Mukanda w’oma le Olui-walɔmbɔla
OKO wayaso suke la mbɔtɔ lo dikongɛ di’akambo di’oyoyo diayaye, ekɔ ohomba sho tetemala kongɛ Jehowa. (Zef. 3:8) Ɔprɔfɛta Danyɛlɛ akate dia ‘Nzambi ekɔ Ombishodi w’awui woshami, ndo nde akeyanya awui wayosalema lo etena k’ekomelo ka nshi.’ (Dan. 2:28) Tekɔ mɛtɛ la diɛsɛ dia woke dia sɛna lo etena kakatama kɛsɔ ndo dia shihodia awui woshami waki Jehowa weyanyande nshi nyɛ!
Oma lo tshimbo ya ‘ɔhɔmbɔ wa kɔlamelo ndo wa kɛsɔ,’ Jehowa ekɔ lo tashola yema yema sangwelo diande dia tshumanya “ului a wuki” wa atɛmɔdi wa l’andja w’otondo lo “nshi y’ekumelu” y’ofukutanu nyɛ. (Mat. 24:45; Eny. 7:9; 2 Tim. 3:1) Isaya 2:2, 3 kɔndɔlaka otshumanyelo ɔsɔ wasalema ‘lo etena k’ekomelo ka nshi’ l’andja w’otondo. Ɔnɔnyi tshɛ, otshumanyelo ɔsɔ tetemalaka salema l’atei w’ofukutanu ndo wa awui wa ngala wambodiangana lo andja ɔnɛ.
Oma lo Ngɔndɔ ka ntondo polo ka dikumi l’ahende 2004, takɛnyi ohomba w’efula wa nɛnya ɛtɛkɛta waki Yeso wata ɔnɛ: ‘Nyotetemale sungukala ndo nyoyalɔngɔsɔlake.’ (Mat. 24:42, 44) Lo mɛtɛ, kɛnɛ kasalema lo andja ɔnɛ ekɔ la kitshimudi ya diambo le Akristo washihodia “tulimbitelu ta tena” ndo wasala awui lo yoho yɔtɔnɛ latɔ. (Mat. 16:1-3) Dia kotsha Ɔtɛkɛta ande, Jehowa ayotetemala monga la ekambi ande wakandalɔngɔsɔla dia sala olimu ande oyadi ɔlɔshamelo akɔna wakoka pomana lawɔ.
Oyadi welo wadja anto amɔtshi dia mbidja wekamu kana kumiya esambishelo ka Diolelo, anangɛso la akadiyɛso tetemalaka mbewoya akambo wa mɛtɛ ndo sangana kâmɛ. (Etsha 5:19, 20; Heb. 10:24, 25) Lo Ngɔndɔ ka samalo 2004, lo wodja wa Russie, tuminadi ta mbɛvi ta la Moscou takasukɛ yɛdikɔ yakɔshi tuminadi ta l’ɛse dia shimba elimu wa Ɛmɛnyi wa Jehowa ndo dia ndanya tshunda diawɔ dieyama le lɛɛta lo osomba ɔsɔ. Koko, anangɛso la akadiyɛso hawɔkɔmɔ etema; vɔ mbeyaka kɛnɛ kâlɔmba Jehowa ndo vɔ mbokitanyiyaka oko wende Omboledi lo dihole dia anto. (Etsha 5:29) Tekɔ la eshikikelo ɔnɛ Jehowa ayɔlɔmbɔla ekambi ande oyadi awui wa kɔlɔ wâsalɛ lɛɛta.
Lo République de Géorgie lo ɛnɔnyi engana wetshi ɛnɛ, anangɛso la akadiyɛso wakashisha diangɔ diawɔ, wakahɛnyahɛnyama oma le elui w’anto ndo wakɛnyi woho wakatshumbaka anto ekanda awɔ. Koko ndoko ehomɔ ɔtɔi kambotshulama dia ndɔ la so kambotondoya. (Is. 54:17) Lo ɔnɔnyi w’olimu 2004, Ɛmɛnyi wa Jehowa wa lo wodja wa Géorgie wakeyama nto le lɛɛta. Nsanganya ya weke yakasalema aha la wekamu ndo ekanda efula wakɔtɔ lo wodja ɔsɔ. Lofulo l’oyoyo la apandjudi ndo l’anto wakɔtɔ lo Eohwelo lakewoyama.
Lo wodja wa Arménie, wa Érythrée, wa République de Corée, wa Rwanda ndo wa Turkménistan, anangɛso la akadiyɛso wakadjama lo nkanu l’ɔtɛ wa mbetawɔ kawɔ. Kânga mbahɛnyahɛnyamawɔ, vɔ mbeyaka ɛkɔkɔ wa lo Afundelo wa ɛhɛnyɔhɛnyɔ awɔ ndo kɛsɔ mbakimanyiyaka dia vɔ nama olowanyi awɔ etena kalongamɛwɔ le Jehowa dia nde mbatshungola.—1 Pet. 1:6; 2 Pet. 2:9.
Naka wɛ sɛdingola alapɔlɔ w’olimu wele lo Tshoto y’Etangelo ya Ngɔndɔ ka hende 1, 2005, kete wɛ ayɔngɛnangɛna lo mɛna ɔlɔlɔ waki Jehowa. (Osam. 31:19; 65:11) Sho nongamɛka dia alapɔlɔ ɔnɛ ayokokeketsha dia wɛ tetemala kɛndakɛnda lo yoho yangɛnyangɛnya Nzambi.—1 Tes. 4:1.
Welo w’efula wekɔ lo mbidjama dia sambisha weho tshɛ w’anto akambo wa mɛtɛ. Ɛnyɛlɔ, waa bandɛ vidɛo, waa DVD, ndo dihomɔ dikina dia lo ɔtɛkɛta w’akanga a mpoke ndo ekanda wa lo Braille, mbuta ate lo ɔtɛkɛta w’akanga a totshungu wambɔlɔngɔswama dia kimanyiya akanga a mpoke ndo akanga wa totshungu wa lo nyuma. Apandjudi efula wa Diolelo wambeka ɛtɛkɛta w’angɛndangɛnda waya lo mbilo ka etshumanelo kawɔ.
Ndo nto, nkama ya elui wânganyi etale wambatema lo ahole wele wolo koma lɛkɔ. Filialɛ kɛmɔtshi kekɔ la elui ndekana 300 wânganyi etale wele la apandjudi ndekana 7000. Dikambo sɔ mɛnyaka dia tshumanelo di’eyoyo diayatema lo ahole asɔ lo nshi yayaye! Ndo nto, l’atei wa anto ndekana 16760607 wakɔtɔ lo Eohwelo, anto ndekana miliyɔ 10 komonga Ɛmɛnyi wa Jehowa. Kɛsɔ mɛnyaka dia dinela dia woke efula diekekɔ la ntondo.
Sho mbishaka Jehowa losaka l’ɔtɛ wa ɛtshɔkɔ ande ndo lo yoho yatokokɛnde lushi la lushi la ngandji. (Tuk. 10:22; Mal. 3:10; 1 Pet. 5:7) Wɛkamu aso wekɔ le Jehowa, oko watatatshu kâmɛ otsha la ntondo lo ‘etena kɛnɛ k’ekomelo ka nshi.’ Oyadi ekakatanu wakoka monga laso, nyɛsɔ toyele ɛtɛkɛta wa lo divɛsa diaso di’ɔnɔnyi 2005 wata ɔnɛ: “Ekimanyelu kami katuyakaka uma le [Jehowa].” (Osam. 121:2) Nyeye dia sho nyokaka ngandji ndo nɔmbaka dikambo dia wahɔ anyu.
Anangɛnyu,
Olui-walɔmbɔla w’Ɛmɛnyi wa Jehowa