TSHAPITA 18

Onde Wɛ Mbohɔka Dia Mbisha Losaka?

ONDE wɛ akale ɛngɔ ɛlɔ?. . . Onde wɛ mbeyaka onto lakâhe?. . . Ondo mama kayɛ kana onto okina mbakâhe, ko lande na kahombaso mbisha Nzambi losaka l’ɔtɛ wa dikambo sɔ?. . . Nɛ dia Nzambi mbatondja tombatomba ndo mbasala dia diɔ mbola. Koko, sho pombaka nto mbisha onto lakâhe diangɔ dia ndɛ kana lakatoshadiɔ losaka.

Tena dimɔtshi sho mbohɛka mbisha losaka lam’atosalɛ anto akina awui w’ɔlɔlɔ, shi mɛtɛ? Lam’aki Ombetsha a Woke lanɛ la nkɛtɛ, ase sudi amɔtshi wakohɛ mbosha losaka.

Onde wɛ mbeyaka onto lelɛwɔ ose sudi?. . . Ose sudi kɛdikɛdi onto loka hemɔ ka sudi. Hemɔ kɛsɔ koka minya ndo emunyi w’onto oma lo demba diande. Lam’aki Yeso lanɛ la nkɛtɛ, ase sudi kopombaka mbidjasɛ l’anto akina dihole ɔtɔi. Ndo naka ose sudi ambɛna onto okina ayaye, nde akahombaka mbelɛ la dui dia wolo dia mbewola onto akɔ di’aha nde sukana lalende. Dui sɔ diakasalemaka ngasɔ di’aha anto akina sukana oya le wɔ ko ondo ndjosambiyama hemɔ ka sudi.

Yeso akokaka ase sudi kɛtshi efula. Lushi lɔmɔtshi, lam’akandatatshɔka otsha la Jerusalɛma, Yeso akahombe tenyanya osomba ɔmɔtshi wa tshitshɛ. Lam’akandasukana l’osomba akɔ, ase sudi dikumi wakaye dia ndjɛnana la nde. Vɔ wakoke dia Yeso aki la wolo w’oma le Nzambi wa kɔnɔla weho wa hemɔ tshɛ.

Ase sudi asɔ kosukana suke la Yeso. Vɔ wakemala tshalola. Koko vɔ waki la mbetawɔ ɔnɛ Yeso koka kɔnɔya sudi kawɔ. Ɔnkɔnɛ, lam’akɛnyi ase sudi asɔ Ombetsha a Woke, vɔ wakawotɛ la dui dia wolo ɔnɛ: ‘Yeso, Ombetsha, otokimanyiya!’

Onde wɛ mbokaka anto wele la hemɔ kɛtshi?. . . Yeso akawaokaka kɛtshi. Nde akeyaka dia monga ose sudi aki pâ efula. Ɔnkɔnɛ, nde akakadimola ase sudi asɔ ndo akate ate: “Nyutshu, nyutuyaenya le elombedi.”​—⁠Luka 17:​11-14.

Lande na kakawatɛ Yeso dia sala dikambo sɔ na? Aki dia nɛnya ɔlɛmbɛ wakasha Jehowa wodja Ande lo kɛnɛ kendana l’ase sudi. Ɔlɛmbɛ ɔsɔ wakataka dia ɔlɔmbɛdi waki Nzambi akahombaka sɛdingola demba diaki ose sudi. Ɔlɔmbɛdi mbakahombaka mbutɛ ose sudi dia hemɔ kande amboshila tshɛ kana atashile. Naka nde ambɔkɔnɔ dimɛna, kete nde akakokaka mbidjasɛ nto dihole diamɛ l’anto waki l’alemba w’amɛna.​—⁠Akambu w’Asi Lewi 13:​16, 17.

Koko ase sudi asɔ waki paka la hemɔ kawɔ. Lâsɔ, onde vɔ wakatshu otsha le ɔlɔmbɛdi oko akawatɛ Yeso?. . . Eelo, vɔ wakatshu paka ko wonya akɔ wâmɛ. Ase sudi asɔ waki la mbetawɔ dia Yeso ayɔkɔnɔla hemɔ kawɔ. Kakɔna kakete na?

La ntondo ka ndo vɔ koma le ɔlɔmbɛdi, hemɔ kawɔ kakakɔnɔ. Demba diawɔ diakakome dimɛna. Hemɔ kawɔ kakashile tshɛ! Vɔ wakakondja difuto oma lo mbetawɔ kaki lawɔ lo wolo waki la Yeso. Vɔ waki mɛtɛ l’ɔngɛnɔngɛnɔ efula! Ko akawahombe sala l’etena kɛsɔ dia mɛnya lowando lawɔ na? Wɛ otoyosala na?. . .

Ose sudi ɔmɔtshi lakakɔnɔ akakawola oya le Yeso. Nde akatatɛ tombola Jehowa lo mbuta awui w’ɔlɔlɔ lo dikambo diande. Ɔsɔ aki dikambo dia dimɛna dia sala nɛ dia oma lo wolo w’oma le Nzambi mbakandakɔnɔ. Onto ɔsɔ akake adwe la ntondo k’Ombetsha a Woke ndo akawosha losaka. Nde aki la lowando efula lo kɛnɛ kakasale Yeso.

Ko kayotota lo dikambo di’ase sudi akina divwa na? Yeso akambola ate: ‘Kema ase sudi dikumi mbakakɔnwɛ? Lende ele asi sudi akina divwa? Onde paka ɔtɔi oto mambokawola dia ndjotombola Nzambi?’

Eelo, ekɔ mɛtɛ. Paka ose sudi ɔtɔi oto mbakatombola Nzambi ndo mbakakawola dia ndjosha Yeso losaka. Ndo onto ɔsɔ aki ose Samariya, mbut’ate onto l’oma lo wodja okina. Anto akina divwa kombisha Nzambi ndo Yeso losaka.​—⁠Luka 17:​15-19.

L’atei w’anto asɔ wɛ fɔnaka l’onto akɔna? Sho tshɛ nangaka monga oko ose Samariya, shi mɛtɛ?. . . Lâsɔ, lam’atosalɛ onto ɔmɔtshi dikambo dimɔtshi di’ɔlɔlɔ, kakɔna kahombaso mbohɔ dia sala na?. . . Sho pombaka mbosha losaka. Mbala efula anto mbohɛka dia mbisha losaka. Koko ekɔ dimɛna mbisha losaka. Lam’asalaso dikambo sɔ, Jehowa Nzambi ndo Ɔnande Yeso ngɛnangɛnaka.

Naka wɛ kanyiya dikambo sɔ, kete wɛ ayohɔ di’anto wambokosalɛ awui efula w’ɔlɔlɔ. Ɛnyɛlɔ, onde wɛ atokaka hemɔ ndoko lushi?. . . Ondo wɛ atokaka hemɔ kele oko k’ase sudi dikumi asɔ, koko ondo wɛ ambokaka lɔkɔsu kana monga la pâ l’asolo. Onde onto ɔmɔtshi akayakiyanya dikambo diayɛ?. . . Ondo wakakosha ekanga ɛmɔtshi ndo wakakosalɛ awui akina. Onde wɛ akangɛnangɛna woho wakawakokimanyiya dia wɛ kɔlɔngana?. . .

Ose Samariya akasha Yeso losaka lo woho wakandɔkɔnɔya ndo dikambo sɔ diakangɛnyangɛnya Yeso. Onde wɛ fɔnyaka dia mama kayɛ kana papa kayɛ wayɔngɛnangɛna naka wɛ mbasha losaka lam’akosalɛwɔ awui amɔtshi?. . . Eelo, vɔ wayɔngɛnangɛna.

Anto amɔtshi kosalɛka awui amɔtshi lushi tshɛ ndo lomingu tshɛ. Ondo olimu awɔ ele wa sala awui akɔ. Vɔ koka monga ndo l’ɔngɛnɔngɛnɔ dia sala awui akɔ. Koko wɛ mbeyaka mbohɛ dia mbasha losaka. Ombetsha ayɛ wa la kalasa koka sala la wolo dia kokimanyiya dia wɛ mbeka. Ɔsɔ mbele olimu ande. Koko nde ayɔngɛnangɛna naka wɛ mbosha losaka l’ɔtɛ w’ekimanyielo kakoshande dia wɛ mbeka.

Mbala mɔtshi anto kosalɛka awui efula wa totshitshɛ. Onde onto atakodiholɛka lokuke ndoko lushi? Kana onde onto ɔmɔtshi atakoshaka yangɔ ya ndɛ wonya wenyu lo ndɛ la midi lo mɛsa? Ekɔ dimɛna mbisha losaka oyadi kânga l’awui wa totshitshɛ asɔ.

Naka sho mbohɔka dia mbisha anto wa lanɛ la nkɛtɛ losaka, kete tayoleka mbohɔka dia mbishaka Shɛso lele l’olongo losaka. Ndo ekɔ mɛtɛ awui efula wahombaso mbisha Nzambi losaka! Nde akatosha lɔsɛnɔ ndo diangɔ di’amɛna tshɛ dietɛ lɔsɛnɔ ɔlɔ. Ɔnkɔnɛ, sho kokaka mɛtɛ tombola Nzambi lo mbewoyaka anto awui w’amɛna wendana la nde lushi tshɛ.

Lo kɛnɛ kendana la woshelo wa losaka, adia Osambu 92:1; Efeso 5:20; Kolosai 3:17; ndo 1 Tesalonika 5:⁠18.

[Osato wa lo lɛkɛ 98, 99]

Yeso atɛnde ase sudi anɛ dia sala na?

[Osato wa lo lɛkɛ 99]

Kakɔna kambohɔ ose sudi ɔnɛ dia sala?

[Osato wa lo lɛkɛ 100]

Ngande wakokayɛ mbokoya ose sudi lakakawola oya le Yeso?

[Esato wa lo lɛkɛ 101]

Lande na ekɔ ohomba mbohɔka dia mbisha losaka?