Djui y’anto mbayɔlɔmbɔla, koko anto efula wayokondja wahɔ
TATƐ lo nshi y’apɔstɔlɔ, Nzambi ekɔ lo sɔna oma l’atei w’anto djui y’Akristo wa kɔlamelo wɔsande oko anande wa yanyi. Etshikitanu wasala ana asɔ wekɔ efula polo lo yɛdikɔ yele Ɔtɛkɛta wa Nzambi mbowelɛka ɔnɛ eotwelo ka hende. Oyango wa eotwelo ka hende ele wa nɔngɔsɔla ekambi waki Nzambi wambotɔ nto ɛsɔ dia vɔ tolɛ l’olongo. (2 Timote 2:12) Dia koma ɛnɔmbɔdi, vɔ mbolɔka oma lo nyɔi dia tɔsɛna l’olongo. (Romo 6:3-5) L’olongo, “vo wayulela . . . kete” kâmɛ la Kristo.—Enyelo 5:10; 11:15.
Koko, Ɔtɛkɛta wa Nzambi mbutaka nto di’anto akina lâdiko di’anto wambotɔ nto wayokondja panda ka pondjo. Bible (lo Afundelo wa lo Hɛbɛru ndo Afundelo w’Akristo wa lo Grɛkɛ) mbutaka dia sangwelo diaki Nzambi ele di’elui ehende w’anto kondja panda, djui ya tshitshɛ dia tɔsɛna l’olongo oko ewandji ndo olui okina wa woke w’ambolami wa Diolelo dia nsɛna la nkɛtɛ. Ɛnyɛlɔ, tende kɛnɛ kakafundɛ ɔpɔstɔlɔ Joani asekande ambetawudi wakotɔ nto. Nde akate lo dikambo dia Yeso ɔnɛ: “Ndi keli ulambu wa ntulambwela dia kolo yasu, aha ulambu asu shame [djui ya tshitshɛ] atu, keli weko ndu wa antu tshe wa la kete [olui wa woke].”—1 Joani 2:2.
Lo kanyi yakɔ yâmɛ, ɔpɔstɔlɔ Paulo akafunde ate: ‘Ditongami [olui wa woke] diekɔ lo nongamɛ l’asolo walomɔlomɔ ɛnɛlɔ k’ana wa Nzambi [djui ya tshitshɛ].’ (Romo 8:19-21) Ngande wahombaso mboka ɛtɛkɛta waki ɔpɔstɔlɔ Joani nde la Paulo ɛsɔ na? Lo yoho nyɛ: Wanɛ wambotɔ nto wekɔ l’atei w’anto wayotɔlɔmbɔla l’olongo. L’oyango akɔna? Dia mbisha miliyɔ y’anto wele ambolami wa lowandji laki Nzambi wayɔsɛna la nkɛtɛ wahɔ wa pondjo. Yeso aketsha ambeki ande dia nɔmbaka ɔnɛ: “Diulelu diaye diayi. Lulangu laye latshami la kete uku atshamalo l’ulungu.”—Mateu 6:10, sho mbɛnganyisha alɛta ango.
Afundelo wa lo Hɛbɛru vɔ lawɔ tɛkɛtaka dikambo dia panda kakondja elui ehende ɛsɔ. Ɛnyɛlɔ, tende kɛnɛ kakatɛ Jehowa Abarahama lɔtshɛtshɛ laki Yeso ɔnɛ: ‘Wedja tshɛ wa la nkɛtɛ [olui wa woke] wayɔtshɔkwama mɛtɛ lo tshimbo ya kanula yayɛ [djui ya tshitshɛ].’ (Etatelu 22:18) Aha la tâmu, wedja tshɛ wayɔtshɔkwama lo tshimbo ya ‘kanula’ yaki Abarahama.
Ele ‘kanula’ shɔ? Kanula shɔ ele Yeso Kristo kâmɛ la anto wambotɔ nto wele Nzambi ambowaɔsa oko anande. Ɔpɔstɔlɔ Paulo akate ate: “Naka asika Kristu mbenyu, keti nyu nyeko [kanula y]a Abarahama.” (Ngalatiya 3:16, 29) Ɛtshɔkɔ akɔna wayokondja anto w’oma lo wedja tshɛ lo tshimbo ya ‘kanula’? Vɔ wayonga la diɛsɛ dia mbetawɔma le Nzambi ndo monga la lɔsɛnɔ la pondjo lo paradiso ka la nkɛtɛ. Omembi w’esambo Davidi akatatshi ɔnɛ: “Antu w’ololo wayukita kete, wayudjaseka loko pundju.”—Osambu 37:29; Isaya 45:18; Enyelo 21:1-5.
Lo mɛtɛ, anto amɔtshi ato mbele la diɛsɛ dia tolɛ l’olongo, koko anto efula wayokondja wahɔ oma lo lowandji la l’olongo lɔsɔ lo nsɛna pondjo pondjo la nkɛtɛ ndo la ɛtshɔkɔ tshɛ wayoya oma lo dui sɔ. Sho kombolaka dia wɛ la nkumbo kayɛ monga l’atei w’anto wayokondja wahɔ wa pondjo wayela Diolelo diaki Nzambi.
[Osato wa lo lɛkɛ 12]
Miliyɔ y’anto waheyama mbadia wayokondja lɔsɛnɔ la pondjo la nkɛtɛ. Onde wɛ ayonga l’atei awɔ?