokayɛ nɔmba etena kayaokayɛ opoko? (Osambo 62:8)

⁶ Jehowa kɔlɔmbaka dia wɛ mbɔlɔmbaka. Nde mɛnaka ekakatanu wele layɛ ndo nde koshikikɛka dia nde ayohokamɛka alɔmbɛlɔ ayɛ ntena tshɛ. (1 Tɛs. 5:17) Nde ngɛnangɛnaka dia mpokamɛ atɛmɔdi ande. (Tok. 15:8) Kakɔna kakokayɛ nsala etena kayaokayɛ opoko? Kɛnɛmɔlɛ Jehowa otema ayɛ oko wakasale Elidja. (Adia Osambo 62:8.) Tɛnde ekakatanu ayɛ ndo woho wayaokayɛ l’ɔtɛ w’ekakatanu akɔ. Lɔmba Jehowa dia nde kokimanyiya dia wɛ ndɔshana l’ekakatanu ayɛ. Ɛnyɛlɔ, naka wɛ ekɔ lo ndjaoka opoko ndo ekɔ lo mboka wɔma nsambisha la kalasa, kete lɔmba Jehowa dia nde kosha dihonga dieyɛ l’ohomba dia nsala dui sɔ. Wɛ koka mbɔlɔmba kaanga lomba dia nembetshiya mbetawɔ kayɛ l’ɔkɔmi tshɛ. (Luka 21:14, 15) Naka wɛ ekɔ lo ndɔshana la tokanyi ta kɔlɔ, kete lɔmba Jehowa dia kokimanyiya dia wɛ nsawola l’Okristo ɔmɔtshi wambotshunda lo nyuma dikambo sɔ. Wɛ koka nɔmba Jehowa dia nde nkimanyiya onto ɔsɔ dia nde kohokamɛ ndo ndjadja lo dihole diayɛ. Kɛnɛmɔlɛ Jehowa otema ayɛ, yanga dia mɛna woho wakadimolande alɔmbɛlɔ ayɛ ndo etawɔ ekimanyielo k’anto akina; ko wɛ hatoyaoka opoko w’efula.

7. Kakɔna kamboyeka oma l’ɛnyɛlɔ ka Mauricio?

⁷ Jehowa akatosha sho tshɛ olimu w’ohomba efula wa nsala. Wɛ koka monga l’eshikikelo dia nde mɛnaka ndo ngɛnangɛnaka tshɛ kasalayɛ dia nkotsha ɛkɛndɛ ayɛ wa l’etshumanelo ndo l’olimu w’esambishelo. (Os. 110:3) Ngande wele ntetemala monga l’olimu efula koka kokimanyiya diaha wɛ ndjaoka opoko? Tɔsɛdingole ɛnyɛlɔ k’ɔnangɛso ɔmɔtshi l’ɔlɔngɔlɔngɔ lelɛwɔ Mauricio.b Yema tshitshɛ l’ɔkɔngɔ wa Mauricio batizama, ɔngɛnyi ande ɔmɔtshi wa ma ma akatatɛ ntshika akambo wa mɛtɛ yema yema. Mauricio mbutaka ate: “Lam’akamɛnyi woho wakandatshike Jehowa, lakashisha wɛkamu ami. Lakayambola dia kana dimi koka nkotsha dɔkɔlɔkɔ diami ndo ntetemala ntshikala lo nkumbo ka Jehowa. Lakayaoke opoko ndo lakafɔnya dia ndooko onto lakeyaka woho wakamayaokaka.” Kakɔna kakakimanyiya Mauricio? Nde mbutaka ate: “Lakasambishaka efula. Dui sɔ diakakimanyiya dia ntshika kanyiyaka paka lo dikambo diami to ndo lo woho wakamayaokaka. Laki l’ɔngɛnɔngɛnɔ ndo dimi kondjaoka opoko etena kakamasambishaka kaamɛ l’anto akina.” Lo mɛtɛ, kaanga etena kahatakoke nsambisha kaamɛ l’asekaso ambetawudi okoko l’okoko, sho keketshamaka lo nsambisha kaamɛ la wɔ, ɛnyɛlɔ lo tshimbo ya mikanda kana ya telefɔnɛ. Kakɔna nto kakakimanyiya Mauricio? Nde kotshaka ate: “Laki nto l’akambo efula wa nsala l’etshumanelo. Lakasalaka tshɛ dia nɔngɔsɔla ndo nsala ɛkɛndɛ w’ombeki. Ɛkɛndɛ ɛsɔ wakakimanyiya dia dimi mboka dia Jehowa ndo anto akina mbɔsakami la nɛmɔ.”

JEHOWA TOKIMANYIYAKA ETENA KAYAOKASO DIA TAMBƆKƆMƆ L’ƆTƐ W’EHEMBA WA WOLO

8. Shɛngiya yakɔna yakoka monga l’ekakatanu wa wolo le so?

⁸ Sho nongamɛka dia tayohomana l’ekakatanu lo nshi y’ekomelo nyɛ. (2 Tim. 3:1) Koko, ekakatanu wa weho la weho koka tokomɛ la shashimoya. Sho koka ndɔshana l’okakatanu wendana l’ekondjelo, okakatanu wendana la hemɔ kɛmɔtshi ka wolo kana mvusha lakiso ɔmɔtshi la ngandji. Lo ntena dia ngasɔ, sho mbeyaka nkɔmɔ, djekoleko naka ekakatanu waya nshila kodje kana ekakatanu efula wa wolo tokomɛ l’etena kakɔ kaamɛ. Koko, tohɔ dia Jehowa ekɔ lo mɛna ekakatanu aso ndo l’ekimanyielo kande sho kokaka mbikikɛ oseka ohemba tshɛ l’eshikikelo tshɛ.

9. Shila ehemba ɛmɔtshi wakahomana la Jɔbɔ.

⁹ Tɔsɛdingole woho wakakimanyiya Jehowa Jɔbɔ pami ka kɔlamelo. Nde akadiɛnɛ l’ehemba efula wa wolo l’etena ka tshitshɛ keto. Lushi lɔmɔtshi, wakatɛ Jɔbɔ dia wambova ndo wambodiaka nyama yande tshɛ, mbidja ndo ekambi ande l’anande wa ngandji. (Jɔbɔ 1:13-19) Yema tshitshɛ l’ɔkɔngɔ, etena kakinde akadiɛnɛ la lɔkɔnyɔ l’efula, Jɔbɔ akandama la hemɔ ka wolo efula. (Jɔbɔ 2:7) Kɛnɛ kakakomɛ Jɔbɔ kaki kɔlɔ efula diakɔ diakandate ate: “Lambohetsha lɔsɛnɔ lami; dimi handjolanga ntetemala nsɛna.”​—Jɔbɔ 7:16.

10. Ngande wakasha Jehowa Jɔbɔ kɛnɛ kaki lande ohomba dia mbikikɛ ehemba ande? (Enda osato wele lo lohoso.)

¹⁰ Jehowa akakokɛka Jɔbɔ. Lam’ele Jehowa akalangaka Jɔbɔ, Nde akawosha kɛnɛ kakinde l’ohomba dia mbikikɛ ehemba ande ndo ntshikala la kɔlamelo. Jehowa akatɛkɛta la Jɔbɔ ndo akawohola lomba lande laha l’elelo ndo woho wakokɛnde ditongami diande la ngandji tshɛ. Nde akatɛkɛta dikambo dia nyama efula yokama wɔma. (Jɔbɔ 38:1, 2; 39:9, 13, 19, 27; 40:15; 41:1, 2) Jehowa akakambe nto l’ɔlɔngɔlɔngɔ ɔmɔtshi wa kɔlamelo wakawelɛka Elihu dia nkeketsha ndo nsamba Jɔbɔ. Elihu akoshikikɛ dia Jehowa mfutaka nshi tshɛ atɛmɔdi Ande l’ɔtɛ w’ekikelo kawɔ. Koko Jehowa akatshutshuya nto Elihu dia mbisha Jɔbɔ alako amɔtshi woludi la ngandji. Elihu akakimanyiya Jɔbɔ dia ntshika nkanyiya efula paka lo dikambo diande lo mbohola dia sho tekɔ totshitshɛ efula lo mbɛdika la Jehowa Otungi w’andja ɔnɛ. (Jɔbɔ 37:14) Jehowa akasha Jɔbɔ olimu okina nto; nde akawotɛ dia nɔmba dikambo di’asekande asato wakasale pɛkato. (Jɔbɔ 42:8-10) Ngande watosukɛ Jehowa ɛlɔ kɛnɛ etena kadiɛnɛso l’ekakatanu wa wolo?

11. Ekeketshelo kakɔna katosha Bible etena kahomanaso l’ekakatanu?

¹¹ Jehowa hayɔtɛkɛta la so mbala kakɔ ɔtɔi oko wakandatɛkɛta la Jɔbɔ, koko nde tɛkɛtaka la so lo tshimbo y’Ɔtɛkɛta ande, Bible. (Rɔmɔ 15:4) Nde tokeketshaka lo tosha elongamelo ka lo nshi yayaye. Tɔsɛdingole tokanyi tɔmɔtshi ta lo Bible takoka tokeketsha etena kadiɛnɛso l’ehemba. L’Afundelo, Jehowa toshikikɛka dia ndooko ɛngɔ, mbidja ndo ehemba wa wolo wakoka “tokakitola la ngandji kande.” (Rɔmɔ 8:38, 39) Nde toshikikɛka nto dia “nde ekɔ suke la wanɛ tshɛ wawelɛ” lo dɔmbɛlɔ. (Os. 145:18) Jehowa totɛka dia naka sho ndjaɛkɛ le nde, kete sho koka monga l’akoka wa mbikikɛ oseka ohemba tshɛ ndo monga l’ɔngɛnɔngɛnɔ kaanga etena kasowaso. (1 Kɔr. 10:13; Jak. 1:2, 12) Ɔtɛkɛta wa Nzambi toholaka nto di’ehemba aso wekɔ wa lo tshanda mɔtshi tsho lo mbɛdika la difuto diatolakande dia lɔsɛnɔ la pondjo. (2 Kɔr. 4:16-18) Jehowa toshaka elongamelo ka shikaa dia nde ayonya kɛnɛ kele lo kiɔkɔ y’ekakatanu aso tshɛ, mbuta ate Satana Diabolo ndo wanɛ wele kɔlɔ oko nde. (Os. 37:10) Onde wɛ ambokimɛ avɛsa amɔtshi wa lo Bible wakeketsha wakoka kokimanyiya dia ndjokikɛ ehemba wa lo nshi yayaye?

12. Kakɔna kalongamɛ Jehowa dia sho nsala naka sho nangaka nkondja wahɔ tshɛ lo tshɛ oma l’Ɔtɛkɛta ande?

¹² Jehowa nangaka dia sho tshungolaka etena ka mbadiaka Bible mbala la mbala ndo kanaka yimba efula la kɛnɛ kadiaso. Etena kakambaso la kɛnɛ kekaso, mbetawɔ kaso keketalaka ndo sho ndekaka ndjasukanya la Shɛso lele l’olongo. Etombelo wayonga la dui sɔ ele, sho keketalaka dia mbikikɛ ehemba. Jehowa mbishaka nto wanɛ wayaɛkɛ l’Ɔtɛkɛta ande nyuma kande k’ekila. Ndo nyuma kande k’ekila toshaka “wolo woleki wɔnɛ wokongaka l’onto” dia mbikikɛ oseka ohemba tshɛ.​—2 Kɔr. 4:7-10.

13. Ngande wele mbo ya ndɛ ya lo nyuma yatosha “ɔhɔmbɔ wa kɔlamelo ndo kɛsɔ” tokimanyiyaka dia mbikikɛ ehemba?

¹³ L’ekimanyielo ka Jehowa, “ɔhɔmbɔ wa kɔlamelo ndo kɛsɔ” ekɔ lo ntondja asawo efula, tovidɛo, mishiki wakadjama l’eshinga wakoka tokimanyiya dia monga la mbetawɔ ka wolo ndo ntetemala ntshikala suke suke la Jehowa. (Mat. 24:45) Sho pombaka nsala la wolo dia nkondja wahɔ tshɛ lo tshɛ oma lo mbo ya ndɛ ya lo nyuma shɔ. Atete edja kadiyɛso kɛmɔtshi kadjasɛ l’États-Unis akɛnya lowando lande lo mbo ya ndɛ ya lo nyuma shɔ tshɛ lo mbuta ate: “L’ɛnɔnyi 40 wamometsha l’olimu wa Jehowa, olowanyi ami wakadjama l’ohemba mbala ko mbala.” Nde akahomana l’ehemba efula, mbuta ate tshɛnde ka pami akadiakema oma le shufɛlɛ mɔtshi yakadjɔ wanu, ambutshi ande wakandama la hemɔ kɛmɔtshi ka wolo kakatɔlɛ lo nyɔi ndo ndaamɛ akoke hemɔ ka kansɛrɛ mbala hiende y’etondo. Kakɔna kakokimanyiya dia mbikikɛ? Nde nembetshiyaka ɔnɛ: “Jehowa akayakiyanyaka nshi tshɛ dikambo diami. Mbo ya ndɛ ya lo nyuma yatondjande lo tshimbo y’ɔhɔmbɔ wa kɔlamelo ndo kɛsɔ, mbakakimanyiya dia mbikikɛ. Diɛsɛ la mbo yakɔ, dimi koka mbita oko wakate Jɔbɔ ate: ‘Polo lam’ayomovɔ, dimi hantotshika olowanyi ami!’”​—Jɔbɔ 27:5.

14. Ngande wakamba Jehowa l’asekaso atɛmɔdi dia tosukɛ lo ntena dieso l’ekakatanu? (1 Tɛsalɔnika 4:9)

¹⁴ Jehowa mbetshaka ekambi ande dia vɔ mbokana ngandji ndo keketshana lam’asawɔ lo ntena dia paa. (2 Kɔr. 1:3, 4; adia 1 Tɛsalɔnika 4:9.) L’ɛnyɛlɔ k’Elihu, anangɛso l’akadiyɛso tokeketshaka dia ntshikala la kɔlamelo etena kadiɛnɛso l’ekakatanu. (Ets. 14:22) Ɛnyɛlɔ, tende woho wakakeketshama Diane oma le ase etshumanelo kande ndo woho wakawokimanyiya dia ntshikala nge lo nyuma l’ɔkɔngɔ w’omɛnde diɛnɛ la hemɔ ka wolo. Nde mbutaka ate: “Aki dui dia wolo. Koko takɛnyi lonya la wolo la Jehowa ndo ngandji kande lo ngɔndɔ ya paa shɔ. Etshumanelo kaso kakatosukɛ l’akambo efula. Woho wakayaka anangɛso ndjotenda ndo wakawatelɛka lo telefɔnɛ akatokimanyiya dia mbikikɛ ehemba. Ntatɛ lam’akeye anangɛso l’akadiyɛso ɔnɛ laya bu l’akoka wa nkɛndjakɛndja mutuka ami, vɔ wakayashikikɛka dia mbeya dia kana laki l’akoka wa mbɔtɔ lo nsanganya ndo nsambisha etena kakahombamaka.” Ande ɔtshɔkɔ wele laso wa monga lo nkumbo ka lo nyuma kokana ngandji lee!

TEKƆ LA LOWANDO LO WOHO WATOKOKƐ JEHOWA LA NGANDJI TSHƐ

15. Lande na keso l’eshikikelo dia sho koka ndɔshana l’ekakatanu?

¹⁵ Sho tshɛ tayohomana la weho ɛmɔtshi w’ekakatanu. Koko, oko wambotodiɛna, hatongaki pondjo epoko etena kadiɛnɛso l’okakatanu ɔmɔtshi. L’ɛnyɛlɔ ka ombutshi ɔmɔtshi wa pami woludi la ngandji, Jehowa tokokɛka nshi tshɛ. Nde ekɔ lo wedi aso, ele suke dia mpokamɛ ɛsɛngɔsɛngɔ aso ndo nde nomɔlɔmɔka dia tosukɛ. (Isa. 43:2) Tekɔ l’eshikikelo dia sho kokaka ndɔshana l’ekakatanu nɛ dia nde toshaka kɛnɛ tshɛ keso l’ohomba dia mbikikɛ. Nde akatosha woshasha wa dɔmbɛlɔ, wa Bible ndo nde toshaka mbo ya ndɛ ya lo nyuma tshavutshavu ndo nde akatosha nkumbo k’onto l’ɔnango koludi la ngandji katokimanyiya lo ntena dieso lo dihombo.

16. Akokaso nsala dia ntetemala kokamɛ la ngandji tshɛ oma le Jehowa?

¹⁶ Tekɔ mɛtɛ la lowando lo woho watokokɛ Shɛso lele l’olongo! “Etema aso ngɛnangɛnaka le nde.” (Os. 33:21) Sho koka mɛnya Jehowa dia tekɔ la lowando lo woho watokokɛnde la ngandji tshɛ lo nkondja wahɔ oma lo tɛdikɔ tshɛ tɔsande dia tokimanyiya. Sho pombaka nto nsala kɛnɛ kahombaso nsala dia sho ntetemala kokamɛ oma le Nzambi. L’ɛtɛkɛta ekina, naka sho ntetemala nsala kɛnɛ tshɛ kakokaso nsala dia ntetemala nkitanyiya Jehowa ndo nsala kɛnɛ kele ɔlɔlɔ lo washo ande, kete nde ayotokokɛka pondjo pondjo!​—1 Pe. 3:12.