Dithuto Go Tswa mo Dikwalong: Malaki 1:1–4:6
Morena wa Boammaaruri O A Tla go Tla go Atlhola
“KE LEHÈLA go dihèla Modimo.” (Malaki 3:14) Go tlhoka tumelo mo go ntseng jalo go ne ga bolelwa ke batho ba Modimo ka sebele fa Malaki a ne a perofesa mo lekgolong la botlhano la dingwaga B.C.E. Ka ntlhayang? Ka ntlha ya gore go ne go na le maemo mangwe a a maswemaswe ao a neng a le gone mo Juda, segolobogolo mo gare ga baperesiti. Boikaelelo jwa bone jwa konokono e ne e le gore ba bone morokotso ka bogagapa. Malaki o ne a senola baeteledipele ba ba ntseng jalo ba ba boitimokanyi ba bodumedi a bo a ba tlhagisa ka gore Morena wa boammaaruri o ne a tlile go tla go ba atlhola, Malaki o ne a ba tlhagisa ka tlhamalalo le ka maatla.—Malaki 1:6-8; 2:6-9; 3:1.
Boperofeti jwa ga Malaki bo a diragadiwa mo motlheng wa rona. Ka gone, re tla bo re dira sentle fa re sekaseka dithuto tseo e nang le tsone.
Go Nyatsa Leina la Modimo
Jehofa o lebeletse gore batho ba gagwe ba mo neele bojotlhe jwa bone. Santlha Modimo o bontsha lorato lwa gagwe mo bathong ba gagwe. Lefa go ntse jalo, baperesiti ba nyatsa leina la gagwe ka go amogela diphologolo tse di foufetseng, tse di lwalang, le tsa digole go tswa mo bathong go dira setlhabelo ka tsone. Jehofa ga a kgatlhegele baperesiti bano bao go itšhebileng bone fela le gone ga a kgatlhegele ditlhabelo tsa maemo a a kwa tlase tse di mo diatleng tsa bone. Mme go sa kgathalesege gore ba dirang, leina la ga Jehofa “le a boitshèga mo meraheñ.”—1:1-14.
Bao eleng barutisi ba na le boikarabelo jo bo boima. (Yakobe 3:1) Baperesiti ba “kgopisitse batho ba le bantsi mo molaoñ.” Jang? Ka go palelwa ke go ruta batho molao wa Modimo le ka go tlhaola batho. Jehofa o ba galefetse ka tshwanelo, “gonne dipounama tsa moperisiti di chwanetse go tshegetsa kicō, me batho ba chwanetse go botsa molaō mo molomuñ oa gagwè.”—2:1-9.
Jehofa ga a itlhokomolose bao ba bontshang lonyatso mo thulaganyong ya lenyalo. Go fapaana le molao wa Modimo, banna ba Juda ba itseetse basadi ba seeng. (Duteronome 7:3, 4) Ba dirisana le basadi ba bosha jwa bone ka bolotsana ka go ba tlhala. Jehofa o “ila tlhalō,” Malaki o tlhagisa jalo.—2:10-17.
Katlholo Le Go Itshekisiwa
Jehofa ga a letlelele phoso gore e nne teng go ya go ile. “Morena wa boammaaruri” o tla tla mo tempeleng ya gagwe, a patilwe ke “moroñwa oa kgōlaganō.” O tla itshekisa barwa ba ga Lefi le go ba phepafatsa. Jehofa o tla fetoga mosupi wa ka bonako kgatlhanong le baloi, baakafadi, bao ba ikanang ka maaka, batsietsi, le bagateledi.—3:1-5, NW.
Bao ba ganelang Jehofa ka ditlhabelo tsa bone ba a ikhumanegisa ka namana. Jehofa ga a fetoge. Fa batho ba diganana ba boela kwa go ene, o tla boela mo go bone ka kutlwelobotlhoko. Ba tsieditse Modimo ka go mo ganela ka ditsabosome le meneelo. Mme fa ba tlisa ditsabosome, Jehofa o solofetsa gore o tla ba naya lesego “ye go se ketlañ go na le bonnō yo bo lekanyeñ go le baea.” Ba tla bona maungo ao a se keng a tlhaela go nna gone le ka motlha.—3:6-12.
Matlho a ga Jehofa a mo bathong ba gagwe. Modimo o sekisa bao ba buang mafoko a a thata kgatlhanong le ene. Go farologana le seo, o tlhokomela thata bao ba mmoifang. “Lokwalō loa segopodishō” lo tla kwalelwa ba ba “akanyañ ka leina ya gagwè.” Batho ba gagwe ba tla bona pharologano magareng ga ba ba siameng le ba ba boikepo.—3:13-18.
Letsatsi la ga Jehofa Le A Tla!
Letsatsi la ga Jehofa le tla bolela go nyelediwa gotlhelele ga baikepi. Letsatsi la ga Jehofa le a tla, mme baikepi ba tla lailwa jaaka dirini mo leisong la boubelo. Ba tla nyelelediwa ruri, ba sa tlogele ‘modi lefa e le kala.’ Fa e le ka bao ba boifang leina la ga Jehofa bone, ba tla ipelela melemo ya go fodisa ya “letsatsi ya tshiamō.” Pele ga letsatsi leno le le boifisang le tla, Jehofa o tla romela Elija ebong moperofeti gore a dire tiro ya go tsosolosa.—4:1-6.
Seo re se ithutang go tswa mo go seno gompieno: Malebana le kobamelo, Jehofa o batla gore batho ba gagwe ba mo neele bojotlhe jwa bone. (Bapisa Mathaio 22:37, 38.) Bao ba rutang Lefoko la Modimo ba na le boikarabelo jwa gore ba laye ba bangwe ka tshwanelo le go ba etelela pele mo kobamelong ya boammaaruri. Re tla bo re dira sentle fa re gakologelwa gore matlho a Modimo wa tshiamo a bona bao ba palelwang ke go tlotla lenyalo le bao ba kopanelang mo go direng phoso. Ekete re ka ineela ka boikokobetso mo tirong ya go itshekisiwa le go phepafadiwa ya Morena wa boammaaruri fa ka tlhoafalo re ntse re letetse “motlha o mogolo le o o boitshègañ oa ga Yehofa . . . [gore] o tle”!
[Lebokoso mo go tsebe 30]
DITEMANA TSE DI TLHATLHOBILWENG TSA BIBELA
○ 1:10—Baperesiti ba ba bogagapa, ba ba bolaetsweng madi ke tlala ba ne ba direla gore ba bone morokotso ka namana. Ba ne ba batla tuelo le eleng mo ditirong tse dinnyane fela tsa kwa tempeleng, tse di ntseng jaaka go tswala dikgoro kana go gotsa molelo wa sebeso. Ga go gakgamatse go bo Jehofa ‘a ne a sena kgatlhego mo ditshupelong tseo di neng di le mo diatleng tsa bone’!
○ 1:13—Baperesiti bano ba ba neng ba sena tumelo ba ne ba leba ditlhabelo jaaka tiro e e lapisang, jaaka morwalo. Ba ne ba nyatsa dilo tse di boitshepo tsa ga Jehofa, ba di kgala. Le ka motlha ga re a tshwanela go letlelela gore “chupèlō ea melomo ea rona [e e] yaka . . . dikgomo” e neelwe jaaka seomodiro fela!—Hosea 14:2; Bahebera 13:15.
○ 2:13—Banna ba le bantsi ba Bajuda ba ne ba tlhala basadi ba bosha jwa bone, gongwe e le gore ba ke ba nyale basadi ba ba saleng basha ba baheitane. Sebeso sa ga Jehofa se ne sa tlala ka dikeledi—go bonala e ne e le tsa basadi bao ba neng ba latlhilwe bao ba neng ba tla mo sebesong go tla go tshololela khutlobotlhoko ya bone fa pele ga Modimo.—Malaki 2:11, 14, 16.
○ 3:1—“Morena wa boammaaruri” ke Jehofa Modimo, mme “moroñwa oa kgōlaganō” ke Jesu Keresete. Boperofeti jono bo ne jwa diragadiwa ga ntlha ka nako ya fa Jesu a ne a phepafatsa tempele. (Mareko 11:15-17) Seno e ne e le dingwaga di le tharo le sephatlo morago ga a sena go tlodiwa jaaka Kgosi E E Tlhophilweng. Ka mo go tshwanang, dingwaga di le tharo le sephatlo morago ga gore Jesu a tlhongwe mo setulong sa bogosi jaaka Kgosi ka dikgakologo tsa 1914, o ne a pata Jehofa go ya kwa tempeleng ya semoya mme a fitlhela batho ba Modimo ba tlhoka go itshekisiwa le go phepafadiwa.
○ 3:2, 3—Go itshekisiwa ga bogologolo go ne go tsaya nako e telele. Ka gone, moitshekisi gantsi o ne a “dula,” a letile go fitlhela tshipi eo e e gakologileng e nna jaaka seipone seo se phatsimisitsweng thata mme a ka kgona go ipona mo go yone. Ka mo go tshwanang, Jehofa o tswela pele go itshekisa batho ba gagwe gompieno, a tlosa dithuto tse di seng phepa le ditlwaelo tse di seng phepa. Seno se ile sa ba thusa gore ba bontshe setshwantsho sa gagwe ka tshwanelo go ya pele.—Baefeso 5:1.
○ 4:2—Fano go tlhalosiwa masego a mo isagweng ao a tlileng go ipelelwa ke bao ba boifang leina la Modimo. Ba na le tebelelo ya go kalapa mo letsatsing la go ratwa thata ke Modimo ka nako eo malwetsi ao a bogisang lelapa la batho mo mmeleng, mo tlhaloganyong, le mo maikutlong a tla bong a fodisitswe ka yone.—Tshenolō 21:3, 4.
○ 4:5—Moperofeti Elija o ne a tshela dingwaga di ka nna 500 pele ga boperofeti jono bo neelwa. Mo lekgolong la ntlha la dingwaga C.E., Jesu Keresete o ne a bolela gore Johane Mokolobetsi e ne e le ene setshwani se se neng se boleletswe pele sa ga Elija. (Mathaio 11:12-14; Mareko 9:11-13) Lefa go ntse jalo, “Eliya” o ne a tla tla pele ga “letsatsi ya ga Yehofa” mme a bolela ka lone, eleng seo se supang go diragadiwa go gongwe ga seno mo motlheng ono wa “go tla” ga ga Keresete.—2 Bathesalonia 2:1, 2.
[Setshwantsho mo go tsebe 31]
Ka nako ya bodihedi jwa ga Jesu jwa mo lefatsheng, o ne a phepafatsa tempele. Ka 1918 o ne a pata Jehofa go ya kwa tempeleng ya semoya go ya go phepafatsa batho ba Modimo