Yeso ambɔkɔnɔla ɔna womoto ndo pami ka ehoke

L’ɔkɔngɔ wa nde manya Afarisɛ lo woho wayelawɔ mbekelo y’ashidi, Yeso akonɛɛ nde l’ambeki ande. Nde akatshu otsha lo ɛtshi ka nkɛtɛ ka Tura la Sidɔna la Fenikiya kilɔmɛtɛlɛ efula otsha lo nɔrdɛ owɛstɛ.

Yeso akatohanga lo luudu lɔmɔtshi, koko nde konanga di’anto mbeya dia nde ekɔ laawɔ. Koko, anto wakeye paka. Womoto ɔmɔtshi l’ose Ngirika lakootɔ l’ɛtshi ka nkɛtɛ kɛsɔ akaye le Yeso ko akatatɛ mbɔsɛngasɛnga ate: “Nkumadiɔndjɔ, Ɔna Davidɛ, omboke kɛtshi. Ɔdiɛngɛ wekɔ lo mpɛnyahɛnya ɔnami la womoto.”​—Mateo 15:22; Makɔ 7:26.

L’ɔkɔngɔ w’etena kɛmɔtshi, ambeki wa Yeso wakawotɛ ɔnɛ: “Tɛnde atshu, nɛ dia nde ekɔ lo ntetemala mpangɔhangɔ l’ɔkɔngɔ aso.” Yeso akakadimola lo mbalembetshiya ɔkɔkɔ wakinde kombodjaka yimba ate: “Dimi kotomama le anto tshɛ, paka le ɛkɔkɔ wakashishɔ wa lo luudu l’Isariyɛlɛ.” Koko womoto ɔsɔ kompekɔ. Nde akasukana ndo akakusama la ntondo ka Yeso asɛngasɛnga ate: “Nkumadiɔndjɔ, onkimanyiya!”​—Mateo 15:23-25.

Ondo dia pemba mbetawɔ kande, Yeso akatɛkɛta dia kanyi ya kɔlɔ yaki l’ase Juda otsha le ase wedja ekina ate: “Bu dimɛna mbɔsa mbo ya ndɛ y’ana ko mbokɛ ana wa mfɔ.” (Mateo 15:26) Lo ntɛkɛta dikambo dia “ana wa mfɔ,” Yeso akɛnya kɛtshi kakandokaka wanɛ waki komonga ase Juda. Ɛnamelo k’elungi kande ndo wondjo ande wa dui woludi la kɛtshi, akakɛnɛmɔla nto dui sɔ.

Lo dihole dia momala, womoto ɔsɔ aketawɔ dia ase Juda wakakananɛka kɔlɔ ndo akate l’okitshakitsha tshɛ ate: “Eelo, Nkumadiɔndjɔ, ko toko ana wa mfɔ ndɛka mfusa yakɔ oma lo mɛsa wa nkumɛwɔ.” Yeso akeye woho waki otema ande ɔlɔlɔ, ndo akate ate: “Womoto, wɛ mɛtɛ ekɔ la mbetawɔ k’efula. Diatshame le yɛ oko wakombolayɛ.” (Mateo 15:27, 28) Ndo kɛsɔ mbakasalema kaanga mbele ɔna womoto akɔ komonga lo dihole diakiwɔ! Etena kakakalola womoto ɔsɔ lakande, nde akatane ɔnande la womoto etami lo mbeto akakɔnwɛ tshɛ lo tshɛ, mbuta ate “ɔdiɛngɛ wakashidi ntomba”!​—Makɔ 7:30.

Oma l’ɛtshi ka nkɛtɛ ka Fenikiya, Yeso l’ambeki ande wakatenyanya ɛtshi ka nkɛtɛ kɛsɔ otsha la diko dia Ɔkɛdi wa Jɔrdana. Ondo vɔ wakatehɔ Jɔrdana dihole dimɔtshi lo nɔrdɛ ka Ndjale ka Ngalileya ko wakatshu la Dekapɔli. Lɛkɔ, vɔ wakadɛ lo dikona koko elui w’anto wakawaɛnyi. Anto wakela Yeso akanga wa tshumbe, akanga wa dikɔmɔ, akanga wa totshungu ndo akanga wa lomi. Vɔ wakakitsha ɛkɔnyi ɛsɔ l’ekolo wa Yeso ndo nde akakɔnɔla. La diambo tshɛ, anto wakatombola Nzambi k’Isariyɛlɛ.

Yeso akadje yambalo ya laande le pami kɛmɔtshi kaki ehoke ndo kaki l’okakatanu dia ntɛkɛta. Wɛ koka nshihodia woho wakandayaokaka l’atei w’olui a woke w’anto. Ondo lo mɛna dia pami kɛsɔ aki ɛkɛlɛkɛlɛ, Yeso akamɔ la nde oma lale olui w’anto. Lam’akiwɔ vɔ ahende ato, Yeso akɛnya kɛnɛ kayangande mbosalɛ. Nde akadje mpita yande l’atoyi wa pami kɛsɔ, ndo l’ɔkɔngɔ wa mpɔngɔla lɔsɔyi, nde akananda lolemi la pami kɛsɔ. Oma laasɔ, Yeso akende l’olongo ndo akate ate, “Effataa,” kitshimudi ate: “Dihɔ.” Ko atoyi wa pami kɛsɔ wakadihɔ ndo nde akonge l’akoka wa ntɛkɛta dimɛna. Yeso konanga dia dui sɔ dianganyema, nde akalange dia anto monga la mbetawɔ le nde l’ɔtɛ wa kɛnɛ kɛnawɔ ndo kokawɔ vɔamɛ.​—Makɔ 7:32-36.

Wolo waki la Yeso wa nsala ɛkɔnwɛlɔ ka ngasɔ waki la shɛngiya ya wolo le wanɛ wakendaka, wanɛ “wakaambe woho w’anyanya.” Vɔ wakate ɔnɛ: “Nde ambosala akambo tshɛ dimɛna. Nde ambokimanyiya ndo ehoke dia nde mboka ndo lomi dia nde ntɛkɛta.”​—Makɔ 7:37.