Matshwenyego a ga Maggy le Masego a Me
Labobedi wa May 2, 1995 ke letsatsi le morwadiake a neng a tsalwa ka lone le le mosadi wa me a neng a swa ka lone. Ka maswabi, Maggy ga a ka a bona le sefatlhego sa ngwana wa gagwe. Tsholofelo ya me gone jaanong ke go itsise Tamara mo go mmaagwe fa a tla bo a tsositswe mo baswing.
MORAGO ga dingwaga di le 16 re sena go nyalana, mosadi wa me, Maggy, o ne a bolelelwa ke ngaka ya gagwe gore o na le kankere ya mabele le gore o tla tshela dikgwedi di sekae fela. Seno se diragetse dingwaga tse tlhano tse di fetileng. Selo se se itumedisang ke gore Maggy o ne a kgona go tshela sentle fela mo dingwageng tsa bofelo tsa botshelo jwa gagwe. Ke fela mo malatsing a bofelo ditlhabi di neng tsa mo gatelela thata.
Ka ntlha ya go anama ga kankere ya gagwe, dingaka di ne tsa bolela fa go ka direga gore a se ka a kgona go ima. Ka jalo o ka akanya fela kafa re neng ra tshoga ka teng nako ya fa go dirwa ditlhatlhobo tsa ka gale tsa ultrasound go lebelela dintho tsa kankere tse di ntseng di gola, ba bona lesea mo popelong ya gagwe! E ne e le mosetsana. Maggy o ne a na le dikgwedi di le nnè le sephatlo a imile. O ne a itumetse thata ka ntlha ya tsholofelo ya go nna mmè e le lekgetlho la ntlha.
Maggy o ne a dira sengwe le sengwe se a se kgonang go tlhomamisa gore lesea le tsalwe le itekanetse sentle. O ne a ela tlhoko dijo tse a di jang, mme le mo dibekeng tse pedi tsa bofelo tsa botshelo jwa gagwe fa setlhabi se nna botlhoko thata, o ne a nwa dibolayaditlhabi fa fela a sa tlhole a kgona go itshokela ditlhabi.
Go Segofadiwa ka Lesea le le Itekanetseng
Ka Matlhatso, April 29 pelo ya ga Maggy e ne e uba thata mme o ne a re: “Ke akanya gore ke tlile go swa.” Ke ne ka nna le ene mafelobeke otlhe. Ka Mantaga morago ga gore ke bitse ngaka, ka mo isa ka yone nako eo kwa bookelong jwa Montreal, mo Canada, jo bo seng kgakala le legae la rona mo St. Jérôme.
Ka 5:30 mo mosong o o latelang, mooki o ne a feta gaufi le lobati lwa kamore eo Maggy a neng a le mo go yone mme a lemoga gore o ne a le mo tlalelong. Go lebega a ne a tlhasetswe ke bolwetse jwa pelo. O ne a bitsa ngaka ka bonako go tswa mo kamoreng e e bapileng le eo. Lefa Maggy a ile a swa, setlhopha sa kalafi se ne sa kgona go falotsa lesea la rona. Tamara o ne a tsholwa dikgwedi di le pedi le sephatlo pele ga nako ya gagwe ya go tsholwa mme o ne a le bokete jwa dikilogerama di le 1,1.
E re ka selekanyo sa disele tsa madi a ga Tamara se ne se ngotlegile, dingaka di ne tsa batla go mo tshela madi. Lefa go ntse jalo, ba ne ba kgothalediwa go dirisa horomone e e itiretsweng e e bidiwang erythropoietin. Ba ne ba dira jalo, mme morago ga gore kalafi eno e atlege mo go oketseng selekanyo sa disele tsa madi a gagwe, mooki mongwe o ne a re: “Ke ka ntlha yang ba sa dirise seno mo maseeng otlhe?”
Tamara o ne a na le mathata a mangwe a a amanang le bana ba ba tshotsweng pele ga nako, mme a ne a alafiwa otlhe. Tota e bile ka nako ya fa Dr. Watters, ngaka e e alafang malwetse a boboko a ne a mo tlhatlhoba morago ga foo, o ne a bolelela mooki jaana: “Ke akanya gore o nneile lesea leno ka phoso go le tlhatlhoba; mo go nna le lebega le siame fela.”
Go Lebana le Loso le go Itshoka Morago
Go ne go le bokete mo go nna go leba Maggy a swa. Ke ne ka ikutlwa ke tlaletswe. Go ne go le bokete go bua ka loso lwa ga Maggy. Lefa go ntse jalo, ke ne ka bua ka lona ka nako ya fa bakaulengwe ba me le bokgaitsadi ba Bakeresete ba ne ba tlile mo kokelong. Fa ke ntse ke bua ka lone botlhoko bo ne bo fokotsega. Ka gale fa ke bala setlhogo sa Tora ya Tebelo kana Tsogang! se se nkamang, ke e baya kwa thoko mo karolong ya dilo tsa me ka namana mo laeboraring ya me mme ke e ntshe go e bala fa ke utlwa go tlhokega.
Kgwetlho e nngwe gape e ne e le go tla mo gae mo ntlong e e lolea. Go thata go itshokela bodutu. Maikutlo ano a sa ntse a le teng, lefa gone ke solegelwa molemo ke botsala jo bo agang jwa Bokeresete. Nna le Maggy re ne re tlwaetse go dira sengwe le sengwe mmogo, re ne re bua le ka bothata jo ke neng ke tla nna le jone jwa bodutu. O ne a batla gore ke nyale gape. Lefa go ntse jalo, dilo ga di motlhofo jalo.
Tshegetso go Tswa go Bakeresetekanna
Ga ke itse gore ke ka bo ke dirile eng fa e ne e se ka tshegetso ya Komiti ya Puisano le Dikokelo (HLC [Hospital Liaison Committee]) ya Basupi ba ga Jehofa. Mo mosong o Maggy a suleng ka one, Mosupi yo o nang le kitso go tswa go HLC o ne a le gone mo kokelong mme a ntlamela ka thuso e ke neng ke e tlhoka.
Badiri ba bookelo ba ne ba kgatlhegile thata ke thuso eo ke e boneng go tswa kwa phuthegong ya Bokeresete e e mo St. Jérôme mmogo le go tswa kwa diphuthegong tse dingwe mo lefelong leno. Bosigo joo go neng go itsisiwe loso lwa ga Maggy kwa dipokanong tsa rona tsa Bokeresete ka jone, ditsala tse di lorato di le 20 di ne tsa tsibogela seo ka go ntswa thuso. Tshegetso eo ne e le ya selekanyo se segolo tota.
Ditsala di ne di mpaakanyetsa dijo; segatsetsi sa setsidifatsi sa me se ne sa fetsa dikgwedi se tletse dijo tse dintsi. Ba lelapa la gaetsho le bakaulengwe le bokgaitsadi ba Bakeresete ba ne ba bo ba rekela morwadiake diaparo. Ba ne ba tlisa dilo tse dintsi moo ke neng ke sa tlhole ke na le mo nka di bayang gone tsotlhe.
Boitumelo Jaanong le Tsholofelo ya Isagwe
Tamara o nthusa go lebala tatlhegelo ya me. O tsere pelo ya me gotlhelele. Letsatsi lengwe le lengwe fa ke mo dumedisa ka boitumelo ke re “dumela,” o arabela ka monyenyo o mogolo a simolola “go bua” le go ragaraga matsogo le maoto a itumetse.
Ka ke le magogorwane wa moithutadinaledi, ke lebeletse pele go baya Tamara mo diropeng gore a lebe ka thelesekoupo ya me dikgakgamatso tsa legodimo tsa Mmopi wa rona yo Mogolo, Jehofa. Go akanya ka botshelo jo bo sa khutleng mo lefatsheng la Paradaise ke selo se se gomotsang tota. Le go itse gore seno ke se Tamara a tlileng go se solofela go dira gore ke itumele le go feta.—Pesalema 37:9-11, 29.
Fa ke akanya ka dingwaga tse tlhano tse di fetileng, nka di tlhalosa sentle ke re e ne e le tsa kutlobotlhoko le boitumelo. Ke ithutile go le gontsi ka nna le ka botshelo ka bojone. Ke tlhagafaletse go bona isagwe eo, jaaka Baebele e tlhalosa, “ga go ketla go tlhola go le loso; le gone ga go ketla go tlhola go le bohutsana, le fa e le selelo le fa e le botlhoko.”—Tshenolo 21:3, 4.
Ka nako eo, fa baswi ba tsosiwa, Maggy o tla kgona go hema a sa utlwe botlhoko. Tsholofelo le keletso ya me go gaisa tsotlhe, ke go nna gone go itsise Tamara mo go Maggy gore a bone mosetsanyana yo o neng a mo direla mo gontsi jaana.—Jaaka go boletse Lorne Wilkins.
[Setshwantsho mo go tsebe 14]
Ke na le mosadi wa me
[Setshwantsho mo go tsebe 14]
Morwadiarona Tamara