Isagwe ya Gago​—Tselae e Botoka ya Go Itse Kaga Yone

KA 1962 balepa-dinaledi ba India ba ne ba bolelela-pele kaga kodumedi ya lefatshe lotlhe “ka baka la go kopana mo go sa tlwaelegang ga dipolanete di roba-bobedi mo moleng wa Capricorn.” Lefa go ntse jalo, ga go a ka ga diragala sepe. Bosheng jaana, boaphelong jwa 1980, bontsi jwa balepa-dinaledi ba Fora ba ne ba akanya gore tautona wa Fora wa nako eo, Giscard d’Estaing, o ne a tla tlhophiwa gape labobedi. Mme moganetsi wa gagwe Francois Mitterrand, o ne a fenya ditlhopho. Go palelwa mo go tshwanang le mo go re lemotsha gore tepo-dinaledi ga e neele tsela epe e e tlhomamisegang ya go itse kaga isagwe.

A mme he go na le tsela e nngwe? Ka sekai, a maiteko a baitseanape a go bolelela-pele isagwe a ka go thusa? Mme kana, go na le polelelo-pele ke eno e e boleletsweng-pele ke McGraw Hill Institute (United States) ka 1970 kaga seo se neng se tla diragala ka 1980: “Diokobatsi tsa go fenya kankere, difofela-loaping tse di tsamaisiwang ke motho di fofela dipolaneteng tsa Mars le Venus, bonno jwa nako yotlhe kwa ngweding, dikoloi tse di tsamayang ka motlakase, dikhomputara tsa mo gae tsa sengwe le sengwe, kgonego ya go tlhopha bong jwa ngwana wa gago, le thelebishene kana dibaesekopo tse di bonalang sentle thata.”

Mo nakong e e fetileng ka 1970 baitseanape ba lekgotla lone le ba ne ba re: “Mokgwa ono [wa go bolelela-pele] o ikaeletse go kgona ponelo-pele e e ikanyegang e e dumalanweng ke botlhe ya setlhopha sa batlhalefi.” Mme dipolelelo-pele tsa batlhalefi bano di itshupile di le phoso mo maphateng ano le a mangwe a mantsi, jaaka mo dipolotiking le mo go tsa itsholelo.

Motswedi o o Tlhomamisegang wa Boikitsiso

Fa balepa-dinaledi le baitseanape ba ka se kgone go bonela-pele ka tlhomamisego seo se tla diragalang, a seo se raya gore ga go kake ga kgonega go bona boikitsiso jo bo ikanyegang kaga isagwe? Pele ga re itlhoboga, re tshwanetse go tlhatlhoba se Bibela e se bolelang mo kgannyeng eno. Gakologelwa gore Jehofa, Mokwadi wa Bibela, o tlhalosiwa jaaka ‘yo O bolelang bokhutlo e santse e le tshimologo, a bolele e sale bogologolo dilo tse di eseng di dirwe.’​—Isaia 46:10.

Lefoko la Modimo le na le boperofeti jo bontsi. Bo farologana jang le dipolelelo-pele tsa balepa-dinaledi? Se se latelang ke phetolo e e tswang mo bukeng ya setlhogo se se reng The Great Ideas: “Mme go ya kafa go itsetse-pele ga motho yo o swang go ntseng ka teng, baperofeti ba Bahebera ba lebega ba tlhomologile. Ka go sa tshwaneng le baitseanape ba baheitane kana ba ba dirisang bola, . . . ga ba tlhoke go dirisa matlhale kana maano go epolola masaitsiweng a bomodimo. . . . Gantsi-ntsi dipolelo tsa bone tsa boperofeti, ka go sa tshwaneng le tsa babueledi ba boitseanape, di lebega di sa belaesege. Bobotlana boikemisetso jwa bone bo lebega e le go senola, eseng go fitlha boikaelelo jwa Modimo mo dilong tseo Ene ka Boene a eletsang gore batho ba bonele-pele gore di tla bo di tswa kae.”

Jaaka sekai sa se, boikitsiso jo bontsi kaga Jesu bo ne jwa kwalwa mo Bibeleng makgolokgolo a dingwaga pele ga go tsholwa ga gagwe. Go ne ga bolelelwa-pele gore o ne a tla tsholelwa mo motseng wa Bethelehema ke ba losika lwa ga Jese, rraagwe Kgosi Dafide. (Mika 5:2; Isaia 11:1, 10) Dikwalo gape di ne tsa bolelelapele gore o ne a tla bolaelwa mo koteng mme gore o ne a tla seka a robega lerapo lepe, jaaka go ne go tlwaelegile ka dipolao tse di ntseng jalo. Dipolelo tse di ne tsa supega di le boammaaruri, mme ke dikai di sekaenyana fela tsa seo mokanoki mongwe wa Bibela o neng a di lekanyetsa go dipolelelo-pele tse di fetang 120 tse di neng tsa diragadiwa mo go Jesu.​—Pesalema 22:16, 17; 34:20.

Polelelo-pele e e Diragaditsweng mo Motlheng Ono

Mo godimo ga moo, Bibela e na le dipolelelopele tse di lebisitsweng mo motlheng wa rona. A re akanyetseng nngwe ya tse di botlhokwa mo go tseno. E tlhalosa ditiragalo tse di tlhomaganeng tse di neng di tla tshwaya nako e e etelelang pele go tsenelela mo go tlhomologileng ga Bogosi jwa Modimo mo mererong ya selefatshe. Ditiragalo tseno di akareletsa dintwa tsa mafatshe, dithoromo tsa lefatshe, malwetse, mauba le go oketsega ga boganana. A go gola ga dilo tseno ga se mo go buiwang thata mo dikgannyeng tsa lefatshe mo lekgolong leno la rona la bo-20 la dingwaga?​—Mathaio 24:3, 7-14; Luke 21:7, 10, 11; 2 Timotheo 3:1-5.

Jesu o ne a tlhalosa gore go diragadiwa ga dipolelelo-pele tseno go ne go tla bolela go goroga ga Bogosi jwa gagwe fela jaaka go tlhoga ga ditlhare go itsise go goroga ga dikgakologo tota. O bile a tlhalosa sentle gore di ne di tla diragadiwa mo losikeng lo le longwe fela. Jaanong, dikarolo tsotlhe tsa sesupo, go akareletsa le dintlha tse di umakilweng fa godimo, re di bonye di diragadiwa fa e sale ka 1914.a Ka gone re ka tlhomamisega ka botlalo gore Bogosi bo tla akofa bo tsaya kgato ka bonako.​—Luke 21:29-33.

Karolo e nngwe e go neng ga bolelelwa-pele ka yone kaga nako eno e ne e le “pitlaganō ea merahe, e rarañwa.” (Luke 21:25) Jaanong, ke ka ntlhayang fa go na le kgatlhego e kgolo gompieno mo tepo-dinaleding le mefuta e mengwe ya masaitsiweng? Pampiri ya dikgang ya Fora ya Le Monde Dimanche e araba ka go re: “Fa batho ba lebane le khuduego, ba tla leka sengwe le sengwe se se ka ba nonotshang. Thuto ya tiriso-tlhaloganyo ya motho e neela kgomotso e kgolo kwantle ga go dira boiteko bope, mme mo motlheng ono wa dilo tse di boitshegang tse di fitlheletsweng ke boitseanape jaaka tsa boranyane jwa nuklea le jwa go aroganya dibopa-popego, batho ba raelesegela go tshabela go masaitsiweng le tse di sa utlwaleng, ba leka go batlisisa bokao jwa botshelo.” Jalo ga re a tshwanela go gakgamadiwa ke kgatlhego e e anameng mo ditlwaelong tsa masaitsiweng, jaaka tepo-dinaledi. Ke nngwe ya ditshupo tsa “pitlaganō” e batho ba e itemogelelang mo motlheng ono tiragatsong ya boperofeti jwa ga Jesu.

‘Tsholetsa Tlhogo ya Gago’

Bakeresete ba tshwanetse go dirang fa ba bona dilo tseno tsotlhe? Ba tsenwe ke poifo, jaaka batho ba ba ba dikologileng? Jesu o ne a neela tlhagiso e e latelang: “Me e tla re dilō tse di simologa go dihala, hoñ lo lelalè, lo choletsè ditlhōgō tsa lona; ka gonne thekololō ea lona e tla bo e atamèla.”​—Luke 21:28.

A o ka rata go itse isagwe ya gago ka mo go oketsegileng? Jalo iphe nako go tlhatlhobisa Bibela ka tlhoafalo o bo o “tlhotlhomisè meōea, bo ke ea Modimo.” (1 Yohane 4:1) O ka dira seno ka thuso ya makasine wa Tora ya Tebelo, oo ka metlha o buang ka boperofeti jwa Bibela o bo o tlhalosa tiragatso ya jone mo motlheng wa rona. Ka gone, le wena o tla kgona go ‘tsholetsa tlhogo ya gago’ jaaka o tlhatswega pelo gore bokhutlo jwa lefatshe leno le le nang le mathata bo gaufi. Gape o tla itse seo o tshwanetseng go se dira gore o nne le melemo ya Bogosi jwa Bomesia, jo bo tla tlogang bo tsenelela mo mererong ya lefatshe mo go tla solegelang molemo batho ba dipelo tse di siameng.

[Ntlha e e kwa tlase]

[Lebokoso mo go tsebe 5]

“Mme Seshupō . . . Seuō se Dihala”

‘Ke eng se se phoso ka go ya go bona moitseanape yo o bolelang isagwe kana go bala kaga naledi ya gago mo pampiring ya dikgang? A seno ga se go tshameka fela mo go senang molato?’

Bibela ga e tseye kgang eno motlhofo fela. Ebile tota, e re thusa go itisa mo go ba ba buang le badimo le baswabi. Mo bukeng ya Duteronome, Jehofa o neela tlhagiso e e latelang: “E re ha . . . moperofiti . . . leha e le molori oa ditōrō, . . . a gu naea seshupō kgotsa segakgamatsi, Me seshupō kgotsa segakgamatsi seuō se dihala, se o buileñ nau kaga shōna, a re, ‘A re saleñ medimo e sele moragō,’ . . . U se ka oa reetsa mahoko a moperofiti eouō kgotsa molori eouō oa ditōrō.”​—Duteronome 13:1-3.

Elatlhoko gore Dikwalo ga di ganetse ntlha ya gore dingwe tsa dipolelelo-pele tsa ba ba buang le badimo le balepa-dinaledi di ka nna tsa nna boammaaruri. Go na le moo, Bibela e re tlhagisa gore, fa dipolelelo-pele tseno di thailwe mo ditshupong tse di mo magodimong kana mefuta mengwe ya boswabi, di tswa mo badimoneng, di a tsietsa, mme di ka kgaphela batho kgakala le Modimo wa boammaaruri.​—Bona Ditihō 16:16-18.

Go reetsa balepa-dinaledi kana bangwe ba ba iphakang ba bolelela-pele isagwe ke go itsenya mo bothateng jwa go ipiletsa mathata a a masisi a semoya mme o felela o le lekgoba la “mashomōshomō a meōa ea boikèpō mo mannoñ a selegodimo.” (Baefesia 6:12) Ka gone, go ya go bona batho ba ba ntseng jaana Modimo o go leba e le sebe se se masisi; ba ba dirang dilo tse di ntseng jaana ba makgapha mo matlhong a gagwe mme ga ba kitla ba rua Bogosi jwa gagwe.​—Tshenolō 22:15.

Ka gone go solegela rona molemo go bo Bibela e re tlhagisa mo balepa-dinaleding le mo mefuteng e mengwe yotlhe ya boswabi.

[Lebokoso mo go tsebe 6]

BIBELA E BOLELETSE-PELE GO SA LE GALE GORE:

◆ Jesu o ne a tla tsalelwa mo Bethelehema.​—Mika 5:2

◆ O ne a tla tsalwa mo losikeng lwa ga Jese, rraagwe Kgosi Dafide.​—lsaia 11:1, 10

◆ O ne a tla bolaelwa mo koteng.​—Pesalema 22:16, 17

◆ O ne a se kitla a robega lerapo lepe.​—Pesalema 34:20