Nna Tsala ya Modimo ka Bosakhutleng!

Go tlhokega maiteko gore o nne le tsala; go tlhokega maiteko gore lo tswelele lo ntse lo le ditsala. Maiteko a gago a go nna tsala ya Modimo le go tswelela o le yone a tla segofadiwa thata. Jesu o ne a raya ba ba neng ba dumela mo go ene a re: “Boammaaruri bo tla lo golola.” (Johane 8:32) Seo se raya eng?

O ka gololesega gone jaanong. O ka gololesega mo dithutong tsa maaka le maaka a a anamisitsweng ke Satane. O ka gololesega mo go tlhokeng tsholofelo mo batho ba ba dimilione ba ba sa itseng Jehofa ba nang le gone. (Baroma 8:22) Ditsala tsa Modimo di gololesegile le e leng mo go ‘boifeng loso.’—Bahebera 2:14, 15.

O ka itumelela kgololesego mo lefatsheng le lesha la Modimo. A bo o ka itumelela kgololesego e e molemo jang ne mo isagweng! Mo lefatsheng la Paradaise, go tla bo go se na ntwa, bolwetse le bokebekwa. Kgololesego mo khumanegong le mo tlaleng. Kgololesego mo botsofeng le mo losong. Kgololesego mo poifong, mo kgatelelong le mo tshiamololong. Baebele e bua jaana ka Modimo: “O bula seatla sa gago, o kgotsofatse keletso ya setshedi sengwe le sengwe.”—Pesalema 145:16.

Ditsala tsa Modimo di tla tshelela ruri. Botshelo jo bo sa khutleng ke mpho e e tlhwatlhwakgolo e Modimo a tla e nayang batho botlhe ba ba batlang go nna ditsala tsa gagwe. (Baroma 6:23) Akanya fela gore botshelo jo bo sa khutleng bo ka kaya eng mo go wena!

O tla nna le nako ya go dira dilo tse dintsi. Gongwe o ka rata go ithuta go letsa seletswa sa mmino. Kgotsa gongwe o batla go ithuta go penta ditshwantsho kgotsa go nna mmetli. O ka nna wa rata go ithuta ka diphologolo kgotsa dimela. Kgotsa gongwe o batla go tsamaya o bona dinaga tse di farologaneng le batho. Botshelo jo bo sa khutleng bo tla dira gore o kgone go dira dilo tseno tsotlhe!

O tla nna le nako ya go nna le ditsala tse dintsi. Go tshelela ruri go tla dira gore go kgonege gore o itse batho ba bangwe ba bantsi ba e leng ditsala tsa Modimo. O tla itse bokgoni jwa bone le dinonofo tsa bone tse di molemo, mme le bone e tla nna ditsala tsa gago. O tla ba rata le bone ba tla go rata. (1 Bakorintha 13:8) Go nna le botshelo jo bo sa khutleng go tla go naya nako e e lekaneng ya go nna tsala ya mongwe le mongwe mo lefatsheng! Se se molemo go di feta tsotlhe ke gore botsalano jwa gago le Jehofa bo tla nonofa le go feta fa go ntse go feta makgolo a dingwaga. E kete o ka nna tsala ya Modimo ka bosakhutleng!