Balepadinaledi Ba Etela Jesu

Banna bangwe ba tla ba tswa kwa Botlhaba. Ke balepadinaledi—batho ba ba ithutang dinaledi, ba ba reng ba kgona go tlhalosa gore ke eng fa dilo dingwe di diragalela batho. (Isaia 47:13) Fa ba le kwa Botlhaba, ba ile ba bona “naledi” mme ba e sala morago, mme e ne ya ba isa kwa Jerusalema e seng kwa Bethelehema.

Fa ba fitlha kwa Jerusalema, ba botsa ba re: “Ngwana yo e tla nnang kgosi ya Bajuda o kae? Gonne re ne ra bona naledi ya gagwe re le kwa Botlhaba, mme re tlile go obama fa pele ga gagwe.”—Mathaio 2:1, 2.

Kgosi Herode wa Jerusalema o a galefa fa a utlwa seno. Ka jalo, o bitsa baperesiti ba bagolo le baeteledipele ba Bajuda a bo a ba botsa gore Keresete o tla tsholelwa kae. Ba mo araba go ya ka se se kwadilweng mo Dikwalong ba re: “Kwa Bethelehema.” (Mathaio 2:5; Mika 5:2) Go tswa foo, Herode o biletsa balepadinaledi mo sephiring a bo a ba raya a re: “Tsamayang lo ye go batla ngwana yoo ka kelotlhoko, mme fa lo sena go mmona, lo boe lo tle go nkitsise gore le nna ke ye go obama fa pele ga gagwe.” (Mathaio 2:8) Tota Herode o batla go bolaya ngwana yono!

Fa balepadinaledi ba sena go tsamaya, go direga sengwe se se gakgamatsang. “Naledi” e ba neng ba e bone, e ba etelela pele gape. Tota naledi eno ga se e e tlwaelegileng mme ke e e neng e tla ba kaela. Ba e sala morago go fitlha e ema mo godimo ga ntlo e Josefa le Marea ba nnang mo go yone le morwaabone.

Fa balepadinaledi ba tsena mo ntlong, ba fitlhela Marea a na le Jesu. Fa ba mmona ba obama fa pele ga gagwe. Go tswa foo, ba mo naya dimpho tsa gauta le dinkgisamonate. Moragonyana fa ba re ba boela kwa go Herode, Modimo o ba tlhagisa mo torong gore ba se ka ba dira jalo. Ka jalo, ba boela gae ka tsela e nngwe.

O akanya gore ke mang yo o neng a dirisa “naledi” go kaela balepadinaledi bao? Gakologelwa gore e ne ya se ka ya ba kaela kwa Jesu a neng a le gone kwa Bethelehema. Go na le moo, e ne ya ba isa kwa Jerusalema, kwa ba neng ba kopana le Kgosi Herode teng, yo o neng a batla go bolaya Jesu. Mme a ka bo a dirile jalo fa Modimo a ka bo a sa tlhagisa balepadinaledi gore ba se ka ba bolelela Herode gore Jesu o kae. Seno se bontsha gore mmaba wa Modimo e bong Satane, o ne a batla gore Jesu a bolawe, mme o ile a dirisa naledi eno go leka go diragatsa maikaelelo a gagwe.