Nna Gone kwa Kopanong ya Kgaolo ya “Puo e e Itshekileng”

GO FAROLOGANA ka puo e ile ya nna selo se se kgaoganyang batho fa esale go tloga kwa Babele. Gone koo Jehofa o ne a tlhakatlhakanya puo ya batho mme a dira gore boikaelelo jwa batho jwa go ‘ikagela kago e e godileng le go itirela leina’ bo retelelwe. (Genesise 11:4) Go bona ka moo go farologana ka puo go ka kgaoganyang batho ka gone go ka bonwa mo go seo se neng sa diragala kwa Belgium. Dingwaga di sekae tse di fetileng, Yunibesithi ya Katoliki ya kwa Louvain e ne ya kgaoganngwa ka bogare go ya ka dipuo.

Puo ke le le lengwe fela la mabaka a go bo batho ba kgaogane jaana. A mangwe ke bomorafe, lotso, thuto, le maemo a tsa ikonomi. Mme lefa go ntse jalo Basupi ba ga Jehofa ba ile ba berekela go fenya dilo tseno tse di kgaoganyang batho mme ba seoposengwe eletota.

Selemo se se fetileng se ne sa bona go nna seoposengwe gono go bontshiwa ka tsela e e gakgamatsang kwa metseng ya Chorzów (gaufi le kwa Katowice), Poznan, le Warsaw kwa Poland. Go ne go na le Basupi bao ba buang dipuo di ka nna 20 tse di farologaneng, go tswa kwa mafatsheng a ka nna 37. Lefa go ntse jalo, botlhe ba ne ba bontsha go nna seoposengwe ka tsela e e gakgamatsang. Ke eng seo se neng se dira gore ba dire jalo? Botlhe ba ne ba bua “puō e e itshekileñ” ya boammaaruri jwa Dikwalo. Seno se ne sa bolelelwa pele ka tsela ya boperofiti mo go Sefania 3:9: “Hoñ ke [Jehofa Modimo] tla hetolèla dichaba puō e e itshekileñ, gore ba bitsè leina ya ga Yehofa, go tla ba mo dihèla ka tumalanō e le ñwe hèla.”

Ka jalo, go a utlwala go bo dikopano tsa kgaolo tsa ka 1990 di tlile go nna le setlhogo se se reng “Puo E E Itshekileng.” Ka ntlha ya go sa itekanelang ga motho, ditlhotlheletso tse di tswang mo lefatsheng le le boikepo la ga Satane, le ditiro tse di boferefere tsa ga Diabolo mmogo le badimona ba gagwe, go bua “puo e e itshekileng” ga go itlele bonolo fela ka metlha. Ka metlha re tshwanetse ra itlhokomela kgatlhanong le mekgwa ya bogagapa eo e ka nnang ya re kgaoganya.

Ke ka ntlhayang fa Modimo o re neile puo eno e e itshekileng? E le gore re ke re kgone go direla Jehofa ka “tumalanō e le ñwe hèla.” Dithanolo tse dingwe di bontsha gore seno se raya gore re direle Modimo “kafa tlase ga jokwe e le nngwe fela” (The Jerusalem Bible); “ka bongwe fela” (Moffatt); “re le seoposengwe” (An American Translation); le go “dirisana mmogo mo tirelong ya gagwe.”—Byington.

Go dirisiwa dipuo, dipontsho, maitemogelo, disimphosiamo, le diterama tsa Bibela kwa dikopanong tseno, re tlile go kgothadiwa le go tlhotlhelediwa gore re bue puo e e itshekileng kwantle ga bothata bope. Gape di tla re tlhotlheletsa gore re direle le bakaulengwe ba rona ka katlego le ka kutlwano go ya pele.

Dikopano tseno di tla simolola ka Labone ka bonakonyana fela morago ga 1:00 p.m. mme di tla konelwa mo e ka nnang ka 4:00 p.m. ka Sontaga. Dira dithulaganyo jaanong gore o nne gone fa go opelwa pina e e simololang le gore o nne gone mo dikarolong tsotlhe go fitlhela ka thapelo e e konelang ka Sontaga thapama.

Tlang le Dibibela tsa lona le dikopelo tsa lona, mme lo nne lo ipaakanyeditse go kwala dintlha. Tlang gape lo na le keletso e e molemo ya dijo tsa semoya, mme lo tla tsamaya lo iketleeleditse ka botlalo ka mo go oketsegileng go bua puo e e itshekileng le go direla Jehofa.