Botshelo le Bodihedi tsa ga Jesu

MORAGONYANA ga a sena go amogelwa mo legaeng la ga Simone, Jesu o simolola loeto lwa bobedi lwa thero mo Galilea. Mo loetong lwa gagwe lwa pele lwa tshimo e, o ne a na le barutwa ba gagwe ba ntlha, Petere, Anderea, Jakobe, le Johane. Mme jaanong baaposetoloi ba ba 12 ba a mo pata, gammogo le basadi bangwe. Bano ba akareletsa Maria Magatalena, Susana, le Joana, yo monna wa gagwe a leng modiredi wa ga Kgosi Herode.

Jaaka go gola ga bodihedi jwa ga Jesu go anama, kgang-kgolo mabapi le tiro ya gagwe le yone e a gola. Monna yo o nang le moya wa badimo, yo gape a leng sefofu ebile a le semumu, o tlisiwa kwa go Jesu. Fa Jesu a mo hodisa, ka jalo a gololesegile mo taolong ya moya wa badimo mme a kgona go bua le go bona, bontsi bo akabala fela. Ba simolola gore: “Eo, a ke èna morwa Dafide?”

Bontsi bo phuthega ka palo e kgolo go dikologa ntlo e Jesu a nnang mo go yone mo eleng gore ene le barutwa ba gagwe ga ba kgone le eleng go ja. Kwantle ga bao ba akanyang gore gongwe ke “Morwa Dafide” yo o solofeditsweng, go na le bakwadi le Bafarasai bao ba neng ba tswa kwa Jerusalema bokgakaleng joo go tla go mo tlontlolola. Fa ba masika ba ga gabo Jesu ba utlwa ka kgaruru e e dikologileng Jesu, ba tla go mo tshwara. Ka lebaka lefe?

Mme kana, bomorwa-rraagwe Jesu ga ba ise ba dumele gore ke Morwa Modimo. Gape, modumo wa batho le dikgang tse a di tsositseng gotlhelele ga se ga ga Jesu yo ba neng ba mo itse fa a ne a gola mo Nasaretha. Ka gone ba dumela gore sengwe se senyegile mo tlhaloganyong ya ga Jesu. “Oa tsènwa,” ba ne ba fetsa jalo, mme ba batla go mo tshwara le go tsamaya ka ene.

Lefa go le jalo, bosupi bo phepafetse gore Jesu o hodisitse monna yo o nang le moya wa badimo. Bakwadi le Bafarasai ba itse gore ga ba ka ke ba latola bommatota jwa seno, gammogo le dikgakgamatso tse dingwe tsa ga Jesu. Ka jalo go tlontlolola Jesu ba bolelela batho jaana: “Monna eo ga a kgoromeletse badimo ntlè, ha e se ka Belesebube kgōsana ea badimo.”

Ka go itse go akanya ga bone, Jesu o biletsa bakwadi le Bafarasai kwa go ene mme a re: “Bogosi boñwe le boñwe yo bo ikgaogantseñ boa shwahala; le motse moñwe le moñwe leha e le ntlo e e ikgaogantseñ ga e kake ea èma: Me ha Satane a kgoromeletsa Satane ntlè, o tla bo a ikgaogantse; me bogosi yoa gagwè bo tla èma yañ?”

Abo e le botlhale jo bo fenyang jang ne! Ereka Bafarasai ba re batho ka bobone ba ile ba kgarameletsa badimona ntle, Jesu gape o a botsa: “Ha ke kgoromeletsa badimo ntlè ka Belesebube, ana bomorwa lona bōnè, ba ba kgoromeletsa ntlè ka mañ?” Ka mafoko a mangwe, go bona Jesu molato ga bone go tshwanetse ka mo go tshwanang ga dira le mo go bone jaaka go dira mo go ene. Go tloga foo Jesu wa tlhagisa: “Me e ka re ha ke kgoromeletsa badimo ntlè ka Mōea oa Modimo, e tla bo yalo Bogosi yoa Modimo bo tsile mo go lona.”

Go tshwantshetsa gore go kgoromeletsa badimo ntle ga gagwe ke sesupo sa maatla a gagwe mo godimo ga ga Satane, Jesu a re: “Kgotsa motho o ka tsèna yañ mo tluñ ea monna eo o thata, a thopa dilō tsa gagwè, ha a se ka a golèga monna eo o thata pele? ke gōna o ka thopañ ntlo ea gagwè. Eo o sa èmañ le nna o tlhabana le nna; le eo o sa phutheñ le nna oa halatsa.” Go phepafetse gore Bafarasai ba kgatlhanong le Jesu, ba itshupa ba le badiredi ba ga Satane. Ba halatsa Baiseraele go tswa mo go ene.

Ka ntlha ya gona moo, Jesu o tlhagisa baganetsi bano ba bosatane gore “tlhapaco e e tlhapatsañ Mōea ga e ketla e ichwarèlwa.” O a tlhalosa: “Leha e le mañ eo o tla buañ lehoko ye le nyatsañ Morwa Motho, o tla go ichwarèlwa; me leha e le mañ eo otla buañ lehoko ye le nyatsañ Mōea o o Boitshèpō, ga a ketla a go ichwarèlwa, leha e le mo lehatshiñ yeno, leha e le mo go ye le tlañ.” Bakwadi le Bafarasai bao ba dirile sebe seo se se senang boitshwarelo ka go kaela go Satane seo se bonalang sentle e le tiro ya dikgakgamatso ya moya o o boitshepo wa Modimo. Mathaio 12:22-32; Mareko 3:19-30; Yohane 7:5.

◆ Loeto lwa ga Jesu lwa bobedi la Galilea le farologana jang le lwantlha?

◆ Ke eng fa ba-losika ba gagabo Jesu ba leka go mo tshwara?

◆ Bafarasai ba leka jang go tlontlolola dikgakgamatso tsa ga Jesu, mme Jesu o ba ganetsa jang?

◆ Bafarasai bao ba na le molato wa eng, mme ka ntlha yang?