Dipotso tse di Tswang go Babadi
◼ Jesu o ne a re, “Ha lo ka bo lo no lo houhetse lo ka bo lo sena boleo.” (Yohane 9:41) A o ne a raya gore batho bangwe ga ba na boleo?
Nnyaa, batho botlhe gompieno ke baleofi, fela jaaka go ne go ntse mo lekgolong la ntlha la dingwaga, kwantle ga ga Jesu ka boene. Mo mafokong ano a a tswang mo go Yohane 9:41, Jesu o ne a lebisitse go mofuta o o rileng wa boleo.
Rremogolo wa rona rotlhe ebong Adame o ne a rwesa ditlogolwana tsotlhe tsa gagwe mokgweleo wa sebe. Adame o ne a bopilwe a itekanetse, a sena boleo. (Duteronome 32:4; 2 Samuele 22:31) Fa a ne a sa utlwe ditao tsa motheo tsa ga Jehofa, Adame o ne a fetoga yo o sa itekanelang. Go leofa go raya fela “go fosa lotshwao.” Ka boammaaruri Adame o ne a dira jalo. Jalo ka go tlola taolo ya Modimo, Adame o ne a nna moleofi.
Rotlhe re ile ra amiwa ke seo ka gonne rotlhe re tswa mo go Adame. Oka tshwantsha seno ka tsela eno: Monna mongwe yo o tshotsweng a na le bogole bongwe jwa tsalo o bo fetisetsa mo baneng botlhe ba gagwe; ba ne ba tla nna le bogole jo bo tshwanang. Baitseanape ba segompieno ba ka kgona go lemoga fa go na le bogole bongwe mo diseleng tsa lee kana ngwana yo o sa tswang go tsholwa, mme Jehofa o kgona go feta foo. O lemotsha gore Adame o ne a nna le bogole jo bogolo le gare o ne a bo fetisetsa mo go rona rotlhe. Bogole jono ke boleo. “Boleo bo tsenye mo lehatshiñ ka motho a le moñwe hèla [Adame], le losho ka boleo; me yalo losho loa hetèla mo bathuñ botlhe, ka botlhe ba leohile.” (Baroma 5:12) Boemo jono jwa boleo bo dirile gare batho ba seka ba nna mo kutlwanong le Mmopi, mo godimo ga go ba leretse bolwetse le loso. Ga go na motho ope kwantle ga ga Jesu yo o neng a itekanela kana a seka a atlholelwa loso.—Baroma 5:18-21; 6:23; 2 Ditihalō 6:36.
Lefa go ntse jalo, mo Bibeleng fa gongwe batho ba bidiwa “baleohi” ka gonne go lemogilwe fa e le ba ba dirang boleo ka mo go tlhomologileng kana ba dira boleo bongwe jo bogolo. (Luke 19:2-7; Mareko 2:16, 17; 14:41) Seo, legale, ga se reye gare batho ba bangwe ba itekanetse, ga ba na boleo. Fa e le gore ba ne ba ntse jalo, ba ka bo ba sa tsofale ba ba ba felela ba sule.
Polelo e e mo go Yohane kgaolo 9 e .kopanyeletsa monna yo o neng a tshotswe a le sefofu mme yo Jesu a neng a alafa bofofu jwa gagwe. Monna yoo ka boene o ne a sa kgone go bala Dikwalo, lefa gone a ne a na le kitso e e rileng. O ne a itse gore Modimo ga o reetse dikopo tsa baleofi ba ka boomo. Lebaka la go bo Jehofa a ne a neile Jesu maatla a go dira kgakgamatso ya go foufolola le ne le supa gare Jesu o ne a le moperofeti. Lefa go le jalo, Bafarasai ba ba boikgodiso, ba ne ba gana go amogela bosupi jo bo utlwalang jwa monna yoo, mme ba ne ba mo latlhela kwa ntle.—Yohane 9:13-17, 26-34.
Morago ga seno, Jesu o ne are: “Ke tletse katlholō mo lehatshiñ yeno, gare ba ba sa boneñ ba bōnè; le gare ba ba bōnañ ba houhalè.” (Yohane 9:39) Ee, ka go rera ga gagwe, ditiro tse dingwe, le boemo jwa gagwe mo maikaelelong a Modimo, batho ba ne ba ka kgona go bona ka tsela ya semoya mme ba tsamaya mo leSeding kana ba ne ba ka nna mo lefifing la semoya. (Isaia 9:1, 2; 42:6, 7; Mathaio 4:13-17; 6:23; 2 Petere 1:9; 2 Bakorintha 4:4) Fa baeteledipele ba bodumedi ba ne ba le Bajuda fela ba ba senang kitso ba ba nang le morwalo o o rwelweng ke botlhe wa sebe sa motho, go sa amogeleng ga bone Mesia go ka bo go nnile le lebaka. Mme bone, ba ba neng ba iphaka fa ba “bona,’. kana ba tlhaloganya, ba ne ba na le mokgobo fela thata ka gonne ba ne ba na le kitso e kgolwane ya Molao le ya Lefoko la Modimo la boperofeti.)alo go gana ga bone Jesu e ne e le boleo ;0 bo masisi joo bo neng bo ba atlhola go feta kafa bosaitekanelang jwa bone jo bo tlwaelesegileng le boleo di neng di ba atlhola ka gone. Ka gone, Jesu o ne a raya Bafarasai a re: “Ha lo ka bo lo no lo houhetse lo ka bo lo sena boleo: me ke ha, loa re, Loa bōna: boleo yoa lona bo sale gōna.”—Yohane 9:41.