O ka Sutisa Dithaba!

GO NE ga begwa fa May 29, 1953, e le nako eo e neng e le lantlha motho a neng a ema mo godimo ga setlhoa sa thaba e e di fetang tsotlhe ka boleele mo lefatsheng lotlhe—eleng Mount Everest, eo e leng dimetara di le 8 848 go feta selekanyo sa bogodimo jwa lewatle. Ba rotloediwa ke banna ba ba fetang 450, Edmund Hillary wa New Zealand le Tenzing Norgay, Mopalamadithaba wa kwa Nepal, ba ne ba atlega mo go fenyeng dikgapetlana tsa metsi tse di reledisang, kapoko e e thibang matlho, le go tlhoka phefo e e hemiwang gore ba fitlhe kwa godimo kwa mokgeleng wa bone wa bogodino jwa dikilometara di le 8,8.

Go palamelela kwa godimo ga thaba e e godileng eleruri ke phitlhelelo e e sa tlwaelesegang. Le fa go le jalo, ga e kake ya tshwana le seo Jesu a neng a se tlhalosetsa barutwa ba gagwe: “Amarure kea lo raea, Ha lo na le tumèlō e e kanañ ka tlhaka ea peo ea mosetara, lo ka raea thaba e, loa re, Tloga ha, u hudugèlè hale; me e tla huduga; me ga go ketla go dihana le sepe se se tla lo retelèlañ.” Ako o akanye fela, o sa palame mme o sutisa thaba!—Mathaio 17:20.

Ke eng seo se neng sa tlhotlheletsa Jesu go raya barutwa ba gagwe mafoko ano? Ba ne ba sa tswa go retelelwa ke go fodisa mosimane yo o neng a tsenywe ke badimona. Jesu o ne a gatelela lebaka la go bo ba ne ba retelelwa: Ba ne ba tlhoka tumelo e e oketsegileng. (Mathaio 17:14-20) o ne a tshwantshanya tumelo le peo ya mosetara, selo seo ba neng ba tlwaelane le sone fela thata. Lemororo peo ya mosetara e le nngwe ya tse di “pōtlana,” fa e sena go gola morago ga dikgwedi di sekae e nna setlhare se segolo. (Mathaio 13:31, 32) Ka gone, Jesu o ne a gatelela dilo tse dikgolo tseo tumelo e potlana e ka di kgonang fa e tlhagolelwa sentle e ba e nonotshiwa—dilo tseo di lebegang di sa kake tsa kgonega di tla kgonega.

Mme morago ga go nonotsha tumelo ya go nna jalo, ke dithaba tsa mofuta ofe tseo barutwa ba ga Jesu ba neng ba tla kgona go di sutisa? Fela jaaka thaba ya mmatota e ka nna kgolo, dikgoreletsi tsa seka-dithaba di ka kgoreletsa kgatelo-pele ya rona mo tirelong ya ga Jehofa. “Dithaba” tseo e ka nna dife mme re ka kgona go di “sutisa” jang?

Moaposetoloi Paulo ke sekai sa Mokeresete yo o neng a thulana le dikgoreletsi di le dintsi. Mo go 2 Bakorintha 6:4-10 le 2 Bakorintha 11:23-28, o ka bala ka boitemogelo jwa gagwe jwa ditlala, dititeo, go latlhelwa mo kgolegelong, go thubegelwa ke sekepe, le masetlapelo a mangwe a mantsintsi. Mo godimo ga dilo tseno, o ne a “tsènwa ke mutlwa mo nameñ” ka tshwantshetso, seo gongwe e neng e le bothata bongwe jwa matlho a gagwe. (2 Bakorintha 12:7; Ditihō 14:15) Go ne ga kgonega jang gore a fenye dikgoreletsi tseo tsa seka-dithaba a bo ka katlego a kgone go dira thato ya Modimo kaga gagwe? “Nka diha dilō cotlhe ka èna eo o nnonotshañ,” ga kwala jalo Paulo. Se no e ne e le “gore bogolo yo bo leñ bogolo thata yoa nonoho e nnè yo bo cwañ mo Modimoñ, e señ mo go rona.” (Bafilipi 4:13; 2 Bakorintha 4:7) Ka gone, Paulo o ne a na ie tshepho e e feletseng mo kgonong ya ga Jehofa ya go mo nonotsha ka nako eno ya mathata. O ne a na le tumelo.

Go Sutisa Dithaba Gompieno

A ke keletso ya gago go oketsa tirelo ya gago go Jehofa? Jaaka makgolokgolo a diketekete tsa batho bao ba kopanetseng le matsholo a bareri ba nako e e tletseng (babulatsela), wena le wena o ka bona fa nako e potlakile mme o ka nna wa bo o akanya ka masisi ka go oketsa bodihedi jwa gago. Lefa go ntse jalo, a go na le bothata joo bo lebegang bo le bogolo thata jaaka thaba fa pele ga gago? Fa go nt se jalo, a o ka kgona go sutisa dithaba? Diketekete tsa batho ba bangwe ba dirile jalo mo maitekong a bone a go oketsa tirelo ya bone go Jehofa. Maitemogelo mangwe a bone a sekae ke ano.

Mosetsanyana mongwe yo mmotlana yo o neng a tloga a aloga kwa sekolong fa a fetsa dithuto tsa gagwe o ne a eletsa go bulatsela, mme go tlhoka tiro e ne e le thaba mo go ene. O anela jaana:

“Go akanya ga me mo go sa siamang le dipelaelo kaga bobulatsela e ne ya nna bothata joo ke neng ke tshwanelwa ke go 00 fenya. Ereka ke ne ke tshwenyegile ka go bona tiro pele ga ke simolola go bulatsela, ke ne ke sa ikanye le go tshepha Jehofa ka botlalo le go kgona ga gagwe go tlamela bao ba bayang kobamelo ya gagwe kwa pele. Ke ne ka nna ka akanya ka go re, ‘Santlha ke tla batla tiro, mme go tswa foo ke tla dira kopo ya go bulatsela.’ Ke ne ke sa bule tsela; tota ke ne ke senya nako e e nang le mosola. Lefa go ntse jalo, mongwe wa bagolwane ba phuthego o ne a mpontsha gore fa ke ntse ke diega go simolola bobulatsela, ditiro tse di tsayang nako yotlhe di tla nna di lebega di le botoka, ereka go sena sepe seo se neng se nthibela go di amogela.”

O ne a dira eng? “Ke ne ka rapela Jehofa ka tlhoafalo gore moya wa gagwe o o boitshepo o goge le go kaela ditiro tsa me le go akanya.” Morago ga go aloga kgaitsadi yono o ne a bulatsela ka nakwana, mme morago ga foo o ne a tsenelela bodihedi jwa bobulatsela jwa ka metlha. Ka bokhutshwane fela morago ga foo, o ne a bona tiro ya boitshediso e e tshwanetseng e e neng e mo letlelela go dira tiro ya bobulatsela.

Mogolwane mongwe, yoo mosadi wa gagwe o neng a le mo tirelong ya bobulatsela ebile e le yo o neng a godisa bana ba babedi, o ne a ikutlwa gore o ne a tshwanetse go dira mo go oketsegileng go na le gore a tlamele fela lelapa la gagwe ka madi. Go babogedi bangwe, maemo ao a neng a mo thibela go dira tiro ya bobulatsela a ne a lebega a sa kake a fenngwa, mme lefa go le jalo o ne a eletsa go oketsa bodihedi jwa gagwe. Ke eng seo se neng sa tshwanela go fetolwa?

“Ke akanya gore sekgoreletsi se segolo seo ke neng ka tshwanelwa go se fenya e ne e le nna ka bonna,” o bolela jalo. “Bodihedi jwa tshimo e ne e le sengwe seo ke neng ke se ipelela ka metlha, mme fa ke ne ke buisana le badiredi ba nako e e tletseng mme ke bona mas ego a bone, ke ne ka tsenwa ke moya wa bone o o molemo. Ke ne ke ipona ke le mo bodiheding jwa nako e e tletseng ka letsatsi lengwe. Bothata jwa go akanya ga me e ne e le gore go bulatsela e ne e le selo seo ke neng ke akanya fela kaga sone. Mme ke ne ke ise ke tlhome letsatsi leo ke neng ke batla go simolola mokgele oo ka lone.”

Morago ga go akanyetsa seo ka thapelo, mokaulengwe yono o ne a simolola go berekela mokgele wa gagwe wa tirelo ya nako e e tletseng. O ne a atamela mogolwane wa gagwe kwa tirong, a mo tlhalosetsa maikaelelo a gagwe, mme a kopa gore a letlelelwe go bereka dioura di sekae fela beke le beke. Fa e le ka molao wa khampani eo, thulaganyo ya mofuta oo a neng a o batla e ne e ise e ko e diragale.

O tswelela jaana: “Mogolwane wa me o ne a digela puisano ya rona ka go bolela gore ga go bonale ke tla bona thulaganyo eo ke neng ke e kopa. Ke ne ke tlhomamisega sentle gore fa e le gore phetso e ne e tla dirwa ke ene a le nosi, karabo e ne e tla nna nnyaa. Jalo go amogelwa ga thulaganyo eo e ne e tla nna fela ka thuso ya ga Jehofa. Morago ga beke le sephatlo, tumelelo ya thulaganyo ya me e ntšha e ne ya tla e tswa kwa go ba khuduthamaga. Morago ga ke sena go leboga mogolwane wa me, ke ne ka tswa ka ya kwa kareng ya me, ka kgweetsa sekgala se se seng kalo, ka ema fa thoko ga tsela, mme ka leboga Jehofa le go anaanela. Ee, ke ne ke tla fitlhelela mokgele wa me wa tirelo ya nako e e tletseng.”

Kgaitsadi mongwe yo o nyetsweng o ne a “sutisa” thaba ya gagwe jang? O anela jaana: “Ke na le bana ba bane le monna yo o sa dumeleng. Fa ke ne ke simolola go akanya kaga bobulatsela, ke ne ke na le dikgoreletsi di le mmalwa. Selo sa ntlha ke gore, monna wa me o ne a bereka ka nakwana, ereka tiro ya gagwe e ne e sa nne ka dinako tsotlhe, ke ne ke bereka ka nakwana go mo thusa go duelela dikoloto. Jalo ke ne ka ithaya ka re lemororo ke na le keletso, ga ke kake ka kgona go bulatsela ka baka la maemo a me. Lefa go nt se jalo, fano e ne e le gone fa ke neng ke tshwanetse go fetola go akanya ga me gone. Ke ne ka lemoga gore fa ke nnela go akanya gore ga ke kake ka kgona, ke ne ke se kitla ke dira boiteko jwa go leka. Potso e nngwe ya botlhokwa eo ke neng ka tshwanelwa ke go e araba e ne e le gore, Ke tla tsaya kae nonofo ya go bulatsela? Ke ne ka bona karabo mo go Bafilipi 4:13. Ke ne ka seka ka rapela Jehofa go le gosi kaga kgang eno mme ke ne ka simolola go ikaega fela thata ka ene. Gape ke ne ka tsaya dikgato tse di bonalang tsa go fitlhelela mokgele wa me ka go rulaganya thulaganyo e e molemo le go tsenelela bobulatsela jwa nakwana. Fa nako e ntse e tsamaya, Jehofa o ne a nna a mpulela tsela ya go tsenelela tirelo ya bobulatsela. Monna wa me o ne a kgona go boela kwa tirong, ke ne ka kgona go fokotsa tiro ya me ya nakwana e le gore ke bereke letsatsi le le lengwefela ka beke. Go ise go ye kae morago ga seno, ke ne ka nna mmulatsela wa nako e e tletseng.”

Mo godimo ga moo, o ne a bulegelwa ke tshiamelo ya go nna teng kwa Sekolong sa Tirelo ya Bobulatsela, seo e neng ya nna thuso e kgolo fela thata mo bodiheding jwa gagwe. “Ke batla fela go bolelela mongwe le mongwe yo o akanyetsang go bulatsela go rapela Jehofa le go go tlogela mo diatleng tsa gagwe,” o bolela jalo. “Go tswa foo o dire boiteko, mme o tla go segofaletsa go iteka ga gago.”—Pesalema 37:5.

A maitemogelo ana ga a go thuse go bona kafa tumelo fa e dirisiwa e ka thusang Mokeresete go fenya dikgoreletsi tsa seka-dithaba ka gone? Ka gone, fa e le keletso ya gago go bulatsela, sekaseka maemo a gago. Bua le ba bangwe bao ba bulang tsela, mme o ithute mo maitemogelong a bone. Tsaya dikgato tse di bonalang tsa go fitlhelela mokgele wa gago. Mo godimo ga tsotlhe, rapela Jehofa kaga keletso ya gago; go tswa foo o bo o ikaega ka ene gore a sogofatse maiteko a gago. Ee, wena le wena oka sutisa dithaba!