KƐNƐ KA NSALA ETENA KATADƐ DIANGƆ ESHINGA

Ngɛnangɛna la kɛnɛ kele la yɛ

Anto wangɛnangɛna la kɛnɛ kele la wɔ, mongaka l’ɔngɛnɔngɛnɔ lo nsɛnɔ yawɔ. Ndo etena katshikitana awui wele la wɔ, vɔ tshikitanyaka yoho yawɔ ya lɔsɛnɔ dia nsɛna lo yoho yɔtɔnɛ la kɛnɛ kele la wɔ.

OHOMBA WA DUI SƆ

Jessica Koehler lele manyi l’akambo wa lo yimba mbutaka ate: Anto wangɛnangɛna la kɛnɛ kele la wɔ, ndekaka mɛna akambo la sso di’ɔlɔlɔ. Nde akate nto dia anto asɔ hawoleke kɔmiya anto akina. Bu dui dia diambo lo woho wele anto wangɛnangɛna la kɛnɛ kele la wɔ mongaka tena tshɛ l’ɔngɛnɔngɛnɔ ndo bu l’ekiyanu efula. Lo mɛtɛ, anto amɔtshi waleka monga l’ɔngɛnɔngɛnɔ ele wanɛ wele bu la lomombo efula. Dui sɔ diekɔ mɛtɛ djekoleko le wanɛ wɔsa la nɛmɔ di’efula diangɔ diahakoke falanga nsomba, ɛnyɛlɔ ɔngɛnɔngɛnɔ waya lo mbetsha wenya kaamɛ l’ase nkumbo ndo angɛnyi.

“Naka tekɔ la yangɔ ya ndɛ ndo dihɔndɔ dia ndɔta, tɔngɛnɛngɛnɛ la diangɔ sɔ.”—1 Timɔte 6:8.

KƐNƐ KAKOKAYƐ NSALA

Ewɔ dia ndjaɛdika l’anto akina. Naka wɛ mbɛdika lɔsɛnɔ layɛ laha kawotake la lɔnɛ la kawotake l’onto okina, kete dui sɔ mbeyaka koshishɛ ɔngɛnɔngɛnɔ ndo kokonya dia mbɔkɔmiya. Ndjaɛdika l’anto akina lo yoho shɔ, mbeyaka monga ko bu dui dia mɛtɛ. Mbeyaka monga ko anto amɔtshi wele la lomombo wekɔ l’abasa kaapo. Nicole, ladjasɛ lo Sénégal mbutaka ate: “Dimi bu l’ohomba wa diangɔ efula dia monga l’ɔngɛnɔngɛnɔ. Dimi ngɛnangɛnaka la kɛnɛ kele la mi, dimi koka monga l’ɔngɛnɔngɛnɔ oyadi etena kele anto akina la diangɔ efula ndekami.”

Hemba nsala nganɛ: Ewɔ waa piblisite kana awui wadjawɔ l’Ɛtɛrnɛtɛ wɛnya falanga y’efula kana diangɔ di’eshinga wolo diele l’anto akina.

“Kaanga etena kele onto la diangɔ efula, lɔsɛnɔ lande halolemanɛ la diangɔ diele la nde.”—Luka 12:15.

Onga la lowando. Anto wele la lowando ndekaka monga l’ɔngɛnɔngɛnɔ ndo hawokanyiya dia wekɔ l’ohomba wa diangɔ efula. Roberton, lele la Haïti, mbutaka ate: “Dimi mbɔsaka etena ka nkanyiya awui w’amɛna wakatosalɛ anto akina dimi l’ase nkumbo kami. Oma laasɔ, dimi mbutɛka anto asɔ dia lekɔ la lowando l’efula lo kɛnɛ kakawatosalɛ. Ndo nto, laketsha ɔnami la pami lele l’ɛnɔnyi enanɛi dia mbishaka losaka l’oseka ɛngɔ tshɛ kawoshawɔ.”

Hemba nsala nganɛ: Ongaka la “lowando” lushi tshɛ. Lushi tshɛ fundaka dui dimɔtshi dieyɛ la lowando lɔkɔ. Wɛ mbeyaka mbisha losaka l’ɔtɛ wa yoonge ya dimɛna yele la yɛ, diɔtɔnganelo dia dimɛna diele lam’asayɛ l’ase nkumbo kayɛ, l’angɛnyi ayɛ wa mɛtɛ kana woho wonga wonya olangala etena katawadje.

“Onto lele la otema wele l’ɔlɔ salaka fɛtɛ tena tshɛ.”—Tokedi 15:15.

Tena efula, sho tshɛ mongaka l’okakatanu dia ngɛnangɛna la kɛnɛ kele la so. Koko welo aso bu anyanya! Etena kasɔnaso dia ngɛnangɛna la kɛnɛ kele la so, sho sɔnaka nto dia monga l’ɔngɛnɔngɛnɔ, mbuta ate dionga dikina diele falanga hakoke nsomba.