Go Lemoga Dikgang

“Rra Echo . . . ”

“Basadi go dikologa naga eno ba ile ba bolelela baobamedi ka bone gore go dirisa puo ya senna fela go a ba tshwenya (‘Rra echo eo o kwa legodimoñ’) mo ditirelong tsa kobamelo,” go bega jalo Minneapolis Star and Tribune. “Go ba dira gore ba ikutlwe jaaka ekete ke baagi ba maemo a a kwa tlase, basadi bano ba bolela jalo, mme ga ba kgone go nna le kamano le modimo wa senna.” Lekgotla le le laolang la United Methodist Church ya kwa Minneapolis, Minnesota, U.S.A., le ne la tshegetsa kgang eno ka go boutela lenaane le lesha la mafoko ao a tshwanetseng go dirisiwa go bua ka Modimo ke batho ba ba tsenang kereke fa ba rapela, ka nako ya ditirelo tsa kobamelo, le ka nako ya ditiro tse dingwe tsa kereke.

Mafoko mangwe a a senang bong ao a baakanyeditsweng ke lekgotla la kereke eo ke “motswedi wa kagiso, motswedi wa kutlwelobotlhoko, yo o tlhomameng le yo o lorato, thata ya botshelo jwa rona, . . . mogopolo wa lobopo lotlhe, . . . mogodimo le yo o boitshepo.” Go tla kgothalediwa gore go dirisiwe mafoko ano mo boemong jwa maemedi a botona gammogo le mafoko a a ntseng jaaka Morena, Kgosi, le Rraetsho, ao a lebisang go Modimo jaaka motho wa senna.

Lefa go ntse jalo, go gana mokgwa wa Bibela wa go bitsa Modimo jaaka motho wa senna ga go ise go ke go diragale pele. Pelenyana fela ga loso lwa gagwe, Jesu, ebong Morwa wa Modimo yo o tsetsweng a le esi, o ne a dirisa lefoko la Searamika ka tlhamalalo eleng Abba, leo le rayang “Rraetsho,” fa a ne a rapela Jehofa Modimo. (Mareko 14:36) Ka mo go tshwanang, moaposetoloi Paulo o ne a dirisa lefoko leno go bontsha kamano e e atamalaneng magareng ga Bakeresete ba ba tloditsweng ka moya le Rraabone wa selegodimo, ebong Jehofa. (Baroma 8:15; Bagalatia 4:6) Ka gone, fa Jesu a ne a ruta balatedi ba gagwe gore ba rapele ba re, “Rra echo eo o kwa legodimoñ,” a Bakeresete botlhe gompieno ga baa tshwanela go dira se se tshwanang le seo?—Mathaio 6:9.

Dikereke di Tsene mo Molatong

Morago ga pokano ya sinoto sa Kereke ya Dutch Reformed kwa Teransefala bokone, Afrika Borwa, go ne ga begiwa gore diphuthego di le 134 tsa kereke eo di tsene mo molatong wa madi a a kana ka R13 890 000. Fa kanaanelakgang e e mo lekwalo-dikgannyeng leo la Seburu eleng Beeld e ne e akgela malebana le bothata joo, e ne ya botsa jaana: “Lefa go ntse jalo, a ka dinako tse dingwe molato ono ga wa bakiwa ke moruti le khansele ya kereke eno?” Lekwalo-dikgang leo le tlhalosa jaana: “Gantsi go diragala gore modiakone a dire maeto a kgwedi le kgwedi a ka ntlo le ntlo go phutha madi, fa moruti ene a itsege ka go sa nne gone ga gagwe mme mogolwane ene o nna teng sewelo mo lefelong la gagwe. A maloko a kereke, mo makgetlong a a ntseng jalo, a tshwanetse go bonwa molato fa a na le boikutlo jwa gore kereke eo e kgatlhegela madi a bone fela, eseng pholo ya bone ya semoya?”

Go farologana le seo, bodihedi jwa ga Jesu le jwa barutwa ba gagwe bo ne bo gatelela go aba ka tsela ya semoya. (Mathaio 10:8) Lemororo bareetsi ba ba nang le kanaanelo gantsi ba ne ba ba thusa ka go ithaopela go ba tlamela ka dilo tsa konokono tseo ba neng ba di tlhoka tse di ntseng jaaka dijo le marobalo, Jesu lefa e le barutwa ba gagwe ba ne ba sa senke go solegelwa molemo ke dilo tse di bonalang. (Luke 10:5-9) Jaaka moaposetoloi Paulo a ne a bolela jaana: “Ga kea ka ka eletsa selefera sa opè, leha e le gouda, leha e le diaparō.” Mo boemong jwa seo, o ne a tlhagisa badihedi ba boammaaruri ba Modimo gore ba “ikgololè mo go rateñ khumō ea madi.” O ne a direla maeto a gagwe a ka ntlo le ntlo gore a ke a ‘supele tlhabologelo Modimong le tumelo mo Moreneng wa rona ebong Jesu.’ (Ditihō 20:20, 21, 33; Bahebera 13:5) E ne e le baeteledipele ba bodumedi ba motlha oo bao ba neng ba tlhalosiwa ke mokwadi wa Bibela ebong Luke jaaka “barati ba khumō ea madi.”—Luke 16:9-15.

Boitlosobodutu jo bo sa Siamang

Go intsha bodutu fela, barutwana ba Majeremane ba kwa Lahnstein ba ne ba simolola go tlhotlheletsa mewa ya maatla a sedimona gore e bue ka galase e e nwelang ka go nna e tsamaya mo ditlhakeng ka go farologana ga tsone, “e kwala” molaetsa. Diphelelo e ne ya nna dife?

“Basha ba ba nang le dingwaga di le sometlhano, bao ba boifang go ya kwa ntlwaneng ya boithomelo ba le bosi, ba peteketsa kaga badimona ba sa ikutlwe gore baa reng. Bosigo, basha ba batla go robala le batsadi ba bone,” go bega jalo lekwalo-dikgang la Jeremane eleng Rhein-Zeitung. Bontsi jwa bao ba neng “ba ikuela mo meweng mme morago ga moo mo go ‘Lusifa’ mo dipokanong tsa bokukuntshwane” ke bone bao ba neng ba tsenwa ke letshogo. Fa morutabana mongwe a ne a akgela malebana le ka moo bana bao ba neng ba itshwara ka gone “fa go ne go diragala gore ‘Lusifa’ a rakane le bone,” o ne a bolela jaana: “Le eleng bana bao ba neng ba fuduegile tlhaloganyo go gaisa ba ne ba akofa ba nna bokgwabo thata. Ba ne ba tsenwe ke letshogo.” Morago ga tiragalo eno, lefelo la thaka e tshesane la toropo eo le ne la thibela “metshameko” e e ntseng jalo, mme batsadi ba ne ba kopiwa gore ba seka ba tlogela bana ba bone ba ba tsenweng ke letshogo ba le bosi.

Go ya ka pampiri eo, “lekhubo leno la maatla a sedimona le kgatshegela mo dibaesekopong, mo dithelebisheneng, le mo direkotong.” Lefa go ntse jalo, go kopanela mo maatleng a sedimona go intsha bodutu ga go a ka ga neela barutwana bao ba Majeremane ba kwa Lahnstein monate o ba neng ba o lebeletse. Ke ka ntlha yang fa go ne ga seka ga nna jalo? Ka gonne Bibela e re bolelela gore Diabolo o bolalome ebile ke “motsietsi oa lehatshe yeotlhe.” E nyalanya go atlega ga ga Diabolo mo lefatsheng le “go latlhèga.” Satane le “meōea e e boikèpō” ya gagwe (eleng badimona) ba tshwanetse ba tsewa ka masisi jaaka kotsi ya mmatota ya semoya, mme ba tilwe.—Tshenolō 12:9, 12; Baefesia 6:11, 12; Bapisa Ditihō 19:19.