Kgaolo ya Lesomenngwe

Jehofa o Batla Gore Batho ba Tshele—A le Wena o Batla Jalo?

1, 2. (a) Tsela e Jona a neng a itshwara ka yone fa a utlwa tshwetso e Jehofa a e tsereng ka Ninife e ka re ruta eng? (b) Ke ka ntlha yang fa re tshwanetse go sekaseka bopelotlhomogi jwa Modimo le tsela e a lebang botshelo ka yone?

JEHOFA o ne a itumetse. Moporofeti Jona ene o ne a hutsafetse. Modimo o ne a nnile pelotlhomogi mme a se ka a bolaya diketekete tsa batho. Fa e ne e le Jona, o ka bo a ba tlogetse ba nyelela! Jehofa o ne a tlhopha go itshwarela le go boloka batho ba e neng e le baba ba batho ba gagwe.

² Jaaka kgang ya ga Jona e re bontsha, ka dinako tse dingwe go ka nna thata gore batho ba tlhaloganye selekanyo sa boitshoko jwa Modimo ba bo ba nne le keletso e e tshwanang le ya gagwe ya gore batho ba tshele. Jona o ne a fitlhela tshwetso ya ga Jehofa ya gore a se ka a nyeletsa Baninife e “sa itumedise ka gope, mme a tuka bogale.” A go ka tswa e le gore Jona o ne a tshwenyegile thata ka maikutlo a gagwe go na le go nna pelotlhomogi le go amega ka go bolokwa ga matshelo a batho? A ka tswa a ile a akanya gore fa Baninife ba ne ba ka se senngwe, ba ne ba tla mo tsaya e le motho yo o sa bueng boammaaruri. (Jona 4:1, 10, 11) Go tweng ka motlha wa rona, jaaka letsatsi la ga Jehofa la katlholo le ntse le atamela ka bofefo? O ka nna wa ipotsa jaana: ‘Nka dira jang gore ke anaanele boitshwarelo jwa Modimo botokanyana, mme nka thusa jang batho ba ba dirileng phoso mme ba ikwatlhaya, ke ba thusa gore ba solegelwe molemo ka botlalo ke kutlwelobotlhoko ya gagwe? Tota nka etsa jang keletso ya Modimo ya gore batho ba bone botshelo?’

TSHIAMISO LE BOPELOTLHOMOGI KA BOIKAELELO JWA GO BOLOKA MATSHELO A BATHO

3. A tshiamiso ya Modimo le bopelotlhomogi jwa gagwe di a ganetsana? Tlhalosa.

³ Batho ba bangwe ba akanya gore dibuka tseno tse 12 tsa boporofeti, di bua thata ka bogale jwa Modimo le kafa a neng a otlhaya batho ka teng, a diragatsa tshiamiso. Ba ka nna ba botsa jaana: ‘Bopelotlhomogi jwa ga Jehofa bo kae? A o amega ka go boloka matshelo a batho?’ Totatota, tshiamiso ya Modimo le bopelotlhomogi jwa gagwe, ga di ganetsane, mme ka bobedi jwa tsone di thusa go boloka matshelo a batho. Tshiamiso le bopelotlhomogi ke dikarolo tse pedi tsa botho jwa gagwe jo bo lekalekaneng sentle. (Pesalema 103:6; 112:4; 116:5) Fa Modimo a baakanya se se sentsweng ke baikepi, o bontsha bopelotlhomogi mo bathong ba ba batlang go dira se se siameng. Seo se naya bosupi jwa gore o na le tshiamiso e e sa tlhaeleng. Kafa letlhakoreng le lengwe, a ntse a le tshiamiso jalo mo dilong tsotlhe, gape o dirisa bopelotlhomogi jwa gagwe go akanyetsa batho ba ba sa itekanelang. O ka e baya jaana: o naya katlholo fa go tlhokega, mme o pelotlhomogi fa go kgonega. Mo melaetseng ya baporofeti, go na le mafoko a mantsi a a tlhomamisang tsela eno ya Modimo e e lekalekaneng ya go dira dilo, a a bontshang gore o batla gore batho ba tshele. A re sekasekeng seno mme fa re ntse re dira jalo, re bone dilo tse re ka di ithutang ra ba ra di dirisa gompieno.

4. Ke bosupi bofe jo bo bontshang gore Modimo o batla batho ba bona botshelo?

⁴ Moporofeti Joele o ne a bolela molaetsa wa katlholo, mme gape o ne a tlhomamisa gore Modimo “o pelontle le kutlwelobotlhoko, o bonya go galefa e bile o tletse bopelonomi jwa lorato.” (Joele 2:13) Dingwaga di ka nna lekgolo moragonyana, mo lekgolong la borobedi la dingwaga B.C.E., Mika o ne a gatelela kafa re tlhokang boitshwarelo jwa ga Jehofa ka teng. Fa Mika a sena go botsa a re “Ke mang Modimo yo o tshwanang le wena?” o ne a tlhalosa Jehofa jaana: “Ruri ga a na go tshwarelela mo bogaleng jwa gagwe ka bosaengkae, gonne o natefelelwa ke bopelonomi jwa lorato. O tla re bontsha kutlwelobotlhoko gape.” (Mika 7:18, 19) Jaaka fa re bona mo pegong ya ga Jona ka Baninife, Modimo a ka busetsa morago katlholo e a neng a ikaeletse go e tlisetsa batho ba ba mo galefisitseng, fa ba dira ditiro tse di bontshang go ikwatlhaya.

5. Ke dilo dife tse o fitlhelang di kgothatsa ka bopelotlhomogi jwa Modimo le go batla ga gagwe go boloka matshelo a batho? (Bona le “Ba ne ba Ithaopa.”)

⁵ Rona ga re tshele mo metlheng ya baporofeti ba ba 12. Le fa go ntse jalo, a ga re anaanele ditsela tseno tse di bontshang bopelotlhomogi jwa ga Jehofa le tsela e a batlang go boloka matshelo a batho ka yone? Fa o ikutlwa jalo, seo se ka nonotsha kamano ya gago le Modimo mme sa oketsa kgatlhego e o nang le yone ya go thusa batho ba bangwe gore ba bone botshelo. Le fa batho ba le bantsi gompieno ba dira bosula, re tlhomamisega gore Modimo “ga a eletse gore ope a senngwe mme o eletsa gore botlhe ba fitlhe mo boikwatlhaong.” (2 Petere 3:9) Se se bontshang gore Jehofa o eletsa jalo ke mafoko a a lorato a a neng a buiwa ke Hosea fa a ne a boa a amogela mosadi wa gagwe wa kgokafalo gape. Jehofa o ne a “bua le pelo” ya batho ba gagwe. Modimo o ne a sa patelesege go bontsha boitshwarelo, mme o ne a iketleeditse go dira jalo ‘ka go rata ga gagwe.’ (Hosea 1:2; 2:13, 14; 3:1-5; 14:4) A o itse gore ke ka ntlha yang fa boikutlo jwa Modimo le ditiro tsa gagwe mo ntlheng eno di le botlhokwa jaana? Ke ka gonne di ama matshelo a batho. O ka bona bosupi jo bongwe gape jwa bopelotlhomogi jwa Modimo le kafa a eletsang ka gone gore batho ba bone botshelo fa o leba phuthego ya Bokeresete, e e dirang sengwe se o nang le seabe mo go sone.

GO THUSA BATHO GORE BA BONE BOTSHELO

6. Ke tsela efe ya botlhokwa e Modimo a bontshang ka yone gore o batla batho ba bona botshelo?

⁶ Ke ka ntlha yang fa o ya bodireding jwa phatlalatsa? Lebaka lengwe la konokono ke gore o tle o thuse batho ba bangwe go itse Modimo wa boammaaruri. Sengwe sa botlhokwa se o tshwanetseng go se itse ka Jehofa ke se: O naya tlhagiso e e utlwalang sentle pele a tlisa kotlhao. Seno se bontsha gore o kgatlhegela batho ka go ba tlhomogela pelo, ga a batle ba a swa mme o batla gore ba bone botshelo. Baporofeti ba ba 12 ba ne ba itsise batho ba ba molato gore Modimo o ne a ba naya sebaka sa go ikwatlhaya le gore ba se ka ba tlelwa ke bogale jwa gagwe jo bo tshwanetseng go tla. Le rona re dira tiro e e ntseng jalo gompieno. Fa o le Mokeresete, o na le tshiamelo e kgolo ya go tlhagisa batho ka letsatsi le le tlang la Modimo la pusoloso. Fa o ntse o dira jalo, o se ka wa nna le maikutlo ape a go ipusolosetsa, o batla go bona batho ba ba sa ikwatlhayeng ba newa kotlhao e e ba tshwanetseng. Ikgopotse gore tota o rera gore batho ba tle mo tseleng ya botshelo.—Joele 3:9-12; Sefania 2:3; Mathaio 7:13, 14.

7. (a) Ke ka ntlha yang fa go le botlhokwa go nna le seabe mo tirong ya go rera? (b) Fa batho ba sa batle go reetsa molaetsa wa rona, go akanya ka boikutlo jwa ga Jehofa go ka re thusa jang?

⁷ Nako le nako fa o bolela boammaaruri jwa Baebele mo ntlong ya motho, kwa sekolong, kwa tirong, kgotsa kae fela, o thusa motho yo o tlhokang bopelotlhomogi jwa Modimo le go itshwarelwa ka potlako. (Hosea 11:3, 4) Gone ke boammaaruri gore bangwe ba ka nna ba se ka ba go reetsa e bile ba ka nna le boikutlo jwa go se kgathale. Le fa go ntse jalo, fa o itshokela maemo ao, o etsa Modimo wa rona yo o pelotlhomogi, yo o neng a bolelela setšhaba sa gagwe sa diganana jaana a dirisa Sekarea: “Boang tsweetswee, mo ditseleng tsa lona tse di bosula le mo ditirong tsa lona tse di bosula.” (Sekarea 1:4) Ke mang yo o itseng gore ke batho ba le kae ba ba tla utlwang fa o ba bolelela ka bopelotlhomogi jwa Modimo le go ba bontsha tsela e e yang botshelong? Gape, leka go gopola gore o rera ka gonne Jehofa a batla batho ba bona botshelo, mme le wena o batla ba bona botshelo.

8. Ke ka ntlha yang fa go kgothatsa go gopola kafa bangwe ba ileng ba arabela ka teng fa ba bontshiwa bopelotlhomogi jwa Modimo?

⁸ O ka nna wa kgothadiwa ke go gopola ntlha eno: Mo e ka nnang ka dinako tsotlhe, go a bo go ntse go na le batho ba ba amogelang melaetsa ya Modimo. Ke gone ka moo Hosea a ileng a bua ka batho ba ba neng ba lemoga gore “ditsela tsa ga Jehofa di thokgame.” Moporofeti yono o ne a oketsa jaana: “Basiami ke bone ba tla tsamayang mo go tsone.” (Hosea 14:9) Fa makgolo a dingwaga a ntse a feta, batho ba le bantsi ba ile ba gapiwa maikutlo ke taletso eno ya Modimo: “Boelang mo go nna ka dipelo tsa lona tsotlhe.” (Joele 2:12) Mafoko ao a ne a bolelelwa batho ba ba neng ba setse ba itse Jehofa, mme gape a bontsha tsela e Modimo a kgatlhegelang ka yone batho ba e leng gone ba ithutang kaga gagwe. Ee, Modimo ga a ise a tlhoboge batho gore ba ka se kgone go ikwatlhaela diphoso tse ba di dirileng, ba sokologa mme ba simolola go dira se se siameng. Seno se dira gore ba nne mo seemong sa gore ba ka falola.—1 Timotheo 4:16.

9. Tsela e Baninife ba ileng ba arabela ka yone e bontsha gore ke eng se se tlhokegang?

⁹ Go na le ntlha e nngwe gape e re e tlhokomelang mo go itshwareleng ga ga Jehofa Baninife. Fa re bala re utlwa gore batho ba ne ba tsaya tsia molaetsa wa gore katlholo ya Modimo e ne e tla, mme “ba simolola go dumela mo Modimong.” (Jona 3:5) Go ne go tlhokega tumelo, e seng fela go boifa katlholo gore ba tswelele pele ba tshela. E re ka Jehofa a eletsa thata go bona batho ba ikwatlhaya le go tsaya kgato ka tumelo, o re letlile go rera e le gore re thuse batho go itirela tshwetso. Diphelelo e nnile dife? Go kwadilwe jaana ka Baninife: “Modimo wa boammaaruri a bona ditiro tsa bone, gore ba ne ba boetse morago ba dule mo tseleng ya bone e e bosula; ka jalo Modimo wa boammaaruri a ikwatlhaela masetlapelo a a neng a buile gore o tla a ba tlisetsa; mme a se ka a a tlisa.” (Jona 3:10) Jehofa a ka se tsiediwe ke mafoko fela kgotsa ditiro tsa go ikgolola. Baninife ba tshwanetse ba bo ba ile ba bontsha go ikwatlhaya ga mmatota ka ditiro tsa bone. Modimo o ne a kgona go bona gore ba dirile phetogo ya mmatota; ba ne ba bontsha boikwatlhao jwa mmatota mmogo le tumelo.

10. Maemo mangwe a Jehofa a neng a boloka batho mo go one ke afe?

¹⁰ Le ka motlha ga re a tshwanela go swetsa ka gore go kgatlhegela ga ga Jehofa go boloka matshelo a batho go solegetse Baninife fela molemo. Fa Jerusalema e ne e senngwa ka 607 B.C.E.—morago ga bodiredi jwa ga Obadia, Nahume le Habakuke—Jehofa o ne a falotsa Jeremia yo o kutlo le setlhopha sa ditsala tsa gagwe tse di ikanyegang. (Jeremia 39:16-18) Mme baporofeti ba Modimo ba ne ba bolelela pele gore masalela a a ikanyegang a ne a tla boa kwa Babelona mme a tsosolose kobamelo e e itshekileng. (Mika 7:8-10; Sefania 3:10-20) Dipolelelopele tseo di diragaditswe ka tsela e kgolo mo metlheng ya gompieno. Morago ga Ntwa ya Lefatshe I, Bakeresete ba ba tloditsweng, ba bontsi jwa bone ba neng ba setse ba goga dinao mo kobamelong ya boammaaruri, ba ne ba tsosolosiwa gore ba dire ka tlhoafalo ba bo ba amogelwe ke Jehofa, mme ba nna le tebelelo ya go bona botshelo. Gompieno le gone, batho ba ba tswang mo ‘ditšhabeng di le dintsi’ ba “gokagana le Jehofa.” (Sekarea 2:11) Batho bano ba na le tsholofelo ya go falola bokhutlo jo bo ntseng bo atamela jwa tsamaiso eno ya dilo. Ka jalo, bodiredi jo o bo dirang jwa phatlalatsa ga se sengwe se o se dirang go bontsha kutlo fela ka gonne Bakeresete ba laetswe go dira jalo. E bile ga se selo se o se dirang fela go diragatsa boporofeti. (Mathaio 24:14; 28:19, 20) Lebaka la konokono la go rera phatlalatsa ke gore o thuse batho gore ba ithute kaga Jehofa, ba bontshe tumelo mme ba bone botshelo.

BA BA BOELANG MO GO JEHOFA BA BONA BOTSHELO

11, 12. Bopelotlhomogi jwa Modimo bo ka solegela molemo jang ba ba kileng ba bo ba mo obamela?

¹¹ Jehofa o rata batho ba ba simololang go mo direla e bile o batla gore ba bone botshelo, mme ga a lebale ba ba setseng ba mo direla. Le rona re tshwanetse ra bontsha go ba kgatlhegela re bo re eletse gore ba tswelele mo tseleng ya botshelo. Ke eng se re ka se dirang go bontsha gore re a ba kgatlhegela?

¹² O ka tswa o itse ka bangwe ba ba ileng ba ithuta ka ga Jehofa, ba nna le tumelo mo go ene, mme ba nna le seabe mo kobamelong ya boammaaruri, mme gone jaanong ba sa tlhole ba mo direla. Melaetsa e Jehofa a ileng a e romela ka baporofeti ba ba 12 e bontsha gore o ne a iketleeditse go tlhomogela pelo batho ba ba neng ba kile ba bo ba le mo gare ga batho ba gagwe mme ba se ka ba tswelela pele mo kobamelong ya boammaaruri. Jehofa o ikutlwa jalo le gompieno, le fa batho bano ba ka tswa ba katogetse go sele, ba katogetse kgakala, kgotsa ba wetse mo boleong mme ba tlhoka go ikwatlhaya. (Bahebera 2:1; 3:12) Le fa ba ka tswa ba sa itumelele go katogana le Jehofa, ba ka nna ba bona go le thata go boa. Modimo o ikuela mo go bone, jaaka mo mafokong ano a moporofeti wa gagwe: “Jehofa wa masomosomo o buile jaana: ‘Boelang mo go nna,’ go bua Jehofa wa masomosomo, ‘mme ke tla boela mo go lona.’” (Sekarea 1:3) A bo mafoko a ga Hosea a kgothatsa jang ne! A re: “A ko o boele mo go Jehofa Modimo wa gago, wena Iseraele, gonne o ne wa kgopiwa mo tlolong ya gago. Itseeleng mafoko mme lo boele mo go Jehofa. Lona lotlhe, mo reyeng lo re, ‘E kete o ka itshwarela tlolo; mme o amogele se se molemo.’” Ee, tota le batho ba ba dirileng maleo a a masisi mme ba bo ba boela mo Modimong ba ikwatlhaya ka mmatota, ba ka itshwarelwa mme ba kgona go boela ka botlalo mo seemong sa bone sa pele. (Hosea 6:1; 14:1, 2; Pesalema 103:8-10) Go ne go ntse jalo mo metlheng ya baporofeti, mme go ntse jalo le gompieno.

13. Re na le mabaka afe a go bontsha bopelotlhomogi mo bathong ba Modimo a ba itshwaretseng?

¹³ Mme seo se kayang ka Bakeresete ba ba ntseng ba le mo tseleng e e isang botshelong? Rona re ka bontsha jang gore re leba batho ka tsela e Jehofa a ba lebang ka yone? Jehofa o lebeletse gore re bontshe bopelotlhomogi, mo bathong ba ba simololang go mo direla, mmogo le mo go ba ba ka tswang ba tlogetse go mo direla. Modimo o ne a dirisa Hosea go bolela se a ratang re se dira: “Ke natefeletswe ke bopelonomi jwa lorato, mme e seng ke setlhabelo.” Jesu Keresete o ne a dirisa mafoko a a tsamaisanang le ao fa a ne a re: “Tsamayang, mme lo ithute gore seno se rayang, ‘Ke batla kutlwelobotlhoko, e seng setlhabelo.’” (Hosea 6:6; Mathaio 9:13) Fa re batla go nna re na le kamano e e molemo le Modimo, go botlhokwa thata gore re bontshe bopelotlhomogi jo bo ntseng jalo. Ela tlhoko kafa moaposetoloi Paulo a ileng a amanya ka teng go itshwarela le go etsa Modimo: “Nnang pelonomi mongwe go yo mongwe, lo le pelotlhomogi ka bonolo, lo itshwarelana lo gololesegile fela jaaka Modimo le ene a ne a lo itshwarela ka Keresete a gololesegile. Jalo, nnang baetsi ba Modimo, jaaka bana ba ba rategang, lo bo lo tswelele lo tsamaya mo loratong.” (Baefeso 4:32–5:2) O kgona go etsa Modimo go le kana kang mo ntlheng eno?

14, 15. Tsela e re ikutlwang ka yone ka boitshwarelo jwa ga Jehofa e ka lekwa mo maemong afe?

¹⁴ Go tweng fa mokaulengwe mongwe a ile a dira boleo jo bo masisi e bile a sa ikwatlhaye mme a tshwanelwa ke go ntshiwa mo phuthegong? Go ne go a tle go direge jalo mo lekgolong la ntlha la dingwaga; Bakeresete ba ba neng ba fetoga baleofi ba ba sa ikwatlhayeng ba ne ba tshwanelwa ke go kgaolwa. Fa seo se ne se direga fa baaposetoloi ba ga Jesu ba ne ba sa ntse ba le teng, ga go gakgamatse go bo go tle go direge le gompieno. Fa seo se direga, ba ba ikanyegang mo phuthegong ba dirisa kaelo ya Baebele ya gore ba se ka ba dirisana le motho yo o kgaotsweng. Go ikanyega ga bone mo go Jehofa go ka thusa motho yo o dirileng phoso go bona kafa se a se dirang se leng masisi ka teng, mme a ka nna a tlhotlheletsega go ikwatlhaya. Fa re bala mo Baebeleng re utlwa gore monna mongwe kwa Korintha yo o neng a kgaotswe o ne a ikwatlhaya moragonyana, a sokologa mme a busediwa. (1 Bakorintha 5:11-13; 2 Bakorintha 2:5-8) Fa seo se direga gompieno, o ikutlwa jang, mme o ka bontsha jang gore o kgatlhegela gore ba bangwe ba bone botshelo?

¹⁵ Modiraphoso yo o ikwatlhayang a ka tswa a tlhabiwa ke ditlhong e bile a tlaletswe, a tlhoka go tlhomamisediwa gore Modimo le bakaulengwe ba gagwe ba a mo rata e bile ba batla gore a bone botshelo. Bona kafa Modimo a ileng a tlhomamisetsa batho ba gagwe ba bogologolo ka bonolo ka teng, ba ba neng ba batla go ikwatlhaya: “Ke tla go beelela ka boikanyegi; mme ruri o tla itse Jehofa.” (Hosea 2:20) E re ka Modimo a ikutlwa jalo, re tshwanetse ra bontsha gore re ikutlwa jaaka ene, jaaka Sekarea a ne a mo tlhalosa a re ke Modimo yo o ‘bontshang kutlwelobotlhoko.’—Sekarea 10:6.

16. Re tshwanetse go itshwara jang fa mongwe a busediwa?

¹⁶ Modimo o batla gore batho ba bone botshelo, ka jalo o a itumela fa moleofi a ikwatlhaya kgotsa motho yo o kileng a bo a tsidifetse a boa a tlhagafala gape.a (Luke 5:32) Mo kgannyeng ya motho wa kwa Korintha yo o neng a busediwa yo o umakilweng fa godimo, Paulo o ne a kgothatsa phuthego go mo itshwarela le go mo kgothatsa, go mmontsha gore tota ba a mo rata: “Go kgalema mono mo go newang ke bontsi go lekane motho yo o ntseng jalo, mo e leng gore, . . . lo tshwanetse go mo itshwarela ka bopelonomi lo bo lo mo gomotse, gore ka tsela nngwe motho yo o ntseng jalo a tle a se ka a komediwa ke go utlwa botlhoko thata ga gagwe. Jalo ke lo rotloetsa gore lo mo tlhomamisetse lorato lwa lona.” (2 Bakorintha 2:6-8) Gopola gore Hosea o ne a nopola Jehofa a bolela jaana ka batho ba pele e neng e le baleofi: “Ke tla fodisa go sa ikanyegeng ga bone. Ke tla ba rata ka go rata ga me.” (Hosea 14:4) A re tla etsa Jehofa, re itumelela go nna le seabe mo phodisong e e ntseng jalo le mo botshelong jo bo sa khutleng jo bo ka e lereng?

17, 18. Re ka thusa jang ka lorato batho ba ba boetseng mo go Jehofa kgotsa ba lelapa la mongwe yo o kgaotsweng?

¹⁷ Jehofa o bontsha sentle gore batho ba ba boang, o ba tshwara ka seriti, o ba amogela gape gore a ba rate ka lorato lo logolo, fela jaaka Hosea a ne a amogela gape mosadi wa gagwe yo o kileng a bo a sa ikanyege. Jehofa o bolela jaana ka tsela e a neng a tshwara batlhanka ba gagwe ka yone: “Ke ne ka nna jaaka ba ba tsholetsang jokwe e e mo ditlhaeng tsa bone, mme ka bonolo ke ne ka tlisetsa mongwe le mongwe wa bone dijo.” (Hosea 11:4) Jehofa o bontsha batho bano ba ba boelang kwa go ene lorato ka tsela e e itumedisang tota! Re ka mo etsa ka gore re se ka ra nna tsididi fela kgotsa ra tlhoka botsalano mo mothong yo o bontshitseng go utlwa botlhoko ka tsela e e siameng a bo a ikwatlhaya ka mmatota. Fa a sena go busediwa mo phuthegong, mo boemong jwa go mo kgotswela kgotsa go boloka sekgopi ka ntlha ya diphoso tse a di dirileng, re tshwanetse ra bua le ene ka go mo gomotsa nako le nako fa go tlhokega.—1 Bathesalonika 5:14.

¹⁸ A o ka akanya ka ditsela tse dingwe tse o ka etsang Jehofa ka tsone fa go na le mongwe yo o kgaotsweng mo phuthegong? Fa mongwe a kgaotswe, a re ka thusa batho ba ba ikanyegang ba lelapa la gagwe, gongwe molekane wa gagwe wa lenyalo le bana? Ba ka tswa ba ketefalelwa ke go nna gone ka metlha mo dipokanong le mo tshimong. A re tla ba ema nokeng ka tsela e e kgethegileng e ba e tlhokang? Tsela e nngwe e re ka bontshang bopelotlhomogi jo bo lorato ka yone ke ka go dirisa “mafoko a a molemo, mafoko a a gomotsang,” re simolola metlotlo e e kgothatsang le batho bao ba ba ikanyegang. (Sekarea 1:13) Go na le ditshono tse dintsi tsa go dira seo pele le morago ga dipokano, fa re na le bone kwa tshimong le ka dinako tse dingwe. Ke badirimmogo le rona, maloko a a rategang a phuthego ya rona a a sa tshwanelang go ikutlwa a sa ratege kgotsa a kgaphetswe kwa thoko. Ka dinako tse dingwe, ke bana fela ba motsadi yo o kgaotsweng ba ba lekang go direla Jehofa. Ruri re batla gore ba bone botshelo. Re ka bontsha seo jang?

‘MOSIMANE YO O SE NANG RRE O BONTSHIWA KUTLWELOBOTLHOKO’

19. Sefania o ne a thusa jang mongwe yo go ka tweng ke “mosimane yo o se nang rre” a mo thusa mo dilong tsa semoya?

¹⁹ Fa o sekaseka bodiredi jwa ga Sefania, yo o neng a direla mo bogareng jwa lekgolo la bosupa la dingwaga B.C.E., o ka bona sekai sa tsela nngwe ya go thusa ba bangwe. Sefania e ka tswa e ne e le wa lelapa la segosi la Juda, gongwe e le losika le Kgosi Josia. Batho ba ne ba bolaya rraagwe Josia, mme ka jalo Josia a tshwanelwa ke go nna kgosi a na le dingwaga di le robedi. O ne a lebane le namane e tona ya tiro: Setšhaba se ne se tsene ka tlhogo mo kobamelong ya medingwana le mo mekgweng e e makgapha. (Sefania 3:1-7) Josia yo mmotlana, yo o se nang rre, o ne a tlhoka kaelo ya mongwe yo o setswerere le kgakololo e e ikanyegang gore a kgone go busa setšhaba seo se se tsuologang. Jehofa o ne a dirisa Sefania le baporofeti ba bangwe go mo naya kgakololo e e botlhale, jaaka go bontshitswe mo dikgaolong tse di fetileng tsa buka eno. Ela tlhoko gore le fa Jehofa a ne a dirisa moporofeti wa gagwe go bua kgatlhanong le “dikgosana” tsa Juda, Jehofa ga a ka a tshwaya kgosi phoso. (Sefania 1:8; 3:3) Seno se ka bontsha gore Kgosi Josia yo mmotlana o ne a setse a bontshitse gore o rata kobamelo e e itshekileng. Kwantle ga pelaelo, kgakololo ya moporofeti yono e ne ya thusa Josia go nonotsha boikaelelo jwa gagwe jwa go fedisa kobamelo e e itshekologileng mo Juda.

20. Go thusa bana ba ba “se nang rre” mo phuthegong ka go ba kaela semoyeng go ka ba thusa jang?

²⁰ Tsela e Sefania a neng a kgatlhegela Josia ka yone e re bontsha kafa Jehofa a kgatlhegelang ka teng basha ba ba tlhokang tlhokomelo, ba ba ka se itireleng sepe, jaaka bana ba gongwe motsadi wa bone a kgaotsweng. Hosea o ne a bolela jaana: “Ke wena [Modimo] o bontshang mosimane yo o se nang rre kutlwelobotlhoko.” (Hosea 14:3) A o itse ka basimane le basetsana bape ba bangwe ba ba “se nang rre” ba ba tlhokang go thusiwa mo dilong tsa semoya le mo go tse dingwe tsa botshelo? E ka tswa e le masiela a semoya, bana ba malapa a motsadi a le mongwe fela kgotsa basha ba ba direlang Jehofa ba sa engwa nokeng ke ba malapa a bone. Go le gantsi, selekanyo se batho bano ba nnang ba le gaufi le phuthego ka sone ba bo ba gole semoyeng se laolwa ke gore a ba na le motlhokomedi mo dilong tsa semoya kgotsa nnyaa. ‘Basimane ba ba se nang rre’ ba le bantsi ba ile ba gatela pele ba nna bagolo ba ba lebang dilo ka tsela ya semoya morago ga go bontshiwa lorato ke Bakeresete ba ba godileng mo phuthegong.—Pesalema 82:3.

21. Bakeresete ba ba godileng ba ka thusa basha jang?

²¹ Ka sekai, mmè yo o se nang molekane a ka thusiwa ka gore Bakeresete ba ba godileng ba bontshe go kgatlhegela bana ba gagwe. (Jakobe 1:27) Balebedi le ba bangwe mo phuthegong ba ka thusa malapa a a tlhokang go tlhokomelwa, ba ba thusa ka dilo tsa semoya, mme ba ntse ba le kelotlhoko gore ba tlotle botlhogo ba bo ba itshware ka tsela e e tlotlegang le e e tshwanetseng. Gongwe wena le molekane wa gago kgotsa lelapa la gago lo ka ipha nako ya go nna le mosimane kgotsa mosetsana yo o se nang rre. A o ka bontsha go amega ka basha ba ba ka tswang ba jewa ke bodutu? Ba ka tswa ba tlhoka mongwe yo o ka ba utlwelang botlhoko le yo ba ka mmulelang mafatlha, mme o ka ipha nako ya go ba reetsa fa o dira le bone mo bodireding jwa tshimo. Kwantle ga pelaelo o na le dilo tse dintsi tse o tlhokang go di dira, ka jalo go naya mosha thuso e e ntseng jalo ka metlha ka lobaka lo lo rileng go ka ‘leka bommatota jwa lorato lwa gago.’ (2 Bakorintha 8:8) Maiteko a o a dirang a tla bontsha gore o eletsa gore ba bangwe ba bone botshelo.

22. O akanyang ka tsela e Jehofa a kgatlhegelang ka yone gore batho ba bangwe ba bone botshelo?

²² A bo go kgothatsa jang ne go akanya kafa Modimo a kgatlhegelang batho ka teng, kafa a batlang gore ba bone botshelo jo bo sa khutleng ka teng! A ka mpa a bontsha lorato lwa gagwe mo bathong ba ba siameng ba ba mo ratang a bo a ba naya botshelo go na le go bontsha kafa a sa amogeleng ka teng ba ba sa batleng go fetoga mme ka jalo ba sa tshwanelwe ke botshelo jo bo sa khutleng. Fa re ntse re emetse letsatsi la ga Jehofa ka tlhoafalo, a re mo etseng ka go thusa ba bangwe gore ba tsene mo tseleng e e isang botshelong.

[Ntlha e e kwa tlase]

A O LEMOGILE NTLHA?

• O ka solegelwa molemo jang ke go sekaseka boikutlo jwa gago ka namana malebana le boutlwelobotlhoko le bopelotlhomogi?—Jona 4:1, 10, 11.

• Bopelotlhomogi le tshiamiso ya ga Jehofa di dirisana mmogo jang?—Hosea 2:19; Mika 7:9.

• Kgang ya Baninife e bontsha dikarolo dife tsa boitshwarelo jwa ga Jehofa?—Jona 3:5, 9, 10; 4:2.

O KA SOLEGELWA MOLEMO JANG?

• Batho ba ba dirileng maleo a a masisi ba ka solegelwa molemo jang ke bopelotlhomogi jwa Modimo?—Hosea 3:3; 4:2; 14:4.

• Dingwe tsa ditsela tse o ka bontshang bopelonomi jo bo lorato mo phuthegong ka tsone ke dife?—Hosea 11:4; Sekarea 1:13.

• Ke ka ntlha yang fa go le botlhokwa go nna pelotlhomogi fa o thusa ba ba tlhokang thuso?—Sefania 3:16, 17.

[Lebokoso mo go tsebe 141]

BA NE BA ITHAOPA

Baporofeti ba ba 12 e ne e le dikai tse di molemo tsa batho ba ba amegang ka matshelo a batho ba bangwe. Le fa ba ne ba tshwanelwa ke go itima dilo dingwe, ba lebana le dikotsi le matshosetsi, ba ne ba isa melaetsa ya bone ka boikanyegi gore batho ba Modimo le ba bangwe ba solegelwe molemo. Mo karolong e e ntseng e gola ya mo lefatsheng ya phuthego ya Modimo, go ntse go ya go tlhokega banna ba ba godileng ba ba iketleeditseng go direla e le bagolwane le batlhanka ba bodiredi mo diphuthegong lefatshe ka bophara. Gape go na le tlhokego e kgolo ya badiredi ba nako e e tletseng. A o ka etsa sekao sa baporofeti ka go ithaopa ka go rata, o dirisa bokgoni jwa gago go dira tiro ya Modimo mo teng ga phuthego le kwantle ga yone? Eo ke nngwe ya ditsela tse di molemo thata tse re ka etsang Jehofa ka tsone gore ba bangwe ba tle ba bone botshelo.

[Setshwantsho mo go tsebe 143]

Ka dinako tse dingwe tota le batlhanka ba Modimo ba ka nna ba se ka ba lemoga kafa a leng pelotlhomogi ka teng

[Setshwantsho mo go tsebe 146]

O ka thusa jang Bakeresete ba ba kileng ba bo ba tlhoafetse gore ba boele mo go Jehofa?

[Setshwantsho mo go tsebe 151]

A o ka nna motlhokomedi yo o lorato wa semoya mo basheng ba ba “se nang rre”?