Kitsha wanu lo dihole diawɔ

TONY lakatatɛkɛta dikambo diande lo sawo dia mbɔtwɛlɔ otokoka monga la yoho ya lɔsɛnɔ yotshikitanyi otondongaka nde akeye okakatanu waki la nde lo kɛnɛ kendana la ɔnwɛlɔ a wanu. Koko, lam’ele nde akɛnaka dia nde kokaka nnɔ elangi a wanu efula aha la mɛnama dia nde ambodjɔ, nde akɛnaka dia wanu hatowosalɛ ndoko dikambo. Lande na kele kanyi yande shɔ komonga dimɛna?

Ɔnwɛlɔ a wanu wa tshambandeko wakalanya ekanelo kande ka yimba. Oyadi Tony akeyaka dikambo sɔ kana bu, etenyi ka demba kalɔmbɔla demba, yimba ndo nsaki yande, mbuta ate wɔɔngɔ ande kokambaka dimɛna l’ɔtɛ w’ɔnwɛlɔ ande a wanu wa tshambandeko. Lo yɛdikɔ yakandatalekaka nnɔ wanu mbakandatalekaka nkitshakitsha akoka wele la wɔɔngɔ wa nkamba dimɛna.

Ɔkɔkɔ wa hende wɛnya dia kanyi yaki Tony yaki kɔlɔ ele, nsaki k’efula kaki la nde kaha ntshika mbekelo yande yendana la ɔnwɛlɔ a wanu. Allen, lakatatɛkɛta dikambo diande lo asawo wetshi kombetawɔ ntondo dia nde aki l’okakatanu wendana la ɔnwɛlɔ a wanu. Nde akate ate: “Dimi lakanɔka wanu lo woshɛshɛ ndo lakasalaka la wolo dia mɛnya anto dia halanɔ wanu lo tshambandeko. Oyango ɔtɔi waki la mi ele wa ntetemala la nnɔ wanu.” Kânga mbele anto akina wakakoke mɛna dia ɔnwɛlɔ a wanu waki Tony nde la Allen ayowakonya lo wâle, vɔ akɔ ahende kɔmɛnaka dikambo sɔ. Vɔ akɔ ahende wakahombe mbɔsa yɛdikɔ ya nkitshakitsha ɔnwɛlɔ awɔ a wanu. Ko yɛdikɔ yakɔna yakawahombe mbɔsa?

Ɔsa yɛdikɔ!

Anto efula wakatshike nnɔ wanu lo tshambandeko wakakitanyiya ɛtɛkɛta waki Yeso wata ɔnɛ: “Naka su diaye dia lupami diambukutakanya, udikhunduli, udikadja. Ne dia nshisha leke otoi l’uma lu dimba ndeka mbikadjema l’utundu aye tshe lu luwinga la dja ololo.”—Mateu 5:29.

Lo mɛtɛ, Yeso kokeketshaka anto dia vɔ ndjahembola tenyi dimɔtshi dia demba. Koko, nde akake epole ɔsɛkɛ lo nkamba l’ɛtɛkɛta wa didjidji ɛsɔ dia mɛnya dia sho pombaka minya dikambo tshɛ dia lo lɔsɛnɔ laso diakoka tela wâle wa lo nyuma. Lo mɛtɛ, yɛdikɔ yahombaso mbɔsa kokaka tosha pâ efula. Koko, yɔ kokaka tokokɛ oma lo tokanyi ndo akambo tshɛ wakoka tokonya lo ɔnwɛlɔ a wanu wa tshambandeko. Ɔnkɔnɛ, naka anto akina wambokotɛ dia ɔnwɛlɔ ayɛ a wanu wambotatɛ ntamba elelo, kete ɔsa yɛdikɔ ya nkitshakitsha.a Naka mɛnamaka hwe dia wɛ hakoke ndjadjɛ elelo lo ɔnwɛlɔ ayɛ a wanu, kete onga suke dia ntshika nnɔ. Pâ kakoka kosha yɛdikɔ shɔ hɛdimi la pâ kayonga la yɛ naka lɔsɛnɔ layɛ laya lo wâle.

Kânga naka wɛ bu omunga a wanu, onde wɛ nyangaka dia nnɔ wanu efula? Naka ngasɔ, naa wanya amɔtshi wa shikaa wakokayɛ ntakola dia kokimanyiya dia wɛ nkitsha wanu lo dihole diawɔ?

Lɛnɛ akokayɛ ntana ekimanyielo

1. Onga la mbetawɔ lo wolo waya oma lo dɔmbɛlɔ dia l’etete ndo l’otema ɔtɔi. Bible mbishaka anto tshɛ walanga ngɛnyangɛnya Jehowa Nzambi dako nɛ: “Lu akambu tshe, nyuti ehumba anyu le [Nzambi] lu dombelo la osengosengo kame la eukelu ka lusaka. Okone ki ka [Nzambi], kuleki yimba tshe, ayulama etema anyu la tukanyi tanyu le Kristu Jesu.” (Filipi 4:6, 7) Kakɔna kakokayɛ nɔmba dia nkondja ki ka lo yimba kɛsɔ?

Etawɔ l’otema ɔtɔi dia wɛ ekɔ lo nnɔ wanu efula ndo ɔsɔ ekɔ ɔkɛndɛ ayɛ hita. Tɛ Jehowa kɛnɛ kalangayɛ nsala ko nde ayɔtshɔkɔla welo wadjayɛ dia nkandola okakatanu ɔsɔ ndo mbewɔ ekakatanu ekina woleki wolo. Bible mbutaka ɔnɛ: “One latusheka kolo yandi, hatongonaka. Keli one latushulaka ndu latosekaka kolo yandi, ayukama ketshi.” (Tukedi 28:13) Yeso nde lawɔ akate dia sho kokaka nɔmba ɔnɛ: “Tutukumiaki lu ehimba, keli utushimbeli uma lu kolo.” (Mateu 6:13) Ko ngande wakokayɛ nsala akambo lo yoho yɔtɔnɛ la alɔmbɛlɔ ayɛ ndo lende akokayɛ ntana ekadimwelo wa ɛsɛngɔsɛngɔ ayɛ?

2. Kondja wolo oma lo Ɔtɛkɛta wa Nzambi. ‘Ɔtɛkɛta wa Nzambi wekɔ la lɔsɛnɔ ndo la wolo ndo vɔ kokaka nembetɛ tokanyi la nsaki ya l’otema.’ (Heberu 4:12) Anto efula wakanɔka wanu wa tshambandeko wakakondja ekimanyielo lo mbadiaka ndo lo kanaka yimba la avɛsa wa lo Bible lushi la lushi. Omembi w’esambo ɔmɔtshi wakokaka Nzambi wɔma akafunde ate: “Untu lahayeli kanyi y’antu wa kolo . . . eli la otshoko. Keli ndi atongenangenaka lu elembe wa [Jehowa]; atukanaka yimba dia elembe ako ndu la yanyi ndu l’utshu. . . . Lu akambu tshe watshandi, ndi atongonaka.”—Osambu 1:1-3.

Allen lele wekelo ande wa Bible la Ɛmɛnyi wa Jehowa akawosha wolo wa ntshika ɔnwɛlɔ a wanu wa tshambandeko mbutaka ate: “Lambosuya dia otondonga Bible la atɔndɔ wa lɔkɔ kokimanyiyami dia ntshika mbekelo kɛsɔ, tshike lamboshilaka mvɔ.”

3. Onga la ndjakimɛ. Bible mɛnyaka dia anto amɔtshi waki ambidjɔki a wanu l’etshumanelo k’Akristo wakɛdiama ‘oma l’ekimanyielo ka nyuma ka Nzambi kaso.’ (1 Koreto 6:9-11) Lo woho akɔna na? Ntondotondo, vɔ wakakimanyiyama dia ntshika wodjwelo a wanu ndo ɛngɛnɔngɛnɔ wa kɔlɔ lo monga la ndjakimɛ, dionga diakɛnɛmɔla onto oma l’ekimanyielo ka nyuma k’ekila kaki Nzambi. Bible mbutaka ɔnɛ: “Tanyojɔke waanu: waanu ntɔlaka onto lo lɔsɛnɔ l’ofutanu; koko nyolole la [nyuma k’ekila].” (Efeso 5:18; Dyookaneelo dy’Oyooyo; Ngalatiya 5:21-23) Yeso Kristo akalake ate: “Shenyu le l’ulungu huleka mbisha wane wôlomba nyuma k’[ekila].” Ɔnkɔnɛ, “nyolomb[ak]e, ku wayunyusha.”—Luka 11:9, 13.

Wanɛ wakombola ntɛmɔla Jehowa lo yoho yetawɔnde kokaka monga la ndjakimɛ lo mbadiaka ndo mbekaka Bible ndo lo nɔmbaka mbala la mbala l’otema ɔtɔi. Lo dihole dia wɛ nkɔmɔ, etawɔ daka diasha Ɔtɛkɛta wa Nzambi ɔnɛ: “One latuneka lu nyuma, ayuna lumu la pundju uma le nyuma. Tatuhekoki dia ntsha ditshelu di’ololo, ne dia tayuna lu eleku ka muna, naka hatuheko.”—Ngalatiya 6:8, 9.

4. Sɔna angɛnyi w’ɛlɔlɔ. Bible mbutaka ɔnɛ: “One latengolaka kame la akanga a yimba, atuyalaka kanga yimba. Keli one latekesanelaka la akanga a dinginya, atuhumoka lukulu l’engeno.” (Tukedi 13:20) Tɛ angɛnyi ayɛ yɛdikɔ yamboyɔsa ya nkitshakitsha ɔnwɛlɔ ayɛ a wanu. Koko, Ɔtɛkɛta wa Nzambi wakatatshi dia naka wɛ ntshika ‘ɔnwɛlɔ a wanu wa tshambandeko ndo ɛngɛnɔngɛnɔ wa kɔlɔ,’ kete anto amɔtshi waki angɛnyi ayɛ ‘wayonyanga ndo wayɔtɛkɛta kɔlɔ lo dikambo diayɛ.’ (1 Petero 4:3, 4) Etawɔ nkakitɔna la angɛnyi wahetawɔ yɛdikɔ yamboyɔsa dia ntshika ɔnwɛlɔ a wanu wa tshambandeko.

5. Yadjɛ elelo wa shikaa. Bible mbutaka nto ɔnɛ: “Tanyuyafanyaki l’akambu wa la kete nye. Keli nyuhilwami lu yimba y’uyuyu, kanyeyi okone weli lulangu la [Nzambi], l’ololo latôngenyangenyaka, ndu l’uluwanyi.” (Romo 12:2) Naka wɛ mbetawɔ dia atɔndɔ w’oma lo Ɔtɛkɛta wa Nzambi kokimanyiya dia wɛ ndjadjɛ elelo lo dihole dia ntshika angɛnyi ayɛ la ‘dikongɛ nɛ di’akambo’ nsala dikambo sɔ, kete wɛ ayonga la yoho ya lɔsɛnɔ yetawɔma le Nzambi. Ko ngande wakokayɛ nshikikɛ yɛdikɔ ya wanu yele ɔlɔlɔ le yɛ?

Yɛdikɔ ya wanu tshɛ yafukutanya ekanelo kayɛ ka yimba yekɔ efula kamboleka le yɛ. Koko, naka wɛ ambɔsa yɛdikɔ ya nnɔ wanu, kete hatonga dui dia lomba dia wɛ ndjadjɛ elelo waheyama shikaa lam’asa ɔnwɛlɔ wa la wɛdimo la wodjwelo. Tetawɔke dia ditakataka mfukutanya yɛdikɔ yamboyɔsa lo kɛnɛ kendana la ɔnwɛlɔ a wanu. Yadjɛ elelo wa shikaa wahatonga wâle le yɛ, mbuta ate wahatokokonya dia wɛ ndjɔnɔ wanu lo tshambandeko.

6. Eka dia mbuta ɔnɛ hanɔ. Bible mbutaka ɔnɛ: ‘Eelo kayɛ kayale Eelo, Kema kayɛ kayale Kema.’ (Mateu 5:37) Eya woho wa ntona la dilɛmiyɛlɔ tshɛ etena kakɔtɛtɛ onto ɔmɔtshi lakakolongodi dia wɛ nnɔ wanu. Bible mbutaka ɔnɛ: “Nyutaki paka aui wa ngandji ka mamba tena tshe, wosohanyimi la leho dia nyu mbeya wuhu wa nkaluya untu tshe diui.”—Kolosai 4:6.

7. Yanga ekimanyielo. Yanga ekimanyielo oma le angɛnyi ayɛ w’eshika wakoka nsukɛ yɛdikɔ yayɛ yendana la ɔnwɛlɔ a wanu ndo wakoka kosha ekimanyielo ka lo nyuma. Ɔtɛkɛta wa Nzambi mbutaka ɔnɛ: “Antu ahendi ndeka untu otoi, ne dia vo watulungulaka difutu di’ololo uma l’ulimu awo. Naka vo wamboko, omotshi mbeyaka mbetula unyandi.” (Undaki 4:9, 10; Jakoba 5:14, 16) Ndo Tshunda dia lo wodja w’États-Unis diendana la osekelo wa ɔnwɛlɔ a wanu wa tshambandeko ndo sɔngu ka wanu ndakaka ɔnɛ: “Tena dimɔtshi, nkitshakitsha ɔnwɛlɔ ayɛ a wanu mbeyaka monga tshondo y’okakatanu. Ɔnkɔnɛ, lɔmba ase nkumbo kayɛ ndo angɛnyi ayɛ dia vɔ kokimanyiya dia wɛ nkotsha oyango ayɛ.”

8. Yashikikɛ dia nɛnya yɛdikɔ yayɛ. Bible mbutaka ɔnɛ: “Nyuyali atshi wa diui, aha ambuki atu, watuyadimbiyaka. . . . Keli lenda elembe w’ololo wa ndjadjasela, ndu latetemala loko aha umbuki a diui ladiuhela, keli utshi a diui mbendi. Untu ako ayotshokwama lu etsha andi.”—Jakoba 1:22, 25.

Woho wa ntshika ɔnwɛlɔ a wanu wa tshambandeko

Aha onto tshɛ lanɔ wanu lo tshambandeko mbakoma omunga a wanu. Koko anto amɔtshi tatɛka nnɔ efula kana mbala la mbala polo lo vɔ ndjokoma emunga a wanu. Lam’ele onto laya omunga a wanu komaka mfumbe ka wanu lo demba ndo lo yimba, onto la ngasɔ bu tsho l’ohomba wa mbɔsa yɛdikɔ ya wolo ndo ekimanyielo ka lo nyuma dia nde ntshika ɔnwɛlɔ a wanu wa tshambandeko. Allen mbutaka ate: “Etena kakamayatshikaka dia nnɔ wanu, aki tshondo y’okakatanu dia dimi nsala dikambo sɔ. Diɔ diakɔ diakamɛnyi dia laki l’ohomba w’ekimanyielo k’aseka enganga lâdiko dia ekimanyielo ka lo nyuma kakawambishaka.”

Ambidjɔki efula wekɔ l’ohomba w’ekimanyielo k’aseka enganga dia nkeketala lo ta dia lo nyuma dialɔwɔ dia ntshika ɔnwɛlɔ a wanu wa tshambandeko.b Amɔtshi wekɔ l’ohomba wa mbɔtɔ lo lopitadi dia nongola ekanga wayowakimanyiya dia nkitshakitsha mposa kawɔ k’efula ka wanu ndo mbakimanyiya dia vɔ ntshika lo pondjo. Ɔnaki Nzambi lakasale ahindo akate ate: ‘Akanga wa alemba ki bu l’ohomba w’onganga, paka ɛkɔnyi mbatongaka l’ohomba ande.’—Mako 2:17.

Ɛlɔlɔ waya oma lo ndjela wetshelo waki Nzambi

Dako di’oma lo Bible diendana la wanu ndja oma le Nzambi ka mɛtɛ, Ɔnɛ latokombolɛ kɛnɛ koleki ɔlɔlɔ, aha tsho dikambo di’ɔngɛnɔngɛnɔ aso wa kakianɛ, koko ndo di’ɔngɛnɔngɛnɔ aso wa pondjo. Ɛnɔnyi akumi ahende la ɛnɛi l’ɔkɔngɔ wa Allen ntshika nnɔ wanu, nde mbutaka ɔnɛ: “Aki dikambo dia diambo dia dimi mbeya dia lakakoke ntshikitanya lɔsɛnɔ lami, dia mbeya dia Jehowa akalangaka kimanyiyami dia dimi ndowanya lɔsɛnɔ lami, dia nde . . .” Allen akɔlama yema nɛ dia mbohɔ akambo asɔ akôkonyaka dia nde ndela. “Huum, . . . ndo mbeya dia Jehowa mbeyaka ndo tokanɛka ndo toshaka ekimanyielo keso la tɔ ohomba. Ɔsɔ aki dikambo dia mamba!”

Ɔnkɔnɛ, naka wɛ aya mfumbe ka wanu, tɔkɔmɔke otema esadi eto kana nshisha elongamelo. Allen kâmɛ la anto akina efula waki la ntondo ka dikambo diele la yɛ ndo wakayokitshakitshaka ɔnwɛlɔ a wanu kana ntshika lo pondjo. Vɔ hawonyange ɛlɔ kɛnɛ lo yɛdikɔ yakawɔshi ndo wɛ lawɔ hatonyanga.

Oyadi wɛ ambɔsa yɛdikɔ ya nɔka wanu la wɛdimo kana ya ntshika nnɔ wanu, kitanyiya dako diaki Nzambi dioludi la ngandji diata ɔnɛ: “Utunduyala we akalungi elembe ami, tshiki ki kaye kutuyala utamanya, la sambu kaye k’ololo kutuluwana otekoya.”—Isaya 48:18.

[Nɔtɛ ya l’ɛse ka dikatshi]

[Kiombo/Osato wa lo lɛkɛ 8]

Onde wanu wolanga kahemɛ?

Wɛ kokaka ndjambola wate:

• Onde dimi lambotamba yɛdikɔ yatomɔnɔka?

• Onde dimi loleka nnɔ mbala la mbala oleki woho wakamanɔka ntondo?

• Onde ɔnwɛlɔ ami a wanu waya wolo?

• Onde dimi nɔka wanu dia ndɔshana l’ekakatanu kana dia ndawɔ ekakatanu?

• Onde ɔngɛnyi ami ɔmɔtshi kana ose nkumbo akayakiyanya dikambo di’ɔnwɛlɔ ami a wanu?

• Onde wanu wakambela ekakatanu la ngelo, l’olimu kana lɛnɛ atamɛngɔla?

• Onde lɛnaka wolo mbetsha lomingu l’otondo aha la nnɔ wanu?

• Onde dimi tonyangaka etena katona anto akina dia nnɔ wanu?

• Onde dimi mbishɛka anto akina lofulo la wanu wanɔmi?

Naka wɛ ambokadimola ɔnɛ eelo lo dimbola ɔtɔi kana ndekana, kete wɛ pombaka mbɔsa tɛdikɔ dia mbahemɛ ɔnwɛlɔ ayɛ a wanu.

[Kiombo/Osato wa lo lɛkɛ 9]

Woho wa mbɔsa tɛdikɔ ta lomba lo dikambo dia wanu

La ntondo ka nnɔ wanu, sɛdingola awui anɛ:

• Onde ekɔ ɔlɔlɔ dimi nnɔ wanu, kana dimi pombaka ntona nnɔ wanu?

Dako: Onto lahakoke ndjadjɛ elelo lo yɛdikɔ yanɔnde pombaka ntshika dia nnɔ wanu.

• Tɔvɛrɛ tongana tahombami nnɔ?

Dako: Shikikɛ yɛdikɔ yahayahombe ndekanya la ntondo ka wanu ndjofukutanya yimba yayɛ.

• Etena kakɔna kayomɔnɔka?

Alako: Tɔnɔke la ntondo ka nkɛndjakɛndja kana ka nsala elimu walɔmba dia yimba monga la edie, la ntondo ka nsala awui wa lo nyuma; tɔnɔke etena keyɛ la diemi kana kɔsayɛ ekanga ɛmɔtshi.

• Lende ayangami tɔnɔ?

Alako: Nɔka lo dihole dia dimɛna; aha lo woshɛshɛ dia mbishɛ wanu wanɔyɛ; tɔnɔke la ntondo k’anto wahetsha wanɛ wanɔ wanu.

• Dimi l’onto akɔna layanga tɔnɔ?

Alako: Nɔka kâmɛ la angɛnyi w’ɛlɔlɔ kana ase nkumbo koko aha l’anɔshi a wanu wele l’ekakatanu.

[Kiombo/Osato wa lo lɛkɛ 10]

Ɔtɛkɛta wa Nzambi wakakimanyiya onto ɔmɔtshi laki ombidjɔki a wanu

Supot, londjashi lo wodja wa Thaïlande, aki omunga a wanu. L’etatelo, nde akanɔka paka l’akɔlɔ. Yema yema, nde akayotatɛ nnɔ wanu la pindju ndo wonya w’olelo wa la midi. Mbala efula nde akanɔka paka l’oyango wa mbidjɔ. Koko nde akayotatɛka mbeka Bible nde l’Ɛmɛnyi wa Jehowa. Etena kakandeye dia Jehowa Nzambi hangɛnangɛna ambidjɔki a wanu, Supot akakile wanu. Koko l’ɔkɔngɔ wa tshanda mɔtshi, nde akayokalolɛka mbekelo yande yendana l’ɔnwɛlɔ a wanu. Nkumbo kande kakahandjɔ.

Koko Supot akatetemala mboka Jehowa ngandji ndo akakombolaka mbɔtɛmɔla lo yoho ya dimɛna. Angɛnyi ande wakatetemala mbokimanyiya ndo nkeketsha nkumbo kande dia mbetshaka wenya kâmɛ la nde ndo aha vɔ mbohekɔ. L’etena kɛsɔ, ɛtɛkɛta wokɛma hwe wa lo 1 Koreto 6:10 w’ɔnɛ: ‘Ambidjɔki a wanu hawotokita Diolelo dia Nzambi’ dia mɛna dia wodjwelo ande a wanu kema dikambo dia tshitshɛ. Nde akashihodia dia nde pombaka nsala tshɛ dia ntondoya okakatanu ande wendana la ɔnwɛlɔ a wanu.

Mbala kɛsɔ, Supot akɔshi yɛdikɔ ya nkila wanu lo pondjo. L’ekomelo, l’ekimanyielo ka wolo wa nyuma k’ekila kaki Nzambi ndo ka ɛlɔmbwɛlɔ k’Ɔtɛkɛta wa Nzambi ndo l’ekimanyielo k’ase nkumbo kande ndo k’etshumanelo, Supot akakondja wolo wa lo nyuma ndo akahemɛ mposa kande ka nnɔ wanu. Nkumbo kande kakangɛnangɛna efula etena kakandabatizama oko djembetelo ya ndjakimɔ kande le Nzambi. Ɛlɔ kɛnɛ, Supot aya la diɔtɔnganelo di’ɔlɔlɔ lam’asande la Nzambi oko wakandakombolaka tena tshɛ ndo nde okamba la wenya ande dia nkimanyiya anto akina lo nyuma.