Dithaba tsa Caucasus Lefelo La Dipuo Tse Dintsi

AKANYA o le mo kgaolong e kgolo e e dithabathaba. Se se go gakgamatsang ke gore go na le ditšhaba di le dintsintsi mo kgaolong eno mme sengwe le sengwe se na le puo ya sone. Mo mafelong mangwe, batho ba ba nnang mo metseng e e bapileng ga ba utlwane ka puo! Baitse ba thutafatshe ba metlha ya bogare ba tshwanetse ba bo ba ile ba gakgamala ka tsela e e ntseng jalo ka gonne mongwe wa bone o ile a tlhalosa lefelo le le tshwanang le leo, e leng kgaolo ya Caucasus, a re ke “thaba ya dipuo tse dintsi.”

E re ka kgaolo eno ya Dithaba tsa Caucasus e le fa gare ga lewatle le Lentsho le lewatle la Caspian, e mo makopanelong a dikontinente mme e kopantse ditso tse dintsi, se se dirileng gore e nne le hisitori e e tswang kgakala le ditso tse dintsi. Batho ba kgaolo eno ba itsege ka go tlotla bagolo, go rata go bina le go amogela baeng ka lorato. Mme gone batho ba le bantsi ba ba etelang kgaolo ya dithaba tsa Caucasus ba bona selo se se kgatlhang thata ka lefelo leno e le ditso le dipuo tsa koo tse dintsi tse di sa tshwaneng—tota e bile le na le dipuo di le dintsi go feta kgaolo epe fela ya kwa Yuropa e e lekanang le lone.

Pharologano e e Gakgamatsang

Mo lekgolong la botlhano la dingwaga B.C.E., moitsehisitori wa Mogerika e bong Herodotus o ile a bega jaana: “Go na le ditšhaba tse dintsi tsa mefutafuta tse di nnang kwa kgaolong e e dithaba ya Caucasus.” Mo e ka nnang mo tshimologong ya lekgolo la ntlha la dingwaga C.E., moitsehisitori yo mongwe wa Mogerika e bong Strabo o ne a kwala ka merafe e le 70 e e nnang kwa kgaolong eo. Morafe mongwe le mongwe o ne o na le puo ya yone e bile o dira kgwebo kwa Dioscurias, e jaanong e leng toropo ya segompieno ya Sukhumi, e e mo lotshitshing lwa Lewatle le Lentsho. Masome a dingwaga a le mmalwa moragonyana, Pliny yo Mogolwane, mokanoki wa Moroma, o ne a kwala gore fa Baroma ba ne ba dira kgwebo kwa Dioscurias, ba ne ba tlhoka baranodi ba le 130.

Gompieno batho ba ditso di feta 50 ba sa ntse ba nna kwa Caucasus. Setso sengwe le sengwe se na le mofuta o o rileng wa diaparo, wa botaki le wa go aga. Go santse go buiwa bobotlana dipuo di le 37 tse di tlholegang fano—dingwe di buiwa ke batho ba le dimilionemilione mme tse dingwe di buiwa mo metseng e e rileng fela. Karolo ya kgaolo eno e go buiwang dipuo tse dintsi thata mo go yone e leng Dagestan Republic ya kwa Russia, e na le ditso di ka nna 30 tse di tlholegang koo. Le go fitlha jaanong, baitse ga ba tlhomamisege gore dipuo tseno di amana jang le gore di nnile gone ka tsela efe.

A o ka rata go bona gore mokwalo wa dipuo tsa kgaolo ya Caucasus o lebega jang? Web site ya semolao ya Basupi ba ga Jehofa ya www.pr418.com, e fitlhelwa ka dipuo di feta 400. Gareng ga tsone ke dingwe tsa dipuo tse di buiwang mo kgaolong ya Caucasus, e leng kgaolo e e kgatlhang e go tshwanelang go bo e bidiwa “thaba ya dipuo tse dintsi.”

DITLHAKA TSE DINTSI LE MEDUMO YA MEFUTAFUTA

Dipuo tsa kwa kgaolong ya Caucasus di dirisa mekwalo e e farologaneng. Se-Armenia le Se-Georgia di na le ditlhaka tse di sa tshwaneng le tsa dipuo tse dingwe. Dipuo tse dingwe di dirisa mokgwa wa go kwala o o dirisang ditlhaka tsa mokwalo wa ga Cyril kgotsa ditlhaka tsa Selatine tse di fetotsweng.

Dipuo tsa kwa kgaolong ya Caucasus tse di kwa mafelong a a kwa bokonebophirima di na le ditumammogo di le dintsi go feta dipuo tsotlhe mo lefatsheng, mme di na le ditumanosi di le mmalwa fela. Go ya ka buka nngwe ya tshedimosetso, dipuo tseo di dirisa ditumammogo “tse modumo wa tsone o dirwang ka karolo nngwe le nngwe e e ka kgonang go dira modumo ya molomo le mometso.” Motho wa bofelo yo puo ya kwa kgaolong ya Caucasus ya Se-Ubykh e neng e le segabone o ne a tlhokafala ka 1992. Mme go bolelwa gore puo eno e ne e na le ditumammogo di ka nna 80 tse di farologaneng, gongwe le ditumanosi di le 2 fela.

Tlhamane nngwe e bua ka mmusi mongwe wa Bamoseleme wa kwa Turkey yo o neng a romela moithuti kwa kgaolong ya Caucasus go ya go ithuta Se-Ubykh. Fa moithuti yono a boa, o ne a tlhalosa lebaka la go bo a sa kgona go se ithuta ka go tsaya kgetsana e e nang le matlapana a bo a a tshololela fa fatshe mo bodilong jwa mmabole fa pele ga mmusi yono wa Bamoseleme. O ne a re: “Utlwa medumo eno. Fela jaaka go le thata go tlhaloganya modumo wa matlapana ano, go thata fela jalo gore motho yo o sa itseng Se-Ubykh a se tlhaloganye.”