“Ombidje vɛrɛ y’ekomelo”

ALLEN akatatɛ nnɔ wanu efula etena kakinde la ɛnɔnyi 11.a Nde la angɛnyi ande wakakɛnyaka l’okonda, wokoya kɛnɛ kakawɛnyi lo filmɛ. Anto wakawokoyaka komonga anto wa mɛtɛ, koko wanu wakanɔka Allen nde la angɛnyi ande waki wanu wa mɛtɛ.

Tony aki la ɛnɔnyi 40 etena kakandatatɛ mfudia yema yema ɔnwɛlɔ ande a wanu oma l’olangi ɔtɔi kana ehende polo lo etanu kana esamalo dikɔlɔ tshɛ. L’edjedja ka wonya, nde akayongaka hayeya yɛdikɔ ya wanu yakandanɔka lo lushi.

Allen akayange ekimanyielo lo kɛnɛ kendana l’ɔnwɛlɔ ande a wanu wa tshambandeko. Tony akatone ekimanyielo kakawosha ase nkumbo ndo angɛnyi ande wa ngandji. Allen ekɔ la lɔsɛnɔ ɛlɔ kɛnɛ dia tɔkɔndɔlɛ ɔkɔndɔ ande, koko Tony akavu ambeta ɛnɔnyi ɛmɔtshi lo aksida wa mutuka wakandasale l’ɔkɔngɔ wa nde tɔnɔ wanu efula.

Kânga lo etena kanɔ onto ndamɛ wanu lo tshambandeko, dui sɔ mongaka la shɛngiya lo nsɛnɔ y’anto akina, ndo mbala efula diɔ mongaka la etombelo wa kɔlɔ efula.b Ɔnwɛlɔ a wanu wa tshambandeko mongaka tena efula lo kiɔkɔ y’ɛtɛkɛta wa wotakataka ndo y’awui w’otshatsha, y’awui w’ata ndo diakatanelo, ya waa aksida wa mutuka ndo wa l’olimu ndo ya hemɔ efula. Ɔnwɛlɔ a wanu wa tshambandeko shishɛka anto miliyara ya dɔlara l’ɔnɔnyi, aha la mbidja etombelo wa kɔlɔ wele la dikambo sɔ le onto ndamɛ, le ase nkumbo ndo le ana.

Kânga mbediɔ ngasɔ, Kalasa y’ase Amɛrikɛ yendana la yônge mbutaka ɔnɛ: “Aha onto tshɛ lanɔ wanu mbala la mbala mbɔsama oko onto lanɔ wanu lo tshambandeko. Ndo aha anto tshɛ wanɔ wanu lo tshambandeko mbanɔ lushi tshɛ.” Anto efula wele bu emunga a wanu waya la mbekelo ka nɔka wanu efula aha la vɔamɛ mbeya. Anto akina nɔka paka lo pai, koko vɔ nɔka akɔhɔ kana elangi ndekana etanu lo diaaso ɔtɔi.

Naka wɛ ambɔsa yɛdikɔ ya nnɔ wanu, yɛdikɔ yakɔna ya wanu yoleki efula le yɛ? Ngande wakokayɛ mbeya etena kahayahombe mbuta ɔnɛ: “Ombidje vɛrɛ y’ekomelo”? (Tukedi 23:29, 30, Contemporary English Version) Asawo wayela wayɔtɛkɛta akambo w’ohomba efula lo kɛnɛ kendana la wanu.

[Nɔte ya l’ɛse ka dikatshi]