Nsango hiende y’oma le Nzambi

Sho koka mbɔsa Bible k’otondo dia tɔ kekɔ mɛtɛ losango l’oma le Nzambi. Shɛso lele l’olongo akatoshatɔ dia tetshaka. Laasɔ, tɔsɛdingole nsango hiende ya laande yakewoyama ambeta ɛnɔnyi ndekana 2 000. Ondjelo Ngabriyɛlɛ ‘latemalaka la ntondo ka Nzambi’ mbakewoya nsango yakɔ. (Luka 1:19) Lo tena diakɔna diakewoya ondjelo nsango y’ohomba shɔ?

Aki oya l’ɔnɔnyi 3 N.T.D. Lende akewoya Ngabriyɛlɛ losango la ntondo? Lo akona wa la Judeya, ondo suke la Jɛrusalɛma. Lɛnɛ akadjasɛka ɔlɔmbɛdi wa Jehowa wakawelɛka Zɛkariya. Nde la wadɛnde Elizabɛtɛ waya esombe, koko watote ndooko ɔna. Aki etena ka Zɛkariya ka nkamba olimu ande w’ɔlɔmbɛdi lo tɛmpɛlɔ ka Nzambi la Jɛrusalɛma. Lam’aki Zɛkariya lo tɛmpɛlɔ, Ngabriyɛlɛ akɛnama la shashimoya suke la elambwelo ka tshɔ.

Aha la taamu, dikambo sɔ diakokiya Zɛkariya wɔma efula. Koko, ondjelo akakitshakitsha wɔma waki la Zɛkariya lo mbotɛ ate: “Zɛkariya, tokake wɔma, nɛ dia ɛsɛngɔsɛngɔ ayɛ wambokɛma ndo wadɛyɛ Elizabɛtɛ ayokotɛ ɔna pami, kowɔlɛ Joani.” Ngabriyɛlɛ akakotsha dia Joani “ayonga woke lo washo wa Jehowa” ndo nde ayonga suke “dia nɔngɔsɔlɛ Jehowa anto.”​—Luka 1:13-17.

Zɛkariya akɛnaka dia dikambo sɔ hadiotosalema. Lande na? Nɛ dia nde la Elizabɛtɛ wa wadɛnde waya esombe. Ko Ngabriyɛlɛ akawotɛ ate: “Wɛ ayonga lomi ndo hatɔtɛkɛta polo lushi layokotshama akambo asɔ, nɛ dia wɛ hetawe ɛtɛkɛta ami.”​—Luka 1:20.

L’etena kɛsɔ, anto waki l’andja wakayambolaka lande na kambotoviya Zɛkariya edja efula l’etei. L’ekomelo nde akayotombaka, koko nde kokoka ntɛkɛta. Zɛkariya akasalaka tsho tɔjɛstɛ la anya ande. Mɛnamaka mɛtɛ dia nde ambotɛna dikambo dimɔtshi di’ehekesa etena kakinde lo tɛmpɛlɔ.

L’ɔkɔngɔ wa Zɛkariya nshidiya olimu ande lo tɛmpɛlɔ, nde akakalola lakande. Keema edja, Elizabɛtɛ akatshu diemi! Elizabɛtɛ akadjasɛ ndamɛ l’edja ka ngɔndɔ tshanu lo luudu mangana l’anto etale, etena kakandakongaka dia ɔna mbotɔ.

Oma laasɔ, Ngabriyɛlɛ akɛnama mbala ka hende nto. Le onto akɔna? Le osekaseka wakawelɛka Mariya laki atatshukama, lakadjasɛka lo nɔrdɛ ka Jɛrusalɛma l’ɛtshi ka nkɛtɛ kakawelɛka Ngalileya lo osomba wa Nazarɛtɛ. Kakɔna kakawotɛ ondjelo? Nde akate ate: “Wɛ ambohomɔ lokolo l’ɔlɔ lo washo wa Nzambi.” Ngabriyɛlɛ akanyomotɛ Mariya ate: “Eenda, wɛ ayotshɔ diemi, ayota ɔna pami, kowɔlɛ ɔnɛ Yeso.” Ngabriyɛlɛ akakotsha ate: “Nde ayoyala woke, wayowelɛ vate Ɔna aki Ɔnɛ-Laheme-Tshɛ, . . . ko nde ayonga Nkumekanga lo luudu la Jakɔbɔ pondjo pondjo ndo Diolelo diande hadiotonga l’ekomelo.”​—Luka 1:30-33.

Wɛ koka nshihodia woho wakayaoke Ngabriyɛlɛ lo diɛsɛ diakandalongola dia ndjewoya nsango hiende shɔ. Etena kadiɛso akambo efula wendana la Joani ndo Yeso, dui sɔ diayɛnya dimɛna lande na kele nsango y’oma l’olongo shɔ yekɔ ohomba efula.