Kgaolo 17

Bona Polokesego Mo Bathong Ba Modimo

1, 2. Boemo jwa losika lwa motho gompieno bo tshwana jang le jwa batho ba lefelo le le kgautlhantsweng ke setsuatsue?

AKANYA ka setsuatsue se se sentseng lefelo le o nnang mo go lone. Legae la gago le senyegile, e bile o latlhegetswe ke dithoto tsotlhe tsa gago. Ga go na dijo. E bile ga go lebege o ka bona thuso gope. Morago ga moo go tla thuso ya namolo e o sa e lebelelang. O fiwa dijo le diaparo tse dintsi. O agelwa ntlo e ntšha. Ruri o tla leboga motho yo o go neileng dilo tseno.

² Go diragala selo se se tshwanang le seo gompieno. Fela jaaka setsuatsue sele, botsuolodi jwa ga Adame le Efa bo ile jwa gobatsa losika lwa motho fela thata. Batho ba ne ba latlhegelwa ke legae la bone la Paradaise. Fa e sale go tloga ka nako eo, dipuso tsa batho di ile tsa palelwa ke go sireletsa batho mo dintweng, mo bokebekweng le mo go sa direlweng tshiamo. Bodumedi bo tlogetse batho ba bantsi ba bolailwe ke tlala ya dijo tse di siameng tsa semoya. Lefa go ntse jalo, fa re bua ka tsela ya semoya, Jehofa Modimo jaanong o aba dijo, diaparo le matlo. O dira seo jang?

“MOTLHANKA YO O BOIKANNGO LE YO O BOTLHALE”

3. Jehofa o naya losika lwa motho dilo jang, jaaka go supiwa ke dikai dife?

³ Gantsi dithuso tsa namolo di abiwa ke ba ba rulagantsweng go dira seo mme Jehofa le ene o baakanyeditse batho ba gagwe dilo tsa semoya. Ka sekai, Baiseraele e ne e le “phuthego ya ga Jehofa” ka dingwaga tse di ka nnang 1 500. Mo gare ga bone go ne go na le batho ba ba neng ba direla Modimo ka go ruta ba bangwe Molao wa gagwe. (1 Ditirafalo 28:8; 2 Ditirafalo 17:7-9) Jehofa o ne a tlhoma phuthego ya Bokeresete mo lekgolong la ntlha la dingwaga C.E. Go ne ga tlhomiwa diphuthego mme di ne tsa dira di kaelwa ke setlhopha se se laolang se se neng se dirilwe ka baaposetoloi le bagolwane. (Ditiro 15:22-31) Go ntse fela jalo le gompieno, Jehofa o dirisana le batho ba gagwe ka setlhopha sengwe se se rulagantsweng. Re itse seno jang?

4. “Motlhanka yo o boikanngo le yo o botlhale” o itshupile e le mang mo metlheng eno ya segompieno, mme re bona jang dilo tsa semoya tse Modimo a di baakantseng?

⁴ Jesu o ne a bolela gore ka nako ya fa a tla bo a le teng a busa mo Bogosing, “motlhanka yo o boikanngo le yo o botlhale” o ne a tla fitlhelwa a naya balatedi ba Gagwe “dijo ka dipaka tse e leng tsone.” (Mathaio 24:45-47) “Motlhanka” yono o ne a itshupa e le mang fa Jesu a ne a tlhongwa jaaka Kgosi ya selegodimo ka 1914? Eleruri e ne e se baruti ba Labokeresete. Ka go bo bone tota, ba ne ba fepa matsomane a bone ka dikgang tsa maaka tse di neng di ema nokeng dipuso tsa ditšhaba tsa bone mo Ntweng ya Lefatshe I. Mme Bakeresete ba boammaaruri ba ba neng ba tloditswe ka moya o o boitshepo wa Modimo e bile e le karolo ya se Jesu a neng a se bitsa “letsomanyane” ba ne ba aba dijo tse di siameng tsa semoya ka nako e e tshwanetseng. (Luke 12:32) Bakeresete ba ba tloditsweng bano ba ne ba rera ka Bogosi jwa Modimo go na le ka dipuso tsa batho. Go ne ga felela ka gore, fa dingwaga di ntse di feta, dimilione tsa batho ba ba dipelo di siameng ba “dinku di sele” ba tle go kopanela le “motlhanka” mo kobamelong ya boammaaruri. (Johane 10:16) Modimo o dirisa “motlhanka yo o boikanngo” le Setlhopha se se Laolang sa gagwe sa motlha wa segompieno go kaela batho ba one ba ba rulagantsweng go abela batho botlhe ba ba nang le keletso, dijo tsa semoya, diaparo le matlo.

“DIJO KA DIPAKA TSE E LENG TSONE”

5. Boemo jwa lefatshe jwa semoya bo ntse jang gompieno, mme Jehofa o dira eng ka seno?

⁵ Jesu o ne a re: “Motho ga a tshele ka senkgwe se le sosi, fa e se ka lefoko lengwe le lengwe le le tswang mo molomong wa Modimo.” (Mathaio 4:4) Lefa go ntse jalo, ka maswabi, batho ka bontsi ga ba reetse se Modimo a se bolelang. Fela jaaka Amose, moperofeti wa ga Jehofa a ne a bolelela pele, go na le “leuba mo lefatsheng, e seng leuba la dijo le fa e le lenyora la metsi, fa e se leuba la go utlwa lefoko la ga Jehofa.” (Amose 8:11) Tota le batho ba ba tlhoafaletseng bodumedi ba mo leubeng la semoya. Lefa go ntse jalo, Jehofa o batla gore “batho botlhe ba ke ba bolokwe, mme ba fitlhe mo kitsong ya boammaaruri.” (1 Timotheo 2:3, 4) Go dumalana le seo, o aba dijo tse dintsi tsa semoya. Mme di ka bonwa kae?

6. Jehofa o ile a fepa batho ba gagwe semoyeng jang mo nakong e e fetileng?

⁶ Jehofa ga a bolo go nna a naya batho ba gagwe dijo tsa semoya jaaka setlhopha go ralala hisitori yotlhe. (Isaia 65:13) Ka sekai, baperesiti ba Baiseraele ba ne ba phutha banna, basadi le bana go tla go ba ruta Molao wa Modimo e le setlhopha. (Duteronome 31:9, 12) Bakeresete ba lekgolo la ntlha la dingwaga ba ne ba rulaganya diphuthego le go tshwara dipokano tse di neng di ruta le go kgothatsa botlhe ba kaelwa ke setlhopha se se laolang. (Baroma 16:5; Filemone 1, 2) Basupi ba ga Jehofa ba latela sekao seno. O lalediwa ka lorato gore o nne teng kwa dipokanong tsotlhe tsa bone.

7. Go nna teng ka metlha kwa dipokanong tsa Bokeresete go amana jang le go nna le kitso le tumelo?

⁷ Gone mme o ka tswa o setse o ithutile go le gontsi ka bowena mo Baebeleng. Gongwe o ile wa thusiwa ke mongwe. (Ditiro 8:30-35) Lefa go ntse jalo, tumelo ya gago e ka tshwantshiwa le semela se se swabang se bo se swa fa se sa tlhokomelwe sentle. Ka gone, o tshwanetse go otliwa sentle semoyeng. (1 Timotheo 4:6) Dipokano tsa Bokeresete di na le thulaganyo e e tswelelang ya go kaela e e diretsweng go go nonotsha semoyeng le go go thusa go nna o gola mo tumelong fa o ntse o oketsa kitso ya gago ka Modimo.—Bakolosa 1:9, 10.

8. Ke eng fa re kgothalediwa go ya kwa dipokanong tsa Basupi ba ga Jehofa?

⁸ Dipokano di mosola ka tsela e nngwe gape. Paulo o ne a kwala jaana: “A re gopolaneng, re tlhotlheletsanyeng mo loratong le mo ditirong tse di molemo; re se ka ra bakela go phuthega ga rona.” (Bahebere 10:24, 25) Lefoko la Segerika le le ranolwang jaaka “go tlhotlheletsana” gape le ka kaya “go lootsa.” Seane sengwe sa Baebele sa re: “Tshipi e lootsa tshipi; motho o lootsa jalo sefatlhogo sa tsala ya gagwe.” (Diane 27:17) Rotlhe re tlhoka go nna re ‘loodiwa’ ka metlha. Dilo tse di re gatelelang letsatsi le letsatsi tsa lefatshe di ka koafatsa tumelo ya rona. Fa re ya kwa dipokanong tsa Bokeresete, re a kgothatsana. (Baroma 1:11, 12) Maloko a phuthego a latela kgothatso ya ga moaposetoloi Paulo ya gore ba ‘laane mme ba agelelane,’ e bile dilo tseo di lootsa tumelo. (1 Bathesalonika 5:11) Go nna teng ka metlha kwa dipokanong tsa Bokeresete gape go supa gore re rata Modimo, e bile go re naya tshono ya go mmaka.—Pesalema 35:18.

“LO APARE LORATO”

9. Jehofa o ile a tlhoma sekao jang mo go supeng lorato?

⁹ Paulo o ne a kwala jaana: “Lo apare lorato, lo e leng lone sebofo sa boitekanelo.” (Bakolosa 3:14) Jehofa o re file diaparo tseno ka bopelontle. Ka tsela efe? Bakeresete ba kgona go supa lorato gonne ke lengwe la maungo a ba a neilweng ke Modimo la moya o o boitshepo wa ga Jehofa. (Bagalatia 5:22, 23) Jehofa ka boene o supile lorato lo logolo ka go romela Morwawe yo o tsetsweng a le esi gore re kgone go bona botshelo jo bo sa khutleng. (Johane 3:16) Tsela e kgolo eno ya go supa lorato e re tlhometse sekao sa kafa re ka supang nonofo eno ka gone. Moaposetoloi Johane o ne a kwala jaana: “Fa Modimo o re ratile mo go kalo, le rona re tshwanetse go ratana.”—1 Johane 4:11.

10. Re ka bona molemo mo ‘bakaulengweng botlhe’ jang?

¹⁰ Fa o nna teng kwa dipokanong kwa Holong ya Bogosi o tla nna le tshono e ntle thata ya go supa lorato. Fa o le koo o tla kopana le batho ba ba farologaneng. Ga go belaetse gore o tla ikutlwa o kgatlhegela ba bangwe fela thata fa o ba bona. Ee gone, le batho ba ba direlang Jehofa ba na le botho jo bo sa tshwaneng. Gongwe mo nakong e e fetileng o ne o a tle o tile go kopana le batho ba ba neng ba sa kgatlhegele dilo tse o di kgatlhegelang kana ba mekgwa e e farologaneng le ya gago. Lefa go ntse jalo, Bakeresete bone ba tshwanetse go “rata bakaulengwe botlhe.” (1 Petere 2:17, NW) Ka gone, itlhomele mokgele wa go batla go tlwaela batho botlhe kwa Holong ya Bogosi—le batho ba dingwaga tsa bone di sa lekaneng le tsa gago, ba ba sa tshwaneng le wena ka botho, lotso kana ba ba sa rutegang jaaka wena. O tla fitlhela gore mongwe le mongwe wa bone o na le nonofo nngwe e e dirang gore a ratege.

11. Ke eng fa o sa tshwanela go tshwenngwa ke botho jo bo sa tshwaneng jwa batho ba ga Jehofa?

¹¹ Botho jo bo farologaneng thata jwa batho ba ba mo phuthegong ga bo a tshwanela go go tshwenya. Go tshwantsha, akanya ka dikoloi di le mmalwa di tabogile fa thoko ga gago mo tseleng. Ga di taboge tsotlhe ka lebelo le le lengwe, e bile seemo sa tsone ga se tshwane. Tse dingwe di setse di tsamaile dikilometara tse dintsi, mme tse dingwe ke gone di simololang jaaka wena. Lefa go ntse jalo, lefa di ka tswa di farologana jang, tsotlhe di tabogile mo tseleng. Go ntse fela jalo le ka batho ba ba leng mo phuthegong. Ga ba nne le dinonofo tsa Bokeresete ka bofefo jo bo tshwanang. Mo godimo ga moo, maemo a mmele le a maikutlo a bone ga a tshwane. Bangwe ba na le dingwaga tse dintsi ba ntse ba obamela Jehofa; ba bangwe ke gone fela ba simololang. Lefa go ntse jalo botlhe ba tsamaya mo tseleng e e isang botshelong jo bo sa khutleng, ‘ba mogopolo o le mongwe fela le mo tshekatshekong e le nngwe fela.’ (1 Bakorinthe 1:10) Ka gone, leba dilo tse ba ba mo phuthegong ba nonofileng mo go tsone eseng makoa a bone. Fa o dira jalo seno se tla dira gore pelo ya gago e tlale ka lorato ka go bo o tla lemoga gore ruri Modimo o teng mo bathong ba gagwe. E bile tota ke gone kwa o batlang go nna teng.—1 Bakorinthe 14:25.

12, 13. (a) O ka dira eng fa o ka kgopisiwa ke mongwe mo phuthegong? (b) Ke eng fa go le botlhokwa gore o se ka wa nna ka sekgopi?

¹² E re ka batho botlhe ba sa itekanela, ka dinako tse dingwe mongwe mo phuthegong a ka bua kana a dira sengwe se se go kgopisang. (Baroma 3:23) Morutwa Jakobe o ne a kwala jaana ka boammaaruri: “Gonne re tle re kgopise rotlhe mo dilong di le dintsi. Fa mongwe a sa kgopise mo puong, yoo e be e le motho yo o itekanetseng.” (Jakobe 3:2) O tlile go dira eng fa mongwe a go kgopisa? Seane sa Baebele sa re: “[Temogo, NW] ya motho e mo dira gore a nne bonya go galefa; le gone ke kgalalelo ya gagwe go tlhokomologa tlolo.” (Diane 19:11) Go nna le temogo go kaya go bona se se bakileng seemo seo, go tlhaloganya mabaka a a dirileng gore motho a bue kana a dire ka tsela nngwe e e rileng. Rotlhe re dirisa temogo fa re ntshetsa diphoso tse re di dirileng mabaka. Ke eng fa re sa e dirise go tlhaloganya le go bipa bosaitekanelang jwa ba bangwe?—Mathaio 7:1-5; Bakolosa 3:13.

¹³ O se ka wa lebala le ka motlha gore re tshwanetse go itshwarela ba bangwe fa re batla gore Jehofa a re itshwarele. (Mathaio 6:9, 12, 14, 15) Fa re dira dilo ka tsela ya boammaaruri, re tla tshwara ba bangwe ka lorato. (1 Johane 1:6, 7; 3:14-16; 4:20, 21) Ka gone, fa o nna le bothata le mongwe mo phuthegong, se itetle go nna ka sekgopi. Fa e le gore o apere lorato, o tla leka ka natla go rarabolola bothata joo, e bile ga o kitla o okaoka go kopa maitshwarelo fa o kgopisitse yo mongwe.—Mathaio 5:23, 24; 18:15-17.

14. Re tshwanetse go apara dinonofo dife?

¹⁴ Diaparo tsa rona tsa semoya di tshwanetse go akaretsa le dinonofo tse dingwe tse di amanang thata le lorato. Paulo o ne a kwala jaana: “Lo apare pelotlhomogi, le pelonomi, le boikokobetso, le bonolo le bopelotelele.” Dinonofo tseno, tse di akarediwang ke lorato, ke karolo ya “motho yo mosha” wa bomodimo. (Bakolosa 3:10, 12) A o tlile go leka go apara ka tsela eno? O tla bo segolobogolo o na le letshwao le le tshwayang barutwa ba ga Jesu fa o ka apara lorato lwa bokaulengwe ka go bo o ne a re: “Batho botlhe ba tlaa itse fa lo le barutwa ba me ka mo, fa lo ratana.”—Johane 13:35.

LEFELO LA POLOKESEGO

15. Phuthego e tshwana le ntlo e e sireletsang jang?

¹⁵ Phuthego gape e ntse jaaka ntlo, lefelo la botshabelo le le sireletsang koo o tla ikutlwang o babalesegile teng. O tla fitlhela e na le batho ba ba peloephepa ba ba lekang go dira dilo tse di siameng mo matlhong a Modimo. Bontsi jwa bone bo latlhile ditiro le mekgwa e e maswe e o ka tswang o lwela gore o e latlhe. (Tito 3:3) Ba ka go thusa, ka go bo re bolelelwa gore re ‘rwadisanye merwalo.’ (Bagalatia 6:2) Ka tlholego fela ke boikarabelo jwa gago gore o ganelele mo tseleng e e isang kwa botshelong jo bo sa khutleng. (Bagalatia 6:5; Bafilipi 2:12) Lefa go ntse jalo, Jehofa o re file phuthego ya Bokeresete e e leng tsela e e molemo thata e e re thusang le go re ema nokeng. Lefa mathata a gago a ka tswa a ngomola pelo go le kana kang, o na le koo o engwang nokeng tota gone—phuthego e e lorato e e tla go tshegetsang fa o le mo mathateng kana fa o tlhoka.—Bapisa Luke 10:29-37; Ditiro 20:35.

16. Bagolwane ba phuthego ba thusa ka tsela efe?

¹⁶ ‘Dineo tse e leng batho’—bagolwane ba ba tlhomilweng mo diphuthegong kana balebedi ba ba disang letsomane ba sa patelediwe le ka pelo e e ratang, ke bangwe ba batho ba ba tla go emang nokeng. (Baefeso 4:8, 11, 12; Ditiro 20:28; 1 Petere 5:2, 3) Moperofeti Isaia o ne a perofesa jaana ka bone: “Monna o tlaa nna jaaka boipoteletso mo phefong, le boitekeletso mo ledimong; jaaka dinoka tsa metsi mo sekakeng, jaaka moriti wa lefika le legolo mo nageng e e lapisang.”—Isaia 32:2.

17. (a) Ke thuso efe e Jesu a neng a batla go e neela segolobogolo? (b) Modimo o ne wa solofetsa go naya batho ba gagwe eng?

¹⁷ Ka nako ya fa Jesu a ne a le mo lefatsheng, baeteledipele ba bodumedi ba ne ba sa etelele pele ka tsela e e lorato. Seemo sa batho se ne se mo tshwenya thata, mme o ne a batla go ba thusa thata semoyeng. Jesu o ne a ba tlhomogela pelo gonne ba ne ba “patikegile ba gasagasame jaaka dinku tse di se nang modisa.” (Mathaio 9:36) A bo seno se tlhalosa sentle jang ne boemo jo bo maswe jwa batho ba bantsi ba ba nang le mathata a a botlhoko thata mme ba sena ope yo o ba thusang le go ba gomotsa semoyeng! Lefa go ntse jalo, batho ba ga Jehofa bone ba thusiwa semoyeng ka go bo o ne a solofetsa jaana: ‘Ke tlaa tlhoma badisa mo go bone gore ba ba otle; ga ba ketla ba tlhola ba boifa, le fa e le go tseana, le gone ga go ketla go tlhokafala lepe.’—Jeremia 23:4.

18. Ke ka ntlha yang fa re tshwanetse go atamela mogolwane fa re tlhoka thuso ya semoya?

¹⁸ Dira gore o tlwaele bagolwane ba ba tlhomilweng mo phuthegong. Ba na le boitemogelo jo bontsi jwa go dirisa kitso ya Modimo, ka go bo ba ile ba fitlhelwa ba na le dinonofo tsotlhe tsa balebedi tse di mo Baebeleng. (1 Timotheo 3:1-7; Tito 1:5-9) O se ka wa etsaetsega go ya kwa go mongwe wa bone fa o tlhoka go thusiwa semoyeng gore o fenye mokgwa kana tsela nngwe e e sa dumalaneng le se Modimo o se batlang. O tla fitlhela gore bagolwane ba latela kgakololo eno ya ga Paulo: “Nametsang ba ba lapang pelo, pepetletsang ba ba bokoa, lo nne pelotelele mo go botlhe.”—1 Bathesalonika 2:7, 8; 5:14.

ITUMELELE POLOKESEGO LE BATHO BA GA JEHOFA

19. Jehofa o segofatsa jang batho ba ba batlang go senka polokesego mo phuthegong ya gagwe?

¹⁹ Le fa gone jaanong re tshela mo maemong a a sa siamang, Jehofa o re naya dijo, diaparo le matlo a semoya. Gone mme, re tshwanetse go emela lefatshe le lesha le Modimo o le solofeditseng gore re kgone go bona melemo ya paradaise. Mme botlhe ba e leng karolo ya phuthego ya ga Jehofa, jaanong ba itumelela polokesego ya paradaise ya semoya. Esekiele o ne a perofesa jaana ka bone: “Ba tlaa aga ka thagamo, ope ga a ketla a ba boifisa.”—Esekiele 34:28; Pesalema 4:8.

20.Jehofa o tlile go duela jang sepe fela se re ka intshetsang kobamelo ya gagwe setlhabelo mo go sone?

²⁰ A bo re ka leboga thata jang ne go bo Jehofa a re neile dilo tsa semoya ka Lefoko la gagwe le phuthego ya gagwe! Atamela batho ba Modimo. Se ikgogone o tshaba se ditsala kana ba losika ba tla se akanyang ka wena fa o ithuta ka Modimo. Bangwe ba ka nna ba se ka ba rata fa o kopanela le Basupi ba ga Jehofa le fa o ya kwa dipokanong kwa Holong ya Bogosi. Lefa go ntse jalo, Modimo o tla go duelela sepe fela se o se dirang go intshetsa kobamelo ya gagwe setlhabelo. (Malaki 3:10) Mo godimo ga moo, Jesu o ne a re: “Ga go motho ope yo o tlogetseng ntlo, kgotsa bomorwa rraagwe, kgotsa bokgaitsadie, kgotsa mmaagwe, kgotsa rraagwe, kgotsa bana, kgotsa masimo, ka ntlha ya me, le ka ntlha ya Mafoko a a Molemo, yo o se ketlang a bona ga lekgolo, le jaana mo lobakeng lono, e bong matlo, le bomorwa rraagwe, le bokgaitsadie, le bommaagwe, le bana, le masimo, di na le dipogiso; mme mo lefatsheng le le tlang o tlaa bona botshelo jo bo sa khutleng.” (Mareko 10:29, 30) Ee, lefa o ka tswa o tlogetse eng kana o tshwanela go itshokela eng, o ka itumelela botsalano le polokesego ya semoya fa o le fa gare ga batho ba Modimo.

TLHATLHOBA KITSO YA GAGO

“Motlhanka yo o boikanngo le yo o botlhale” ke mang?

Ke dilo dife tse Jehofa a di re neileng go re fepa semoyeng?

Ba ba leng mo phuthegong ya Bokeresete ba ka re thusa jang?

[Setshwantsho se se tletseng mo go tsebe 165]