Kgaolo 22

Karolo 1—Go Neela Bosupi go Fitlha kwa Dintlheng Tsotlhe tsa Lefatshe

Eno ke karolo ya ntlha ya tse tlhano tsa kgaolo e e begang kafa tiro ya Basupi ba ga Jehofa e ileng ya anamela mo lefatsheng lotlhe ka teng. Karolo 1, e e akaretsang nako ya go tloga ka bo1870 go fitlha ka 1914, e simolola mo go tsebe 404 go fitlha ka 422. Batho ga ba ise ba ko ba kgone go rula mo masetlapelong a a neng a bakiwa ke Ntwa ya Lefatshe I, e e neng ya simolola ka 1914. Oo e ne e le ngwaga o Baithuti ba Bibela ba neng ba setse ba lemogile go le gale gore o tshwaya bokhutlo jwa Metlha ya Baditšhaba.

JESU KERESETE o ne a laela baaposetoloi ba gagwe jaana pele a tlhatlogela kwa legodimong: “Lo tla nna bashupi ba me . . . go ea hèla kwa sekhutloñ sa lehatshe.” (Dit. 1:8) O ne a boleletse pele gape gore “Mahoko a a Molemō a, a bogosi, a tla rèrwa mo lehatshiñ yeotlhe, go nna chupō mo merahiñ eotlhe.” (Math. 24:14) Tiro eo ga e a ka ya wediwa mo lekgolong la ntlha la dingwaga. Karolo e kgolo ya yone e ile ya dirwa mo metlheng ya segompieno. Mme pego ya go dirwa ga yone go tswa ka bo1870 go tla go fitlha jaanong ruri ke e e itumedisang.

Le mororo Charles Taze Russell a ile a itsege thata ka dipuo tsa gagwe tse di neng di itsisitswe thata tsa Bibela, ga se gore o ne a kgatlhiwa ke go bo a ne a reediwa ke batho ba bantsi, mme o ne a kgatlhegela batho ka bobone. Ke gone ka moo, erileng fa a sena go simolola go gatisa Tora ya Tebelo ka 1879 a ileng a tsaya maeto a maleele a etela ditlhopha tse dinnye tsa babadi ba makasine oo le go buisana le bone ka Dikwalo.

C. T. Russell o ne a kgothaletsa ba ba neng ba dumela ditsholofetso tse di molemo tsa Lefoko la Modimo gore ba di bolelele ba bangwe. Bao dipelo tsa bone di neng tsa amiwa thata ke se ba neng ba se ithuta ba ne ba dira jalo ka tlhoafalo. Ba ne ba neelwa dikgatiso gore di ba thuse mo tirong eno. Kwa tshimologong ya 1881, go ne ga nna le dipampitshana di le mmalwa. Go ne ga tsewa tshedimosetso mo go tsone ya kopanngwa le e nngwe gape go dira buka e go tweng Food for Thinking Christians, e go neng ga gatisiwa dikaelo tsa yone di le 1 200 000 gore di tle di anamisiwe. Mme palonyana e nnye eo ya Baithuti ba Bibela (e ka nako eo gongwe e neng e ka tshwara 100) e ne e tla kgona jang go di anamisa tsotlhe?

Go Fitlhelela Batho Ba Ba Tsenang Kereke

Dingwe di ne tsa newa ditsala le balosika. Makwalodikgang mangwe a le mmalwa a ne a dumela go romela kopi e le nngwe kwa go ba ba neng ba dirile dipeeletso tsa one. (Go ne ga ganelelwa thata mo dipampiring tse di tswang gangwe fela ka beke le gangwe fela ka kgwedi gore Food for Thinking Christians e kgone go fitlha kwa bathong ba ba neng ba nna mo dikgaolong tsa selegae.) Mme lefa go ntse jalo ba ne ba kgona go tsamaisa tse dintsi thata ka boSontaga ba ba tlhomaganeng fa pele ga dikereke kwa United States le kwa Borithane. Go ne go sena palo e e lekaneng ya Baithuti ba Bibela go dira tiro eo yotlhe, ka jalo ba ne ba hira bangwe go ba thusa.

Mokaulengwe Russell o ne a romela ditsala dingwe tsa gagwe tse pedi ebong J. C. Sunderlin le J. J. Bender, kwa Borithane go ya go okamela tiro ya go anamisa dikaelo di le 300 000 koo. Mokaulengwe Sunderlin o ne a ya kwa Lontone, fa Mokaulengwe Bender ene a ne a ya kwa bokone jwa Scotland le kwa borwa. Go ne go itebagantswe thata le metsemegolo e metona. Ba ne ba kgona go bona banna ba dinatla gonne ba ne ba phasaladitse seo mo makwalodikgannyeng, mme go ne ga dirwa ditumalano le bone gore ba rulaganye bathusi ba ba lekaneng go anamisa mekoa e ba neng ba e neetswe. Baanamisi ba ba ka tshwarang 500 ba ne ba bonwa kwa Lontone fela. Tiro e ne ya dirwa ka bofefo, ka boSontaga ba babedi ba ba latelanang.

Mo ngwageng one oo, go ne ga dirwa dithulaganyo tsa gore Baithuti ba Bibela ba ba neng ba ka kgona go dirisa sephatlo sa nako ya bone kgotsa nako ya bone e e oketsegileng mo tirong ya Morena ba dire jaaka barekisi ba dibuka, ba anamise dibuka tsa go ithuta Bibela. Bano ba ba ileng ba tla pele, ba gompieno ba itsiweng jaaka babulatsela ba ile ba dira tiro e kgolo fela thata ya go anamisa mafoko a a molemo.

Mo dingwageng tse di lesome tse di neng tsa latela, Mokaulengwe Russell o ne a rulaganya dipampitshana tse di farologaneng tse di neng di dirisiwa go anamisa boammaaruri bongwe jo bo tlhomologileng jwa Bibela jo bo neng bo setse bo ithutilwe. O ne a kwala gape dibolumo di le dintsinyana tsa Millennial Dawn (tse moragonyana di ileng tsa bidiwa Studies in the Scriptures). Morago o ne a simolola go tsaya maeto a go rera ka namana go ya kwa dinageng tse dingwe.

Russell O Ya kwa Dinageng Di Sele

Ka 1891 o ne a etela Canada, koo go neng go na le batho ba bantsi ba ba kgatlhegang teng fa esale ka 1880 mo go neng ga kgonega gore go tshwarwe kopano e e neng ya tliwa ke ba le 700 kwa Toronto. O ne a etela gape kwa Yuropa ka 1891 go bona gore ke eng se se ka dirwang go tsweledisa go anamisiwa ga boammaaruri pele koo. Mo loetong lono o ne a ya kwa Ireland, Scotland, Engelane, dinaga tse dingwe tse dintsi tsa Yuropa, Russia (karolo e jaanong e bidiwang Moldova) le kwa Botlhabagare.

O ne a swetsa jang ka ba a neng a kopana le bone mo loetong loo lwa gagwe? O ne a bega jaana: “Ga re a bona maemo a letla kana gone gore boammaaruri bo ka amogelwa ka gope kwa Russia . . . Ga re a bona sepe se se re nametsang gore re ka solofela gore go ka rojwa sepe kwa Italy kana Turkey kana Austria kana Jeremane. Mme lefa go ntse jalo Norway, Sweden, Denmark, Switzerland, mme bogolo jang Engelane, Ireland le Scotland, ke masimo a a buduleng a a emetseng fela go robiwa. Masimo ano a lebega ekete a tlhaeletsa a re, Tlang lo re thuseng!” Ono e ne e le motlha oo ka one Kereke ya Katoliki e neng e thibela go balwa ga Bibela, nako e bontsi jwa Baporotesetanta ba neng ba tlogela dikereke tsa bone, le nako e ka yone bontsi jo bo neng bo sa tlhole bo tsiediwa ke dikereke bo neng bo gana Bibela gotlhelele.

E le gore go tle go thusiwe batho ba ba neng ba tshwerwe ke tlala ya semoya, morago ga loeto lwa ga Mokaulengwe Russell ka 1891, go ne ga dirwa maiteko a magolo a go ranolela dibuka mo dipuong tsa kwa Yuropa. Gape, go ne ga dirwa dithulaganyo tsa gore go gatisiwe le go boloka dibuka kwa Lontone gore di nne di ntse di le teng go ka dirisiwa kwa Borithane. Ka boammaaruri, tshimo ya Borithane e ne ya itshupa e emetse go robiwa. Ka 1900, go ne go setse go na le diphuthego di le robonngwe mme go ne go na le palogotlhe ya Baithuti ba Bibela ba le 138—mme bangwe ba bone, e ne e le barekisi ba ba tlhaga ba dibuka. Fa Mokaulengwe Russell a ne a etela Borithane gape ka 1903, ba le sekete ba ne ba kgobokana kwa Glasgow go mo reetsa a bua ka setlhogo se se reng “Dilo Tse Di Solofetsweng le Tse Di Lebeletsweng tsa Mileniamo,” ba le 800 ba ile ba nna teng kwa Lontone, mme kwa ditoropong dingwe go ne go na le bareetsi ba ba ka tshwarang 500 go ya go 600.

Lefa go ntse jalo, fela jaaka Mokaulengwe Russell a ne a lemoga, go ile ga tsaya dingwaga di le 17 morago ga loeto lwa gagwe pele go nna le phuthego ya ntlha ya Baithuti ba Bibela kwa Italy, kwa Pinerolo. Mme go tweng ka Turkey? Mo dingwageng tsa bofelo tsa bo1880, Basil Stephanoff o ne a setse a rerile kwa Makedonia, koo ka nako eo go neng go bidiwa European Turkey. Le mororo bangwe ba ile ba lebega ba kgatlhega, bangwe ba ba ileng ba ipitsa bakaulengwe ba ile ba bega dilo tse di seng boammaaruri, tse di ileng tsa dira gore a latlhelwe mo kgolegelong. Go ile ga se ka ga diragala sepe go fitlha ka 1909 fa go ne go amogelwa lekwalo le kwadilwe ke Mogerika mongwe kwa Semerena (eo jaanong e bidiwang Izmir), kwa Turkey, le le neng la bega gore setlhopha sengwe koo se ne se itumelela go ithuta dikgatiso tsa Watch Tower. Fa e le ka Austria, Mokaulengwe Russell ka boene o ne a boela teng ka 1911 go ya go bua kwa Vienna, mme kokoano eo e ne ya kgorelediwa ke segopa sa batho. Mme le kwa Jeremane, batho ba ba kgatlhegang ba ne ba bonwa ka bonya. Mme batho ba Scandinavia ba ne ba bontsha fa ba lemoga thata gore ba tlhoka eng semoyeng.

Ba-Scandinavia ba Bolelela ba Bangwe

Batho ba Sweden ba le bantsi ba ne ba nna kwa Amerika. Ka 1883 ba ne ba newa kopi e go neng go lekelediwa ka yone ya Watch Tower e e ranotsweng ka Se-Sweden. Go ise go ye kae dikopi tseno di ile tsa romelelwa ditsala le balosika kwa Sweden. Go ne go ise go gatisiwe dibuka dipe ka Se-Norway. Lefa go le jalo, ka 1892, ngwaga morago ga loeto lwa ga Mokaulengwe Russell la kwa Yuropa, Knud Pederson Hammer, Mo-Norway yo o neng a ithutile boammaaruri kwa Amerika, o ne a boela kwa Norway go ya go rerela balosika.

Mme, erile ka 1894, fa dibuka di simolola go gatisiwa ka Se-Norway se se buiwang kwa Denmark, Sophus Winter, Mo-Denmark wa kwa Amerika wa dingwaga tse 25 o ne a romelwa kwa Denmark go ya go anamisa mokoa o a neng a o neetswe. Mo dikgakologong tse di latelang, o ne a setse a tsamaisitse dibolumo di le 500 tsa Millennial Dawn. Mo nakong e khutshwane fela, palo e potlana ya ba ba neng ba badile dikgatiso tseo e ne e setse e mo thusa mo tirong eo. Ka maswabi, e ne ya re kwa morago a latlhegelwa ke go leba tshiamelo e e molemolemo e a neng a na le yone ka tsela e e siameng; mme lefa go le jalo ba bangwe ba ne ba tswelela ba phatsimisa lesedi.

Lefa go le jalo, pele a tlogela tirelo, Winter o ile a direla jaaka morekisi wa dibuka kwa Sweden. Ka bonako fela morago ga foo, mookamedi yo mmotlana wa Salvation Army ebong August Lundborg, o ne a bona dibolumo tse pedi tsa Millennial Dawn kwa legaeng la tsala ya gagwe kwa setlhaketlhakeng sa Sturkö. O ne a di adima, a di bala ka tlhoafalo, a tswa mo kerekeng, mme a simolola go bolelela ba bangwe se a neng a se ithutile. Lekawana le lengwe ebong P. J. Johansson o ne a bulega matlho fa a sena go bala pampitshana e a neng a e sela mo bankeng ya paraka.

Fa setlhopha sa Sweden se ntse se gola, bangwe ba bone ba ne ba ya kwa Norway go ya go anamisa dibuka tsa Bibela. Mme le pele ga moo, dibuka di ne di setse di gorogile kwa Norway ka poso go tswa kwa go balosika kwa Amerika. Rasmus Blindheim o ne a simolola go direla Jehofa ka tsela eno. Mo bathong ba Norway, go ne go na le Theodor Simonsen yo e neng e le moruti wa kereke ya Free Mission, yo o neng a bona boammaaruri mo dingwageng tseo tsa kwa tshimologong. O ne a simolola go ganetsa thuto ya dihele mo therong tsa gagwe kwa Free Mission. Bareetsi ba gagwe ba ne ba itumelela go utlwa dikgang tseno tse di molemo; mme fa go ne go lemogiwa gore o ne a ikopantse le “Millennial Dawn,” o ne a kojwa mo kerekeng. Lefa go ntse jalo, o ne a tswelela pele a bua ka dilo tse di molemo tse a di ithutileng. Lekawana le lengwe le le neng la amogela dibuka e ne e le Andreas Øiseth. Fa a sena go tlhatswega pelo gore o bone boammaaruri, o ne a tlogela polasi ya gaabo mme a ya go dira tiro ya go rekisa dibuka. O ne a dira karolo e e kafa bokone ka botswerere, mme go tswa foo a bo a ya kwa borwa a raletse melapo e e mo dithabeng, a sa fete batho bape. Mo marigeng o ne a tsamaya a tshotse dilo tse a di tlhokang—dijo, diaparo, le dibuka—ka selei se se kgoromediwang, mme batho ba ba amogelang baeng ba ile ba mo fa boroko. Mo loetong loo lo lo tsereng dingwaga di le robedi, o ne a batla a kopanya naga yotlhe a itsise mafoko a a molemo.

Mosadi wa ga August Lundborg ebong Ebba, o ne a tswa kwa Sweden a ya kwa Finland go ya go dira tiro ya go rekisa dibuka ka 1906. Ka nako yone eo, banna ba ba neng ba tswa kwa United States ba ne ba tla ka dikgatiso tsa Watch Tower mme ba simolola go bolelela ba bangwe dilo tse ba neng ba di ithutile. Ka jalo mo dingwageng di sekae fela, Emil Österman, yo o neng a batla sengwe se se botoka go gaisa se dikereke di neng di se neela, o ne a kgona go nna le The Divine Plan of the Ages. O ne a e bala le tsala ya gagwe ebong Kaarlo Harteva, yo le ene a neng a ntse a senka. Ka go lemoga mosola wa se ba neng ba se ithuta, Harteva o ne a e ranolela mo puong ya Se-Finland, mme, a thusiwa ke Österman ka madi, o ne a rulaganya gore e gatisiwe. Boobabedi ba ne ba tsaya matsapa a go e anamisa. Ba ne ba itshupa tota gore ke bareri ka go bua le batho mo mafelong a botlhe, ba tsamaya ka ntlo le ntlo, ba bo ba neela dipuo mo mafelong a matona a bokopanelo a a neng a tlala fela thata. Kwa Helsinki, fa Mokaulengwe Harteva a sena go senola maaka a dithuto tsa Labokeresete, o ne a laletsa bareetsi gore yo o kgonang a dirise Bibela go femela thuto ya gore moya ga o swe. Botlhe ba ne ba leba moruti yo a neng a le teng. Go ne go se ope yo o buang; go se ope yo a neng a ka ganetsa ntlha e e papametseng e e bonwang mo go Esekiele 18:4. Bangwe mo bareetsing ba ne ba re ga ba a ka ba bona boroko bosigong joo ka ntlha ya se ba neng ba se utlwile.

Moleminyana Fela wa Ditshingwana O Nna Moreri wa Efangele kwa Yuropa

Ka nako eo, Adolf Weber, yo o ileng a kgothadiwa ke tsala ya gagwe e e godileng ya Mo-Anabaptist, o ne a tloga kwa Switzerland a ya kwa United States gore a tlhalosediwe Dikwalo ka botlalo. Fa a tsena koo, o ne a nna molemi wa tshingwana ya ga Mokaulengwe Russell a sena go bona seo se anamisitswe. Adolf o ne a thusiwa ke The Divine Plan of the Ages (e e neng e setse e le teng ka Sejeremane) le dipokano tse di neng di tshwarwa ke Mokaulengwe Russell, go bona kitso ya Bibela e a neng a e batla, mme o ne a kolobediwa ka 1890. ‘Matlho a pelo ya gagwe a ne a sedifala,’ mme o ne a tlhaloganya ka botlalo tshiamelo e kgolo e e neng e mmulegetse. (Baef. 1:18) Fa a sena go rera ka lobakanyana a le tlhaga kwa United States, o ne a boela kwa nageng e a tsholetsweng kwa go yone go ya go dira ‘mo tshimong ya mofine ya Morena.’ Ka jalo, erile mo bogareng jwa bo1890, o ne a boetse kwa Switzerland a bolelela ba ba neng ba mo reetsa boammaaruri jwa Bibela.

Adolf o ne a bona se a itshedisang ka sone ka go dira jaaka molemi wa ditshingwana le mojadi wa ditlhare, mme lefa go le jalo o ne a rata go rera thata. O ne a rerela ba a neng a dira le bone, mmogo le batho ba ba neng ba le mo ditoropong le metse e e fa gaufi ya Switzerland. O ne a itse dipuo di le mmalwa, mme o ne a dirisa kitso eno go ranolela dikgatiso tsa Mokgatlho mo Seforeng. Fa mariga a tsena o ne a tle a tlatse kgetsi ya gagwe ka dibuka tsa Bibela a bo a tsamaya ka dinao go ya kwa Fora, mme ka dinako tse dingwe o ne a ya kwa bokonebophirima kwa Belgium le kwa borwa kwa Italy.

E le gore a tle a kgone go fitlhelela batho ba a neng a ka se ka a ba bona ka namana, o ne a kwala dikitsiso makwalodikgannyeng le mo dimakasineng go itsise gore go na le dibuka tsa go ithuta Bibela. Kwa bogare jwa Fora, Elie Thérond o ne a araba nngwe ya dikitsiso tseo, o ne a lemoga gore se a neng a se bala e ne e le boammaaruri a bo a simolola go anamisa molaetsa ka bofefo fela. Kwa Belgium, Jean-Baptiste Tilmant, yo Mogolwane, le ene o ne a bona nngwe ya dikitsiso tseo ka 1901 mme o ne a itseela dibolumo di le pedi tsa Millennial Dawn. Abo go ile ga mo itumedisa jang ne go bona boammaaruri jwa Bibela bo tlhalosiwa ka tsela e e phepafetseng jalo! Tota o ne a ka lesa jang go bolelela ditsala tsa gagwe! Mo ngwageng o o latelang, go ne go setse go na le setlhopha se se kopanelang ka metlha mo legaeng la gagwe go tla go ithuta. Ka bonako fela morago ga foo tiro ya setlhopha se sennye seo e ne ya simolola go ungwa le kwa bokone jwa Fora tota. Mokaulengwe Weber o ne a ikgolaganya le bone, gangwe le gape a etela ditlhopha tse di farologaneng tse di neng tsa runya, a di aga semoyeng le go ba kaela kafa ba ka bolelelang ba bangwe mafoko a a molemo ka teng.

Fa Mafoko A A Molemo A Fitlha kwa Jeremane

Nakonyana fela fa dikgatiso di sena go nna teng ka Sejeremane, mo bogareng jwa bo1880, Bajeremane ba ba neng ba le kwa Amerika ba ba neng ba di rata ba ne ba simolola go romelela balosika dikopi kwa nageng e ba tsholetsweng kwa go yone. Mooki mongwe yo o neng a dira kwa kokelong ya Hamburg o ne a amogela dikopi tsa Millennial Dawn mme a di bala le ba bangwe kwa kokelong eo. Ka 1896, Adolf Weber o ne a dira dikitsiso mo makwalodikgannyeng a a kwalwang ka Sejeremane a le kwa Switzerland a bo a romela dipampitshana kwa Jeremane. Go ne ga bulwa mabolokelo a dibuka kwa Jeremane mo ngwageng o o latelang, go thusa go anamisa Tora ya Tebelo ya Sejeremane, mme maungo a ne a se ka a bonwa ka bonako. Lefa go ntse jalo, ka 1902, Margarethe Demut yo a neng a ithutile boammaaruri kwa Switzerland o ne a ya kwa Tailfingen, kwa botlhaba jwa Black Forest. Go tlhagafalela ga gagwe go rera ka namana go ne ga thusa mo go simololeng sengwe sa ditlhopha tsa ntlha tsa Baithuti ba Bibela kwa Jeremane. Samuel Lauper yo a neng a tswa kwa Switzerland o ne a fudugela kwa Bergisches Land, kwa bokonebotlhaba jwa Cologne, go ya go anamisa mafoko a a molemo kwa lefelong leo. Ka 1904, dipokano di ne di setse di tshwarwa gone koo kwa Wermelskirchen. Mo go bone go ne go na le rre mongwe yo o nang le dingwaga tse 80 ebong Gottlieb Paas yo o neng a sa bolo go batla boammaaruri. Morago ga lobaka lo lokhutshwane fela fa dipokano tseo di sena go simololwa go tshwarwa, Paas o ne a tshwara Tora ya Tebelo mme o ne a bolela jaana fela fa a tla tloga a swa: “Seno ke boammaaruri; bo ngapareleng.”

Kgabagare palo ya ba ba neng ba kgatlhegela boammaaruri jono jwa Bibela e ne ya oketsega. Le mororo go ne go batla madi a mantsi, dithulaganyo di ne tsa dirwa gore go tsenngwe dikopi tsa mahala tsa Tora ya Tebelo mo makwalodikgannyeng kwa Jeremane. Pego e e kwadilweng ka 1905 e bolela gore go ne ga anamisiwa dikopi tse di fetang 1 500 000 tsa Tora ya Tebelo. Seo e ne e le tiro e kgolo fela thata e e neng e kgonnwe go dirwa ke setlhopha se sennye seo.

Baithuti botlhe ba Bibela ba ne ba sa ikutlwe botlhe gore fa ba reretse batho ba ba gaufi le bone go ne go lekane. Go tloga ka 1907, Mokaulengwe Erler wa kwa Jeremane, o ne a tsaya maeto go ya kwa Bohemia koo ka nako eo go neng go bidiwa Austria-Hungary (e morago e neng ya nna karolo ya Czechoslovakia). O ne a anamisa dibuka tse di neng di tlhagisa ka Hara–Magedona le go bolela kaga masego a a tla tlelang batho morago ga moo. Ka 1912 Moithuti mongwe wa Bibela o ne a anamisitse dibuka tsa Bibela kwa kgaolong ya Memel, e jaanong e leng Lithuania. Bontsi bo ne jwa itumelela molaetsa oo fela thata, mme ditlhopha di le mmalwa tsa bogolo jo bo nametsang tsa Baithuti ba Bibela di ne tsa tlhomiwa koo ka bofefo. Mme lefa go le jalo, fa ba ne ba lemoga gore Bakeresete ba boammaaruri ba tshwanetse gape go nna basupi, dipalo tsa bone di ne tsa simolola go ya kwa tlase. Lefa go le jalo, ba sekae ba bone ba ne ba itshupa e le baetsi ba boammaaruri ba ga Keresete, “moshupi eo o boikañō le boamarure.”—Tshen. 3:14.

Nikolaus von Tornow, mohumi yo mogolo wa Jeremane yo o neng a na le matlo le dithoto tse dintsi kwa Russia, o ne a newa nngwe ya dipampitshana tsa Mokgatlho wa Watch Tower fa a ne a le kwa Switzerland ka 1907. Ngwaga tse pedi morago ga foo o ne a ya kwa Phuthegong ya Berlin, kwa Jeremane, a apere diaparo tsa gagwe tse dintle ebile a patilwe ke motlhanka wa gagwe. Go ne ga mo tsaya lobaka go tlhaloganya gore ke eng fa Modimo o ne o ka neela bathonyana fela ba ba kwa tlase boammaaruri jo bo botlhokwa thata jalo, mme legale se a neng a se bala mo go 1 Bakorintha 1:26-29 se ile sa mo thusa: “Gonne ba ga echo, a lo ko lo lebeñ go bidiwa ga lona, yaka go se bantsi ba ba botlhale kaha nameñ, go se bantsi ba ba nonohileñ, go se bantsi ba ba tlotlègañ, ba ba bidicweñ . . . Gore go se ka ga ikgantsha nama epè ha pele ga Modimo.” Fa a sena go kgotsofala gore o bone boammaaruri, von Tornow o ne a rekisa dithoto tsa gagwe kwa Russia mme a dirisa nako yotlhe ya gagwe le madi otlhe a gagwe go tsweletsa pele dilo tse di dirwang mo kobamelong e e phepa.

Ka 1911, fa basha bangwe ba babedi ba Bajeremane boorra Herkendell, ba ne ba nyalana, monyadiwa o ne a lopa rraagwe madi a a ntshiwang ke rraagwe mosetsana fa a nyalwa, a go tsaya loeto lwa fa ba sena go nyalana lo lo sa tlwaelegang. Ene le monna wa gagwe ba ne ba akantse go tsaya loeto lo lo neng lo tla ba tsaya dikgwedi di le dintsi. Loeto lono lwa fa ba sena go nyalana e ne e le loeto lwa go rerela batho ba ba buang Sejeremane ba ba kwa Russia. Ka jalo batho ba ba farologaneng ba ne ba bolelela ba bangwe se ba neng ba se ithutile kaga boikaelelo jo bo lorato jwa Modimo ka ditsela tse dintsi.

Koketsego kwa Tshimong ya Borithane

Fa dibuka di sena go anamisiwa thata kwa Borithane ka 1881, batho bangwe ba ba neng ba tsena kereke ba ne ba bona botlhokwa jwa gore ba dire go ya ka se ba se ithutileng. Tom Hart wa Islington, kwa Lontone, e ne e le mongwe wa ba ba neng ba kgatlhiwa thata ke kgakololo ya Dikwalo ya makasine wa Tora ya Tebelo e e neng e re, “Cwañ mo go èna, lona batho ba me”—ke gore tswang mo dikerekeng tsa Labokeresete tsa Sebabelona lo sale dithuto tsa Bibela morago. (Tshen. 18:4) O ne a tlogela kereke ka 1884, mme a salwa morago ke ba bangwe ba le mmalwa.

Bontsi jwa ba ba ileng ba kopanela le ditlhopha tsa thuto ba ile ba felela e le bareri ba ditswerere. Bangwe ba ile ba tsamaisa dibuka tsa Bibela mo diparakeng tsa Lontone le mo mafelong a mangwe a batho ba neng ba itapolosa mo go one. Bangwe ba ne ba itebaganya thata le mafelo a kgwebo. Lefa go ntse jalo, tsela e e neng e tlwaelegile thata e ne e le ya go tsamaya ka ntlo le ntlo.

Sarah Ferrie, mongwe wa ba ba neng ba dirile peeletso ya Tora ya Tebelo, o ne a kwalela Mokaulengwe Russell a mmolelela gore ene le dingwe tsa ditsala tsa gagwe kwa Glasgow ba ne ba eletsa go ithaopela go nna le seabe mo go tsamaiseng dipampitshana. Abo a ne a gakgamala jang ne fa llori e ne e ema fa kgorong ya gagwe ka dipampitshana di le 30 000, tsotlhe di tshwanetse go tsamaisiwa mahala! Ba ne ba tsena mo tirong. Minnie Greenlees a na le barwa ba gagwe ba bararo, ba pagame “kara e e gogwang ke dipitse,” o ne a dira ka natla go phatlalatsa dibuka tsa Bibela kwa magaeng a Scotland. Moragonyana, Alfred Greenlees le Alexander MacGillivray, ba ne ba tsamaya ka dibaesekele ba anamisa dipampitshana go ralala karolo e kgolo ya Scotland. Go na le go tlhola ba hira batho ba ba duela go tsamaisa dibuka, baithaopi ba ba ineetseng jaanong ba ne ba dira tiro eo ka bobone.

Dipelo tsa Bone Di Ne tsa Ba Patelela

Mo setshwantshong sengwe sa gagwe, Jesu o ne a re batho ‘ba ba utlwileng lefoko la Modimo ka dipelo tse di siameng le tse di molemo’ ba tla ungwa. Go anaanela ka boammaaruri dilo tse ba di newang ka lorato tsa Modimo go ne go tla ba dira gore ba bolelele ba bangwe mafoko a a molemo a Bogosi jwa Modimo. (Luke 8:8, 11, 15) Lefa ba ne ba ka tswa ba le mo maemong afe ba ne ba tla bona tsela nngwe ya go dira seo.

Motsamai mongwe wa Mo-Argentina o ne a bona karolo ya pampitshana ya Food for Thinking Christians mo motsamaising wa dikepe wa Mo-Italy. Fa ba le mo boemakepeng jwa Peru, motsamai yoo o ne a kwala a kopa tse dintsi, mme fa kgatlhego ya gagwe e sena go gola o ne a kwala gape, a le kwa Argentina ka 1885, a kwalela morulaganyi wa Tora ya Tebelo a kopa dibuka. Mo go one ngwaga oo leloko la British Navy, le le neng la romelwa le mophato wa lone kwa Singapore le ne la tsamaya ka makasine wa Tora ya Tebelo. O ne a itumelela se a neng a se ithuta mo makasineng oo fela thata mme o ne a o dirisa go tlhalosa se Bibela e se buang ka dikgang tse di neng di ratwa ke batho thata. Ka 1910 sekepe se se neng se pegile basadi ba babedi ba Bakeresete se ne sa ema ka lobakanyana mo boemakepeng jwa Colombo, kwa Ceylon (e jaanong e bidiwang Sri Lanka). Ba ne ba dirisa sebaka seo go rerela Rre Van Twest, mookamedi wa badiredi ba tsa lewatle wa boemakepe joo. Ba ne ba bua le ene ka tlhoafalo ka dilo tse dintle tse ba di ithutileng mo bukeng ya The Divine Plan of the Ages. Ka ntlha ya seo, Rre Van Twest o ne a nna Moithuti wa Bibela, mme mafoko a a molemo a ne a simolola go rerwa kwa Sri Lanka.

Le eleng ba ba neng ba sa kgone go tsamaya ba ne ba senka ditsela tsa go bolelela batho ba bangwe ba dinaga tse dingwe boammaaruri jo bo itumedisang jwa Bibela. Jaaka fa lekwalo lengwe le le neng le leboga le ne la bolela ka 1905, mongwe kwa United States o ne a romeletse rre mongwe buka ya The Divine Plan of the Ages kwa St. Thomas, e e kwa lefelong le ka nako eo le neng le bidiwa Danish West Indies. Fa a sena go e bala, rre yo o neng a e amogetse yoo o ne a khubama ka mangole mme a bolela fa a eletsa gore a dirisiwe ke Modimo mo go direng thato ya gagwe. Ka 1911, Bellona Ferguson wa kwa Brazil o ne a bolela kgang ya gagwe e le “sekai sa bosupi jo bo tletseng jwa gore ga go na ope yo o kgakala mo a ka se kang a fitlhelelwa” ka metsi a boammaaruri. Go ne go bonala fa a ne a sale a ntse a amogela dikgatiso tsa Mokgatlho ka poso go tloga ka 1899. Nako nngwe pele ga Ntwa ya Lefatshe I, mofaladi mongwe wa Mojeremane yo o neng a nna kwa Paraguay o ne a fitlhela pampitshana ya Mokgatlho mo bokoseng ya gagwe ya poso. O ne a kopa dibuka tse dingwe gape mme go ise go e kae a tlogela dikereke tsa Labokeresete. Go ne go sena ope mo nageng eo yo o neng a ka ba kolobetsa, ka jalo ene le kgaitsadie mosadi wa gagwe ba ne ba fetsa ka gore ba kolobetsane. Ke boammaaruri gore bosupi bo ne bo neetswe kwa dikarolong tse di kgakala tsa lefatshe, ebile bo ne bo ungwa.

Mme gape bangwe ba Baithuti ba Bibela ba ne ba ikutlwa ba patelesega go ya kwa mafelong ao bone kgotsa batsadi ba bone ba tsholetsweng kwa go one go bolelela ditsala le balosika kaga boikaelelo jo bo molemolemo jwa ga Jehofa le kafa ba ka nnang le seabe ka teng. Ke gone ka moo Mokaulengwe Oleszynski a neng a boela kwa Poland ka 1895 a tshwere mafoko a a molemo kaga “thekololo, go busediwa mo seemong sa boitekanelo le piletsogodimo”; lefa ka maswabi a ile a se ka a tshwarelela mo tirong eo. Ka 1898 motho mongwe yo e neng e kile ya bo e le porofesara, wa Mo-Hungary, o ne a fuduga kwa Canada a ya go gasa molaetsa o o potlakileng wa Bibela kwa nagagaeng ya gaabo. Ka 1905 monna mongwe yo a neng a fetoga Moithuti wa Bibela kwa Amerika o ne a boela kwa Greece go ya go neela bosupi teng. Mme erile ka 1913 lekawana lengwe le ne la tsaya peo ya boammaaruri jwa Bibela go tswa kwa New York la ya kwa toropong e lelapa la gaabo le neng le tswa kwa go yone, kwa Ramallah gaufi le Jerusalema.

Go Simolola go Dira kwa Kgaolong ya Caribbean

Fa palo ya bareri ba mafoko a a molemo e ntse e oketsega kwa United States, Canada, le Yuropa, boammaaruri jwa Bibela bo ne bo simolola go itsetsepela kwa Panama, Costa Rica, Dutch Guiana (e jaanong e bidiwang Suriname), le British Guiana (e jaanong e bidiwang Guyana). Joseph Brathwaite, yo a neng a le kwa British Guiana ka nako ya fa a ne a thusiwa go tlhaloganya boikaelelo jwa Modimo, o ne a ya kwa Barbados ka 1905 go ya go dirisa nako ya gagwe yotlhe a ruta batho koo. Louis Facey le H. P. Clarke, ba ba ileng ba utlwa mafoko a a molemo fa ba santse ba dira kwa Costa Rica, ba ne ba boela kwa Jamaica ka 1897 go ya go bolelela batho ba ga bone ka tumelo e ntšha eo ba e boneng. Ba ba neng ba amogela boammaaruri koo e ne e le badiri ba ba dinatla. Ka 1906 fela, setlhopha sa kwa Jamaica se ile sa anamisa dipampitshana le dibuka tse dingwe di le 1 200 000. Modiri yo mongwe gape wa mofaladi yo o neng a ithuta boammaaruri kwa Panama o ne a tsaya molaetsa wa tsholofetso wa Bibela a boela ka one kwa Grenada.

Diphetogo tsa kwa Mexico tsa 1910-11 ke sengwe se se neng sa thusa gore batho ba ba bolaetsweng tlala ke boammaaruri ba bolelelwe molaetsa wa Bogosi jwa Modimo. Bontsi bo ne jwa tshabela kwa bokone kwa United States. Koo bangwe ba bone ba neng ba kopana le Baithuti ba Bibela teng, ba ithuta kaga boikaelelo jwa ga Jehofa jwa go tlisetsa batho kagiso e e tla nnelang ruri, mme ba ne ba romela dibuka kwa Mexico. Lefa go ntse jalo, leno e ne e se lekgetlo la ntlha molaetsa ono o goroga kwa Mexico. Bogologolo ka 1893, Tora ya Tebelo (ka Seesemane) e ne ya gatisa lekwalo le le neng le kwadilwe ke F. de P. Stephenson, wa Mexico, yo o neng a badile dingwe tsa dikgatiso tsa Mokgatlho wa Watch Tower mme a batla gore a neelwe tse dintsi go di abela ditsala tsa gagwe tse di kwa Mexico le tse di kwa Yuropa.

Go simolola go rera boammaaruri jwa Bibela mo dinageng tse dintsi tsa Caribbean le go rulaganya dipokano tsa go ithuta, Mokaulengwe Russell o ne a romela E. J. Coward kwa Panama ka 1911 mme morago ga foo o ne a mo romela kwa ditlhaketlhakeng. Mokaulengwe Coward e ne e le sebui se se buang se gatelela ebile a bua ka tsela e e kgatlhang, mme bareetsi ba ba neng ba tshwara makgolokgolo gantsi ba ne ba oologela go ya go reetsa dipuo tsa gagwe tse di neng di ganetsa thuto ya dihele le ya gore moya wa motho ga o swe, le go bolela kaga isagwe e e itumedisang ya lefatshe. O ne a tsamaya a tlhomaganya ditoropo, le ditlhaketlhake—St. Lucia, Dominica, St. Kitts, Barbados, Grenada, le Trinidad—a kopana le batho ba bantsi ka mo go ka kgonegang ka teng. Mme gape o ne a bua le kwa British Guiana. Fa a ne a le kwa Panama o ne a kopana le W. R. Brown, Mokaulengwe yo o senatla yo mmotlana wa Mo-Jamaica, yo erileng kwa morago a dira le Mokaulengwe Coward kwa ditlhaketlhakeng di le mmalwa tsa Caribbean. Morago, Mokaulengwe Brown o ne a thusa go simolola tiro kwa ditshimong tse dingwe gape.

Ka 1913, Mokaulengwe Russell ka boene o ne a neela puo kwa Panama, Cuba le Jamaica. Mo puong ya phatlalatsa e a neng a e neetse kwa Kingston, kwa Jamaica, diholo tse pedi di ne di tletse, mme ba ba ka tshwarang 2 000 ba ne ba busediwa kwa morago. Babegadikgang ba ne ba lemoga gore sebui se ne se sa bue sepe ka madi gape go ne go sena dipoleite tsa koleke.

Lesedi la Boammaaruri le Fitlha mo Afrika

Afrika le yone e ne e setse e tlhabelwa ke marang a lesedi la boammaaruri ka nako eno. Lekwalo le le neng le kwadilwe go tswa kwa Liberia ka 1884 le ne la bontsha gore mmadi mongwe wa Bibela koo o ne a ile a bona kopi ya Food for Thinking Christians mme o ne a batla tse di oketsegileng go di abela ba bangwe. Dingwaga di sekae morago ga moo, go ne ga begwa gore moruti mongwe kwa Liberia o ne a tlogela go nna moruti gore a gololesege go ruta boammaaruri jwa Bibela jo a neng a bo ithuta a thusiwa ke Tora ya Tebelo le gore go ne go na le dipokano tsa ka metlha tse di neng di tshwarwa koo ke setlhopha sa Baithuti ba Bibela.

Moruti mongwe wa Dutch Reformed go tswa kwa Holland o ne a tsaya dingwe tsa dikgatiso tsa ga C. T. Russell fa a ne a romelwa kwa Afrika Borwa ka 1902. Le mororo di ne tsa se ka tsa mo solegela molemo, di ile tsa solegela molemo Frans Ebersohn le Stoffel Fourie, ba ba neng ba bona dibuka tseno mo laeboraring ya gagwe. Dingwaga di sekae moragonyana, palo ya batho kwa karolong ya tshimo eo e ne ya nonotshiwa fa Baithuti ba babedi ba ba tlhaga ba Bibela ba ne ba fudugela kwa Durban, kwa Afrika Borwa go tswa kwa Scotland.

Ka maswabi, mo go ba ba neng ba amogela dibuka tse di neng di kwadilwe ke Mokaulengwe Russell ba bo ba ruta ba bangwe ka tsone, go ne go na le ba sekae ba bone jaaka bo Joseph Booth le Elliott Kamwana, ba ba neng ba tsenya megopolo ya bone, e e neng e diretswe go tsosa tlhakatlhakano ya gore go nne le diphetogo tsa loago. Mo go ba ba neng ba etse dilo tlhoko kwa Afrika Borwa le Nyasaland (e morago e neng ya bidiwa Malawi), seno se ne sa dira gore go se ka ga bonala sentle gore tota Baithuti ba boammaaruri ba Bibela ke bafe. Lefa go ntse jalo, bontsi bo ne bo reetsa le go anaanela molaetsa o o neng o ba dira gore ba lebe Bogosi jwa Modimo e le jone fela bo ka rarabololang mathata a batho.

Lefa go le jalo, thero mo Afrika e ne e santse e tla anama mo isagweng.

Go Ya kwa Botlhaba le kwa Ditlhaketlhakeng tsa Pacific

Fela fa dikgatiso tsa Bibela tse di neng di rulagantswe ke C. T. Russell di sena go anamisiwa kwa Borithane, di ne tsa fitlha le kwa Botlhaba. Ka 1883, Mohumagatsana C. B. Downing, morongwa wa Presbyterian kwa Chefoo (Yantai), kwa China, o ne a amogela kopi ya Tora ya Tebelo. O ne a itumelela go ithuta kaga go busediwa ga dilo gore di nne jaaka di ne di ntse kwa tshimologong, mme a bala dibuka tseo le barongwa ba bangwe go akaretsa le Horace Randle, yo e neng e le leloko la Baptist Mission Board. Morago, kgatlhego ya gagwe e ne ya kgotlediwa ke kitsiso e e neng e itsise ka Millennial Dawn e e neng e le mo lokwalodikgannyeng la Lontone le go tweng Times, mme morago o ne a bona dikopi tsa dibuka tseo ka botsone—e nngwe a e romeletswe ke Mohumagatsana Downing fa e nngwe a ne a e romeletswe ke mmaagwe kwa Engelane. Kwa tshimologong o ne a tshosiwa ke se a neng a se bala. Mme fa a sena go tlhatswega pelo gore Tharonngwe ga se thuto ya Bibela, o ne a tlogela Kereke ya Baptist mme a tswelela a bolelela barongwa ba bangwe se a neng a se ithutile. Ka 1900 o ne a bega gore o romeletse barongwa ba ba kwa China, Japane, Korea, le Siam (Thailand) makwalo a le 2 324 le dipampitshana di le 5 000. Ka nako eo bosupi bo ne bo neelwa thata barongwa ba Labokeresete kwa Botlhaba.

Mo lobakeng loo lwa nako, peo ya boammaaruri e ne ya jalwa gape le kwa Australia le kwa New Zealand. Ya ntlha mo “dipeong” tseo e e neng ya goroga kwa Australia e ka nna ya bo e isitswe koo ka 1884 kana moragonyana ga moo ke rre mongwe yo o neng a bonwa ke Moithuti wa Bibela mo parakeng kwa Engelane. “Dipeo” tse dingwe di ne tsa tla ka poso go tswa kwa ditsaleng le balosika kwa moseja.

Morago ga dingwaga di sekaenyana fa go sena go tlhamiwa Dinaga tsa Kgolagano ya Australia ka 1901, makgolokgolo a batho koo a ne a dirile peeletso ya Tora ya Tebelo. Ba ba neng ba go tsaya e le tshiamelo go bolelela ba bangwe boammaaruri ba ne ba dira tota mme ba romelela batho ba maina a bone a neng a le mo lenaaneng la batlhophi diketekete tsa dipampitshana. Tse dintsi di ne tsa anamisiwa mo mebileng, mme diphuthelwana tsa tsone di ne di latlhelelwa badiri le baagi ba ba neng ba le mo mafelong a a kwa thoko a a gaufi le seporo ka difensetere tsa terena. Batho ba ne ba itsisiwe kaga go atamela ga bokhutlo jwa Metlha ya Baditšhaba ka 1914. Arthur Williams, yo Mogolwane, o ne a bua ka seno le bareki botlhe ba ba neng ba tla mo lebenkeleng la gagwe kwa Bophirima jwa Australia mme o ne a laleletsa botlhe ba ba kgatlhegang kwa lelapeng la gagwe go tsweledisa motlotlo.

Le go fitlha jaanong ga go ise go itsiwe gore ke mang yo o isitseng molaetsa wa boammaaruri jwa Bibela pele kwa New Zealand. Mme legale erile ka 1898, Andrew Anderson, moagi wa New Zealand, o ne a setse a badile dikgatiso tsa Watch Tower ka mo go lekaneng mo di neng tsa mo dira gore a anamise boammaaruri e le morekisi wa dibuka. Maiteko a gagwe a ne a nonotshiwa ke barekisi ba bangwe ba dibuka ka 1904 ba ba neng ba tswa kwa Amerika le ba ba neng ba tswa kwa ofising ya lekala ya Mokgatlho e e neng ya tlhomiwa ka one ngwaga oo kwa Australia. Mohumagadi Thomas Barry, wa Christchurch, o ne a amogela dibolumo di le thataro tsa Studies in the Scriptures mo motsamaising mongwe wa dibuka. Morwawe ebong Bill o ne a di bala ka 1909 a le mo loetong lwa dibeke tse thataro ka mokoro a ya kwa Engelane mme a lemoga gore se a neng a se tshotse e ne e le boammaaruri. Dingwaga tse dintsi morago ga foo morwawe ebong Lloyd o ne a nna leloko la Setlhopha Se Se Laolang sa Basupi ba ga Jehofa.

Mongwe wa badiri ba ba tlhaga ba metlha eo ya pele e ne e le Ed Nelson, yoo, le mororo a ne a sa itse go bua ka botlhale, a neng a dirisa nako yotlhe ya gagwe ka dingwaga di le 50 go anamisa molaetsa wa Bogosi go simolola kwa ntlheng e e kafa bokone jwa New Zealand go ya kwa borwa. Dingwaga di sekae moragonyana, o ne a thusiwa ke Frank Grove yo a neng a mo thusa gore a kgone go gakologelwa dilo sentle gonne a ne a sa bone sentle mme le ene o ne a bula tsela dingwaga tse 50 go fitlha a swa.

Loeto lwa Lefatshe Lotlhe lwa go Tsweletsa Tiro ya go Rera Mafoko A A Molemo

Maiteko a mangwe a magolo a ne a dirwa ka 1911-12 go thusa batho ba ba kwa Botlhaba. International Bible Students Association e ne ya romela komiti ya banna ba le supa, e e neng e eteletswe pele ke C. T. Russell, go ya go sekaseka maemo a koo ka namana. Gongwe le gongwe kwa ba neng ba ya teng ba ne ba bua kaga boikaelelo jwa Modimo jwa go tlisetsa batho masego ka Bogosi jwa Bomesia. Fa gongwe bareetsi ba ne ba sekaenyana fela, mme kwa Philippines le kwa India, ba ne ba reediwa ke diketekete. Ba ne ba se mo letsholong le ka nako eo le neng le tseetswe kwa godimo thata ke Labokeresete la go kokoanya madi a go sokolola lefatshe lotlhe. Ba ne ba lemogile gore maiteko a magolo a barongwa ba Labokeresete a ne a direlwa go ruta batho thuto ya selefatshe. Mme lefa go ntse jalo Mokaulengwe Russell o ne a tlhatswegile pelo gore se batho ba se tlhokang e ne e le “Mafoko a a Molemo a Modimo a a bolelang kaga Bogosi jo bo tlang jwa Bomesia jo a tla bo nayang batho ka lorato.” Go na le gore ba lebelele gore ba ka fetola lefatshe, Baithuti ba Bibela ba ne ba tlhaloganya go tswa mo Dikwalong gore se se tshwanetseng go dirwa ka nako eo e ne e le go neela bosupi le gore seno se ne se tla dira gore go kokoanngwe ‘setlhopha se sennye go tswa mo merafeng yotlhe, e le batho, ba ditso le diteme go nna maloko a setlhopha sa Monyadiwa [wa ga Keresete]—go nna le Ene mo setulong sa gagwe sa bogosi ka dingwaga tse di sekete, ba dirisana mmogo le ene mo go tsosoloseng batho botlhe.”a—Tshen. 5:9, 10; 14:1-5.

Fa ba sena go nna lobakanyana kwa Japane, China, Philippines, le kwa mafelong a mangwe, maloko a komiti a ne a tsaya gape loeto lwa dikilometara tse 6 400 go ya kwa India. Batho bangwe ba ba neng ba nna kwa India ba ne ba badile dibuka tsa Mokgatlho mme ba ne ba setse ba kile ba kwala ba bolela kafa ba di itumelelang ka teng go tloga bogologolo ka 1887. Bosupi jo bo tlhamaletseng bo ne bo ile jwa neelwa batho ba ba buang Se-Tamil fa esale ka 1905 ke monna mongwe yo mmotlana, yo erileng a tsena sekolo kwa Amerika, a kopana le Mokaulengwe Russell mme a ithuta boammaaruri. Lekawana leno le ne la thusa go tlhoma ditlhopha tsa go ithuta Bibela di ka nna 40 mo borwa jwa India. Mme legale erile a sena go ruta ba bangwe, ene ka boene o ne a lejwa a sa siama ka ntlha ya go bo a ne a sa sale melao ya Bokeresete morago.—Bapisa 1 Bakorintha 9:26, 27.

Lefa go ntse jalo, mo e ka nnang ka yone nako eo, A. J. Joseph, wa kwa Travancore (Kerala), o ne a romelelwa Studies in the Scriptures ke Mo-Adventist mongwe yo o itsegeng thata a araba potso e a neng a e mmoditse ka lokwalo. Mo go yone o ne a bona dikarabo tse di kgotsofatsang tsa Dikwalo tsa dipotso tsa gagwe ka Tharonngwe. Go ise go ye kae ene le maloko a mangwe a lelapa ba ne ba ya le masimo a reisi le dipolasi tsa ditlhare tsa coconut mo borwa jwa India ba bolelela ba bangwe ka tumelo e ntšha e ba e boneng. Morago ga loeto lwa ga Mokaulengwe Russell ka 1912, Mokaulengwe Joseph o ne a simolola tirelo ya nako e e tletseng. O ne a tsamaya ka terena, kara e e gogwang ke dipholo, ka seketswana, le ka dinao, a anamisa dibuka tsa Bibela. Fa a ne a neela dipuo tsa phatlalatsa, gantsi di ne di kgorelediwa ke baruti le balatedi ba bone. Kwa Kundara, fa moruti wa “Mokeresete” a ne a dirisa balatedi ba gagwe go kgoreletsa phuthego le go gasa Mokaulengwe Joseph ka boloko, rre mongwe yo o tlotlegang yo lentswe la gagwe le agelwang mosako wa Mohindu o ne a tla go bona gore modumo oo e ne e le wa eng. O ne a botsa moruti jaana: ‘A seo ke sekao se Keresete a se tlhometseng Bakeresete go se latela, kgotsa a se o se dirang seno ke boitshwaro jo bo tshwanang le jwa Bafarasai ba motlha wa ga Jesu?’ Moruti o ne a lesa seo.

Pele komiti ya IBSA e wetsa loeto lwa lefatshe lotlhe lwa dikgwedi tse nnè, Mokaulengwe Russell o ne a rulaganyetsa gore R. R. Hollister e nne moemedi wa Mokgatlho kwa Botlhaba le gore a tsweledise go bolelela batho molaetsa wa Bogosi jwa Bomesia jo Modimo o tla bo ba nayang ka lorato. Dipampitshana tse di kgethegileng di ne tsa kwalwa ka dipuo di le lesome mme dimilione tsa tsone di ne tsa anamisiwa kwa India, China, Japane, le Korea ke batho ba koo. Go tswa foo dibuka di ne tsa ranolelwa mo dipuong di le nnè tsa tseno go naya ba ba neng ba kgatlhega dijo tse di oketsegileng tsa semoya. Eno e ne e le tshimo e kgolo fela thata, mme go ne go santse go na le tiro e ntsi. Mme lefa go ntse jalo, se se neng se setse se kgonnwe go tla go fitlha foo se ne se gakgamatsa eleruri.

Go Ne go Neetswe Bosupi Jo Bo Itumedisang

Bosupi bo ne bo setse bo neetswe tota mo lefatsheng lotlhe fa ntwa ya lefatshe ya ntlha e tla go senya kafa e neng ya senya ka teng. Mokaulengwe Russell o ne a tsere maeto a go ya go neela dipuo mo ditoropong tse di makgolokgolo kwa United States le kwa Canada, mme o ne a setse a kile a nna a ya kwa Yuropa gantsi, o ne a beile le dipuo kwa Panama, Jamaica, le Cuba, gape le mo ditoropong tse dikgolo tsa Botlhaba. Diketekete tse di masomesome tsa batho di ne di utlwile dipuo tsa gagwe tse di kgatlhang tsa Bibela mme ba ne ba mmona a araba phatlalatsa dipotso tseo di neng di botswa ke ditsala le baba a dirisa Dikwalo. Ka tsela eo ba ne ba kgatlhega thata, mme diketekete tsa makwalodikgang kwa Amerika, Yuropa, Afrika Borwa, le Australia di ne di tlhola di gatisa dithero tsa ga Mokaulengwe Russell. Baithuti ba Bibela ba ne ba anamisitse dibuka mmogo le dipampitshana di le dimilione di le makgolokgolo le dibuka tse dingwe gape ka dipuo di le 35.

Lefa seabe sa gagwe se ne se le segolo thata, ga go reye gore Mokaulengwe Russell o ne a rera a le esi. Ba bangwe ka mo go tshwanang go dikologa lefatshe ba ne ba itsise kaga Jehofa le Morwawe ebong Jesu Keresete ba le seoposengwe. Ga se botlhe ba ba neng ba na le seabe ba e neng e le dibui tsa phatlalatsa. Maemo a bone a botshelo a ne a farologane, mme ba ne ba dirisa mokgwa ope fela o ba neng ba ka o kgona go anamisa mafoko a a molemo.

Ka January 1914, fa bokhutlo jwa Metlha ya Baditšhaba bo ne bo saletswe ke lobaka lo lo kafa tlase ga ngwaga, go ile ga tswiwa letsholo le lengwe gape le legolo la go neela bosupi. Bo ne jwa neelwa ka “Photo-Drama of Creation,” e e neng e gatelela ka mokgwa o mosha boikaelelo jwa Modimo ka lefatshe. E ne e dira seno ka diselaete tse di neng di na le mmala o montle le ditshwantsho tsa baesekopo, tse di neng di tsamaisana le modumo. Babegi ba dikgang ba kwa United States ba ne ba bega gore mo nageng eo yotlhe e ne e bogelwa ke batho ba ba neng ba ka tshwara makgolokgolo a le diketekete beke le beke. Kwa bokhutlong jwa ngwaga wa ntlha, palo yotlhe ya ba ba neng ba e bona kwa United States le Canada e ne e setse e atamela dimilione di le robedi. Kwa Lontone, kwa Engelane, batho ba ne ba tlala ba bo ba tshologa kwa Opera House le kwa Royal Albert Hall go ya go bona ditshwantsho tseno tse di neng di na le dikarolo tse nnè tse nngwe le nngwe ya tsone e neng e tsaya diura tse pedi. Mo sephatlong sa ngwaga fela, ba ba fetang 1 226 000 ba ne ba setse ba e bone mo ditoropong di le 98 tsa British Isles. Boidiidi jwa batho kwa Jeremane le Switzerland bo ne bo tlala ebile bo tshologa mo diholong tse di neng di le teng. E ne ya bonwa gape ke batho ba bantsintsi kwa Scandinavia le Pacific Borwa.

Abo go ile ga neelwa bosupi jo bo gakgamatsang jang ne, jo bo nonofileng, mo lefatsheng ka bophara mo masomeng a dingwaga tsa ntlha tsa hisitori ya segompieno ya Basupi ba ga Jehofa! Mme, eleruri tiro eno e ne e santse e simologa.

Ke ba le makgolo a sekae fela ba ba ileng ba anamisa boammaaruri jwa Bibela ka matlhagatlhaga mo masimologong a bo1880. Go ya ka dipego tse di leng teng, go ne go na le ba le 5 100 ba ba neng ba nna le seabe mo tirong ka 1914. Ba bangwe ba ka nna ba bo ba ile ba thusa nako nngwe ka go anamisa dipampitshana. Badiri ba ne ba le babotlana.

Setlhopha se sennye seno sa bareri, se ne se setse se anamisitse molaetsa wa sone wa Bogosi jwa Modimo ka ditsela tse di farologaneng mo dinageng di le 68 mo karolong ya bofelo ya 1914. Mme tiro ya bone jaaka bareri le baruti ba Lefoko la Modimo e ne e setse e itsetsepetse sentle mo dinageng di le 30 mo go tseno.

Dimilione tsa dibuka le dimilione di le makgolokgolo tsa dipampitshana di ne di setse di anamisitswe pele Metlha ya Baditšhaba e fela. Mo godimo ga moo, makwalodikgang a a ka tshwarang 2 000 a ne a tlhola a gatisa dithero tse di neng di rulagantswe ke C. T. Russell, mme ka ngwaga wa 1913 batho ba ba fetang 9 000 000 mo dikontinenteng tse tharo tsa lefatshe ba ne ba bone “Photo-Drama of Creation.”

Ka boammaaruri, bosupi bo ne bo neetswe ka tsela e e gakgamatsang! Mme lefa go ntse jalo tiro e ne e santse e le ntsi.

[Ntlha e e kwa tlase]

[Mmapa/Setshwantsho mo go tsebe 405]

C. T. Russell o ne a neela dipuo tsa Bibela mo ditoropong tse di fetang 300 (mo mafelong a a bontshiwang ka marontho) kwa Amerika Bokone le Caribbean—mme mo go tse dintsi tsa tsone o ne a di neetse ka makgetlo a le 10 kgotsa a le 15

[Mmapa]

(See publication)

Mmapa mo go tsebe 407]

(See publication)

Mesepele ya go ya go rera ya ga Russell kwa Yuropa, gantsi a tsena ka Engelane

1891

1903

1908

1909

1910 (gabedi)

1911 (gabedi)

1912 (gabedi)

1913

1914

[Mmapa/Setshwantsho mo go tsebe 408]

Fa a sena go tlhatswega pelo gore o bone boammaaruri, Andreas Øiseth o ne a anamisa ka matlhagatlhaga dibuka tsa Bibela mo e batlileng e nna mo metseng yotlhe ya Norway

[Mmapa]

(For fully formatted text, see publication)

NORWAY

Arctic Circle

[Mmapa/Setshwantsho mo go tsebe 409]

Adolf Weber, moleminyana fela wa ditshingwana, o ne a anamisa mafoko a a molemo go tswa kwa Switzerland go ya kwa dinageng tse dingwe tsa Yuropa

[Mmapa]

(For fully formatted text, see publication)

BELGIUM

GERMANY

SWITZERLAND

ITALY

FRANCE

[Mmapa/Setshwantsho mo go tsebe 413]

Bellona Ferguson, kwa Brazil—‘ga go ope yo o kgakala mo a ka se kang a fitlhelelwa’

[Mmapa]

(For fully formatted text, see publication)

BRAZIL

[Mmapa mo go tsebe 415]

(For fully formatted text, see publication)

ALASKA

CANADA

GREENLAND

ST. PIERRE & MIQUELON

UNITED STATES OF AMERICA

BERMUDA

BAHAMAS

TURKS & CAICOS ISLANDS

CUBA

MEXICO

BELIZE

JAMAICA

HAITI

DOMINICAN REPUBLIC

PUERTO RICO

CAYMAN ISLANDS

GUATEMALA

EL SALVADOR

HONDURAS

NICARAGUA

COSTA RICA

PANAMA

VENEZUELA

GUYANA

SURINAME

FRENCH GUIANA

COLOMBIA

ECUADOR

PERU

BRAZIL

BOLIVIA

PARAGUAY

CHILE

ARGENTINA

URUGUAY

FALKLAND ISLANDS

VIRGIN ISLANDS (U.S.)

VIRGIN ISLANDS (BRITISH)

ANGUILLA

ST. MAARTEN

SABA

ST. EUSTATIUS

ST. KITTS

NEVIS

ANTIGUA

MONTSERRAT

GUADELOUPE

DOMINICA

MARTINIQUE

ST. LUCIA

ST. VINCENT

BARBADOS

GRENADA

TRINIDAD

ARUBA

BONAIRE

CURAÇAO

ATLANTIC OCEAN

CARIBBEAN SEA

PACIFIC OCEAN

[Mmapa mo go tsebe 416, 417]

(For fully formatted text, see publication)

GREENLAND

SWEDEN

ICELAND

NORWAY

FAEROE ISLANDS

FINLAND

RUSSIA

ESTONIA

LATVIA

LITHUANIA

BELARUS

UKRAINE

MOLDOVA

GEORGIA

ARMENIA

AZERBAIJAN

TURKMENISTAN

UZBEKISTAN

KAZAKHSTAN

TAJIKISTAN

KYRGYZSTAN

POLAND

JEREMANE

NETHERLANDS

DENMARK

BORITHANE

IRELAND

BELGIUM

LUXEMBOURG

LIECHTENSTEIN

SWITZERLAND

CZECHOSLOVAKIA

AUSTRIA

HUNGARY

ROMANIA

YUGOSLAVIA

SLOVENIA

CROATIA

BOSNIA & HERZEGOVINA

BULGARIA

ALBANIA

ITALY

GIBRALTAR

SPAIN

PORTUGAL

MADEIRA

MOROCCO

WESTERN SAHARA

SENEGAL

ALGERIA

LIBYA

EGEPETO

LEBANONA

ISERAELE

CYPRUS

SYRIA

TURKEY

IRAQ

IRAN

BAHRAIN

KUWAIT

JOREDANE

SAUDI ARABIA

QATAR

UNITED ARAB EMIRATES

OMAN

YEMEN

DJIBOUTI

SOMALIA

ETHIOPIA

SUDAN

CHAD

NIGER

MALI

MAURITANIA

GAMBIA

GUINEA-BISSAU

SIERRA LEONE

LIBERIA

CÔTE D’IVOIRE

GHANA

TOGO

BENIN

EQUATORIAL GUINEA

ST. HELENA

GUINEA

BURKINA FASO

NIGERIA

CENTRAL AFRICAN REPUBLIC

CAMEROON

SÃO TOMÉ

CONGO

GABON

ZAIR

ANGOLA

ZAMBIA

NAMIBIA

BOTSWANA

AFRIKA BORWA

LESOTHO

SWAZILAND

MOZAMBIQUE

MADAGASCAR

RÉUNION

MAURITIUS

RODRIGUES

ZIMBABWE

MAYOTTE

COMOROS

SEYCHELLES

MALAWI

TANZANIA

BURUNDI

RWANDA

UGANDA

FRANCE

PAKISTAN

AFGHANISTAN

NEPAL

BHUTAN

MYANMAR

BANGLADESH

INDIA

SRI LANKA

GREECE

MALTA

TUNISIA

KENYA

LEWATLE LA ATLANTIC

LEWATLE LA INDIA

ALASKA

MONGOLIA

DEMOCRATIC PEOPLE’S REPUBLIC OF KOREA

JAPANE

REPABOLIKI YA KOREA

CHINA

MACAO

TAIWAN

HONG KONG

LAOS

THAILAND

VIETNAM

CAMBODIA

PHILIPPINES

BRUNEI

MALAYSIA

SINGAPORE

INDONESIA

SAIPAN

ROTA

GUAM

YAP

BELAU

CHUUK

POHNPEI

KOSRAE

MARSHALL ISLANDS

NAURU

PAPUA NEW GUINEA

AUSTRALIA

NEW ZEALAND

NORFOLK ISLAND

NEW CALEDONIA

WALLIS & FUTUNA ISLANDS

VANUATU

TUVALU

FIJI

KIRIBATI

TOKELAU

HAWAII

WESTERN SAMOA

AMERICAN SAMOA

NIUE

TONGA

COOK ISLANDS

TAHITI

SOLOMON ISLANDS

LEWATLE LA PACIFIC

LEWATLE LA INDIA

[Mmapa/Setshwantsho mo go tsebe 421]

A. J. Joseph wa India, le morwadie ebong Gracie yo a neng a dira jaaka morongwa wa Gileade

[Mmapa]

(For fully formatted text, see publication)

INDIA

[Setshwantsho mo go tsebe 411]

Hermann Herkendell, le mosadi wa gagwe ba ile ba tsaya loeto lwa dikgwedi tse dintsintsi lwa fa ba sena go nyalana go ya go rerela batho ba ba buang Sejeremane kwa Russia

[Ditshwantsho mo go tsebe 412]

Barekisi ba dibuka kwa Engelane le kwa Scotland ba ne ba batla gore mongwe le mongwe a utlwe bosupi; le bana ba bone ba ne ba thusa mo go anamiseng dipampitshana

[Setshwantsho mo go tsebe 414]

E. J. Coward o ne a anamisa ka matlhagatlhaga boammaaruri jwa Bibela mo kgaolong ya Caribbean

[Setshwantsho mo go tsebe 418]

Frank Grove (kafa molemeng) le Ed Nelson (fano ba ne ba bonwa ba na le basadi ba bone) mongwe le mongwe wa bone o ne a dirisa dingwaga tse di fetang 50 go anamisa molaetsa wa Bogosi a dirisa nako ya gagwe yotlhe go ralala New Zealand

[Ditshwantsho mo go tsebe 420]

C. T. Russell le ditsala tsa gagwe tse thataro ba ne ba tsaya loeto go dikologa lefatshe ka 1911-12 go tsweledisa pele go rerwa ga mafoko a a molemo