Ditoro

Tlhaloso: Megopolo kana dipono tsa tlhaloganyo tsa motho fa a ntse a robetse. Bibela e lebisa go ditoro tsa tlholego, ditoro tse di tswang go Modimo, le ditoro tse di kopanyeletsang boloi.—Yobe 20:8; Dipa. 12:6; Seka. 10:2.

A ditoro mo metlheng ya rona di na le bokao bongwe jo bo kgethegileng?

Babatlisisi ba ithutileng kaga ditoro?

“Mongwe le mongwe o a lora,” go bolela jalo The World Book Encyclopedia (1984, Bol. 5, ts  279). “Bagolo ba bantsi ba lora metsotso e e ka nnang 100 mo dioureng tse robedi tsa boroko.” Ka jalo ditoro ke boitemogelo jo bo tlwaelegileng jwa motho.

Go boletse jaana Dr. Allan Hobson, wa Sekolo sa Botsogo sa Harvard: “Ke tlhotlheletso e e raraaneng eo e ka tlhalosiwang ka tsela nngwe le nngwe fa e bewa fa pele ga ngaka. Bokao jwa tsone bo mo tlhaloganyong ya modilori—eseng mo torong ka boyone.” Fa e ne e bega seno, karolo ya “Science Times” ya The New York Times e ne ya oketsa ka gore: “Mo teng ga kakanyo eo go bewang bokao jo bogolo jwa ditoro, go na le ditsela tse dintsi tsa go bona molaetsa wa tlhaloganyo wa toro, nngwe le nngwe e na le dipono tsa phopholetso tse di farologaneng. Mo-Freudian o tla bona mofuta o mongwe wa bokao mo torong, fa Mo-Jungian a tla bona o mongwe, mme moithuta ditiragalo tsa tlhaloganyo wa Mo-Gestalt o sa ntse a tla bona bokao jo bongwe gape. . . . Mme pono ya gore ditoro di na le bokao jwa tlhaloganyo e ne ya tlhaselwa fela thata ke baitseanape ba disele tsa tlhaloganyo.”—July 10, 1984, ts. C12.

A ditoro tseo go lebegang di neela kitso e e kgethegileng di ka tswa di tswa motsweding o mongwe go na le Modimo?

Yer. 29:8, 9: “Gonne Yehofa oa mashomōshomō, . . . a re, A baperofeti ba lona ba ba mo gare ga lona, le baitseanape ba lona, ba se lo tsietse, gapè lo se ka loa reetsa ditōrō tsa lona tse lo di lōrañ. Gonne ba perofesa ka tsieco mo ineñ ya me: ga kea ba roma, go bua Yehofa.”

Harper’s Bible Dictionary e re itsise jaana: “Bababelona ba ne ba na le ikanyo e kgolo mo ditorong mo eleng gore mo nakong ya pele ga diphetso tse di botlhokwa ba ne ba robala mo ditempeleng, ba solofetse go bona kgakololo. Bagerika ba ba neng ba eletsa kgakololo kaga botsogo ba ne ba robala mo dikagong tsa kobamelo tsa ga Aesculapius [yo setshwantsho sa gagwe e neng e le noga], mme Baroma mo ditempeleng tsa ga Serapis [ka dinako tse dingwe a amanngwa le noga e e ithathileng]. Baegepeto ba ne ba kwala dibuka tse di tlhalosang ditoro ka botlalo.”—(New York, 1961), Madeleine Miller le J. Lane Miller, ts. 141.

Modimo o ne wa dirisa ditoro mo nakong e e fetileng go neela ditlhagiso, tao, le boperofeti, a mme jaanong o etelela batho ba gagwe pele ka tsela eo?

Dipego tsa ditoro tse di ntseng jalo tse di tswang mo Modimong di fitlhelwa go Mathaio 2:13, 19, 20; 1 Dikgosi 3:5; Genesise 40:1-8.

Baheb. 1:1, 2: “Modimo, o e rileñ ka o buile le borara mo metlheñ ea bogologolo ka baperofeti, ka mahoko mañwe le mañwe, le ka mekgwa meñwe le meñwe [go akareletsa le ka ditoro], O buile le rona mo bokhutloñ yoa metlha eno ka Morwa ōna [Jesu Keresete, yo dithuto tsa gagwe di kwadilweng mo Bibeleng].”

1 Bakor. 13:8: “Me leha go na le diperofeshō [mme ka dinako tse dingwe Modimo o ne o tlisa dipolelelo pele go batlhanka ba gagwe ka tsela ya ditoro], di tla khutlisiwa.”

2 Tim. 3:16, 17: “Lokwalō loñwe le loñwe lo lo kwadilweñ ka tlhotlheleco ea Modimo, lo bile lo molemō go ruta, . . . Gore motho oa Modimo a tlè a nnè boitèkanèlō, a iketleeleletse rure tihō ñwe le ñwe e e molemō.”

1 Tim. 4:1: “Me Mōea o bua ka thanolō, go re mo metlheñ ea moragō, bañwe ba tla tenèga mo tumeloñ, ba tlhōkōmèla meōea e e timetsañ [ka dinako tse dingwe e e tlang ka ditoro], le dithutō tsa badimo.”