Pego ya Baboledi ba Bogosi
Maitemogelo a a Tswang Kwa Tuvalu
MAFOKO a a molemo a Bogosi a bolelwa mo setlhaketlhakeng se sentle sa Tuvalu, mo South Pacific , mme bosupi jo bo molemo bo neetswe le eleng go batho ba maemo a a kwa godimo. Mokaulengwe mongwe yo o tswang kwa Australia yo o dirang tiro ya go eta le mosadi wa gagwe kwa Tuvalu o re bolelela ka boitemogelo jwa gagwe:
“Nna le mosadi wa me re ne ra lalediwa go nna teng kwa moletlong wa dijo kwa legaeng la tonakgolo ya Tuvalu. Tiragalo e ne e le ketelo ya Tona ya Merero ya Mafatshe a Sele ya kwa Australia. Fa go ntse go jewa, nna le mosadi wa me re ne ra nna le sebaka se se mole mo sa go rerela tona eo ya Australia gammogo le mosadi wa gagwe. Fa Tonakgolo a ne a re itsise batho, o ne a umaka tiro e e molemo eo Basupi ba ga Jehofa ba neng ba e dira mo Tuvalu, segolo bogolo mabapi le go ranolela dibuka tsa rona mo puong ya Setuvalu. ‘Ke na le dikaelo tsa dikgatiso tsotlhe tsa bone mo laeboraring ya me, mme di molemo fela thata!’ a rialo. Tona gammogo le mosadi wa gagwe ba ne ba kgatlhegela go utlwa ka moo tiro ya rona e tsweletseng ka teng mo Tuvalu.
“Moragonyana mo maitsiboeng ao, re ne ra nna teng kwa maitisong a lefelo leo a mmino wa setso sa bone. Morago Mmusimogolo wa Tuvalu o ne a re atamela mme a umaka gore Basupi bangwe ba ne ba etetse kwa legaeng la gagwe mo bekeng e e fetileng mme ba tlogetse dikaelo dingwe tsa dimakasine tsa Tora ya Tebelo le Awake!. O ne a bone kafa morago ga nngwe ya dimakasine tseo go bapadiwa New World Translation of the Holy Scriptures mme a batla go itse ka fa a neng a ka bona e le nngwe fela mo lefelong leo ka teng. Re ne ra tlhalosa gore re ne re ka itumelela go mo neela sekaelo sa yone. Sontaga e e latelang, ke ne ka ya kwa legaeng la gagwe ke tshotse Bibela eo, mme ra nna le motlotlo o o molemo mo e ka nnang ka oura. O ne a umaka ka moo a neng a anaanela tire ya rona le dikgatiso ka gone. Tota-tota, fa re ne re goroga kwa legaeng la gagwe, mosadi wa gagwe o ne a bala bu ka ya Tshelela Ruri ka Setuvalu. Jalo re ne ra itumelela go kgona go rerela bangwe ba ‘maemo a a kwa godimo.’”—1 Timotheo 2:1-4.
Mo tiragalong e nngwe Tonakgolo ya kwa Tuvalu o ne a etela kwa Solomoñ Islands. Batho ba Tuvalu bao ba nnang koo ba ne ba dira moletlo go mo gorosa sentle. Gareng ga bao ba neng ba laleditswe kwa moletlong oo e ne e le kgaitsadi mongwe, yo o neng a bega maitemogelo a a latelang:
“Fa moletlo o fela Tonakgolo o ne a letlelela gore go ka bodiwa dipotso kaga dikgatelopele tsa bosheng mo Tuvalu. Potso nngwe e e neng ya bodiwa e ne e le gore, ‘A go na le ditumelo dingwe tse disha mo Tuvalu?’ Tonakgolo o ne a araba ka go re ‘go na le ditumelo tse disha tse di letleletsweng mo Tuvalu mme go na le e le nngwe fela fela e e molemo.’ Fa a ne a bodiwa gore eo e ne e le efe, o ne a fetola ka go re, ‘ke ya Basupi ba ga Jehofa.’
“Mongwe le mongwe o ne a gakgamadiwa ke karabo ya gagwe, mme fela jaaka gale go ne ga bodiwa gore ke ka ntlhayang fa tumelo ya Basupi ba ga Jehofa e le ‘tumelo e le nngwe fela fela e e molemo.’ O ne a tlhalosa ka go re: ‘Ke ka gonne baruti ba rona ba nna fela kwa gae tsatsi lotlhe ba bo ba letsa tshipi ka boSontaga gore re ye go ba reetsa. Mme Basupi ba ga Jehofa ba tla kwa go wena tota, mme le fa o ka tswa o sa tsene kereke, ba go ruta Bibela mo legaeng la gago.’”
Jalo, lemororo bangwe ba ka nyatsa bodihedi jwa rona jwa ntlo le ntlo, kwantle ga pelaelo bangwe baa anaanela fa re ba isetsa molaetsa kwa magaeng a bone.—Ditihō 5:42.