Kgaolo 16

Kafa O Ka Atamalanang Le Modimo Ka Teng

1.Ditumelo tse dintsi di tshwana ka eng?

MOJANALA mongwe yo a neng a etetse naga nngwe ya kwa Botlhaba o ne a gakgamadiwa ke dingwaokobamelo tsa bodumedi tse a neng a di bona di dirwa kwa tempeleng ya Babuda. Le mororo ditshwantsho tse di tlhomilweng tsa teng e ne e se tsa ga Maria le Keresete, bontsi jwa dingwaokobamelo tsa teng di ne di tshwana le tsa kereke ya kwa a neng a tswa teng. Ka sekai, o ne a ba bona ba dirisa dirosari e bile ba goloketsa dithapelo. Tse dingwe le tsone di ne di ntse fela jalo. E ka ne e le kwa Botlhaba kana kwa Bophirima, ditsela tse batho ba ba ineetseng ba lekang go atamela Modimo ka tsone kana dilo tse ba di dirisang mo kobamelong di tshwana ka tsela e e gakgamatsang.

2.Thapelo e ile ya tlhalosiwa jang, mme e bile ke ka ntlha yang fa batho ba le bantsi ba rapela?

² Ba le bantsi ba leka thata go atamalana le Modimo ka go mo rapela. Thapelo e ile ya tlhalosiwa gore ke “tsela e motho a buisanang ka yone le Modimo, medimo, le lefelo la masaitseweng, kana le maatla a a fetang a motho a a itshekileng kana a a boitshepo.” (The New Encyclopædia Britannica) Lefa go ntse jalo, bangwe ba akanya fela ka molemo o ba ka o bonang fa ba rapela Modimo. Ka sekai, monna mongwe o kile a botsa mongwe wa Basupi ba ga Jehofa a re: “A mathata a ke nang nao mo lelapeng, kwa tirong le a boitekanelo a tla rarabologa fa o ka nthapelela?” Go lebega monna yono a ne a akanya jalo, lefa go ntse jalo, batho ba le bantsi ba a rapela mme ba fitlhela mathata a bone a ntse a tswelela. Ka jalo, re ka nna ra botsa jaana, ‘Gone tota ke ka ntlha yang fa re tshwanetse go atamalana le Modimo?’

LEBAKA LA GO BO RE TSHWANETSE GO ATAMALANA LE MODIMO

3.Re tshwanetse go lebisa dithapelo tsa rona kwa go mang, mme ka ntlha yang?

³ Thapelo ga se ngwaokobamelo e e senang mosola, e bile ga se tsela fela ya go bona sengwe se o se batlang. Lebaka le legolo la go rapela Modimo ke go nna le botsalano jo bo atamalaneng thata le ene. Ka gone re tshwanetse go lebisa dithapelo tsa rona kwa go Jehofa Modimo. Mopesalema Dafite o ne a re: “Jehofa o gaufi le botlhe ba ba mmitsang.” (Pesalema 145:18) Jehofa o re laletsa gore re tsalane le ene ka kagiso. (Isaia 1:18) Ba ba arabelang taletso eno ba dumalana le mopesalema yo a neng a bolela jaana: “Mo go nna go molemo go atamela Modimo.” Ka ntlha yang? Gonne ba ba atamelang Jehofa Modimo ba tla bona boitumelo jwa mmatota le kagiso ya mogopolo.—Pesalema 73:28.

4, 5. (a) Ke eng fa go le botlhokwa go rapela Modimo? (b) Re ka aga botsalano jwa mofuta ofe le Modimo fa re mo rapela?

⁴ Ke eng fa re rapela Modimo gore o re thuse fa e le gore ‘o itse dilo tse re di tlhokang re ise re di mo lope’? (Mathaio 6:8; Pesalema 139:4) Thapelo e supa gore re dumela mo Modimong e bile re mo leba jaaka Motswedi wa “neo nngwe le nngwe e e molemo, le se se molemo sengwe le sengwe se se tletseng.” (Jakobe 1:17; Bahebere 11:6) Jehofa o itumelela dithapelo tsa rona. (Diane 15:8) O itumela thata fa a utlwa re bua mafoko a a utlwalang re mo leboga le go mmaka, fela jaaka rre a itumela fa a utlwa ngwana wa gagwe a bua mafoko a tebogo go tswa mo pelong. (Pesalema 119:108) Rre le ngwana ba buisana ka lorato fa go na le botsalano fa gare ga bone. Ngwana yo o ratiwang o batla go bua le rraagwe. Go ntse fela jalo le ka botsalano jwa rona le Modimo. Fa re itumelela se re se ithutang kaga Jehofa le lorato lo a lo re bontshitseng, re tla eletsa thata go bua le ene ka thapelo.—1 Johane 4:16-18.

⁵ Fa re atamela Modimo Mogodimodimo, re tshwanetse go supa tlotlo, le mororo re sa tshwanela go tshwenyega thatathata ka mafoko a re a buang. (Bahebere 4:16) Re kgona go bua le Jehofa ka dinako tsotlhe. E bile a bo e le tshiamelo e e molemo jang ne go ‘tsholola dipelo tsa rona’ re rapela Modimo! (Pesalema 62:8) Fa re anaanela Jehofa re tla nna le botsalano jo bo lorato le ene, jo bo tshwanang le jo Aberahame, monna yo o ikanyegang a neng a bo ipelela jaaka tsala ya Modimo. (Jakobe 2:23) Lefa go ntse jalo, re tshwanetse ra rapela Morena Molaodi ka tsela e a e batlang.

DILO TSE DI BATLEGANG GORE RE KGONE GO ATAMALANA LE MODIMO

6, 7. Le mororo Modimo a sa batle gore re mo duelele go reetsa dithapelo tsa rona, o batla gore re dire eng fa re rapela?

⁶ A re tlhoka madi gore re atamele Modimo? Batho ba bantsi ba duela baruti madi gore ba ba rapelele. E bile ba bangwe ba akanya gore dithapelo tsa bone di tla amogelwa go lebilwe bogolo jwa moneelo o ba o ntshitseng. Lefa go ntse jalo, Lefoko la Modimo ga le bolele gore motho o tshwanetse go ntsha madi gore a kgone go rapela Jehofa. Dilo tse a di re nayang tsa semoya le masego a re a bonang ka go kgona go mo rapela ga a duelelwe.—Isaia 55:1, 2.

⁷ Ke eng he, se se tlhokegang? Go tlhokega pelo e e siameng. (2 Ditirafalo 6:29, 30; Diane 15:11) Re tshwanetse go dumela mo pelong gore Jehofa Modimo ‘o utlwa thapelo’ le gore ke “moduedi wa ba ba o batlang.” (Pesalema 65:2; Bahebere 11:6) Gape re tshwanetse go nna le boikokobetso mo dipelong. (2 Dikgosi 22:19; Pesalema 51:17) Mo setshwantshong se sengwe sa gagwe, Jesu Keresete o ne a bontsha gore mokgethisi mongwe yo o boikokobetso yo a neng a ingotlafaditse mo pelong o ne a lejwa a siame go gaisa Mofarisai yo o ikgogomosang fa ba ne ba rapela Modimo. (Luke 18:10-14) Fa re rapela Modimo, a re gakologelweng gore “mongwe le mongwe yo o pelo e e ikgodisang o sefedisapelo mo go Jehofa.”—Diane 16:5.

8. Fa re eletsa gore Modimo o arabe dithapelo tsa rona, re tshwanetse go iphepafatsa mo go eng?

⁸ Re tshwanetse go tlogela go dira boleo fa re batla gore Modimo o arabe dithapelo tsa rona. Morutwa Jakobe o ne a oketsa jaana fa a ne a kgothaletsa ba bangwe go atamalana le Modimo: “Itloseng leswe mo diatleng, baleofi ke lona; lo intlafatse dipelo, lona ba lo maikutlo mabedi.” (Jakobe 4:8) Badirabosula le bone ba ka tsalana le Jehofa ka kagiso fa ba ikwatlhaya mme ba tlogela tsela e ba neng ba tshela ka yone pele. (Diane 28:13) Ga re kake ra kgona go bua le Jehofa fa re dira e kete re baakantse ditsela tsa rona ntswa re sa dira jalo. Lefoko la Modimo la re: “Matlho a ga Jehofa a mo basiaming, le ditsebe tsa gagwe mo mekokotlelong ya bone; mme sefatlhogo sa ga Jehofa se bifetse ba ba dirang bosula.”—1 Petere 3:12.

9. Re tshwanetse go rapela Jehofa ka mang, mme ka ntlha yang?

⁹ Baebele e bolela jaana: “Ga go na mosiami ope mo lefatsheng yo o dirang molemo a sa leofe.” (Moreri 7:20) Ka gone, o ka nna wa botsa jaana: ‘Mme gone re ka atamela Jehofa Modimo jang?’ Baebele e araba jaana: “Fa motho mongwe a leofa re na le Mmueledi kwa go Rara, e bong mosiami Jesu Keresete.” (1 Johane 2:1) Le mororo re le baleofi, re ka atamela Modimo re bua ka kgololesego ka Jesu Keresete yoo a neng a swa gore a re rekolole. (Mathaio 20:28) Ke ene fela yo re ka atamelang Jehofa Modimo ka ene. (Johane 14:6) Ga re a tshwanela go tsaya se se dirilweng ke setlhabelo sa ga Jesu sa thekololo motlhofo mme ra bo re leofa ka boomo. (Bahebere 10:26) Lefa go ntse jalo, fa e le gore re dira bojotlhe jwa rona go tila go dira bosula mme re bo re dira diphoso ka dinako tse dingwe, re ka ikwatlhaya mme ra kopa Modimo gore o re itshwarele. O tla re utlwa fa re mo atamela re ikokobeditse mo pelong.—Luke 11:4.

DITSHONO TSA GO BUA LE MODIMO

10. Re ka etsa Jesu jang fa re rapela, mme re ka rapelela mo sephiring ka dinako dife?

¹⁰ Jesu Keresete o ne a tsaya kamano ya gagwe le Jehofa e le botlhokwa tota. Ka gone, Jesu o ne a ipha nako ya go rapela Modimo a le nosi kwa thoko. (Mareko 1:35; Luke 22:40-46) Re tla bo re dira sentle fa re etsa sekao sa ga Jesu mme re rapela Modimo ka metlha. (Baroma 12:12) Re tshwanetse go rapela mo mosong, re bo re rapele gape pele re ya go robala, re lebogela Jehofa se re se dirileng mo letsatsing leo. Tlhomamisa gore o atamela Modimo “ka metlha yotlhe” motshegare. (Baefeso 6:18) Mme gape, re ka rapelela mo pelong re didimetse, re itse gore Jehofa o kgona go re utlwa. Fa re bua le Modimo mo sephiring, seo se re thusa go nonotsha kamano ya rona le ene mme e bile fa re rapela Jehofa letsatsi le letsatsi seo se dira gore re atamalane le ene fela thata.

11. (a) Ke eng fa malapa a tshwanetse go rapela a le mmogo? (b) Go kaya eng fa go twe “Amen” kwa bofelong jwa thapelo?

¹¹ Jehofa gape o reetsa dithapelo tse di rapelelwang batho fa ba le setlhopha. (1 Dikgosi 8:22-53) Lelapa le lone le ka atamalana le Modimo, le eteletswe pele ke tlhogo ya lelapa. Seno se dira gore lelapa le bofagane e bile Jehofa e nna wa mmatota mo go ba babotlana fa ba utlwa batsadi ba bone ba rapela Modimo ka boikokobetso. Go tweng fa motho a rapelela setlhopha sa batho, gongwe kwa dipokanong tsa Basupi ba ga Jehofa? Fa re le mo bareetsing, a re reetseng ka kelotlhoko gore fa thapelo e khutla, re kgone go bua ka pelo yotlhe re re “Amen,” se se rayang “A go nne jalo.”—1 Bakorinthe 14:16.

DITHAPELO TSE JEHOFA A DI UTLWANG

12. (a) Ke eng fa Modimo o sa arabe dithapelo dingwe? (b) Ke eng fa re sa tshwanela go rapelela fela dilo tse re di tlhokang ka namana?

¹² Bangwe ba ka nna ba re Modimo ga o arabe dithapelo tsa bone le mororo ba mo rapela ka Keresete. Lefa go ntse jalo, moaposetoloi Johane o ne a bolela jaana: “Fa re lopa sengwe ka fa go rateng ga [Modimo], o a re utlwa.” (1 Johane 5:14) Ka jalo, re tshwanetse go kopa dilo tse di dumalanang le thato ya Modimo. E re ka a batla gore re itekanele sentle semoyeng, re ka rapelela sengwe le sengwe se se amang bomoya jwa rona. Re tshwanetse go ithiba gore re se ka ra rapelela fela dilo tsa senama tse re di tlhokang. Ka sekai, le mororo go siame go rapelela temogo le gore re nonotshiwe fa re lwala, go tshwenyega ga rona thata ka boitekanelo ga go a tshwanela go hupetsa dilo tsa semoya. (Pesalema 41:1-3) Mosadi mongwe wa Mokeresete o ne a kopa Jehofa gore a mo thuse gore a lebe bolwetse jwa gagwe ka tsela e e tshwanetseng, fa a sena go lemoga gore o ne a tshwenyegile thata ka boitekanelo jwa gagwe. Go ne ga felela ka gore a se ka a tlhola a tshwenyega thata ka mathata a gagwe e bile o ne a ikutlwa gore o ne a filwe “bogolo jo bo leng bogolo thata jwa nonofo.” (2 Bakorinthe 4:7) Keletso ya gagwe ya go thusa ba bangwe semoyeng e ne ya nonofa, mme o ne a nna mmoledi wa nako e e tletseng wa Bogosi.

13. Jaaka go supilwe mo go Mathaio 6:9-13, ke dilo dife gape tse di tshwanetseng tse re ka di umakang fa re rapela?

¹³ Ke eng se re ka se akaretsang mo dithapelong tsa rona gore Jehofa a di itumelele? Jesu Keresete o ne a ruta barutwa ba gagwe go rapela. Mo thapelong ya sekao e e kwadilweng mo go Mathaio 6:9-13 o ne a bolela sekai sa dilo tse di tshwanetseng tse re ka di rapelelang. Ke eng se re tshwanetseng ra amega ka sone thata mo dithapelong tsa rona? Leina la ga Jehofa Modimo le Bogosi jwa gagwe di tshwanetse go tla pele. Go siame gape go rapelela dilo tsa senama tse re di tlhokang. E bile go botlhokwa go kopa gore maleo a rona a itshwarelwe le gore re gololwe mo ditekong le mo go yo o bosula, Satane Diabolo. Jesu o ne a sa batle gore re opele thapelo eno kana re e boeletse gantsintsi, re e boka fela re sa akanye ka se e se kayang. (Mathaio 6:7) E tla bo e le kamano ya mofuta mang e mo go yone ngwana a neng a tlhola a bua mafoko a a tshwanang fela fa a bua le rraagwe?

14. Kwa ntle ga go kopa, re ka rapela ka tsela efe gape?

¹⁴ Kwantle ga go kopa le go kokotlela go tswa mo pelong, re tshwanetse go baka le go leboga fa re rapela. (Pesalema 34:1; 92:1; 1 Bathesalonika 5:18) Gape re ka rapelela ba bangwe. Fa re rapelela bakaulengwe le bokgaitsadi ba rona ba semoya ba ba leng mo mathateng le ba ba bogisiwang re supa gore re a ba kgatlhegela e bile Jehofa o a itumela fa a utlwa re bolela gore re amega ka bone. (Luke 22:32; Johane 17:20; 1 Bathesalonika 5:25) E bile tota, moaposetoloi Paulo o ne a kwala jaana: “Lo se ka lwa tlhobaediwa ke sepe; mme mo dilong tsotlhe a ditopo tsa lona di itsisiwe Modimo ka thapelo le kokotlelo, di na le tebogo. Kagiso ya Modimo e e fetang tlhaloganyo yotlhe, e tlaa dibela dipelo tsa lona le megopolo ya lona mo go Keresete Jesu.”—Bafilipi 4:6, 7.

GANELELANG MO THAPELONG

15. Re tshwanetse go gakologelwa eng fa e le gore dithapelo tsa rona di lebega di sa arabiwe?

¹⁵ Le mororo o ntse o nna le kitso ka Modimo, o ka nna wa ikutlwa e kete dithapelo tsa gago ka dinako tse dingwe ga di arabiwe. Go ka nna ga nna jalo gonne e ka tswa e ise e nne nako ya Modimo ya go araba thapelo eo e e kgethegileng. (Moreri 3:1-9) Jehofa a ka nna a letla boemo bongwe gore bo tswelele ka lobakanyana, lefa go ntse jalo o araba dithapelo e bile o itse nako e e tshwanetseng thata ya go dira jalo.—2 Bakorinthe 12:7-9.

16. Ke eng fa re tshwanetse go ganelela mo thapelong, mme go dira jalo go ka ama kamano ya rona le Modimo jang?

¹⁶ Go ganelela ga rona mo thapelong go supa gore re eletsa se re se bolelelang Modimo go tswa mo pelong. (Luke 18:1-8) Ka sekai, re ka nna ra kopa Jehofa gore a re thuse gore re fenye bokoa bongwe. Fa re ganelela mo thapelong mme re dira fela jaaka re kopa re tla supa gore ruri re tlhoafetse. Re tshwanetse go bua re tlhamaletse e bile re ikanyega fa re kopa sengwe. Go botlhokwa gore re rapele thata fa re raelwa. (Mathaio 6:13) Fa re rapela re ntse re leka go lwantsha keletso ya go dira boleo, re tla bona kafa Jehofa a tla re thusang ka teng. Seno se tla aga tumelo ya rona le go nonotsha botsalano jwa rona le ene.—1 Bakorinthe 10:13; Bafilipi 4:13.

17. Re tlile go solegelwa molemo jang fa re ka direla Modimo ka boikutlo jwa thapelo?

¹⁷ Fa re ka nna le boikutlo jwa thapelo fa re ntse re direla Jehofa Modimo tirelo e e boitshepo, re tla lemoga gore ga re mo direle ka nonofo ya rona fela. Jehofa ke ene a dirang gore re kgone go dira dilo. (1 Bakorinthe 4:7) Fa re dumela seno re tla kgona go ikokobetsa mme seno se tla nonotsha kamano ya rona le ene. (1 Petere 5:5, 6) Ee, re na le mabaka a a utlwalang tota a go ganelela mo thapelong. Fa re rapela re tlhoafetse e bile re na le kitso e e botlhokwa thata ya kafa re ka atamalanang le Rraarona yo o lorato wa selegodimo ka gone re tla itumela tota.

GO BUISANA LE JEHOFA GA GO TSWE MO LETLHAKORENG LE LE LENGWE FELA

18. Re ka reetsa Modimo jang?

¹⁸ Fa re batla gore Modimo o utlwe dithapelo tsa rona, re tshwanetse go reetsa se a se bolelang. (Sekaria 7:13) Ga a tlhole a romela melaetsa ya gagwe ya bomodimo ka baperofeti ba ba tlhotlheleditsweng e bile ga a dirise tirisabadimo. (Duteronome 18:10-12) Mme re ka reetsa Modimo ka go ithuta Lefoko la gagwe, Baebele. (Baroma 15:4; 2 Timotheo 3:16, 17) Fela jaaka re tshwanetse go eletsa go ja dijo tse di re siametseng, re kgothalediwa gore re “tlhologelelwe maši a semowa a a se nang boferefere.” Dira gore o nne le keletso ya moutlwalo wa dijo tsa semoya ka go bala Lefoko la Modimo letsatsi le letsatsi.—1 Petere 2:2, 3; Ditiro 17:11.

19. O ka bona molemo ofe fa o tlhatlhanya ka se o se balang mo Baebeleng?

¹⁹ Tlhatlhanya ka se o se balang mo Baebeleng. (Pesalema 1:1-3; 77:11, 12) Seno se raya gore o akanye thata ka tshedimosetso. O ka tshwantsha seno le fa mmele o sila dijo. O ka sila dijo tsa semoya ka go amanya se o se balang le se o setseng o se itse. Akanyetsa gore tshedimosetso eno e ama botshelo jwa gago ka tsela efe kana o akanye ka se e se senolang ka dinonofo tsa ga Jehofa le tsela e a dirisanang le ba bangwe ka yone. Ka jalo, o ka ja dijo tsa semoya tse Jehofa a di re nayang ka go ithuta ka namana. Seno se tla go thusa go atamalana le Modimo e bile se tla go thusa go rarabolola mathata a letsatsi le letsatsi.

20. Go ya kwa dipokanong tsa Bokeresete go re thusa jang go atamalana le Modimo?

²⁰ Gape o ka atamalana le Modimo ka go reetsa Lefoko la gagwe fa le tlotliwa kwa dipokanong tsa Bokeresete, fela jaaka Baiseraele ba ne ba reetsa ka tlhoafalo ka nako ya fa ba ne ba kokoane go tla go utlwa Molao wa Modimo o balelwa batho botlhe. Bakaedi ba nako eo ba ne ba dira gore Molao o utlwale tota, ka tsela eo ba thusa bareetsi go tlhaloganya le go ba rotloetsa go dirisa se ba neng ba se utlwa. Seno se ne se dira gore ba itumele tota. (Nehemia 8:8, 12) Ka jalo dira gore o nne teng ka metlha kwa dipokanong tsa Basupi ba ga Jehofa. (Bahebere 10:24, 25) Seno se tla go thusa gore o kgone go tlhaloganya le go dirisa kitso ya Modimo mo botshelong jwa gago e bile go tla dira gore o itumele. O tla kgona go nna o ntse o atamalane le Jehofa fa o le mo bokaulengweng jwa Bokeresete jwa lefatshe lotlhe. Mme jaaka re tla bona, o ka sireletsega tota fa o le mo gare ga batho ba Modimo.

TLHATLHOBA KITSO YA GAGO

Ke eng fa o tshwanetse go atamalana le Jehofa?

Go tlhokega eng gore o atamalane le Modimo?

Ke dilo dife tse o ka di umakang fa o rapela?

Ke ka ntlha yang fa o tshwanetse go ganelela mo thapelong?

O ka reetsa Jehofa jang gompieno?

[Setshwantsho se se tletseng mo go tsebe 157]