Bukana e e Lebegang Ka Tsela e Ntšha
TSHEDIMOSETSO e e mo setlhogong se se fetileng e ile ya neelwa lefatshe ka bophara ka 41 986 kwa Dikopanong tsa Kgaolo tsa “Kagiso ya Bomodimo” tsa Basupi ba ga Jehofa. Re sobokanya dikakgelo tse dingwe fano tse di kgatlhisang tseo di neng tsa diriwa ke sebui:
“Bōnañ, Dilō Cotlhe Ke Di Diha Sesha.” Seo e ne e le setlhogo sa bukana eo e neng e gatisitswe ke Watch Tower Society bogologolo ka 1959. Bukana ya mofuta ono e ne e ile ya kopiwa ke barongwa ba kwa Japane. Go ne ga lemogiwa gore go tlhokafala buka eo e ka neelang molaetsa wa Bogosi koo ka mokgwa o o phepafetseng, o o motlhofo go solegela batho bao ba sa tlwaelanang sentle le Bibela ka boyone molemo. Kafa tlase ga bokaedi jwa Watch Tower Society, barongwa ba ba fetang 30 ba ne ba nna le seabe mo go kwaleng bukana eno. A bukana eno e ntšha e ne ya diragatsa tlhokafalo eno ereka e ne ya fetoga sedirisiwa sa konokono sa go simolola dithuto tse disha kwa Japane?
Diphelelo tsa gone di a ipuelela. Ka nako eo bukana ya “Bōnañ,” e neng e gololwa ka yone, go ne go na le tlhora ya baboledi ba Bogosi ba le 1 390 kwa Japane. Gompieno, tlhora ya baboledi ke 114 480. Mo e ka nnang botlhe bano ba ne ba simololelwa thuto ya Bibela ka bukana ya “Bōnañ.” Mo dingwageng di le 27 tse di fetileng, dikaelo tse di fetang 8 750 000 tsa bukana eno di ile tsa anamisiwa ka puo ya Sejapane fela. Mme mo dingwageng tse 20 tse di fetileng, Japane e ile ya bega tlhora e ntšha ya baboledi ba Bogosi kgwedi le kgwedi kwa ntle ga di le pedi fela. Lemororo go sena pelaelo ya gore go na le dilo tse dingwe tse di bakang koketsego e e molemo eno, ga gona pelaelo ya gore go dirisa bukana ya “Bōnañ,” go simolola dithuto tsa Bibela e ile ya nna selo se segolo.
Bukana eno jaanong e ile ya kwalwa sesha, go ya ka dilo tseo di tlhokiwang ga jaanong, mme e ne ya gololwa kwa Dikopanong tsa “Kagiso ya Bomodimo” jaaka bukana e e lekanang le makasine ka bogolo e e nang le ditsebe di le 32. Go ile ga tsenngwa karolo e ntšha mo setlhogong se se reng “Dilo tse di Bosula—Ke ka Ntlhayang fa Modimo O Di Dumelela?” Go feta moo, dirapa tse di konelang di ile tsa kwalwa sesha go kgothatsa seithuti ka bothitho gore se kopanele le phuthego ya ga Jehofa. Jaanong buka eno e tlhaga e na le mokwalo o mogolo, o o balegang le ditshwantsho di le mmalwa tse di rutang. Setshwantsho sa yone se sesha sa kafa ntle se sentle sa mebala e le mene se tshwantshitswe ka bogolo jo bo fokoditsweng mo tsebeng e e latelang.
A bukana eno e ntšha, ya “Bōnañ, Dilō Cotlhe Ke Di Diha Sesha,” e tshwanetse ya dirisiwa kwa Botlhaba fela? Kwantle ga pelaelo e tla nna mosola thata koo. Lefa go ntse jalo, go dumelwa gore bukana eno ya “Bōnañ,” e tla nna mosola gape go ralala tshimo yotlhe ya lefatshe mo go simololeng dithuto tsa Bibela. Go setse go fetile mo e ka nnang dingwagangwaga fa e sale ka nako eo bukana ya ntlha e neng ya gatisiwa ka yone. Ka nako eo, kitso ya Bibela e ile ya wela tlase ka mo gosha, le eleng mo mafatsheng a a iphakang gore ke a Bokeresete. Mo boemong jwa gore losika lo losha lo utlwe dipolelo tse di tumileng tsa Bibela go tswa mo batsading ba lone, lo ile lwa gola matlho le ditsebe tsa lone di tlhomilwe mo thelebisheneng, lo amogela lefa e ka nna eng seo lefatshe le nang le sone. Seno, gammogo le dilo tse dingwe tse di faposang tsa lefatshe leno le le tsentshiwang ke menate, se ile sa tsaya dioura tsa botlhokwa-tlhokwa tseo di ka bong di diriseditswe kgatelopele ya semoya. Kokomana ya segompieno, go sa kgathalesege gore ke mo go La-Bodumedi kana gongwe go sele, e itse go se kae fela ka Lefoko la Modimo. E tlhoka ‘mashi a Lefoko,’ jaaka a tlhagisiwa ka phepafalo mo bukaneng ya “Bōnañ.”—Bahebera 5:12.
Lefatshe ka bophara, go na le batho bao dipelo tsa bone di ratang tshiamo mme e le bao ba ka itumelelang go ithuta ka moo ba ka fetogang ka gone bao ba kgethololwang le “boidiidi yo bogolo” joo bo tla falolang Hara-Magedone. (Tshenolō 7:9, 14) Mo tirelong ya rona ya ntlo le ntlo, re ka fitlhela ba le bantsi bao ba kgatlhiwang ke tsebe ya kafa ntle e e nang le ditshwantsho tse dintle tsa bukana eno le ke tlhaloso e e kgatlhisang ya Paradaise mo dirapeng tse di simololang. Fa re boela, re ka dirisa Dikwalo di le mmalwa tse di tlhagiseditsweng go tshegetsa dirapa tseo go bontsha gore tsholofelo eno ga se toro fela. Morago ga moo, ka thuto ya ka metlha ya Bibela, re dirisa bukana ya “Bōnañ,” re ka ba thusa gore ba tswele pele mo tseleng e e isang botshelong. Jaaka Jesu a boletse mo thapelong e e yang kwa go Rraagwe: “Me botshelō yo bo sa khutleñ ke yo, gore ba gu itse, wèna, Modimo o osi, o o boamarure, le èna eo u mo romileñ, eboñ Yesu Keresete.”—Yohane 17:3.
Ekete rotlhe re ka dirisa bukana ya “Bōnañ,” ka tlhoafalo fa re ntse re phatsimisa boammaaruri jwa Bogosi, “boidiidi yo bogolo” bo na le bao ba setseng ba batlodiwa ba boperesiti jo bo ikanyegang mo go ‘direng gore lesedi la bone le phatsimele batho.’ (Mathaio 5:16) Ekete leina le le boitshegang la Molaodi wa Lobopo ebong Morena Jehofa le ka itshepisiwa ka botlalo. Ekete go ka bontshiwa ka metlha yotlhe gore ditsholofetso tsa ga Jehofa Modimo, Mmopi wa legodimo le lefatshe, di “boikañō, le boamarure” ka metlha yotlhe. Ke ene yo o bolelang jaana go tswa kwa setulong sa gagwe sa bogosi kwa legodimong: “Bōnañ, dilō cotlhe ke di diha sesha.”—Tshenolō 21:5.