Eke mpɛtsha ko ndɛ dia kambɛ Nzambi

L’osomba wa Málaga, lo sidɛ k’Espagne, mama kɛmɔtshi nde l’ɔnande la womoto, wele vɔ akɔ ahende nkombo yawɔ Ana, wakabatizama lo Ngɔndɔ ka dikumi l’ahende 19, 2009. Vɔ waki l’atei w’anto 2 352 wakabatizama lo wodja w’Espagne l’ɔnɔnyi 2009. Koko ɛnɔnyi awɔ ekɔ dikambo dimɔtshi dia lânde diendana la mama kɛsɔ nde l’ɔnande la womoto. Mama aki l’ɛnɔnyi 107 ndo ɔnande ɛnɔnyi 83.

Kakɔna kakâkonya dia vɔ batizama dia mɛnya ndjakimɔ kawɔ le Jehowa lo sɛkɛ? L’etatelo k’ɛnɔnyi 1970, osukanyi awɔ ɔmɔtshi akelɛka Ana w’ɔna lo Wekelo wa dibuku wa l’etshumanelo wakasalemaka lo luudu l’Ɔmɛnyi wa Jehowa ɔmɔtshi. Ana akatshɔka mbala la mbala. Koko l’ɔtɛ w’olimu ande wa l’emunyi, nde kopama lo nyuma.

Ɛnɔnyi oko dikumi l’ɔkɔngɔ, ana amɔtshi waki Ana wakatatɛ mbeka Bible ndo wakayokoma ekambi waki Jehowa. Ɔmɔtshi la l’atei awɔ, lelɛwɔ Mari Carmen akayolomialomia nto saki kaki nyango ka akambo wa mɛtɛ wa lo Bible ndo akôkimanyiya dia nde mbetawɔ mbeka Bible. Oma lâsɔ, Ana w’opalanga, mbuta ate tshɛnde la Mari Carmen, nde lawɔ akayotatɛ mɛnya nsaki l’akambo wa mɛtɛ wa lo Bible. L’edjedja ka wonya, anto dikumi wa lo nkumbo kɛsɔ wakayobatizamaka.

Lushi la batismu kawɔ, Ana akɔ ehende waki l’ɔngɛnɔngɛnɔ heyama. Ana w’opalanga waki l’ɛnɔnyi 107 akate ate: “Jehowa ambɔmɛnya ɔlɔlɔ ande lo woho wambondombisha diaaso dia dimi mbêya.” Ana wa dikɛnda akakotsha ate: “La ntondo ka Paradiso ndja, dimi kombolaka kambɛ Jehowa, nsala lolango lande, ndo nsambisha lokumu l’ɔlɔlɔ lo yɛdikɔ y’efula.”

Kɛnɛ kaleka mbisha wadi waki edo ɛsɔ ɔngɛnɔngɛnɔ ele wɔtwɛlɔ wa nsanganya. Ekumanyi kɛmɔtshi ka l’etshumanelo kawɔ mbutaka ate: “Vɔ hawetsha kânga losanganya ɔtɔi. Mbala tshɛ vɔ ndjalɔngɔsɔlaka dia ndjosha kɔmatɛrɛ lo Wekelo wa Tshoto y’Etangelo.”

Ɛnyɛlɔ kawɔ ka kɔlamelo toholaka wadi aki odo Anna, ‘laki kombetshaka lo tɛmpɛlɔ ndoko lushi. Nde akakambaka olimu w’ekila otsho la yanyi la dikilelo dia mbo ya ndɛ ndo l’ɛsɛngɔsɛngɔ.’ Kɛsɔ akôkimanyiya dia nde monga la diɛsɛ dia ndjɛna Yeso etena kakinde ɔna ashashi. (Luka 2:36-38) Kânga mbakinde l’ɛnɔnyi 84, Anna kombuta dia nde aya osombe efula, hayokoka kambɛ Jehowa ndo ngasɔ mbediɔ ndo lo dikambo dia ndoyi yande yɔtɛkɛtshiso dikambo diawɔ lanɛ.

Onde wɛ ekɔ l’ewotɔ walanga mpokamɛ losango l’oma lo Bible? Kana onde wɛ ambohomanaka la osombe ɔmɔtshi l’esambishelo waketawɔ dia kohokamɛ? Anto wa ngasɔ koka ndjonga oko Ana ehende wɔtɛkɛtshiso dikambo diawɔ, nɛ dia oyadi onto aya osombe, eke mpɛtsha ko ndɛ dia nde kambɛ Jehowa, Nzambi ka mɛtɛ.

[Efundelo wa l’etei w’odingɔ wa lo lɛkɛ 25]

“Jehowa ambɔmɛnya ɔlɔlɔ ande”

[Efundelo wa l’etei w’odingɔ wa lo lɛkɛ 25]

“La ntondo ka Paradiso ndja, dimi kombolaka kambɛ Jehowa”