Dipotso tse di Tswang go Babadi
◼ A Jehofa o dirisa tsietso kana boferefere mo bathong, go kopanyeletsa le batlhanka ba gagwe, jaaka Yeremia 4:10 le 20:7 e utlwala ekete e akantsha jalo?
Nnyaa, Mmopi ga a boferefere, ga a fapose dilo, kana go nna bomenemene mo ditirisanong tsa gagwe. Lefa go le jalo, o ka ebile o kgona go fitlhelela go rata ga gagwe go go leng tshiamo go sa kgathalesege gore batho bone ba ka lebelela eng.
Re bona ntlha nngwe ya seno go tswa go Yeremia 4:10, koo moperofeti yoo a neng a re: “Ao, Yehofa Modimo! Rure ua bo u tsieditse chaba e thata, le Yerusalema, ua re, Lo tla bōna kagishō; ecwa chaka e tsenetse mo moeeñ.”
Jehofa o ne a dirisa Jeremia go bolelela pele masetlapelo a a neng a tlela morafe oo wa diganana o o neng o tshwanetse wa bo o ne o Mo direla. (Yeremia 1:10, 15-19; 4:5-8; 5:20-30) Lefa go le jalo, go ne go na le bangwe ba ba neng ba iphaka gore ke baperofeti. (Yeremia 4:9) Batho ba ne ba utlwa eng go tswa go ba go neng go twe ke baperofeti? Modimo o ne a bua ka seo ka tsela eno: “Baperofeti ba perofesa ka maaka . . . me batho ba me ba rata gore go nnè yalo.”—Yeremia 5:31; 20:6.
Lefa Jehofa a ne a sa roma baperofeti bao ba maaka, ga a ka a ba thibela go anamisa melaetsa e e tshwanang le eno: “Lo tla bōna kagishō” le “Ga go na boshula bopè yo bo tla tlañ mo go lona.” (Yeremia 23:16, 17, 25-28, 32) Batho ba ne ba tshwanetse go tlhopha—go amogela dipolelelopele tse di thata mme e le tsa boammaaruri tse di neng di tla ka Jeremia kana go itetla go timediwa ke baperofeti ba maaka, ba ba itlhomileng, ba ba jaaka Hanania le Shemaia. (Yeremia 28:1-4, 11; 29:30-32) Go bo Modimo a se kile a thibela baperofeti bano ba ba timetsang, go ka nna ga buiwa jaana ka ene: “U tsieditse chaba e thata, le Yerusalema, ua re, Lo tla bōna kagishō; ecwa chaka e tsenetse mo moeeñ.”
Ka tlhaloganyo e nngwe, Jeremia o ne a tsieditswe. “Yehofa, u nphepisitse, me ka hepisèga: u thata bogolo go nna, me u hentse: ke dule setshègō sa motshegare otlhe, moñwe le moñwe oa nchotla.”—Yereima 20:7.
Pashure, moperesiti yo mogolo, o ne a itaya Jeremia batho ba mo lebile mme a mo tsenya mo dikoteng. Fa re lebelela ka pono ya batho, Jeremia o ka bo a ne a ikutlwa gore ga a sa tlhole a kgona, gore o ne a sa tlhole a na le nonofo ya go tswelela pele a lebane le kganetso, go ganwa, go sotlwa, le go itewa mo mmeleng. Mme go ne go sa nna jalo. Jehofa o ne a dirisa nonofo ya Gagwe kgatlhanong le, (kana phapaanong le) tshekamelo ya ga Jeremia ya botho. Modimo o ne wa tsietsa Jeremia ka go bo O ne wa dirisa monna yono yo o sa itekanelang go fitlhelela seo moperofeti a neng a ka seka a se dira ka nonofo ya gagwe. Lefa Jeremia a ne a ka tswa a tsieditswe kana a gakgamaditswe ke seno, go ne ga felela ka molemo: Ba ba neng ba mmogisa ba ne ba tlhabisiwa ditlhong, mme molaetsa wa Modimo o ne wa bolelwa.—Yeremia 20:11.
Jalo, fa re tlhaloganya Yeremia 4:10 le 20:7 go ya ka ditemana tse di di dikologileng, di dumalana le konelo eno ya ga Elihu: “Modimo ga o ketla o diha ka mokgwa o o boshula, le gōna Mothataeotlhe ga a ketla a shōkamisa katlholō.”—Yobe 34:12.