A O Tshwenyega Ka Bana Ba Gago?
RURI o tshwenyega ka bone! Malwetsi, tiriso e e sa tshwanelang ya diokobatsi, le boganana ke a le mararo a mathata a o itseng gore a tsenya bana ba gago mo kotsing. Ke ga tlholego gore batsadi ba amege ka bana ba bone—le eleng go tshwenyega ka bone.
Ke ka moo batsadi ba bantsi ba ileng ba ikutlwa ka gone go ralala hisitori, jaaka Bibela e bontsha. Gakologelwa gore Jakobe o ne a roma Josefa go tlhola bomogolowe ka gore Jakobe o ne a amega ka ga bone. (Genesise 37:13, 14) Jobe, le ene, o ne a tshwenyega, lemororo bomorwawe ba ne ba godile ebile ba na le malapa a bone. O ne a akanya: “Goñwe bomorwaake ba bo ba leohile, me ba itatotsè Modimo mo peduñ tsa bōnè.”—Yobe 1:4, 5.
Ka ntlha yang, le eleng Josefa le Maria ba ne ba amega ka morwa wa bone yo o itekanetseng Jesu! Tota, ka nako nngwe fa Jesu a ne a le dingwaga di le 12, ba ne ba tshwenyega thata thata ka ga gagwe, ka gore ba ne ba sa mmone. Lefa go le jalo, ngwana wa bone Jesu e ne e le mpho mo go bone, mme ba ne ba sena lebaka lepe la go ikotlhaya. A re bone se tota se ileng sa diragala mo nakong eo ya kgakologelo mme re tlhokomele dithuto tse batsadi ba gompieno ba ka di ithutang mo go sone.
Morwa yo o Timetseng
Fa o le motsadi, ruri o ka utlwela Maria botlhoko fa ka go omana a ne a raya Jesu a re: “Morwaaka, ke eng fa o re dirile jaana? Rraago le nna re ntse re leka go go batla ka kutlo-botlhoko.” Josefa le Maria ba ne ba kgaogane le Jesu ka malatsi a mararo. O ka lemoga gore ke eng ba ne ba tshwenyegile gore mosimane yoo wa dingwaga di 12 o kae.—Luke 2:48, Today’s English Version.
Ke eng fa Josefa le Maria ba ne ba latlhegelwa ke Jesu? Moakgedi yo o itsegeng thata o ne a ba kgala ka ntlha ya seno, a kwala jaana: “Ka go itse gore ba na le letlotlo le le kalo-kalo ke eng fa ba ne ba ka nna lobaka lo lo kalo kwantle ga go le batla? Maikutlo a a boteng a kamego a ga mme a ne a le kae?” Mme tota, jaaka re tlaa bona, tlhotlhomiso e e oketsegileng ya pego e tlhatswa Josefa le Maria mo go bonweng molato mo go masisi.
Lebaka ke gore Bibela e supa gore Maria e ne e le mosadi yo o molemo le mme yo o siameng. Moengele Gabariele, fa a ne a tla go bolelela pele botsalo jwa ga Jesu, o ne a re o ne a “Bonye lesegō mo Modimoñ.” (Luke 1:28, 30) O ile a amogela kabelo ka go rata go tshola ngwana-monna yo o kgethegileng yono gammogo le boikarabelo jo bo boima jwa go mo godisa le go mo ruta. E ne e le mosadi yo o boikobo ebile a na le tumelo e e nonofileng mo Modimong. Morago ga botsalo jwa ga Jesu, o ne a dira sengwe le sengwe se se tlhokwang ke molao wa ga Jehofa, “Yaka go kwadilwe.”—Luke 1:38, 45-48; 2:21-23, 39.
Josefa, monna yo o neng a nyala Maria mme a nna rragwe ngwana yo a mo tsaletsweng Jesu, o ne a le molemo, e le monna yo o siameng yo o neng a nna le puisanyo le moengele wa ga Jehofa mo mabakeng a le mane. (Mathaio 1:19, 20; 2:13, 19, 22) Gakologelwa, Jehofa o ne a tlhopha Josefa le Maria go rua morwawe yo o tsetsweng a le esi, yo o botlhokwa-tlhokwa. A Modimo o ne a ka dira se sele go na le go tlhopha banyalani ba ba neng ba ka dira sentle mo go thuseng morwa yono go golela mo botlhaleng jwa bomodimo?
Legale, batsadi gompieno ba ka nna ba bo ba tshwenyega ka bana ba bone ka ntlha ya tikologo e e kotsi le e e tletseng boganana eo ba nnang mo go yone. Gape ba itse gore bana ba bone ga ba a itekanela jaaka Jesu. Mme, re santse re ka solegelwa molemo ke sekao sa ga Josefa, Maria, le Jesu.