Setlhaketlhake sa Thursday Se Utlwa Mafoko a a Molemo
FA SEFOFANE se ntse se dikologa, seo re se bonang fela ke setlhophanyana sa ditlhaketlhake tsa dibopego tse di farologaneng le bogolo fa gare ga lewatle le lebududu. Fa se tloga se kotama, re bona tselana ya difofane—abo e le tshesane jang ne—mme abo re wela dibete!
Sefofane se kotame mo Horn Island. Morago ga loeto lwa bese go ya kwa boemela-dikepeng, go tla mokorwana o o re tsayang go re isa kwa Thursday Island, eo e leng bogare jwa Torres Strait Islands. Ditlhaketlhake tseno di tlhomagana jaaka mantswe a a beilweng jaaka bokgabaganyetso jwa go ya kwa ntlheng ya bokone ya Queensland, Australia, go tloga fela kwa Papua New Guinea.
Mo pakeng e e mogote, le ya bokgola (Ferikgong go ya go Motsheganong), sengwe le sengwe se medile ebile se setala. Fa gongwe go tlhagoga ditsuatsue tse di kotsi, mme seo se dira gore go ralala ditlhaketlhake tseno go nne kotsi. Go ya bofelong jwa ngwaga, o tla fitlhela go le komelelo ebile go le lorole.
Mafoko a a Molemo a Goroga mo Ditlhaketlhakeng Tseno
E ne e le ka 1938 fa seketswana sa Mokgatlho wa Watch Tower sa boleele jwa dimitara tse 16 ebong Lightbearer se ema ka bokhutshwane fa ditlhaketlhakeng tseno fa se le mo mosepeleng go ya kwa Dutch East Indies (e jaanong e leng Indonesia). Mo teng ga sone go ne go palame Basupi ba ga Jehofa ba supa, ba ba neng ba tlhoafaletse go bolela molaetsa wa Bibela wa tsholofelo.
Lefa go ntse jalo, bakaulengwe bano ba ne ba sa itse gore mongwe wa barongwa ba La-Bodumedi o ne a ile a goroga ka nako e le nngwe fela. O ne a bolelela baagi ba ditlhaketlhake gore ba seka ba reetsa Basupi ba ga Jehofa lefa e le go amogela dipe tsa dibuka tsa bone. Mme e ne ya re fa bakaulengwe ba goroga kwa legaeng la gagwe le go buisanya le ene, o ne a amogela dibuka di le nne. Bangwe ba baagi ba ditlhaketlhake ba ne ba bona seno, jalo ba akanya ka go re: ‘Fa e le gore ene o a di tsaya, rona o re iletsang?’ Mo maitseboeng ao, fa Basupi ba bangwe ba ntse ba supa ditshwantsho, mokaulengwe mongwe o ne a ema kafa ntle ka dibokoso tsa dibuka. Nako le nako, mo lefifing, go ne go tlhaga letsogo le le tshotseng madi, le lentswe le kopa buka. Ka gone mo oureng e le nngwefela, go ne ga tsamaisiwa dibuka di le 200! Moragonyana, morongwa yoo o ne a leka go dirisa dibuka tse a di tsereng jaaka bosupi jwa go bona Basupi molato mme a seka a atlega.
Go Agiwa Phuthego
Dipeo tseo tsa ntlha tsa boammaaruri di ne tsa seka tsa nosediwa ka nako e telele. Go ne ga tsamaya go fitlha bofelong jwa bo 1950 fa thuso e nngwe e goroga mo ditlhaketlhakeng tseno tse di kwa thoko. Badiredi ba nako e e tletseng ba le babedi ba ne ba romelwa ke Mokgatlho wa Watch Tower. Ba ne ba salwa morago ke boora-Rudd, lelapa la batho ba bararo ba ba neng ba tla go direla mo tlhokafalo e neng e le kgolwane gone. Ka bonakonyana, go ne ga agiwa phuthego e potlana mo Thursday Island.
Eno e ne e le metlha e e boima, mafelo a bonno a sa bonale motlhofo mme ebile go na le kganetso e kgolo mo pusong le mo ditumelong tsa koo. Lantlha diphuthego di ne di kopanela mo ntlwaneng e potlana e e neng e le kwa godimo ga diobene tsa lebaka. Ako o akanye fela kafa go neng go le mogote ka teng mo dinageng tseo tsa boboatsatsi!
Ka go lemoga kafa go tlhokafalang ka teng go ipoloka ba nonofile semoyeng, Basupi ba ne ba ikemisetsa gore ba tla nna gone mo kopanong e e neng e le mo lotshitshing lwa naga ya Australia, eo e neng e ka nna bokgakala jwa dikilometara di le 1 300. Ka go tlhoka madi a sefofane, ba ne ba rapela gore ba bone motlhala o mongwe wa go ya kopanong.
Selo sa ntlha, bakaulengwe ba ne ba reka mokoro o mogologolo o o neng o sena enjene, lefetlho, disaile, le seitsetsepelo. Fa ba ntse ba batla mo mekorong e megologolo, kgabagare ba bona enjene ya disele ya five-cylinder le gearbox. Fa ba sena go di reka, bakaulengwe ba ne ba itumelela go bona disaile, diitsetsepelo, le dikarolo tse dingwe tse dintsi. Lefa go le jalo, go ne go santse go sena ase ya tshipi kana lefetlho.
Mokaulengwe Rudd o ne a kopa mong wa mathulelo a dikepe gore a o ne a ka senka mo go one. Rre yoo ka go tshameka fela o ne a re fa a ne a ka bona ase eo golo gongwe mo madirelong, Basupi ba e tseye. Mong wa madirelo o ne a gakgamala thata fa ba sena go bona ase. Fa mokaulengwe Rudd a ntse a tsamaya ka ntlo le ntlo mo mosong mongwe moragonyana, o ne a kgopa sengwe mo tlhageng e telele. E ne e le lefetlho leo le neng le tla tshwanela mokoro wa bone tota!
Morago ga go baakanya sekepe, phuthego ya batho ba le 25 e ne ya ipaakanyetsa loeto lwa malatsi a supa. Fa ba emelela, ngaka ya setswana ya lefelo leo e ne ya ba “hutsa.” Mo bosigong bongwe mokoro o ne wa kganelwa ke lekekema. Bakaulengwe ba ne ba dirisa nako eo ka botlhale go tshwara ditlhapi. Fa makhubu a gola mo mosong, sekepe se ne sa kokobala, lemororo ba ne ba tshwanelwa ke go pompela metsi ka kwantle ga sone go tsweledisa mosepele.
Fa ba goroga mo Townsville, mo Australia, mong wa mathulelo a dikepe yo o humileng o ne a ba kgatlhantsha. Go bonala fa a ne a ile a bala koranta nngwe kaga maiteko a bone a go nna gone mo kopanong, mme o ne a tlhotlheletsega go thusa. O ne a gagamalela mo go reng o batla go baakanya tshenyego e e neng e diragetse mo mokorong oo lemororo ba ne ba ka se kgone go mo duela kana go mo thusa go o baakanya ka jaana ba tla bo ba le kwa kopanong. Moragonyana, o ne a ba duedisa fela diponto di le 40 (R140) go na le diponto di le 500 (R1 700) ntswa seo e ne e tla bo e le tlhotlhwa e potlana.
Go Fitlha kwa Ditlhaketlhakeng tse Dingwe
Ka kaelo ya ga Jehofa, molaetsa wa Bogosi o ile wa fitlha mo ditlhaketlhakeng tse dingwe tse di ka kwantle. Ka motlhala, Bomokaulengwe Rod Anderson le Allan Webster, ba ba neng ba fudugela kwa Thursday Island dingwaganyana di sekae tse di fetileng, ba ile ba dirisa mokoro wa bone mo go rereleng ditlhaketlhake tse dingwe. Go tla go fitlha jaanong, thero e ile ya dirwa mo ditlhaketlhakeng di le 12 mo go tse 17 tse go nnang batho mo go tsone.
Lefelo le Lentle la Bokopanelo
Lefa go le jalo, go ne ga tsaya bakaulengwe lebaka ba ntse ba ipotsa gore a ba tla kitla ba nna le Holo ya bone ya Bogosi mo Thursday Island. Go tswa foo tiro ya moya wa ga Jehofa e ne ya iponatsa. Ka September 1983, Mokaulengwe Graham Keen, yo o neng a le sethakga sa moagi, o ne a fudugela koo go ya go thusa go aga holo. Diphuthego di le mmalwa mo Australia di ne di ile tsa kgobokanya didirisiwa tsa kago tse di tlhokafalang. Tseno di ne tsa pakiwa mme tsa romelwa go tswa kwa Cairns, mo Queensland. Baagi ba ditlhaketlhake ba ne ba gakgamadiwa ke go bona thaba e kgolo eno ya dilo tsa kago mo setsheng seo pele e neng e le lefatshe fela le le senang sepe. Go ne ga tsaya fela malatsi a le 140 go digela holo eo, gammogo le ntlo kwa morago. Mo letsatsing la go kgakola holo e ntšha eo go ne go na le ba ba 120 ba ba itumetseng.
Abo Basupi botlhe ba ne ba itumetse jang ne go nna le Holo e ntšha ya Bogosi go nna jaaka boremelelo jwa tiro ya go anamisa mafoko a a molemo mo Torres Strait Islands. Ka thuso ya moya wa ga Jehofa, ba ipelela go bolela pako ya ga Jehofa Modimo.—Isaia 42:12.