Ɔtɛkɛta wa Jehowa wekɔ la lɔsɛnɔ

Akambo w’ohomba w’oma lo dibuku dia Ekondo wa ntondo

ƐNƆNYI oko 77 wakete tatɛ oma lam’akakalola ase Juda lo nkɛtɛ yawɔ oma lo lɔhɔmbɔ la Babilɔna. Tɛmpɛlɔ kakakama oma le nguvɛrnɛrɛ Zerubabɛlɛ akayala aya ɛnɔnyi 55. Ɔkɔkɔ wakaleke woke wakakalola ase Juda aki dia tolola ɔtɛmwɛlɔ wa mɛtɛ la Jerusalɛma. Koko, anto komonga la ohetoheto l’ɔtɛmwɛlɔ wa Jehowa. Ohomba w’ekeketshelo waki efula, ndo tɔ mɛtɛ mbasha dibuku dia lo Bible dia Ekondo wa ntondo.

Lâdiko dia ɔkɔndɔ w’ɔlɔndji w’anto, Ekondo wa ntondo mbɔsaka otale w’ɛnɔnyi oko 40, mbuta ate tatɛ oma lo nyɔi ka nkumekanga Saulo polo ndo lo nyɔi ka nkumekanga Davidi. Ɔlɔmbɛdi Ɛzɛra mbakafunde dibuku nɛ lo ɔnɔnyi 460 N.T.D. Dibuku dia Ekondo wa ntondo diekɔ ohomba le so nɛ dia diɔ tɛnyaka woho wakatɛmɔlaka anto lo tɛmpɛlɔ ndo diekɔ la ɔkɔndɔ wendana la ɔlɔndji wa dioho dia Mɛsiya. Oko wediɔ etenyi kɛmɔtshi ka Ɔtɛkɛta wa Nzambi, losango lele lɔkɔ keketshaka mbetawɔ kaso ndo pamiaka eokelo kaso ka Bible.​—Heberu 4:12.

ƆKƆNDƆ W’OHOMBA WA NKOMBO

(1 Ekondo 1:1–9:44)

Awui wendana la listɛ l’ɔlɔndji wakafunde Ɛzɛra wekɔ ohomba lo ɛkɔkɔ esato: dia shikikɛ ɔnɛ paka apami wakalongola lotshungɔ mbakakambaka oko ɛlɔmbɛdi, dia tokimanyiya woho wa shikikɛ okitɔ wa dioho la dioho, ndo dia nama ɔkɔndɔ w’ɔlɔndji wakonya le Mɛsiya. Ɔkɔndɔ mɛnyaka ɔlɔndji w’ase Juda tatɛ oma le pami ka ntondo. Nɔnga dikumi yakayala oma le Adama polo ndo le Nɔa, ndo nɔnga nkina dikumi polo ndo le Abarahama. L’ɔkɔngɔ wa nde shila ana wa Ishamɛlɛ, ana waki Ketura oseka wa Abarahama, ndo ana waki Esau, ɔkɔndɔ mbikaka epole ɔsɛkɛ lo ɔlɔndji wa waoho 12 w’ana wa Isariyɛlɛ.​—1 Ekondo 2:1.

Ɛzɛra akaleke kɔndɔla dikambo dia tokanula ta Juda nɛ dia oma le wɔ mbakaye ɔlɔndji w’ewandji wa nkumekanga Davidi. Ekɔ nɔnga 14 oma le Abarahama polo ndo le Davidi, ndo nɔnga nkina 14 polo ndo l’otshwelo w’otsha lo fumbe la Babilɔna. (1 Ekondo 1:27, 34; 2:1-15; 3:1-17; Mateu 1:17) Oma lâsɔ Ɛzɛra akasale listɛ la waoho wa lo ɛstɛ ka Jɔrɔdana, ndjelana la ɔlɔndji wa dioho di’ana wa Lɛwi. (1 Ekondo 5:1-24; 6:1) Oma lâsɔ, Ɛzɛra akasale ovuswelo wa waoho akina waki lo lɛkɛ l’owɛstɛ la ɔkɛdi wa Jɔrɔdana ndo akakɔndɔla awui tshɛ wendana la ɔlɔndji wa dioho dia Bɛndjamina. (1 Ekondo 8:1) Ndo nkombo y’anto wa ntondo wakadjasɛka la Jerusalɛma l’ɔkɔngɔ w’otshwelo awɔ lo lɔhɔmbɔ la Babilɔna mbofundami.​—1 Ekondo 9:1-16.

Ekadimwelo lo ambola w’oma lo Afundelo:

1:18​—Akɔna aki she aki Shɛla, Kayinana kana Arapakeshadɛ? (Luka 3:35, 36) Arapakeshadɛ aki she aki Shɛla. (Etatelu 10:24; 11:12) Tshɛkɛta “Kayinana” yele lo Luka 3:36 mbeyaka monga wengeswelo wa kɔlɔ wa tshɛkɛta “Kaladiya.” Naka ɔsɔku mbediɔ, kete efundelo wa l’etatelo mbeyaka mbadiema ɔnɛ “on’a Kaladiya Arapakeshade.” Kana mbeyaka monga ko tshɛkɛta Kayinana ndo Arapakeshadɛ nembetshiyaka onto akɔ lâmɛ. Hatohombe mbohɛ dia tshɛkɛta “on’a Kayinana” hatanema lo efundelo ɛmɔtshi wa l’anya.​—Luka 3:36.

2:15​—Onde Davidi aki ɔna l’esambele laki Jɛse? Ndooko. Jɛse aki la ana enanɛi, ndo Davidi mbaki ɔna la kose. (1 Samuele 16:10, 11; 17:12) Ondo ɔna Jɛse ɔmɔtshi akavu aha la nde mbota ɔna. Lam’ele ɔna ɔsɔ takandahombe monga la shɛngiya lo ɔkɔndɔ w’ɔlɔndji, Ɛzɛra akatshike lokombo lande.

3:17​—Lande na kele lo Luka 3:27 Shealatiyɛlɛ ɔnaki Jekoniya, mbelamɛka ɔnɛ ɔnaki Neri? Jekoniya aki she aki Shealatiyɛlɛ. Koko, ondo Neri akasha Shealatiyɛlɛ ɔnande la womoto oko wadi. Lâsɔ Luka tɛkɛtaka dia okilo waki Neri oko wakandasale dikambo dia Yɔsɛfu, lo mbowelɛ ɔnɛ ɔnaki Heli she aki Mariya.​—Luka 3:23.

3:17-19​—Ngande wakotɔka Zerubabɛlɛ, Pedaya ndo Shealatiyɛlɛ? Zerubabɛlɛ aki ɔnaki Pedaya, laki ɔnango aki Shealatiyɛlɛ. Koko, tena dimɔtshi Bible mbelɛka Zerubabɛlɛ ɔnɛ ɔnaki Shealatiyɛlɛ. (Mateu 1:12; Luka 3:27) Dui sɔ diakakoke ndjala ngasɔ nɛ dia Pedaya akavu ndo Shealatiyɛlɛ mbakodia Zerubabɛlɛ. Kana ondo lam’ele Shealatiyɛlɛ akavu aha tshika ɔna, Pedaya akatshuke wadɛnde, ndo Zerubabɛlɛ mbaki ɔna l’enondo la lo tshuki sɔ.​—Euhwelu k’Elembe 25:5-10.

5:1, 2​—Nongola lotshungɔ la ɔna enondo akalembetshiyaka dui diakɔna le Yɔsɛfu? Dui sɔ diakalembetshiyaka dia Yɔsɛfu akalongola tenyi pende di’okitɔ. (Euhwelu k’Elembe 21:17) Ɔnkɔnɛ nde akayala she aki waoho ahende, mbuta ate Efarayima la Manase. Ana akina wa Isariyɛlɛ wakalongola vɔ tshɛ paka etenyi ɔtɔi lo dioho tshɛ.

Wetshelo le so:

1:1–9:44. Ɛlɔndji w’anto wa mɛtɛ mɛnyaka dia ɔlɔngɔswɛlɔ w’otondo wa ɔtɛmwɛlɔ wa mɛtɛ mbika etshina lo awui wa mɛtɛ, koko aha lo toshimu.

4:9, 10. Jehowa akakadimola dɔmbɛlɔ diaki Jabɛza dia l’etete dia nde monga la wɔladi lo ɛtshi kande ka nkɛtɛ woho wa nde nyomoleka nɔngɔsɔla anto wakokaka Nzambi wɔma. Sho lawɔ pombaka nɔmbaka alɔmbɛlɔ w’oma k’ɛse otema dia lofulo l’atɛmɔdi waki Nzambi fula etena kakambaso la ohetoheto olimu wa mbetɛ anto ambeki.

5:10, 18-22. Lo nshi ya nkumekanga Saulo, dioho dia lo lɛkɛ la ɛstɛ ka Jɔrɔdana diakalɛndja ase Hangara kânga mbele dioho sɔ diakaleke efula oko mbala hiende. Dui sɔ diakonge ngasɔ nɛ dia alembe wa dioho sɔ wakayaɛkɛ le Jehowa ndo wakayange ekimanyielo oma le nde. Nyɛsɔ tonge la wɛkamu tshɛ le Jehowa etena kalɔshaso ta diaso dia lo nyuma la atunyi wotoleki efula.​—Efeso 6:10-17.

9:26, 27. Ase Lɛwi wakalamaka asoko wakikɔ la olimu w’ohomba efula. Vɔ wakalongola sapi ka ɛɔtwɛlɔ k’otsha lo ahole w’ekila wa lo tɛmpɛlɔ. Vɔ wakahombaka monga suke dia ndiholaka kuke lushi tshɛ. Takalongola ɔkɛndɛ wa sambisha anto wa lo ɛtshi kaso ka nkɛtɛ ndo mbakimanyiya dia vɔ tɛmɔla Jehowa. Shi sho pombaka mɛnya dia tekɔ anto wakoka anto akina mbɛkɛ etema lo ɛnyɛlɔ k’ase Lɛwi wakalamaka asoko?

DAVIDI AMBOLƐ OKO NKUMEKANGA

(1 Ekondo 10:1–29:30)

Ɔkɔndɔ tatɛka la woho wakavu nkumekanga Saulo nde la anande asato lo ta diakawalɔ la ase Filistiya lo Okongo wa Ngiliboa. Davidi, ɔna Jɛse amboyala nkumekanga lâdiko dia dioho dia Juda. Anto w’oma lo waoho tshɛ wakaye la Hɛbɛrɔna ndo wakawodje nkumekanga lâdiko dia Isariyɛlɛ tshɛ. (1 Ekondo 11:1-3) Yema tshitshɛ oma lâsɔ, Jerusalɛma akakɔ lo anya ande. L’ɔkɔngɔ diko, ase Isariyɛlɛ wakela ɔshɛtɛ wa sheke oya la Jerusalɛma “wayadji aelu w’ongenongeno, wayadi pungi la amama, wayahumi ekokoloko, wayahelenganya akembi la sese.”​—1 Ekondo 15:28.

Davidi akɛnya nsaki ka mbikɛ Nzambi ka mɛtɛ luudu. Oko wakandalamɛ Sɔlɔmɔna diɛsɛ sɔ, Jehowa akadje la Davidi sheke ya Diolelo. Etena kakatetemala Davidi ndɔshana la atunyi ande, Jehowa akawodjɛ etshumba efula. Rɛsasɛma wakandasale aha la dikimɔ akadiakisha anto 70 000. L’ɔkɔngɔ wa nde nongola ɛlɔmbwɛlɔ k’oma le ondjelo dia salɛ Jehowa ediakelo, Davidi akasombe dihole le Ɔrɔnana ose Jebusɛ. Davidi “akatshi diango di’ulimu efula” dia mbikɛ Jehowa luudu la “dimena dia mamba” lo dihole sɔ. (1 Ekondo 22:5) Davidi akalɔngɔsɔla elimu w’ase Lɛwi wɔkɔndwami dimɛna lo dibuku di’Ekondo wa ntondo oleki l’ahole akina wa lo Afundelo. Nkumekanga la wodja wakakimɔ weshasha la lokaho tshɛ dikambo dia tɛmpɛlɔ. L’ɔkɔngɔ wa nde mbolɛ ɛnɔnyi 40, Davidi akavu “aya usumbi wa lukusumbi, akunduya andja. Ndi aki la ongonyi efula ndu la nemo efula. Ku on’andi Solomona akulela lu dihuli diandi.”​—1 Ekondo 29:28.

Ekadimwelo lo ambola w’oma lo Afundelo:

11:11​—Lande na kele lofulo l’anto wakadiakema laki 300 koko aha 800 oko wɔkɔndwamidiɔ lo 2 Samuele 23:8? Pami kaki ɔnɔmbɔdi w’apami asato wakaleke wolo waki Davidi aki Jɔshɛba-Basishɛbɛtɛ. Apami akina ahende wa wolo waki Eleazara ndo Shama. (2 Samuele 23:8-11) Ɔkɔkɔ w’otshikitanu wakonge la ɛkɔndɔ ehende ɛsɔ mbeyaka monga ko vɔ tɛkɛtaka ditshelo diotshikitanyi diakasalema oma le onto akɔ lâmɛ.

11:20, 21​—Naa dihole diaki la Abishai lo diɛdika la nɛ diaki la apami asato wakaleke wolo waki Davidi? Abishai komonga l’atei w’apami asato wakaleke wolo wakakambɛka Davidi. Koko, oko wotamidiɔ lo 2 Samuele 23:18, 19, nde akonge lâdiko dia andɔshi wa ta 30 ndo nde akatshikitana la wɔ vɔ tshɛ. Abishai aki la lokumu laki oko l’apami asato wakaleke wolo nɛ dia nde akatshe akambo wa diambo oko wakasale Jɔshɛba-Basishɛbɛtɛ.

12:8​—Lo yoho yakɔna yaki dundji di’andɔshi wa ta wa Ngada oko dundji dia “tambwe”? Apami asɔ wa wolo waki kâmɛ la Davidi l’oswe. Divo diawɔ diakayala etale. Woho wakiwɔ la divo di’etale, akawasha ɛnamelo kele oko ka tambwe.

13:5​—“Okedi wa l’Edjibitu” kɛdikɛdi na? Anto amɔtshi wakafɔnyaka dia etelo kɛsɔ kakendanaka la ɔkɛdi ɔmɔtshi wa lo ndjale ka Nilɛ. Koko, mbokɛmaka dia etelo kɛsɔ nembetshiyaka ‘ɔkɛdi wa l’okidi w’Edjibito’ waki lo olelo wa nkɛtɛ ya Daka lo lɛkɛ la sidɛ-owɛstɛ.​—Walelu 34:2, 5; Etatelu 15:18.

16:30​—Kakɔna kalembetshiya tshɛkɛta “nyudidimi” lo kɛnɛ kendana la Jehowa? Tshɛkɛta “nyudidimi” kambema lanɛ lo yoho ya didjidji dia mɛnya wɔma wɔsɔhanyemi la dilɛmiɛlɔ wele la onto otsha le Jehowa.

16:1, 37-40; 21:29, 30; 22:19​—Yɛdikɔ yakɔna yendana la ɔtɛmwɛlɔ yakawatetemala kamba la yɔ olimu lo Isariyɛlɛ tatɛ l’etena kakawela Ɔshɛtɛ la Jerusalɛma polo ndo l’etena kakayokamaka tɛmpɛlɔ? Etena kakela Davidi Ɔshɛtɛ la Jerusalɛma ko ndjokitsha lo luudu la dipɛma lakandake, Ɔshɛtɛ komonga lo tabɛrnakɛlɛ lo edja k’ɛnɔnyi efula. L’ɔkɔngɔ wa vɔ mɛmbama, Ɔshɛtɛ akatshikala lo luudu la dipɛma la Jerusalɛma. Tabɛrnakɛlɛ kaki la Ngibiyɔna, lɛnɛ aki Zadɔka, Ɔlɔmbɛdi a Lâdiko nde la anango wakalambolaka elambo wakalɔmbamaka lo Ɛlɛmbɛ. Yɛdikɔ shɔ yakatetemala polo ndo lo etena kakayoshilaka tɛmpɛlɔ la Jerusalɛma. Lam’akashile tɛmpɛlɔ, wakela tabɛrnakɛlɛ oma la Ngibiyɔna oya la Jerusalɛma, ndo Ɔshɛtɛ wakadjama lo Dihole dioleki Ekila dia lo tɛmpɛlɔ.​—1 Khumi ya Dikanga 8:4, 6.

Wetshelo le so:

13:11. Lo dihole dia sho monga la lonyangu kana momalɛ Jehowa etena kahatatondoya lo welo wadjaso, sho pombaka sɛdingola dikambo diakɔ ndo ndjatshutshuya dia mbeya lande na kakatakite tatala. Aha la tâmu kɛsɔ mbakasale Davidi. Nde akakondja wetshelo oma lo munga kande ndo l’ɔkɔngɔ diko nde akayotondoyaka dia mbela Ɔshɛtɛ la Jerusalɛma lo kamba la yoho ya dimɛna yakalɔmbamaka.a

14:10, 13-16; 22:17-19. Sho pombaka ndjasukanya nshi tshɛ le Jehowa lo dɔmbɛlɔ ndo nyanga ɛlɔmbwɛlɔ kande la ntondo ka sho sala olimu tshɛ wayonga la shɛngiya lo lonyuma laso.

16:23-29. Sho pombaka ndjakiyanya ntondo dikambo dia ɔtɛmwɛlɔ wa Jehowa.

18:3. Jehowa kotshaka alaka ande. Oma lo tshimbo ya Davidi, nde akakotsha daka diakandasha Abarahama dia mbisha tokanula tande nkɛtɛ tshɛ y’ase Kanana, tatɛ “lu ndjali ka Edjibitu edja ndu lu ndjali ka wuki, ndjali k’Eyufarate.”​—Etatelu 15:18; 1 Ekondo 13:5.

21:13-15. Jehowa akadjangɛ ondjelo dia kumiya sui nɛ dia nde tɛtɛka solo la ntondo ka asui wa wodja Ande. Lo mɛtɛ, “ndi eli kanga ketshi efula.”b

22:5, 9; 29:3-5, 14-16. Kânga mbakinde konongola ɔkɛndɛ wa mbikɛ Jehowa tɛmpɛlɔ, Davidi akakɛnɛmɔla yimba ya lokaho. Lande na? Nɛ dia nde akashihodia dia kɛnɛ tshɛ kakandakondja akonge oma l’ɔlɔlɔ waki Jehowa. Dionga dia lowando dia ngasɔ mbahomba totshutshuya dia sho monga la yimba ya lokaho.

24:7-18. Ɛlɔngɔswɛlɔ wakasale Davidi wa kahanya ɛlɔmbɛdi lo elui 24 akatatɛ kamba olimu etena kakɛnama ondjelo waki Jehowa le Zekariya, she aki Joani Obatizanyi, ndo kakandewoya eotwelo ka Joani. Oko wakinde ɔmɔtshi la “l’onongo wa Abidja,” Zekariya akakambaka lo etena kɛsɔ lo tɛmpɛlɔ. (Luka 1:5, 8, 9) Ɔtɛmwɛlɔ wa mɛtɛ mendanaka l’anto wa mɛtɛ watɛkɛtama l’ɔkɔndɔ koko aha anto wa lo toshimu. Sho kondjaka ɛtshɔkɔ lo woho wakambaso la kɔlamelo kâmɛ la ‘ɔhɔmbɔ wa kɔlamelo ndo wa kɛsɔ’ lo kɛnɛ kendana la ɔtɛmwɛlɔ wokongɛmi waki Jehowa ɛlɔ kɛnɛ.​—Mateu 24:45.

Tokambe Jehowa la ‘anima w’ɔngɛnɔngɛnɔ’

Dibuku dia Ekondo wa ntondo hatɛkɛta paka dia ɔlɔndji wa waoho w’anto. Diɔ diekɔ nto ɔkɔndɔ wɛnya woho wakela Davidi ɔshɛtɛ wa sheke la Jerusalɛma, etshumba ande wa weke, ɛlɔngɔswɛlɔ wendana la wokelo wa tɛmpɛlɔ ndo woho wakakahanyema dioho dia ɛlɔmbɛdi dia Lɛwi lo elui wa olimu. Akambo tshɛ wakakɔndɔla Ɛzɛra lo dibuku dia Ekondo wa ntondo wakonge mɛtɛ la wahɔ le ase Isariyɛlɛ, akakimanyiya dia vɔ nyomonga la ohetoheto dia tɛmɔlaka Jehowa lo tɛmpɛlɔ.

Ande ɛnyɛlɔ kakatshike Davidi lo mbetshaka ɔtɛmwɛlɔ waki Jehowa lo dihole dia ntondo lo lɔsɛnɔ lande lee! Lo dihole dia nde ndjayangɛ waɛsɛ wa lânde, Davidi akayange dia ntsha lolango laki Nzambi. Sho keketshamaka dia kitanyiya dako diande dia kambɛ Jehowa ‘la anima w’ɔngɛnɔngɛnɔ.’​—1 Ekondo 28:9.

[Nɔtɛ ya l’ɛse ka dikatshi]

[Tablo/Esato wa lo lɛkɛ 8]

(Dia menda awui tshɛ, enda okanda)

Nɔnga y’oma le Adama polo ndo le Nɔa (ɛnɔnyi 1056)

4026 N.T.D. Adama

130 years ⇩

Sɛta

105 ⇩

Ɛnɔsha

90 ⇩

Kenana

70 ⇩

Mahalalɛlɛ

65 ⇩

Jarɛda

162 ⇩

Ɛnɔka

65 ⇩

Metusela

187 ⇩

Lamɛka

182 ⇩

2970 N.T.D. Eotwelo ka NƆA

Nɔnga y’oma le Nɔa polo ndo le Abarahama: (ɛnɔnyi 952)

2970 N.T.D. Nɔa

Ɛnɔnyi 502 ⇩

Sheme

100 ⇩

MVULA K’ELOLA 2370 N.T.D.

Arapakeshadɛ

35 ⇩

Shela

30 ⇩

Ebɛrɛ

34 ⇩

Pɛlɛngɛ

30 ⇩

Reu

32 ⇩

Serungɛ

30 ⇩

Nahɔra

29 ⇩

Tɛra

130 ⇩

2018 N.T.D. Eotwelo ka ABARAHAMA

Oma le Abarahama polo ndo le Davidi: nɔnga 14 (911)

2018 N.T.D. Abarahama

ɛnɔnyi 100

Isaka

60 ⇩

Jakɔba

oya.88 ⇩

Juda

⇩

Pɛrɛzɛ

⇩

Hɛzɛrɔna

⇩

Rama

⇩

Aminadaba

⇩

Nashɔna

⇩

Salamɔna

⇩

Bɔaza

⇩

Ɔbɛdɛ

⇩

Jɛse

⇩

1107 N.T.D. Eotwelo ka DAVIDI