ASAWO WƆTƆNƐ L’ƆTƐ A DUI WA LO LOHOSO | WAA NA WELE ƐMƐNYI WA JEHOWA?
Weho akɔna w’anto wele Ɛmɛnyi wa Jehowa?
Sho tekɔ okongamelo wa l’andja w’otondo wahayasɔhanya l’ɛtɛmwɛlɔ ekina. Kaanga mbele mbalasa kalɔmbɔla olimu aso wa l’andja w’otondo kekɔ l’États-Unis, efula ka Ɛmɛnyi wa Jehowa wekɔ lo mbidjasɛ lo wedja ekina. Lo mɛtɛ, miliyɔ oko enanɛi ya l’atei aso tekɔ lo mbetsha anto Bible lo wedja ndekana 230. Sho salaka ngasɔ dia nkotsha ɛtɛkɛta waki Yeso w’ɔnɛ: “Lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ.”—Mateo 24:14.
Oyadi dihole diakɔna diodjashiso, sho kitanyiyaka ɛlɛmbɛ la dilɛmiɛlɔ tshɛ. Koko sho salaka la wolo dia ntshikala lomangemamge lo awui wa pɔlitikɛ. Sho salaka ngasɔ nɛ dia tekɔ lo nkitanyiya kɛnɛ kakatɛ Yeso Akristo diaha monga “ase andja ɔnɛ.” Diakɔ diele, sho hatoyatambiya lo awui wa pɔlitikɛ kana sukɛ awui wa ata. (Joani 15:19; 17:16) Etena kakalɔmaka Ta dia hende dia l’andja w’otondo, Ɛmɛnyi wa Jehowa wakadjama lo nkanu, wakasɔkishama ndo wakaasalɛ awui wa kɔlɔ efula nɛ dia vɔ konanga nshisha lomangemange lawɔ. Evɛkɛ ɔmɔtshi w’edjedja w’ose Allemagne akafunde ate: “Vɔ mɛtɛ mbakoka mbuta dia vɔ ato mbatona nsala kɛnɛ kaashimba nkum’etema yawɔ lo Lowandji la Sato.”
“[Ɛmɛnyi wa Jehowa] wekɔ la lɔkɛwɔ la dimɛna. Sho koka nkamba l’anto asɔ waha bu la lokaki kaanga lo ahole wa laadiko wa lo pɔlitikɛ, koko hataakondjaki pondjo. . . . Vɔ nɛnyaka ewandji wa lɛɛta, koko vɔ mbetawɔka dia paka Diolelo diaki Nzambi to mbele l’akoka wa nkandola ekakatanu wele l’anto.”—Jurnalɛ ya Nová Svoboda, République Tchèque.
Koko, sho hatoyaanganya l’anto akina. Lo kɛnɛ kendana l’ambeki ande, Yeso akalɔmbɛ Nzambi lo mbuta ɔnɛ: “Lambokɔlɔmba, aha dia wɛ mbanya oma l’andja ɔnɛ.” (Joani 17:15) Ɔnkɔnɛ, wɛ koka tɛɛna takamba olimu, tasondja diangɔ ndo tatshɔ lo kalasa ya lo waa ngelo yeeso.