Go Thusa Ngwana go Golela mo Botlhaleng jwa Bomodimo

BATHO ba ba akanyang ba merafe e mentsi le ditso ba dumela gore Jesu e ne e le morutisi yo o gakgamatsang le motho yo o tlotlang botho. A mme dilo dingwe mo go rutiweng ga gagwe ga bonana di tlatseletsa mo go seno? Ke dithuto dife tse batsadi ba gompieno ba ka di ithutang mo botshelong jwa lelapa la ga gabo le go godisiwa ga gagwe?

Bibela e re bolelela go le gonnye thata ka bonana jwa ga Jesu. Tota-tota, dingwaga tsa gagwe tsa ntlha tse 12 di sobokanngwa mo ditemaneng di le pedi: “Me ea re [Josefa le Maria] ba sena go diha dilō cotlhe kaha molaoñ oa Morèna, ba boèla kwa Galilea, kwa Nasaretha motse oa bōnè. Me ñwana a gola, a nonoha, a tlala botlhale: le tshegōhaco ea Modimo ea nna mo go èna.” (Luke 2:39, 40) Mme go na le dithuto fano mo batsading go di ithuta.

Ngwana yo monnye “a gola, a nonoha.” Jalo he, batsadi ba gagwe ba ne ba mo tlhokomela mo mmeleng. Gape, o ne a tswelela a “tlala botlhale.”a E ne e le boikarabelo jwa ga mang go mo ruta kitso le tlhaloganyo tse di neng di tlaa nna motheo wa botlhale joo?

Go ya ka Molao wa ga Moshe, batsadi ba gagwe ba ne ba lebaganwe ke tiro eo. Molao o ne o laola batsadi ba Baiseraele jaana: “Me mahoko a ke a gu laolèlañ gompiyeno, a a nnè mo peduñ ea gago: Me u a rutè bana ba gago ka tlhōahalō, u buè kaga aōna ha u dutsè mo tluñ ea gago, le ha u tsamaea mo tseleñ, le ha u rapame, leha u rapamologa.” (Duteronome 6:6, 7) Lebaka la go bo Jesu a ne a tswelela go “tlala botlhale,” le gore gape “tshegōhaco ea Modimo ea nna mo go èna,” le bontsha gore Josefa le Maria ba ne ba utlwa taolo eno.

Bangwe ba ka akanya gore ereka Jesu e ne e le ngwana yo o itekanetseng, go godisiwa ga gagwe ga go neele kaelo ya boammaaruri ya go godisiwa ga bana ba bangwe. Lefa go ntse jalo, Josefa le Maria ba ne ba sa itekanela. Lefa go le jalo, go bonala ba ne ba tswelela go neelana ka ditlhokafalo tsa gagwe tsa sebele le tsa semoya, mme ba ne ba dira seno go sa kgathalesege mathata a lelapa le le golang. (Mathaio 13:55, 56) Gape, Jesu, lemororo a ne a itekanetse, o ne a ntse a tshwanetse go gola go tswa mo boseeng go tsena mo bonyaneng le mo bokaung go fitlha mo bogoding. Go ne go na le tiro e ntsi ya go ruta e batsadi ba gagwe ba neng ba na le go e dira, mme go bonala gore ba ne ba e dira ka botswerere.

Jesu a le Dingwaga di le 12

“Me yana, batsadi ba gagwè, ba ne ba tle ba ee Yerusalema ka dinyaga cotlhe, ba ea modihoñ oa Tlolaganyō.” (Luke 2:41) Go ya ka Molao wa Modimo, lonna lotlhe lo ne lo tshwanetse go ya meletlong kwa Jerusalema. (Duteronome 16:16) Mme pego ya re: “Batsadi ba gagwè, ba ne ba tle ba ee.” Josefa o ne a tsaya Maria, gongwe le lelapa lotlhe, mo mosepeleng oo wa dikhilometara di le 100 go ya motlheng wa boitumelo kwa Jerusalema. (Duteronome 16:6, 11) E ne e le mokgwa wa bone​—karolo ya ka metlha ya matshelo a bone. Gape, ba ne ba sa ye go itshupa fela ba bo ba bowa; ba ne ba nna malatsi otlhe a moletlo.​—Luke 2:42, 43.

Seno se neela thuto e e molemo go batsadi gompieno. Meletlo eno ya ngwaga le ngwaga kwa Jerusalema e ne e le dinako tsa pokano e e masisi gammogo le go ipela. (Lefitiko 23:4, 36) Di ne di neela Josefa, Maria, le Jesu yo mmotlana boitemogelo jwa kgolo ya semoya. Gompieno, batsadi ba dira sentle ka go batlela bana ba bone ba babotlana dipaka tse di ntseng jalo go nna le phetogo e e itumedisang gammogo le go ipelela kgolo ya semoya. Batsadi ba Basupi ba ga Jehofa ba dira seno ka go isa bana ba bone kwa dipokanong tse dinnye le tse dikgolo tse di tshwarwang ka metlha mo ngwageng. Ka gone, bana ba ka nna ba nna le boitemogelo jo bo itumedisang jwa mosepele le go nna le gone go nna gareng ga makgolo kana dikete tsa badumedi-ka-bone mo malatsing a sekae. Rrè yo o neng a atlega mo go godiseng bana ba le lesome o lebisa bogolo jwa katlego ya gagwe mo lebakeng la gore ga a ise a tlolwe ke thulaganyo epe ya kopano fa e sale a kolobediwa jaaka Mokeresete dingwaga di le 45 tse di fetileng. Mme o ile a kgothaletsa lelapa la gagwe gore le seka la tlolwa ke epe.

Tlhokomologo

Fa Jesu a santse a le monnye, kwantle ga pelaelo o ne a nna a atamalane le batsadi ba gagwe mo maetong ano a ngwaga le ngwaga go ya kwa motse-mogolong ono wa Jerusalema. Lefa go ntse jalo, jaaka a gola o tshwanetse a bo a ile a neelwa kgololesego e e oketsegileng. Fa a ne a le dingwaga tse 12, o ne a ka nna mo ngwageng eo Bajuda ba e lebang jaaka e e botlhokwa mo go goleng go nna monna. Gongwe ka ntlha ya phetogo eno ya tlholego le e e tlwaelegileng, tlhokomologo e ne ya nna gone fa nako e ne e tlile ya gore lelapa la ga Josefa le tlogele Jerusalema le boela gae. Pego e balega jaana: “Me ea re ba sena go shwetsa malatsi, me ba boea, mosimane Yesu a sala mo Yerusalema, me batsadi ba gagwè ba bo ba sa itse. Me bōnè, ea re ka ba gopotse, go re, o mo lekokoñ ya bōnè, ba tsamaea hèla ka letsatsi le le leñwe hèla; me ba mmatla mo go ba ga bōnè, le mo go ba ba itsanyeñ nabō.”​—Luke 2:43, 44.

Go na le dipopego tsa tiragalo eno tseo batsadi gammogo le bana ba tla di lemogang. Lefa go ntse jalo, go na le pharologanyo e le nngwe fela: Jesu o ne a itekanetse. Ereka a ne a ikobela Josefa le Maria, re ka seke re akanye gore o ne a seka a utlwa thulaganyo nngwe e e neng e dirilwe le ene. (Luke 2:52) Ga go bonale le eseng gore go ka tswa go ne ga nna le go sa buisanye. Batsadi ba ne ba itlhoma gore Jesu o ne a le mo lesomong la ba-masika le ba ba itsanyeng le bone. (Luke 2:44) Go motlhofo go akanya jalo, mo khuduegong ya go tloga mo Jerusalema, ba ne ba tla a neela tlhokomelo e kgolo ya bone mo baneng ba ba nnyennyane mme ba bo ba itlhoma gore morwa wa bone yo mogolo, Jesu le ene, o ne a tla.

Lefa go ntse jalo, go bonala gore Jesu o ne a akanya gore batsadi ba gagwe ba ne ba tla a itse kwa a neng a le teng. Seno se akantshiwa ke phetolo ya gagwe ya moragonyana: “Lo no lo mpatlèlañ? A lo no lo sa itse ha ke chwanetse go nna mo go tse e leñ tsa ga Rrè?” O ne a sa supe go tlhoka maitseo. Mafoko a gagwe a ne fela a bontsha kgakgamalo ya gagwe ka ntlha ya gore batsadi ba gagwe ba ne ba sa itse kwa ba neng ba ka mmona teng. E ne e le tiragalo ya mofuta wa tlhoka-kutlwisiso eo batsadi ba le bantsi ba bana ba ba golang ba ka e tlhaloganyang.​—Luke 2:49.

Akanya ka kamego ya ga Josefa le Maria kwa bokhutlong jwa letsatsi leo la ntlha, fa ba lemoga gore Jesu o ne a seyo. Mme o akanye ka go tshwenyega ga bone mo go neng go gola ka gone mo malatsing a mabedi a ba neng “ba mmatla mo Jerusalema. Lefa go ntse jalo, go ile ga felela ka gore go ruta ga bone Jesu go felele ka bothata jono. Jesu o ne a sa itsalanya le batho ba ba bosula. O ne a sa tlhabise batsadi ba gagwe ditlhong. Fa ba bona Jesu, o ne a le “mo tempeleñ, a dutse ha gare ga baruti, a ba utlwa, a ba a ba botsa dipocō. Me botlhe ba ba mo utlwañ ba gakgamadiwa ke tlhaloganyō ea gagwè, le diphetolo tsa gagwe.”​—Luke 2:46, 47.

Lebaka la go bo a ne a dirisa nako ya gagwe ka tsela e e ntseng jalo, le go utlwisisa sentle melao-metheo ya Dikwalo ga gagwe, le gone go bolela bontle go mo ruta ga ga Josefa le Maria go fitlha mo seemong seo. Lefa go le jalo, boitshwaro jwa ga Maria bo lebega jaaka jwa mme yo o tshwenyegileng: La ntlha go ne go lapolosa, go bona morwa wa gagwe a tshela; go tloga foo ka go bontsha maikutlo a gagwe a go tshwenyega le bohutsana: “Morwaaka, u nu u re dihèlèlañ yalo? Bōna, rrago le nna re gu batlile ka bohutsana.” (Luke 2:48) Ga se mo go sa solofelwang go bo Maria a ne a bua fa pele ga ga Josefa go bontsha kamego ya batsadi boo-babedi. Bontsi jwa ba banana ba ba balang pego e ba ka nna ba re: “Go tshwana fela le mme!”

Dithuto tse di Ithutilweng

Ke dithuto dife tse re ka di ithutang mo boitemogelong jono? Ba banana ba na le tlwaelo ya go itlhoma gore batsadi ba bone ba itse se ba se akanyang. Ba e tle ba utlwiwe ba re: “Ke ne ka akanya gore o ne o tla itse.” Batsadi, fa bana ba lona ba kile ba bua seno fa go ne go na le tlhoka-kutlwisiso nngwe, ga le bantlha go nna le bothata joo.

Fa bana ba tsena mo bokaung kana mo borobeng ba lomologana go le gonnye le batsadi ba bone. Phetogo eno ke ya tlholego, mme batsadi ba tshwanetse go dira dipaakanyo tsa go e ipaakanyetsa. Lefa go le jalo, le eleng mo thutong e e molemo, ditlhoka-kutlwisiso di tlaa tsoga mme batsadi ba tla nna le matshwenyego. Lefa go ntse jalo, fa ba latela sekao se se molemo sa ga Josefa le Maria, fa mathata a tsoga, thuto e e neelwang bana ba bone e tla nna le mosola.

Go bonala gore batsadi ba ga Jesu ba ne ba tswelela go dira le ene mo dingwageng tsa gagwe tsa bonana. Morago ga tiragalo e e sa tswang go tlhokomelwa, o ne a ‘ya le bone’ kwa motseng wa ga gabo mme “a nna a ba utlwa” ka go ba ikobela. Ka matswela afe? “Yesu a cwèlèla mo botlhaleñ le mo go goleñ, le mo go ratweñ ke Modimo le batho.” Ka gone tiragalo eno e ne ya nna le bokhutlo jo bo itumedisang. (Luke 2:51, 52) Batsadi ba ba latelang sekao sa ga Josefa le Maria, ba ba thusang bana ba bone go golela mo botlhaleng jwa bomodimo, ba ba neelanang ka moya o o siameng wa legae le go ba isa mo ditlhotlheletsong tse di molemo tsa bokopano jwa bomodimo, ba godisa kgonagalo ya gore sengwe se se tshwanang se tla diragalela bana ba bone. Bana ba go nna jalo ba ka nna ba ipelela botshelo jo bo itumedisang jaaka ba gola go nna bagolo ba Bakeresete ba ba nang le boikarabelo.

[Ntlha e e kwa tlase]