Ambola w’oma le ambadi

Etena kakatɛ Satana Eva ɔnɛ nde hovɔ naka nde ndɛ olowa w’oma l’osongo w’ewo ka kɛnɛ kele ɔlɔlɔ la kɛnɛ kele kɔlɔ, onde nde akadje lo yimba yande kanyi yambokokanɛ ɛlɔ kɛnɛ y’ɔnɛ anima havu?

Ondo bu. Diabolo kombitɛ Eva ɔnɛ naka nde ndɛ olowa wakashimbe Nzambi, kete otɛnama dia nde ambovɔ tsho, koko etenyi kande kahɛnama (kɛnɛ kelɛ anto amɔtshi ɛlɔ kɛnɛ ɔnɛ anima wahavu) kotototetemala nsɛna dihole dikina. Lo ntɛkɛta lo tshimbo y’oloyi, Satana akataka ɔnɛ naka Eva ndɛ olowa w’oma l’osongo ɔsɔ, ‘nde hatovɔ mɛtɛ.’ Nde akɛnyaka dia Eva ototetemala nsɛna, ngɛnangɛna la lɔsɛnɔ la dimɛna efula la nkɛtɛ aha la mendɛ le Nzambi.​—Eta. 2:17; 3:3-5.

Naka wetshelo wa kashi w’ɔnɛ anima havu wetshawɔ anto ɛlɔ kɛnɛ kotatɛ oma l’Ɛdɛna, etena kakɔna kakawatatɛ? Hatokoke mbita dui sɔ l’eshikikelo. Sho mbeyaka dia ɛtɛmwɛlɔ wa kashi tshɛ wakalanyema lo Mvula k’elola ka lo nshi ya Nɔa. Ndooko tokanyi ta kɔlɔ ta l’ɔtɛmwɛlɔ takonge l’ɔkɔngɔ wa Mvula k’elola, nɛ dia paka Nɔa la nkumbo kande, mbuta ate atɛmɔdi wa mɛtɛ ato mbakake.

Diakɔ diele, wetshelo wetshawɔ nshi nyɛ w’ɔnɛ anima w’onto hawovu wakatatɛ l’ɔkɔngɔ wa Mvula k’elola. Etena kakafukutanya Nzambi ɛtɛkɛta lo Babɛlɛ ndo kakahandjɔ anto “lo nkɛtɛ k’otondo,” ndooko onyake vɔ wakatshu la kanyi y’ɔnɛ anto wekɔ la anima wahavu. (Eta. 11:8, 9) Oyadi etena kakɔna kakatatɛ kanyi ya kashi shɔ, sho koka monga l’eshikikelo ɔnɛ Satana Diabolo, “she kashi,” mbele lo kiɔkɔ yayɔ ndo aki l’ɔngɛnɔngɛnɔ dia mɛna woho wakayadiangana l’andja w’otondo.​—Jni. 8:44.