Onde Nzambi ambokonyangiya?

“LANDE NA dimi? Lande na kaketawɔ Nzambi dia dikambo nɛ komɛmi?” Ɔsɔ ekɔ ambola wakayaoke Sidnei lele la ɛnɔnyi 24 ladjasɛ la Brésil. L’ɔkɔngɔ wa aksida wakandasale lo dihole diatowɔkɛnyaka suke l’ashi, nde akayala la paa kakayokonya dia mbidjasɛka paka lo nkɔsa k’etshimbi.

Asui waya oma lo aksida, hemɔ, nyɔi ka lakiso la ngandji, mpokoso y’oma lo diangɔ diakatongama kana ata koka nkonya anto esadi eto dia nyangɛ Nzambi. Ɔsɔ keema dikambo di’oyoyo. Jɔbɔ laki owandji wa nkumbo lakasɛnɛka lo nshi yakete akadiɛnɛ la asui ombikɔ kokɔ. Nde akayakese lo mbisha Nzambi onongo etena kakandate ɔnɛ: ‘Dimi kolelɛka dia nyanga ekimanyielo, koko wɛ hankadimola; Dimi memalaka, koko wɛ mendakami tsho. Wɛ ambonkadimwɛ la okonda tshɛ; wɛ ambɔndɔsha la wolo tshɛ wa lonya layɛ.’—Jobo 30:20, 21.

Jɔbɔ kombeyaka kiɔkɔ y’asui ande kana lande na kakokomɛka asui akɔ kana lande na kaketawɔ Nzambi dia vɔ mbookomɛ. Diɛsɛ ko, Bible tolembetshiyaka hwe ɔkɔkɔ wakasalema awui asɔ ndo woho wahombaso nsala la ntondo k’awui akɔ.

ONDE NZAMBI AKAKONGƐ DI’ANTO NSOWA?

Lo kɛnɛ kendana la Nzambi, Bible totɛka ɔnɛ: ‘Akambo ande wekɔ kokele, nɛ dia mboka yande tshɛ yekɔ losembwe. Nzambi ka kɔlamelo kele keema la wɛngɛngɛ; nde ekɔ ɔlɔlɔ ndo osembɔki.’ (Euhwelu k’Elembe 32:4) Lam’ele ekɔ ngasɔ, onde ekɔ dimɛna dia Nzambi ɔnɛ lele ‘ɔlɔlɔ ndo osembɔki’ nkongɛ dia anto nsowa kana nkamba la waa mpokoso dia mbasha dilanya kana dia mbaɛdia?

Lo wedi okina, Bible totɛka ɔnɛ: “Onto atotake lam’ayondohembama ate: ‘Nzambi kapemba.’ Nɛ dia Nzambi hakoke pembama l’akambo wa kɔlɔ ndo nde hahembe ndooko onto.” (Jakɔba 1:13) Lo mɛtɛ, sho mbekaka oma lo Bible dia oma l’etatelo Nzambi akasha anto lɔsɛnɔ la kokele. Nde akasha anto wa ntondo, mbuta ate Adama la Eva dihole dia dimɛna dia mbidjasɛ, kɛnɛ tshɛ kakiwɔ la tɔ ohomba lo lɔsɛnɔ ndo olimu wa nɛmɔ efula wa nsala. Nzambi akawatɛ ate: ‘Nyootane, nyofulane, nyolodia nkɛtɛ ndo nyoyiole.’ Adama la Eva komonga kaanga la ɔkɔkɔ ɔtɔi wa nyangɛɛ Nzambi.—Etatelu 1:28.

Koko ɛlɔ kɛnɛ, lɔsɛnɔ lambolola l’ekakatanu. Lo mɛtɛ, lo ɔkɔndɔ w’ana w’anto, anto wakahomana l’ekakatanu wa wolo. Divɛsa nɛ diekɔ mɛtɛ: “Ditongami tshɛ diekɔ lo ntetemala nkuma akumu kaamɛ ndo diekɔ lo nsowa kaamɛ polo ndo kakianɛ.” (Rɔmɔ 8:22) Kakɔna kakatombe?

LANDE NA KELE ASUI?

Dia nshihodia lande na kele asui, sho pombaka nkalola lo etena kakawatatɛ. Lo tshutshuyama oma le ondjelo w’ɔtɔmbɔki wakayelamɛka Satana Diabolo, Adama la Eva wakɔnyɔla atɔndɔ waki Nzambi wendana la ɔlɔlɔ la kɔlɔ oko wakɛnyaka didjango diaha vɔ ndɛ olowa w’oma lo ‘osongo w’ewo ka kɛnɛ kele ɔlɔlɔ la kɛnɛ kele kɔlɔ.’ Diabolo akatɛ Eva dia hawotovɔ naka vɔ mɔnyɔla Nzambi lo mamatanyɛ Nzambi ɔnɛ nde ekɔ kanga kashi. Satana akamamatanyiyɛ Nzambi nto dia nde nimaka anto ande lotshungɔ la nsɔna kɛnɛ kele ɔlɔlɔ la kɔlɔ. (Etatelu 2:17; 3:1-6) Satana akate dia anto wayonga la lɔsɛnɔ la dimɛna aha la ɛlɔmbwɛlɔ ka Nzambi. Awui asɔ tshɛ monyiyaka dimbola di’ohomba efula nɛ: Onde Nzambi sunganaka nɔmbɔla?

Diabolo akonyiya dikambo dikina. Nde akate dia anto tɛmɔlaka Nzambi paka l’eyango wa lokaki. Lo kɛnɛ kendana la Jɔbɔ laki pami ka kɔlamelo, Diabolo akatɛ Nzambi ate: ‘Shi wɛ akoodinge nde la luudu lande la diangɔ diande tshɛ la lokombo l’ekokelo? Koko dia awui ntshikitana, ohosembola lonya layɛ kele kɔmɔla kɛnɛ tshɛ kele la nde, ndooko onyake nde ayokodja mananu ko washo ayɛ.’ (Jobo 1:10, 11) Kaanga mbele ɛtɛkɛta waki Satana waaki otsha le Jɔbɔ, kɛsɔ akɛnyaka dia anto tshɛ wekɔ la eyango wa lokaki dia ntɛmɔla Nzambi.

WOHO WAKASALE NZAMBI DIA NƆNGƆSƆLA AKAMBO

Naa yoho yakaleke dimɛna yakakoke kandɔma akambo asɔ mbala ɔtɔi lo pondjo? Nzambi lele kanga lomba loleki tshɛ aki la yoho yoleki dimɛna ya nkandola awui asɔ, mbuta ate yoho yaha sho mboonyangɛ. (Rɔmɔ 11:33) Nde akɔshi yɛdikɔ ya ntshika di’anto ndjalɔmbɔla vɔamɛ l’etena kɛmɔtshi ndo ntshika dia etombelo mɛnya yoho y’ɛlɔmbwɛlɔ yoleki dimɛna.

Awui wa kɔlɔ weta la nkɛtɛ ɛlɔ kɛnɛ mɛnyaka hwe dia ɛlɔmbwɛlɔ k’anto kambokita tatala. Aha tsho mandji ya l’andja ɔnɛ yambokita tatala dia mbela wɔladi, lotui tshitshi ndo ɔngɛnɔngɛnɔ, koko yɔ yekɔ lo ndanya ndo nkɛtɛ. Kɛsɔ keketshaka mɛtɛ k’ɛtɛkɛta watanaso lo Bible wata ɔnɛ: ‘Onto latakɛndakɛnda bu l’akoka wa nɔmbɔla ekolo ande.’ (Jeremiya 10:23) Paka yoho yaki Nzambi ya nɔmbɔla mbakoka mbela wɔladi wa mɛtɛ, ɔngɛnɔngɛnɔ ndo ɔngɔnyi le anto nɛ dia ɔsɔ kele sangwelo diaki Nzambi.—Isaya 45:18.

Ngande mɛtɛ wayela Nzambi lɔsɛnɔ la dimɛna le anto lo ndjela sangwelo diande? Ohɔ dia Yeso aketsha ambeki ande dia nɔmbaka ɔnɛ: “Diolelo diayɛ diaye. Lolango layɛ latshame la nkɛtɛ oko watshamalɔ l’olongo.” (Mateo 6:10) Lo mɛtɛ, l’etena kahombama, Nzambi ayonya awui tshɛ wɛnya anto paa oma lo tshimbo ya Diolelo diande. (Danyele 2:44) Woola, hemɔ ndo nyɔi wayohamamɛ lo pondjo. Le akanga wa woola, Bible mɛnyaka dia Nzambi ‘ayotsha ose wola layanga ekimanyielo.’ (Osambu 72:12-14) Lo kɛnɛ kendana la akanga wa hemɔ, Bible ndakaka ɔnɛ: ‘Ndooko onto lodjashi lɛkɔ layota ate: Dimi lekɔ la hemɔ.’ (Isaya 33:24) Kaanga lo kɛnɛ kendana l’anto wakavu wanɛ wohɔma lo yimba ya Nzambi, Yeso akate ate: “Etena kekɔ lo ndjaye kele wanɛ tshɛ wele lo waombo wohɔma wayoka dui diande ko wayotomba.” (Joani 5:28, 29) Ɔsɔ ekɔ mɛtɛ alaka w’ɔngɛnɔngɛnɔ!

KƐNƐ KA NSALA DIAHA NYANGƐ NZAMBI

Suke l’ɛnɔnyi 17 l’ɔkɔngɔ w’aksida ande, Sidnei lakatatɛkɛtshi dikambo diande l’etatelo ka sawo nɛ akate ate: “Dimi kombisha Jehowa Nzambi onongo l’ɔtɛ w’aksida wakamasale, koko dimi mbetawɔka dia l’etatelo lakonyangɛ. Ekɔ nshi mɔtshi yele dimi mongaka la paa ndo dimi ndelaka etena kakanyiyami ɛkɔmɔ kami ka lo demba. Kaanga kediɔ ngasɔ, diɛsɛ la Bible, lamboshihodia dia aksida keema dilanya di’oma le Nzambi. Diakɔ diata Bible ɔnɛ: ‘Tena ndo awui wa shashimoya tokomɛka sho tshɛ.’ Nɔmbaka Jehowa ndo mbadiaka Afundelo ambokimanyiya dia monga la lonyuma la dimɛna ndo mɛna akambo la sso di’ɔlɔlɔ.”—Undaki 9:11; Osambu 145:18; 2 Kɔrɛtɔ 4:8, 9, 16.

Naka sho nkimɛ lo yimba lande na kele Nzambi aaketawɔ di’asui monga ndo woho wele etombelo awɔ wayanga mimɔ keema edja, kete kɛsɔ ayotokimanyiya dia ntondoya ɔhɛnyɔhɛnyɔ tshɛ wendana lonyangu lakoka monga la so otsha le Nzambi. Tekɔ l’eshikelo dia Nzambi ekɔ “ofutshi wa wanɛ wooyanga l’otema ɔtɔi.” Ndooko onto lele la mbetawɔ le nde ndo le Ɔnande layowanyangɛ.—Hɛbɛru 11:6; Rɔmɔ 10:11.