Jehofa o Romela Jeremia Go ya Go Rera

Jehofa o ne a tlhopha Jeremia gore a ise molaetsa wa gagwe kwa bathong ba Juda. O ne a re a bolelele batho bao gore ba tlogele go dira dilo tse di sa siamang. Jeremia o ne a raya Jehofa a re: ‘Ke mosimanyana fela. Ga ke itse gore ke a go raya batho bano ke reng.’ Jehofa o ne a mo raya a re: ‘Se boife. Ke tla go bolelela gore o ba reye o reng. Ke tla go thusa.’

Jehofa o ne a laela Jeremia gore a phuthe bagolwane ba Iseraele, a thube nkgo ya mmopa fa pele ga bone mme a ba reye a re: ‘Eno ke tsela e Jerusalema e tla thubiwang ka yone.’ Fa Jeremia a dira se Jehofa a mo laetseng sone, banna ba bagolo ba ne ba galefa thata. Moperesiti yo o bidiwang Pashure o ne a itaya Jeremia a bo a golega matsogo le maoto a gagwe ka dipolanka. Jeremia o ne a fetsa bosigo jotlhe a sa kgone go suta. Mo letsatsing le le latelang Pashure o ne a mo golola. Jeremia o ne a re: ‘Ke utlwile jaanong. Nka se tlhole ke bua ka molaetsa ono.’ A mme o ile a tlogela? Nnyaa. Fa Jeremia a akanya gape ka kgang eno, o ne a re: ‘Molaetsa wa ga Jehofa o tshwana le molelo mo teng ga me. Nka se kgone go emisa go bua ka one.’ Jeremia o ne a tswelela ka tiro ya gagwe.

Fa dingwaga di ntse di ya, go ne ga nna le kgosi e ntšha kwa Juda. Baperesiti le baporofeti ba maaka ba ne ba tlhoile molaetsa wa ga Jeremia. Ba ne ba raya dikgosana ba re: ‘Monna yono o tshwanetse go swa.’ Jeremia o ne a re: ‘Fa lo mpolaya, lo tla bo lo bolaya motho yo o se nang molato. Ke bua molaetsa wa ga Jehofa e seng wa me.’ Fa dikgosana di utlwa seo, di ne tsa re: ‘Monna yono ga a tshwanela go swa.’

Jeremia o ne a tswelela ka go rera mme seo se ne sa galefisa dikgosana. Di ne tsa kopa kgosi gore e bolaye Jeremia. Kgosi e ne ya ba bolelela gore ba dire sengwe le sengwe se ba se batlang ka Jeremia. Ba ne ba latlhela Jeremia mo khuting e e tletseng seretse ba akanya gore o tla swela teng. Jeremia o ne a simolola go nwela mo seretseng.that he would die there. Jeremiah began to sink into the mud.

Modiredi mongwe wa kgosi e bong Ebede-meleke o ne a raya kgosi a re: ‘Dikgosana di latlhetse Jeremia mo khuting! Fa re sa mo ntshe o tlile go swa.’ Kgosi e ne ya laela Ebede-meleke gore a tseye banna ba le 30 mme ba ye go ntsha Jeremia mo khuting eo. Le rona re ka dira se Jeremia a se dirileng ka go se letle sepe se re thibela go rera molaetsa wa Modimo.