Tosha ase wola elongamelo
1 Yeso akayashaka lo yoho ya lânde le ase wola. Kânga mbele lo waaso amɔtshi nde akashaka anto ekimanyielo ka l’emunyi ndo akâkɔnɔyaka hemɔ lo dihindo, nde akaleke mbidja yimba dia mbewoya ase wola “lukumu l’ololo.” (Mat. 11:5) Ɛlɔ kɛnɛ, ase wola ndo anto akina wekɔ lo tetemala kondja wahɔ oma l’olimu w’Okristo.—Mat. 24:14; 28:19, 20.
2 Elongamelo k’oshika: Mbala efula, esambisha wa lo Lokristokristo ndakaka ase wola ɔnɛ wayɔngɔna naka vɔ kimɔka diangɔ la lokaho tshɛ l’ɔtɛmwɛlɔ. Koko, Bible mbetshaka dia paka Diolelo diaki Nzambi mbayoshidiya wola ndo mbayokandola ekakatanu tshɛ wele l’anto. (Osam. 9:18; 145:16; Is. 65:21-23) Lo mɛnya ase wola kɛnɛ ketsha Bible mɛtɛ, sho mbashaka elongamelo ndo mbakimanyiyaka dia vɔ kotsha ehomba awɔ wa lo nyuma.—Mat. 5:3.
3 Afarisɛ wa lo nshi yaki Yeso kombidjaka ase wola yimba ndo wakawaelɛka la diɔnyɔ tshɛ ɔnɛ ‘am-ha·’aʹrets, mbuta ate “ase wodja.” Koko, Yeso akɔsaka “dikila diawo,” kana nsɛnɔ yawɔ oko ɛngɔ ka “ushinga a wulu.” (Osam. 72:13, 14) Sho kokaka mbokoya Yeso ndo ‘mboka ase wola kɛtshi’ lo mbaoka ngandji ndo lo ndjakiyanya lo dikambo diawɔ ndo di’ekakatanu awɔ. (Tuk. 14:31) Tatɔnyɔlake pondjo anto wasɛna lo waa kartie y’ase wola kana mengenga dia mbasambisha. Efula k’anto wetawɔ losango la Diolelo wekɔ ase wola.
4 Ekimanyielo kakokaso mbasha kakianɛ: Mbetsha ase wola wa lo bɛtshi diaso dia nkɛtɛ atɔndɔ wa lo Bible mbakimanyiyaka nto dia vɔ kitshakitsha etombelo w’oma lo wola oma ko kakianɛ. Ɛnyɛlɔ, Bible shimbaka wodjwelo wa wanu, tɔkɛnyɔ ta falanga, nɛndɛ, ɔnwɛlɔ wa mfɔka ndo ditshelo dikina diakonya onto lo wola. (Tuk. 6:10, 11; 23:21; 2 Kor. 7:1; Ef. 5:5) Afundelo keketshaka anto dia monga la losembwe ndo kamba olimu “l’utema otoi,” waonga wayangawɔ le ose olimu. (Kol. 3:22, 23; Heb. 13:18) Lo ndjela ɔkɔnya ɔmɔtshi wakasalema, le ewandji w’olimu efula losembwe ndo olowanyi mbele waonga walekawɔ nyanga le onto lasɛdingolawɔ dia mbidja l’olimu.
5 Jehowa ndjakiyanyaka lam’ɛnande ase wola wasowa. Kema edja Yeso Kristo ayanga tshungola “uhumbi lam’awulelelandi.” (Osam. 72:12) Lo etena kɛnɛ, tekɔ la diɛsɛ dia lânde dia samba anto akina, mbidja ndo ase wola la losango la lo Bible lasha elongamelo.