Jehowa tɛnyaka woho wa mbadia nshi yaso
“Utetsha lama mbala nshi yasu, dia shu ndjala la etema wa yimba.”—OSAMBU 90:12.
1. Lande na kasunganande sho nɔmba Jehowa dia nde tɛnya woho wa “mbala nshi yasu”?
JEHOWA NZAMBI mbele Otungi aso ndo Kiɔkɔ ya Lɔsɛnɔ laso. (Osambu 36:9; Enyelo 4:11) Ɔnkɔnɛ, ndoko onto okina lakoka tɛnya woho wa kamba l’ɛnɔnyi aso wa lɔsɛnɔ lo yoho ya dimɛna ko mboleka. Lâsɔ, omembi w’esambo aki mɛtɛ la shadiya ya nɔmba Nzambi ate: “Utetsha lama mbala nshi yasu, dia shu ndjala la etema wa yimba.” (Osambu 90:12) Sunganaka mɛtɛ sho sɛdingola la yambalo tshɛ Osambu wa 90, lɛnɛ atanaso dɔmbɛlɔ sɔ. Koko ntondotondo, nyɛsɔ tɔsɛdingole lo tshena pe osambo ɔsɔ wakasambiyama oma le Nzambi.
2. (a) Akɔna atawɔ dia nde mbakafunde Osambu wa 90, ndo ondo l’etena kakɔna kakandafunde osambo akɔ? (b) Ngande wahomba Osambu wa 90 monga la shɛngiya lo lɔsɛnɔ laso na?
2 Nɔtɛ ka la diko dia Osambu wa 90 (NW) mbelɛka osambo ɔnɛ, ɔnɛ vɔ wekɔ: “dɔmbɛlɔ diaki Mɔsɛ, onto laki Nzambi ka mɛtɛ.” Lam’ele osambo ɔnɛ mbikaka epole ɔsɛkɛ lo woho wele lɔsɛnɔ l’onto mondomondo, ondo vɔ wakafundama l’ɔkɔngɔ w’otshungwelo w’ase Isariyɛlɛ oma lo lɔhɔmbɔ la l’Edjibito ndo lo ɛnɔnyi 40 wakawekekɔ l’oswe wa shɛnga lam’akavu nunu di’anto wa lo lɔlɔnga lakahombe nshila oshiki l’ɔtɛ wakiwɔ komonga la kɔlamelo. (Walelu 32:9-13) Oyadi dihole diakɔna diakafundama Osambu wa 90, vɔ mɛnyaka dia lɔsɛnɔ l’anto wele kema kokele lekɔ mondo. Mbokɛmaka hwe lasɔ dia sho pombaka kamba la nshi yaso y’oshinga wolo nyɛ la lomba.
3. Awui akɔna watɛkɛtama l’Osambu wa 90?
3 Osambu wa 90, divɛsa 1 polo 6 mɛnyaka dia Jehowa mbele dihole diaso dia pondjo di’edjaselo. Osambu 90 Divɛsa 7 polo 12 mɛnyaka kɛnɛ kahombaso sala dia kamba l’ɛnɔnyi aso wa lɔsɛnɔ watete esadi esadi ɛnɛ lo yoho yetawɔma le Jehowa. Ndo oko wadiɛnya Osambu 90 divɛsa 13 polo 17, tekɔ la saki k’efula ka mbokama ngandji oma le Jehowa ndo kondja ɛtshɔkɔ ande. Lo mɛtɛ, osambo ɔnɛ hawendana mbala kakɔ ɔtɔi l’akambo watokomɛ lo lɔsɛnɔ oko weso ekambi waki Jehowa. Koko, sho tshɛ onto l’onto pombaka sɛdingola dionga dia ndjakimɔ le Nzambi diɛnyami l’osambo ɔnɛ wele oko dɔmbɛlɔ ndo monga la dionga diakɔ. Lâsɔ, oko weso wanɛ wamboyakimɔka le Nzambi, nyɛsɔke tɔsɛdingole Osambu wa 90 dimɛna.
Jehowa mbele “edjaselu kasu”
4-6. Jehowa ngande wende “edjaselu kasu” ka shikaa?
4 Omembi w’esambo tatɛka l’ɛtɛkɛta ɛnɛ ate: “We aki edjaselu kasu lu nonga tshe. Ntundu akuna watatungama, ndu we atatungi kete la andja, umaka mombokombola, we keli [Nzambi].”—Osambu 90:1, 2.
5 Le so, Jehowa lele “[Nzambi k]a pundju,” ekɔ “edjaselu” ka shikaa mbut’ate eshamelo kaso lo nyuma. (Romo 16:26) Hatoke wɔma nɛ dia nde ekɔ wonya tshɛ suke dia tokimanyiya oko wende ‘Ɔnɛ latokaka dɔmbɛlɔ.’ (Osambu 65:2) Lam’ele sho kitshaka ekiyanu aso l’anya wa Shɛso lele l’olongo oma lo tshimbo y’Ɔnande la ngandji, ‘ki ka Nzambi koleki yimba tshɛ namaka etema ndo tokanyi taso.’—Filipi 4:6, 7; Mateu 6:9; Joani 14:6, 14.
6 Tekɔ la lotui tshitshi la lo nyuma nɛ dia lo yoho ya didjidji, Jehowa ekɔ “edjaselo kasu” ka shikaa. Nde nɔngɔsɔlaka nto ndo “mvudu.” Ondo mvudu shɔ mendanaka la tshumanelo di’ekambi ande, ndo diɔ diekɔ ahole w’eshamelo wa lo nyuma lɛnɛ ele anami w’ɛkɔkɔ woludi la ngandji wekɔ lo ndjasha tshɛ di’aha sho monga la wâle. (Isaya 26:20; 32:1, 2; Etsha 20:28, 29) Ndo nto, amɔtshi wa l’atei aso wekɔ l’atei wa nkumbo yambokambɛ Nzambi edja efula ndo yamboshihodia dia nde ekɔ ‘edjaselo k’oshika ka lo nɔnga la nɔnga.’
7. Lo woho akɔna ‘wakatongama’ akona ndo nkɛtɛ ‘lo pâ’?
7 Jehowa akikɔ ntondo akona “watatungama” kana ka nkɛtɛ tongama oko ‘lo pâ.’ Lo kanyi y’anto, otongelo wa nkɛtɛ la kɛnɛ tshɛ kele lɔkɔ, mbidja ndo diangɔ diendana la chimie ndo diangɔ dikina dia wolo wolo akalɔmbɛ welo efula dia diɔ salema. Lam’atande ɔnɛ ntondo akona “watatungama” ndo nkɛtɛ tongama ‘lo pâ,’ omembi w’esambo mɛnyaka ɔngɛnɔngɛnɔ w’efula waki lande lo menda olimu w’efula wakasalema lam’akatonge Jehowa diangɔ sɔ. Onde sho lawɔ hatohombe monga l’ɔngɛnɔngɛnɔ ndo la lowando la woho ɔsɔ lo menda olimu wanya waki Otungi?
Jehowa ekɔ wonya tshɛ nsuke dia tokimanyiya
8. Etelo k’ɔnɛ Jehowa ekɔ Nzambi k’oma ko “mombokombola” alembetshiyatɔ?
8 Omembi w’esambo akembe ate: “Umaka mombokombola, we keli [Nzambi].” “Mombokombola” koka mendana la diangɔ diele la komelo koko otale w’etena kadiɔ konembetshiyama. (Etumbelu 31:16, 17; Heberu 9:15) Koko, l’Osambu 90:2 ndo l’ahole akina wa lo Afundelo w’ase Hɛbɛru “mombokombola” nembetshiyaka ‘pondjo pondjo.’ (Undaki 1:4) Timba taso hatokoke nshihodia kanyi y’ɔnɛ Nzambi okongaka nshi tshɛ. Koko, Jehowa komonga la etatelo ndo hongaki l’ekomelo. (Habakuka 1:12) Nde ayongaka nshi tshɛ la lɔsɛnɔ ndo nsuke dia tokimanyiya.
9. Omembi w’esambo akɛdika ɛnɔnyi kinunu wa lɔsɛnɔ l’anto l’ɛngɔ kakɔna?
9 Nzambi akatshutshuya omembi w’esambo dia mbɛdika ɛnɔnyi kinunu wa lɔsɛnɔ l’anto la etena ka mondo efula lo washo waki Otungi lokongaka pondjo pondjo. Nde akatɛ Nzambi lo funda ate: “We atukadimulaka antu ditshu dia kete, atutaka wati: Nyukaluli, nyu ana w’antu! Ne dia deku kinunu lu ashu aye, dieli uku lomo unya, uku djo ya ntundu l’utshu.”—Osambu 90:3, 4.
10. Ngande wakaloya Nzambi anto otsha lo “ditshu dia kete”?
10 Onto mvɔka, ndo Nzambi atokadimolaka “ditshu dia kete.” Mbut’ate, onto kalolaka otsha lo “ditshu dia kete” oko ɛngɔ kambohandjɔma kana kambetɛma efushi eto lo nkɛtɛ. Diakɔ diata Jehowa ate: ‘Kalola lo nkɛtɛ, nɛ dia oma lɔkɔ mbakayɔsama.’ (Etatelu 2:7; 3:19) Dikambo sɔ mendanaka l’onto tshɛ, oyadi kanga lokalo kana kanga ɔhɔdu, ɔngɔnyi kana wola nɛ dia ndoko onto lele kema kokele ‘lakoka tshungola onyande kana kimɔ tshungo le Nzambi dikambo di’ɔnango dia nde sɛna pondjo pondjo.’ (Osambu 46:6-9) Koko tekɔ mɛtɛ la lowando efula lo woho ‘wakakimɔ Nzambi ɛtɔi kande k’Ɔna lakandote, dia onto tshɛ longa la mbetawɔ le nde monga la lɔsɛnɔ la pondjo’!—Joani 3:16; Romo 6:23.
11. Lande na kakokaso mbuta dia kɛnɛ kɛnama dia kekɔ etena k’otale leso ekɔ etena ka mondo efula le Nzambi?
11 Lo washo waki Jehowa, oyadi Metusɛla lakasɛnɛ ɛnɔnyi 969 kokotsha lushi ɔtɔi. (Etatelu 5:27) Le Nzambi, ɛnɔnyi kinunu ekɔ oko luyi mbut’ate paka wenya 24 eto naka vɔ wambeta. Omembi w’esambo mɛnyaka nto dia le Nzambi, ɛnɔnyi kinunu wekɔ oko wenya ɛnɛi wasala onto djamu l’otsho. (Embadi 7:19) Mbokɛmaka hwe dia kɛnɛ kɛnama dia kekɔ etena k’otale leso ekɔ etena ka mondo efula le Jehowa, Nzambi ka pondjo.
12. Ngande ‘wakɛdia’ Nzambi anto?
12 Otshikitanyi la Nzambi lasɛna pondjo pondjo, lɔsɛnɔ laki anto la nshi nyɛ lekɔ mondo mɛtɛ. Omembi w’esambo mbutaka ɔnɛ: “We atetshaka antu uku elula k’ashi. Vo watuyalaka uku [“djɔ,” NW], watuyalaka la pindju uku adiyu w’omongela. La pindju, vo watomongaka, watuyalaka ashashi atu. Ku la dikolo, watuhimbwamaka, watolengelaka.” (Osambu 90:5, 6) Mɔsɛ akɛnyi nkama y’ase Isariyɛlɛ wavɔ l’oswe wa shɛnga, Nzambi ‘akâkɛdia’ oko l’elola. Etenyi k’osambo ɔnɛ kakakadimɔma ɔnɛ: “Wɛ kɛdjaka anto otsha lo djɔ ya nyɔi.” (New International Version) Lo wedi okina, otale wa lɔsɛnɔ l’anto wele bu kokele wekɔ oko “djɔ” y’etena ka mondo watekana oko djɔ y’otsho ɔtɔi.
13. Ngande weso paka oko “adiyu w’omongela,” ndo ngande wahomba dikambo sɔ monga la shɛngiya lo tokanyi taso?
13 Tekɔ ‘paka oko adiyo w’ɔmɔngɛla wele la pindju, vɔ watɔmɔngaka ndo watoyalaka ashashi’ kele la dikɔlɔ watɔlɛngɛka naka wambohomɔ yanyi ya wolo. Mɛtɛ, lɔsɛnɔ laso mbetaka esadi eto oko adiyo walɛngɛ paka lushi ɔtɔi loto. Lâsɔ aha sho kɛnya l’ɛngɔ k’oshinga wolo kɛsɔ. Koko, sho pombaka nyanga ɛlɔmbwɛlɔ kaki Nzambi dia mbeya woho wahombaso kamba la yema y’ɛnɔnyi aso wambotshikala lo dikongɛ nɛ di’akambo.
Jehowa tokimanyiyaka dia “mbala nshi yasu”
14, 15. Ngande wakakotshama Osambu 90:7-9 le ase Isariyɛlɛ?
14 Omembi w’esambo akatɛ Nzambi nto ate: “Shu tambutshumbama la kele kaye, ndu ududu aye ambutukitsha balakata. We atukitshaka ehedia asu la ntundu kaye, ndu kolo yasu ya lu usheshe lu usasi w’elundji kaye. Nshi yasu tshe yambeta lu kele kaye utu. Shu tatukumiyaka nyumu yasu la dimu dia nyoi.”—Osambu 90:7-9.
15 Ase Isariyɛlɛ waki komonga la mbetawɔ ‘wakatshumbama la nkɛlɛ ka Nzambi.’ ‘Ududu ande akakitsha tatala,’ kana ‘wakasongotɔ l’ɔtɛ wa nkɛlɛ kande.’ (New International Version) Amɔtshi ‘wakadiakema l’oswe wa shɛnga’ l’alanya waki Nzambi. (1 Koreto 10:5) Jehowa ‘akakitsha ehedia awɔ la ntondo kande.’ Nde akâlombosha l’ɔtɛ wa kɔlɔ yakawasalaka lo sɛkɛ ndo lo “usheshe,” mbut’ate pɛkato yakawashɛka yakonge ‘la ntondo k’elongi kande.’ (Tukedi 15:3) Oko wakawokama nkɛlɛ oma le Nzambi, ase Isariyɛlɛ waki kondjatshumoya ‘wakakumiya nyumu yawɔ la dimu dia nyɔi.’ Ɔnkɔnɛ, lɔsɛnɔ laso la mondo lekɔ oko lɔpɛpɛ leta l’ɛlɔmɔ aso oko hiɔtɛhɔtɛ y’anyanya.
16. Naka amɔtshi wekɔ lo sala pɛkato lo woshɛshɛ, ahombawɔ sala?
16 Naka tayosala pɛkato lo woshɛshɛ, kete teye dia sho koka mɛtɛ mbishɛ woho wa dionga sɔ paka lo washo w’asekaso anto l’etena kɛmɔtshi. Koko, kɔlɔ kakatashɛ kekɔ ‘la ntondo k’elongi kaki Jehowa’ ndo etsha aso wayolanya diɔtɔnganelo diele lam’asaso la nde. Dia nɔngɔsɔla diɔtɔnganelo diasaso la Jehowa sɔ, sho pombaka nɔmba dia kondja edimanyielo kande, tshika kɔlɔ yaso ndo mbetawɔ ekimanyielo ka lo nyuma k’oma le dikumanyi di’Akristo la lowando tshɛ. (Tukedi 28:13; Jakoba 5:14, 15) Ayonga mɛtɛ dimɛna efula naka sho sala dia ‘kumiya ɛnɔnyi aso la dimu dia nyɔi,’ tele l’elongamelo ka lɔsɛnɔ la pondjo.
17. Anto efula sɛnaka ɛnɔnyi engana eto ndo ɛnɔnyi akɔ ndola l’akambo akɔna?
17 Lo kɛnɛ kendana l’otale wa lɔsɛnɔ l’anto wele kema kokele, omembi w’esambo mbutaka ate: “Nshi ya lumu lasu nkumaka lu deku akumi esambili, wane wuleki wulu pulu ndu deku akumi enanei. Keli nshi yawo ndjalaka paka pa la asui. Yo yatushilaka esadi, ku shu nfumbo.” (Osambu 90:10) Anto efula sɛnaka ɛnɔnyi 70, ndo lam’akinde l’ɛnɔnyi 85, Kalɛbɛ akate dikambo dia wolo wa lânde waki lande. Koko anto amɔtshi wakalekanya ɛnɔnyi ɛsɔ, ɛnyɛlɔ Arɔna (123), Mɔsɛ (120), ndo Jashua (110). (Walelu 33:39; Euhwelu k’Elembe 34:7; Joshua 14:6, 10, 11; 24:29) Diakɔ diele, lɔlɔnga laki komonga la mbetawɔ lakatombe oma l’Edjibito, l’atei wa wanɛ wakasɔnama waki l’ɛnɔnyi tatɛ oma lo 20 otsha la diko wakavu la ntondo k’ɛnɔnyi 40 wakekekɔ anto l’oswe wa shɛnga shila. (Walelu 14:29-34) Ɛlɔ kɛnɛ, lo wedja efula lɔsɛnɔ l’anto efula komɛka paka lo lofulo l’ɛnɔnyi lakate omembi w’esambo. Ɛnɔnyi aso ndola paka la “pa la asui.” Vɔ mbetaka esadi esadi, ndo “[w]atushishoka uku dedi.”—Jobo 14:1, 2.
18, 19. (a) “Mbala nshi yasu, dia shu ndjala la etema wa [lo]mba” kɛdikɛdi na? (b) Okambelo aso wa la lomba ayototshutshuya dia sala dikambo diakɔna?
18 Omembi w’esambo akembe nto ate: “Akona ateyaka wulu wa kele kaye, lu yediko yahumbasu mbuka ududu aye woma? Utetsha lama mbala nshi yasu, dia shu ndjala la etema wa [lo]mba.” (Osambu 90:11, 12) Ndoko onto l’atei aso leya wolo wa nkɛlɛ kaki Nzambi tshɛ lo tshɛ kana woke woke w’odudu ande. Dikambo sɔ pombaka totshutshuya dia mbɔlɔmba dia nde “tetsha [woho wakokaso] mbala nshi yasu, dia shu ndjala la etema wa [lo]mba.”
19 Ɛtɛkɛta waki omembi w’esambo ekɔ dɔmbɛlɔ diɛnya woho walakanya Jehowa ekambi ande dia vɔ monga la lomba la mbeya mbɛdika ndo kamba la nshi yawɔ yambotshikala lo yoho yetawɔma le nde. Nongamɛ nsɛna ɛnɔnyi 70 ekɔ oko nongamɛ nsɛna yɛdikɔ ya nshi 25500. Oyadi ɛnɔnyi engana wambotɔsɛna, ‘hateye woho wayonga lɔsɛnɔ laso luyi nɛ dia tekɔ oko longe longa paka l’etena ka tshitshɛ keto ko nkombɔ.’ (Jakoba 4:13-15) Lam’ele ‘tena ndo akambo wa shashimoya tokomɛka sho tshɛ,’ hatokoke mbuta ɛnɔnyi engana wayotɔsɛna. Ɔnkɔnɛ, tɔlɔmbake dia kondja lomba la mbeya mbikikɛ ehemba, la mbeya nsɛna l’anto akina ndo la ndjasha tshɛ l’olimu wa Jehowa tatɛ oma ko kakiye. (Undaki 9:11; Jakoba 1:5-8) Jehowa tɔlɔmbɔlaka oma l’ekimanyielo k’Ɔtɛkɛta ande, ka nyuma kande ndo k’ɔlɔngɔswamelo ande. (Mateu 24:45-47; 1 Koreto 2:10; 2 Timote 3:16, 17) Okambelo wa la lomba laso totshutshuyaka dia ‘nyanga ntondo Diolelo diaki Nzambi’ ndo dia kamba la nshi yaso lo yoho yatombola Jehowa ndo yangɛnyangɛnya otema ande. (Mateu 6:25-33; Tukedi 27:11) Mɛtɛ, tɛmɔla Nzambi l’otema aso tshɛ hatotonyɛ ekakatanu aso tshɛ, koko, dikambo sɔ telaka ɔngɛnɔngɛnɔ w’efula.
Ɛtshɔkɔ wa Jehowa telaka ɔngɛnɔngɛnɔ
20. (a) Lo woho akɔna wotoka Nzambi “ketshi”? (b) Ngande watosalɛ Jehowa naka tambosala munga ka woke ko tambɛnya ndjatshumoya ka mɛtɛ?
20 Ayonga dikambo dia dimɛna efula mɛtɛ naka tayokoka ngɛnangɛna lo nshi ya lɔsɛnɔ tshɛ yambotshikala. Lo dikambo sɔ, Mɔsɛ akate ate: “We [Jehowa], etena kakona kayuyukalula? Uki ekambi aye ketshi! Utulutshaki la ngandji kaye ka shikaa [kana “ka kɔlamelo”] pindju tshe, dia shu ndjalaka la ongenongeno, la menaka olo nshi yasu tshe.” (Osambu 90:13, 14, nɔtɛ ka l’ɛse ka dikatshi) Nzambi hatshaka munga. Koko, nde mongaka la “ketshi” ndo koka “nkadimo” oma lo nkɛlɛ kande ndo tshika dia mbisha dilanya naka ɔhɛmwɛlɔ ande wambotshutshuya atshi wa kɔlɔ wele la ndjatshumoya dia vɔ tshikitanya ditshelo ndo dionga diawɔ. (Euhwelu k’Elembe 13:17) Ɔnkɔnɛ, oyadi tambosala munga ka woke, naka sho ndjatshumoya l’otema ɔtɔi, kete Jehowa ‘ayotɛnya ngandji kande ka shikaa’ ndo tayonga l’ɔkɔkɔ wa “ndjalaka l’ongenongeno.” (Osambu 32:1-5) Ndo naka sho monga la yoho ya lɔsɛnɔ yosembwe, kete tayɛna ngandji ka mɛtɛ katoka Nzambi ndo tayokoka “menaka olo nshi yasu tshe” mbut’ate lo nshi ya lɔsɛnɔ yambototshikalɛ.
21. Lo ndjela ɛtɛkɛta wele l’Osambu 90:15, 16, Mɔsɛ akandalɔmbaka mɛtɛ ondo?
21 Omembi w’esambo akalɔmbɛ oma k’ɛse otema ate: “Utongenyangenya nshi efula uku efula ka nshi yakayatusuyaka, uku efula ka deku diakatadienaka. Ulimu aye wenami le ekambi aye, ndu lutumbu laye le an’awo.” (Osambu 90:15, 16) Ondo Mɔsɛ akalɔmbaka Nzambi dia mbisha Isariyɛlɛ ɔngɛnɔngɛnɔ wɛdimi kana wele l’edja ka nshi yakiwɔ lo sui ndo l’ɛnɔnyi wakawadiɛnɛka. Nde akalɔmbɛ di’“ulimu” waki Nzambi wa tshɔkɔla ase Isariyɛlɛ mɛnama hwe le ekambi Ande ndo dia lotombo lande mɛnama hwe le anawɔ. Sho koka mɛtɛ nɔmba di’anto wele l’okitanyiya nongola ɛtshɔkɔ efula l’andja w’oyoyo wakalake Nzambi.—2 Petero 3:13.
22. Lo ndjela kɛnɛ kele l’Osambu 90:17, sho koka nɔmba dia dikambo diakɔna?
22 Osambu wa 90 komiyaka la dɔmbɛlɔ nɛ: “Ngandji ka mamba ka [Jehowa Nzambi k]asu kayali la su. Ushikike ulimu watutukambaka l’anya! Ee, ushikike ulimu w’anya asu.” (Osambu 90:17) Ɛtɛkɛta ɛsɔ mɛnyaka dia sho koka nɔmba Nzambi dia nde tshɔkɔla welo wadjaso l’olimu ande. Oyadi tekɔ akitami w’eso kana “ekoko ekina,” sho ngɛnangɛnaka dia ‘ngandji ka mamba ka Jehowa’ monga laso. (Joani 10:16) Tekɔ l’ɔngɛnɔngɛnɔ efula nɛ dia Nzambi ‘akashikikɛ olimu w’anya aso’ lo woho weso apandjudi wa Diolelo ndo lo weho ekina.
Totetemale la mbadia nshi yaso
23, 24. Ngande wakokaso kondja wahɔ lo kana yimba l’awui wele lo Osambu wa 90?
23 Naka sho kana yimba l’akambo wele lo Osambu wa 90, kete tayonyomoleka ndjaɛkɛ le Jehowa ɔnɛ lele “edjaselu kasu,” ndo nyomoleka mɛna ohomba wa nyanga ɛlɔmbwɛlɔ kande dia mbeya mbadiaka nshi yaso. Ndo naka sho tetemala la nyanga ndo la monga la lomba laki Nzambi, kete tayonga l’eshikikelo ɔnɛ tayokama ngandji oma le nde ndo kondja ɛtshɔkɔ ande.
24 Jehowa ayotetemala la tɛnya woho wahombaso mbadiaka nshi yaso. Ndo naka sho ndjela wetshelo ande, kete tayokoka tetemala la mbadiaka nshi yaso pondjo pondjo. (Joani 17:3) Naka sho mɛtɛ nangaka kondja lɔsɛnɔ la pondjo, kete Jehowa pombaka monga eshamelo kaso. (Jude 20, 21) Oko wayotodiɛna lo sawo diayela, dikambo sɔ nembetshiyama dimɛna l’ɛtɛkɛta w’ekeketshelo watanema lo Osambu wa 91.
Ngande wayoyokadimola?
• Ngande wele Jehowa “edjaselu kasu” ka shikaa?
• Lande na kakokaso mbuta ɔnɛ Jehowa ekɔ nshi tshɛ suke dia tokimanyiya?
• Ngande watokimanyiya Jehowa dia “mbala nshi yasu”?
• Kakɔna katokimanyiya dia “menaka olo nshi yasu tshe”?
[Osato wa lo lɛkɛ 9]
“Ntundu akuna watatungama,” Jehowa aki Nzambi
[Osato wa lo lɛkɛ 10]
Le Jehowa, ɛnɔnyi 969 wakasɛnɛ Metusɛla kokoka kânga lushi ɔtɔi
[Esato wa lo lɛkɛ 12]
Jehowa ‘akashikikɛ olimu w’anya aso’